الى رجاله المنتدى حتى الاربعين عاما... ما هى اجمل فتره مرت به مصر من وجهه نظرك؟؟

[M.ABDOU]

اولا قبل اى حاجه لماذا حددت من رجاله المنتدى حتى 40 سنه

السبب ببساطه انا كنت عاوز اعرف رارء مواليد الثمانياات واواخر السبيعنيات

اللى هما دلوقتى فى اواخر الثلاثنيات او الاربعين عاما


اللى فعلا منتظر منهم انهم انهم يقودوا البلد دى ان شاء الله الفتره المقبله ومنهم حيكون رئيس قادم ان شاء الله

من وجهه نظرى انا كنت شايف ان الفتره الذهبيه لمصر كانت فتره التسعنيات

كانت البلد ازهى عصر اقتصادى

كانت مصر مستقره جدااا جداااااااا

كانت البلد لا يوجد بها اى انقسامات داخليه او توجهات مختلفه بتخلى الناس تكره بعضها علشان اختلاف الراى السياسى فقط

ومكانش فى استفحال زى دلوقتى فى تدنى الاخلاق والسفور فى الملابس ولا الدعاره اللى بنشوفها دلوقتى فى الشارع او التليفزيون

بس راجعت نفسى كده شويه لاقيت ان الفتره دى التسعينات بالذات حصل فيها حاجات غيرت مجرى تاريخنا لحد الان وكان فيها اتزرع بدزر الشر اللى بنجنى حصادها لحد الان


فيها كان انضرب العراق من اسرائيل بضرب المفاعل النووى

فيها كانت حرب الكويت وابتدت العراق تحاصر وخسرنا اكبر ثانى قوه عربيه فى المنطقه ودخلت امريكا الشرق الاوسط

فيها كان ظهور ما يسمى بالجماعات الاسلاميه الجهاديه واثارها الجانبيه على الامن العام واختلاف نظره الناس لاى سمت اسلامى

فيها تم دخلول الانترنت مصر

فيها اول شبكه محمول انشأت فى مصر



انت بقى ايه رايك انهى فتره فى مصر من وجهه نظرك كانت الذهبيه

[حسام الغرباوي]

انا مش في الاربعينات او حتى الثلاثينات ...لكن كقرائة للواقع ...من عام 85 لحد اواخر التسعينات ..وقبل تدخل اسرة مبارك في الحكم وسيطرة الحزب الوطني ورجال الاعمال

[rotanamasoud]

تسعينيات جنزوريات افضل فتره لمصر ولمبارك كان فيها نهوض اقتصادى وكنا قوه صاعده ثم عاطف عبيد وبقينا قوه نازله

[mmtronic]

افضل سنين العمر فى مصر من 85 الى 99

فى هذه الفتره كانت البلد هادئه و جميله - الناس كان ليسه عندها اخلاق و كان فى رحمه و شهامه و مرؤه

كان فيه امان لان كان فيه ايمان ) انا اقصد الامان بين الناس و بعضها ) كان ليسه فى حاجه اسمها ضمير

[hugan]

اقتصاديا من 2000/2010
الفتره ده اكبر فتره شغل بجد واللي ماكاتش معاه فلوس عمل فلوس
اجتماعيا 85/2000
مبارك كان شغال بجد

لكن مع بدء ظهور عصابه جمال اوائل اﻻلفينات
وشيخوخه مبارك
بداء اﻻنهيار

[Bassem Youssef]

مع اني 28 سنه فقط بس حضرت شويه احداث حلوه

يعني علي سبيل المثال

1- الشقه ام 30 الف سنه 1993 اللي اشتراها الوالد بالتقسيط و اياميها اللي كان معاه المبلغ ده كان ملك زمانه

2- المحل ابو 10 الاف جنيه برضه سنه 1993 و اتباع دلوقتي ب 350 الف جنيه

ياريت الحاج اشتري كام محل كمان :)))

3- لما امريكا اتضربت سنه 2001 و منساش اندهاش والدي ساعتها ان ده يحصل في امريكا

دلوقتي عرفنا ان امريكا مجرد بلونه مليانه رز و عماله تشخشخ و توجع دماغنا :)))

4- لما امريكا دخلت العراق سنه 2003 بحجه السلاح الكيماوي و الهجص ده

دلوقتي عرفنا ان اي حرب هتقوم يا اما عشان البترول يا اما عشان الميه غير كده هبل في الجبل

5- الموبايل النوكيا القذر ابو ايريال ابو 1200 جنيه سنه 1998 و اللي كان معاه ساعتها كأنه امتلك صاروخ هيدروجيني

6- انا شخصيا لما الحاج اعطاني الهاتف القذر ابو ايريال سنه 2001 و كنت هموت من الفرحه ساعتها

لو افتكرت حاجه تانيه هقولها :)))

[yaserbasha2000]

للاسف الفرحه في مصر بتتقاس باللحظات

فبراير 2011 هي اكتوبر 73 بتاع الجيل اللي قبلنا و سبحان الله الاتنين السياسه بوظت فرحتهم و الاستفاده منهم اقتصاديا و اجتماعيا

[sfahmy6]

من وجهة نظر مبسطة
أعتقد أنه يوجد تناقض في عنوان الموضوع. ........؟

فمن يتحدث عن النهضة الاقتصادية. ...أو نجاح تجارة أو استثمار. ........إنما هو عبارة عن تااااااااااريخ ......يعني اللى المفروض يخشى يتكلم في الموضوع ده يبقى فوق ال 60 ونت طالع........ وقاعد في البيت حاطط رجل على رجل .......ويقول يااااااااه فين ايام زمان


زى الراجل بتاع .....اسكنشايزر ......هههههههههه ...اللى بيحلم


إنما إلى تحت 40 ....ده لسه مؤسس أسره من 10 . 15 سنه ............


وحضر أسوأ عصور ماااااااسر على الإطلاق. ..فى فترة حياته يعنى



المشكلة بقى انه الفئة بتاعة فوق ال 50 و 60 ........تقريبا اخدت فترة طويلة بتاع 30 40 سنه .....رعب وذل وهوان. ..ومواجهة مصاعب الحياة. ...اللى حطها قدامهم الجلاد بتاعهم. ........فأصبحوا .........لا يتحدثون إلا هوانا. .........





ملحوظة. ....
يحكى البعض. .....وليس رأى الشخصي. .... إن بداية حكم مبارك. .. أول 10 سنين ....كانت بداية نهضة. ...وكبارى وطرق ومشروعات وكده ..........

بس ده يمكن تفسيره بأنه اللى ماسكين البلد كانوا لسه مخلصين على قائد منتصر فى 73 الوحيد اللى لبس إسرائيل طرحه ....وكان ناوي يلبسهم طرح هوا كمان. ....بس هما اللى خلصوا عليه الأول

فكان لازم يدفعوا شوية علشان الشعب الغلبان يأكل الطعم .......زى ما بيحصل كل مرة
زى ما كان متخيل انه فى انتخابات و مرسى هيمسك الحكم وكده. ......هههههههههههههههه

وفى الاخر بياخد على قفاه. ...زى كل مرة؟ .........ودى نتيجة متوقعة للجهل
علشان كده اى ديكتاتور أهم حاجة عنده انه يحافظ على حاجتين، .....الجهل والمرض

وأبقوا قابلونى لو البلد نضفت من غير ما يكون فيها جهل أو مرض
هذا والله اعلم

[msobhy]

انا مواليد 78
اكبر فتره استمتعت فيها بمصر وكنت شايف البلد حلوه من سنة 1997 لغاية 2002

اقتصاديا يوجد تضارب فى الاراء لكن الاغلبيه اللى حسوا بتطور ممكن نقول ملموس فى البلد من سنة 2003-2004 وحتى 2007-2008 وانا من الناس ديه

على الصعيد الشخصى بدأت احس ان احد الاسباب الرئيسيه لتقدم البلد هو توحش بعض رجال الاعمال وعائلة مبارك لدرجة انهم بقوا متشبعيين زيادة عن اللزوم وبقى المهم بالنسبه لهم الشكل العام لبلدهم ولشعبهم ورفضهم ان اى حد يكبر جنبهم تانى
بمعنى مبقاش فارق الفلوس قد ما فارق المظهر
وبصراحه مع كرهى الشديد لمبارك ومن حوله - لكن لو مبارك كان كمل وجمال مسك وراه اعتقد اننا كنا هانوصل لمرحله احسن بكتيييييييييييييييييير من اللى احنا فيه دلوقتى - مجرد وجهة نظر وجود كلب ضخم ومخلف كلاب ضخمه كان مخوفنا لكن فى نفس الوقت كان مريحنا من الكلاب البلدى الصعرانه

اخيرا حلمى يوم بعد يوم انى اهاجر ونفسى اخد الماستر بتاعتى قبل الهجره وقبل ما اتنيل اوصل لسن ال 40

وجهة نظر تانيه خالص
من سن 17-20 كنت فاقد للهدف وعايش اليوم بيومه وبجد كنت مقضيها
20-25 بداية النضج الحقيقى وفى نفس الوقت صحيا ديه احسن فتره فى حياتى وان كنت بطلت رياضه تماما فى الفتره ديه
25-30 بداية التخبط فى حياتى والاراء الخاطئه وعلى رأسها الزواج
30- وحتى الان ---- الاحساس بأن الواحد كبر وبدأت أحس انى زى اى شخص عادى (انا كنت رياضى بشكل عنيف شويه وانا صغير) صحيا بقيت فى النازل - بدأت افقد الامل تماما فى البلد ان حالها يتصلح - اكتشفت انى جاهل بشكل محرج واكتشفت برضو ان اللى حواليه اكثر من جهل لكن الفارق بينى وبينهم انى عرفت انى جاهل وهما مازالوا معتقدين بأنهم عباقره
لاقيت نفسى فى القراءه خصوصا فى التاريخ والاقتصاد
بعد ما كنت مش بقرأ اى حاجه اكتر من 3 أسطر - دلوقتى بقيت مدمن المقالات خصوصا المنقوله عن مفكرين غير مصريين اللى توازى صفحتين تلاته
اكتشفت ان التعليم المصرى على ايامى كان بلح وفى الوقت الحالى مفيش تعليم اساسا - لكن برضو اكتشفت ان فيه تعليم بجد فى مصر وعلى مستوى راقى جدااااااااااا ولكن تكلفته مهوووووووووووووووله لدرجه مفزعه - لدرجة انك ارخص لك بكتير انك تسافر اوروبا او امريكا تتعلم هناك وبنفس المستوى والجوده

جيل السبعينات مظلوم حتى النخاع
جيل من باب الصدفه انه تعامل مع عقليات ضايعه واضطر انه يتماشى معاها - وبداية التطور الحقيقى للجيل الحالى مواليد الثمانينات والتسعينات اللى اغلبهم بدأ حياته بشكل اصطناعى وليس حقيقى ومتخيل انه عايش حياته وانه صح فى كل حاجه
يعنى ببساطه اللى اكبر مننا مطلعين عينينا واللى اصغر مننا فاقعين مررارتنا

[amr011111]

افضل فتره فى مصر من اواخر السبعينات لحد 2000
ومن بداية الانفتاح الفضائى وانتشار الدش وافلام الروشنه ( كامننا والكلام ده ) فبدات اجيال جديده تطفو على السطح

[ahmedsl]

السلام عليكم ورحمة الله وبركاته

بداية انا من مواليد 81

من اللى قريته وسمعته وحسيت بوجوده اقدر اقول ان الفترة من منتصف ال80 الى اواخر ال90 كانت فترة انتعاش حقيقى للبلد فى ظل وجود ثوابت دينية واخلاقية + رغبة تطوير او نهوض بالبلد
مش هنقول مكنش فيه سفالة وقلة ادب لا كانوا موجودين ولكن مكنش فى مجاهرة بيهم زى الوقت الحالى
مكنش فيه اغتصاب وسرقة بالاكراه وخطف زى الوقت الحالى
كان فى رشوة بس مش عينى عينك
كان ممكن تاخد حقك مع مرور الوقت وساعات بالحسنى لكن حاليا لازم الواسطة او الرشوة او لا يوجد لك حق
ولذلك اقدر اقول ان اغلب ان لم يكن كل الاسباب مترتبة على الدش اللى مكنش موجود غير عند قلة قليلة لغلو سعره وفجاة بقى عند كل الناس لرخص تمنه + طبعا الانترنت والسواد المنيل بهباب اللى جاى من وراه لدرجة ان فى ناس بتجيب النت مخصوص لكده + كذلك انتشار المحمول واستخدامه فى غير استخداماته المفيدة

اقتصاديا ممكن نزود الفترة الى 2006-2007 يعنى بعد تعويم سعر الصرف ب 3 او 4 سنين
وفعلا اللى كان عاوز يعمل فلوس فى الفترة دى عملها
والبلد كان فيها شغل ووظائف حكومية مش زى دلوقتى اللى مش عاجبه يجيب توك توك يشتغل عليه قال يعنى التوك توك ببلاش ما هو اصلا بفلوس واللى معاه تمنه ما يفتح محل او مشروع صغير اكرم له واكتر امانا من التوك توك

للاسف الاجيال اللى موجودة دلوقتى وتحديدا من مواليد اواخر ال80 الى الان تحس انهم بدون هدف او وعى اخلاقى او دينى ومفيش عندهم قيم يمشوا عليها علشان ينهضوا بالبلد - الا فئة قليلة علشان مكنش ظلمت الكويس منهم

على العموم دى راى الخاص واسف للاطالة
معليش اصل الحال يخنق والوضع من سىء الى اسواء
ولكن يبقى التفاؤل ان يجعل الله خيرا فى امرنا وفى حالنا

[Ahmedmiy]

بسم الله الرحمن الرحيم

الحمد لله والصلاة والسلام على رسول الله نبينا محمد خير خلق الله

ما شاء الله موضوع جميل
اسمحوا لى اشارك معاكم واضح ان الاغلبية بتحسب الموضوع حساب الحالة الاقتصادية اذا كانت كويسة او لا والحقيقة ان احنا مش حنعبد الفلوس اه هي مهمة بس لازم يكون مصدرها بشكل طبيعي من خلال العمل والانتاج وتبادل المنافع بين الناس

عنوان الموضع نفسه دليل ان فيه خلل او مشكلة وكمان التعليقات

فممكن محاولة التلخيص والتدقيق وده امر مفروض تكون فيما يلي

ايه هى اهمية مصر بالنسبة للعالم

الانترنت الحاجة الوحيدة الى بترخص وبالتاكيد ممكن ترخص لادنى الحدود وممكن قريب تكون ببلاش بعد الاعلان عن ارسال اقمار لتوفير الانترنت الفضائي للعالم كله وخصوصا الناس الفقيرة زى حالتنا
طيب ليه الانترنت ؟؟؟ وكلنا فرحانين بكده جدا لان الانترنت اصبح حياتنا واهم من اى حاجة وممكن جدا الواحد يدفع اشتراك النت وميجبش اكل او يتعالج لانه بيقول المهم يكون فى حاجة تقتل الوقت وتسلينى وممكن انسي الاكل ومش مهم اتعالج لان الصحة مش فارقه علشان مفيش حاجة نعملها بالصحة ديه مفيده والاكل والشرب والدواء وكل الحاجات الاساسية الاسعار كلنا عارفين الجنون الخرافي والمتوقع استمرار الزيادة أكثر مما سبق لان مفيش اى حاجة سعرها بينزل ابدا

قمر النايل سات الوحيد الى دخل عليه فى نفس المدار قمر اخر من اعوام علشان المصريين والعرب يشوفوا الى عمرهم ما شفوه بعيدا عن النايل سات بس هو كمان مع الوقت اتغير وبقي وحش خالص ولما حضرتك تعمل بحث على نايل سات يطلع لك كل قنوات القمر التانى وحاليا فى قمر حيكون بديل النايل سات او النايل سات حيكون جزء صغير جدا منه واتفرج يا عم اضعاف اضعاف الموجود ... بس بالنسبة لى شخصيا ممكن تكون تسلية طيب الناس الى عندها زوجة واولاد ايه الى حيحصل فى بيوتهم .. مش عارف

انا لله وان إليه راجعون

سبحان الله وبحمده سبحان الله العظيم

[moha sasa]

- وجهه نظرى الماليه.

- ليه؟؟؟؟؟؟؟؟؟؟

- هو ده إللى بيعملنا ثورة كل يوم ووقف حال وهى دى مطالب الشعب عيش.

- والعيش ده مش بفلوس!!!!!!!!!!!!!!!!!

- بص على الصورة إللى أنا رفعها.

[moha sasa]

- هى ايه الصورة دى؟؟؟؟؟؟؟؟؟؟

- ده رسم بيانى لنصيب الفرد من إجمالى الناتج القومى.

- تعريفه:-هو مجموع الناتج القومي المحلي مقسوما على عدد سكان الدولة.

- تعريفه:-هو مقياس للرخاء. فكلما زاد الرقم كلما كان ذلك دليل على وجود نشاط و دخل اقتصادي اكبرمقارنة بعدد المواطنين، و العكس صحيح.

- طبعاً من أول نظرة المنحنى صاعد من سنه 1970 وحتى الأن لم يتوقف عن الصعود.

[moha sasa]

- هو مفيش إلا المؤشر اللإقتصادى ده إللى أنت جاى تتكلم عليه.

- لاء فى حاجات تانيه كتير.

- بس أشمعنا ده؟؟؟؟؟؟؟؟؟

- لأن ده بيعبر عن مصلحتى من المكان إللى أنا عايش فيه.