حد جاله الإحساس ده قبل كده ؟؟؟!!!!

[Abo_Mazen]

عندي إحساس هيقتلني ..إني عايش في بلد مش بلدي ..

عايش في البلد دي وأنا حاسس بغربه ...واللي بيزيد الإحساس ده عندي إني حاسس إن وجودي مؤقت في البلد دي


شئ غريب إنك تبقى عايش وجواك أفكار متقدرش تخرجها بره منك ..أو تبقى عايش في بلد بتصنفك أو بتقيمك بناء على إختلافك أو إتفاقك مع النظام القائم فيها

شئ غريب إنك تبقى عايش ولما تيجي تتكلم عن حقك ..لازم توطي صوتك ..عشان محدش يسمع ..وأكيد (محدش) ده من المختلفين معاك في الفكره أو الرأي أو حتى الحق اللي إنت بتطالب بيه

والأصعب إحساسك إنك حبيس داخل البلد دي مش قادر تخرج منها .....

ولو خرجت منها يا تروح مكان أقل منها ..يا تقعد فيها وترضى بقى وكل ما تتوجع بص لتحت ..عشان تحس إن إنت فوق

عندي إحساس عام بعدم الرضا ..عدم الرضا عن الوضع العام برضه اللي إحنا فيه ..

برامج الشات على موبايلي بعد ما بخلص بخفيها ..والشات اللي عملته مع أصحابي على الفيس من على الموبايل بعد ما بخلص بخفيه ..حاسس إني عايش في سجن كبيييييييييييييير قوي ..

نفسي أخرج من البلد دي لبلد تانيه..على الأقل خالص أقدر أتكلم من غير ما أوطي صوتي ..أو حتى أقعد ساكت وما أتكلمش أصلا لإني مليش حق إني أتكلم لإنها وقتها مش هتبقى بلدي ...


العنصرية بقت في كل حاجه في تعاملاتنا مع بعض ..اللي داخل ياكل في مكان ومعاه قرشين بيطلع عقده على العامل الغلبان اللي بيخدمه في المكان ده

والضابط اللي إنت رايحله القسم عشان تقضي مصلحتك منه بيطلع عقده عليك

والموظف اللي في المصلحه الحكوميه برضه نفس الموضوع

ووكيل النيابه اللي إنت رايح تعرض عليه مظلمتك نفس الشئ

حاسس إن الناس بقت تتعامل بناء على إن دي نهاية الحال ومش هيكون أحسن من اللي إحنا فيه

أفكار داخليه مشتته ..كلها بتصب في النهاية في ممر نهايته حيطه سد

مش قادر أتخيل بكره عامل إزاي ...كل ما بحاول أطلع بأفكاري لقدام ...أحس إن الواقع اللي إحنا فيه بيسحبني لتحت وبشده ..عشان مقدرش أطلع خطوه واحده بأفكاري لقدام

حاله عامه من الإحباط ...

في ناس كتير وراء الجدران ..بدون محاكمات ..وحتى المحاكمات اللي إتحاكموها ..محاكمات

عندي إحساس إني شايل ذنب كل واحد إتظلم في البلد دي ...إتظلم عشان أنا سكت ..أو خفت فسكت ..

شايف قدام عيني أكل حق الغلبان مبقاش بالسياسة زي الأول ..أكل حق الغلبان بقى بالدراع ..ولو مش عاجبك ..يبقى هيتعمل قانون عشان ناكل حق الغلبان بيه

شايف قدام عيني ناس بتتوجع من الفقر وناس بتتوجع من الحوجه وناس بتتوجع من التعب ..

شايف قدام عيني ناس فوق وناس تحت ..واللي فوق بيطلع لفوق أكتر ..واللي تحت بيدوسوا عليه عشان ينزل لتحت أكتر

شايف قدام عيني باشوات ..بس بدون طرابيش ..باشوات لابسين بيادات ...

قبل ما تتكلم مع واحد منهم ..مع إنه طلع معاش ..لازم تقدم الرتبه ...سيادة العميد ..سيادة العقيد ..سيادة اللواء ..

ما هما أصحاب المكان ..وإنت ضيف على المكان ..أو تقدر تقول هما أصحاب البلد ...وإنت ضيف في البلد ..


أنا ما بتكلمش عن وضع سياسي ..أنا بتكلم عن حالي أنا مع نفسي ..عشان محدش يدخل يقول ده كلام في السياسه ..

[amr011111]

الموضوع هيتحول لنقاش سياسى زى كل المواضيع
اللى عاوز يسيب البلد وعنده المؤهلات اللى تخليه يسيبها يتفضل يسيبها
والذكى اللى ميبقاش مؤيد لاى شخص تأييد لا نهائى لان مفيش حقيقه مطلقه ومفيش حد صح تماما ولا غلط تماماً
والشىء الاخر والغريب ان احنا كمواطنين مش راضيين عن اى حاجه فى البلد رغم ان البلد ان اللى بنعملها وده هتلاقيه
لما تروح مصلحه حكوميه تخلص ورقك تلاقى الدنيا واقفه رغم ان الموظف ده اخويا واوخوك وجارى وجارك وقريبنا
وقس على ذلك كل المستويات
عندك امين الشرطه اللى مش بيراجع على الرخص الساريه وبيهمه انه بياخد فلوس ويعدى
فى الاخر بتلاقى حد من قرايبه مات فى حادثه على الطريق نتيجه سواق شارب وهكذا

[Abo_Mazen]

الموضوع هيتحول لنقاش سياسى زى كل المواضيع
اللى عاوز يسيب البلد وعنده المؤهلات اللى تخليه يسيبها يتفضل يسيبها

طيب واللي عنده المؤهلات بس عنده مرض الشعب المصري ؟؟؟....

يعمل إيه ساعتها ..ولا إتكتب علينا نروح السودان ونروح أثيوبيا ...؟؟؟؟

وإتحرم علينا نروح نعيش في البلاد اللي فيها بني آدمين عايشين عيشة البني آدمين

[amr011111]

طيب واللي عنده المؤهلات بس عنده مرض الشعب المصري ؟؟؟....

يعمل إيه ساعتها ..ولا إتكتب علينا نروح السودان ونروح أثيوبيا ...؟؟؟؟

وإتحرم علينا نروح نعيش في البلاد اللي فيها بني آدمين عايشين عيشة البني آدمين

ربنا يشفيك ان شاء الله
كنت قريت مشاركه ليك ان علاج الفيروس مش بيمشيه تماما بس مش بيخليه يبان فى تحليل معين
فلو كده يبقى ممكن تعدى من الكشف ده ان شاء الله

[hilal]

عندما ينتشر الفساد وتغيب العدالة في بلد معين ، أي بلد
فإنه من الطبيعي أن يشعر الفاسدون وأقاربهم وأصدقاؤهم أنهم في أحسن بلد في العالم
كل شيء متاح لهم وظائف محترمة ، أراضي بأسعار رمزية ، عدم خضوعهم للقوانين ، .....إلخ

وفي المقابل ستجد أن الشرفاء والكفاءات والبسطاء والفقراء منهم من يستسلم للأمر الواقع ويتأقلم على المعيشة بدون أي حقوق ، وهؤلاء يدفعون الجزية لأصحاب السيادة للحصول على وظائف حقيرة ، أو مساكن حقيرة
ومنهم من لا يستطيع التأقلم مع ذلك ، وهنا المشكلة ، إما أن يفرون إلى بلد أخرى لو سنحت لهم الفرصة ، أو يصطدم مع الفاسدين وهنا سيكون مهدر الدم ، أو على الاقل مصيره السجون.
كان الله في عون الشباب

[msobhy]

منهم من يستسلم للأمر الواقع ويتأقلم على المعيشة بدون أي حقوق ، وهؤلاء يدفعون الجزية لأصحاب السيادة للحصول على وظائف حقيرة ، أو مساكن حقيرة
ومنهم من لا يستطيع التأقلم مع ذلك

انا مستسلم

[hilal]

انا مستسلم

يا عزيزي كلنا هذا الرجل

[hilal]

هل تعلم أهم علامة من علامات الفساد في أي دولة ؟
الزيادة البشعة في عدد القوانين المطبقة في تلك الدولة

[Abo_Mazen]

أنا بقى مستسلم ..بس مستسلم قهرا ..

[Bassem Youssef]

عندي نفس الاحساس علي فكره بس مالها السودان يعني ؟ علي الاقل هتعد في وسط ناس طيبين و محترمين مش زي هنا خالص :)

اللي شايف ان حال البلد ميسرش ميستسلمش و ياخد باسبوره و يهج من هنا علي حسب امكانياته العلميه و الماديه

و اللي شايف ان ماسر ام التونيا و هتبقي قد التونيا يخليه قاعد هنا بس مسمعوش بيشتكي من حاجه و لا اشوفه واقف في طوابير السفارات

اظن كده الكلام بما يرضي الله

[Bassem Youssef]

و الله حاسس ان ربنا هيبتلينا بمصيبه بسبب كتر الظلم و الفساد

زلزال بركان مرض معدي الله اعلم

[Abo_Mazen]

و الله حاسس ان ربنا هيبتلينا بمصيبه بسبب كتر الظلم و الفساد

زلزال بركان مرض معدي الله اعلم

المشكلة مش في الظلم والفساد ..المشكلة في السكوت عن الظلم والفساد ..هي دي اللي تستحق عقاب ربنا فعلا

[م أحمد]

لا حول و لا قوة إلا بالله

ما تسيبهاش

[Abo_Mazen]

لا حول و لا قوة إلا بالله

ما تسيبهاش

أحسن ما قيل

لا حول ولا قوة إلا بالله

[Bassem Youssef]

المشكلة مش في الظلم والفساد ..المشكلة في السكوت عن الظلم والفساد ..هي دي اللي تستحق عقاب ربنا فعلا

عشان كده الهجره من البلد دي واجبه و ربنا يرحمنا برحمته و هو اعلم اننا غير راضيين عن هذا الفساد و الظلم