مطلوب النصيحه من المقيمين بالكويت

[فتوك حائر]

اخوكم بيفكر في السفر والحقيقه ليا صديق بقاله فتره طويله في الكويت بيشجعني اجي زياره او اشتري فيزا حره وادور وبيقلي مجالات الشغل متاحه وكدا
ايه رايكم وانا مهندس صيانه كنت شغال بمستشفي
كنت بفضل اطلع علي شغل بس بيقولوا تحكمات وراتب اقل بعكس الفيزا الحره مثلا ايه رايكم

[أبو صلاح]

فيزا حرة بدون عهقد او اتفاق عمل مضمون = اهانة ومخالفة لقوانين الدول دي
والموضوع بقى حاليا في خطورة عالية جدا
انا كنت في السعودية اقسم بالله شفت حالات وحكايات تشيب

[Bassem Youssef]

هي مش الفيزا الحره دي اتلغت ؟؟؟

[volociximab]

اتلغت فى السعودية

[gade2]

بلاش تروح على المجهول حاول تدور على وظائف فى الجرايد او مكاتب التوظيف والمهندسيين مطلوبيين بس فى الاول بيبقو قليلين فى المرتب ....ربنا يوفقك

[Abo_Mazen]

قانونا في الدول دي .مفيش حاجه اسمها فيزا حره ...ده مصطلح اتفقنا عليه نحن المصريين علشان نطلقه على الفيز اللي بتتباع سوق سودا ..يعني يجي المغترب يتفق مع الكفيل انه يسيبه يشوف شغل بمعرفة المغترب ..وبيتم عمل تسويه ماليه ما بين المغترب وصاحب الفيزا ..سواء بقى المغترب يدفع قرشين لصابةالفيزا كل شهر كراتب ثابت او يشتريها منه

[mr_vampire]

فيزا حرة مهانة وذل ورضا باقل القليل عشان تجيب مصاريفك وجزء من اللي تم صرفه. ومش هتلاقي شغل بالسهولة ده ومحدش فاضي يدورلك (البلد معسكر عمل ولا هتشوف اخوك غير فالمناسبات ).

دور فشركات العمالة علي عقود عمل مناسبة وبشروط مقبولة. واللي تدفعه فالفيزا الحرة تدفعه لشركة التوظيف والعمالة.

وبالتوفيق.

[wawamoha]

انا كنت في الكويت سنه 2007 - اللي اعرفه انه صعب تلاقي عمل محترم و انت هناك - الكوايته مش ساهلين ابدا الا اذا اذل شغلانتك نادره عندهم ...

و عموما الارزاق بيد الله ... ربنا يوفقك - عليك بالاستخاره لو حضرتك مسلم