استفسار عن طريق دهب

[mohammadrashee]

السلام عليكم
اخواني الكرام
ان شاء الله عايز اسافر دهب بس عايز ا7رف الطريق امان ولا لا
واي طريق احسن طريق نخل ولا سانت كاترين ولا شرم
انا عارف ال٣طرق بس مين مشي عليهم مؤخرا وعارف حالة كل طريق
اخبار الامان ايه
يا ريت اللي عارف ومش على ال٣ طرق يقولي انا هكون انا والاولاد
واخبار النفق ايه ومواعيده ايه
وشكرا ليكم

[marsguy]

وعليكم السلام ورحمة الله وبركاته،،،

أأمن وأنضف طريق حالياً هو طريق القاهره - شرم - دهب

حالياً الطريق أمان في المجمل

أحسن وقت تطلع فيه من القاهره على الساعه 2 ونص الفجر. هاتوصل النفق على 4 الصبح وده يمكن أقل وقت بيكون فيه النفق فيه رخامه أو زحمه في التفتيش وكل اللجان اللي في سينا نفسها بتكون سهله. هاتوصل دهب على 8 لأو 9 الصبح.

بالتوفيق

[mohammadrashee]

وعليكم السلام ورحمة الله وبركاته،،،

أأمن وأنضف طريق حالياً هو طريق القاهره - شرم - دهب

حالياً الطريق أمان في المجمل

أحسن وقت تطلع فيه من القاهره على الساعه 2 ونص الفجر. هاتوصل النفق على 4 الصبح وده يمكن أقل وقت بيكون فيه النفق فيه رخامه أو زحمه في التفتيش وكل اللجان اللي في سينا نفسها بتكون سهله. هاتوصل دهب على 8 لأو 9 الصبح.

بالتوفيق

[mohammadrashee]

انا بفضل طريق نخل نويبع عشان الكمين بتاع شرم الشيخ
اخر مره ناس اعرفهم وقفوا فيه ساعتين تفتيش

[marsguy]

انا بفضل طريق نخل نويبع عشان الكمين بتاع شرم الشيخ
اخر مره ناس اعرفهم وقفوا فيه ساعتين تفتيش

أنا باحب طريق نخل جداً عشان طريق مستقيم من غير ملفات وأخره في مناظر طبيعيه رهيبه قبل طابا بشويه وفي المسافه بين طابا ونويبع. بس انا وغيري بطلنا نستخدمه للأسباب دي:

تقريباً ما فيش ولا بنزينه عدله في الطريق إلا التعاون اللي في أول الطريق خالص والبنزينه اللي في طابا. وبرضو دول ساعات مش ببكون فيهم بنزين. البنزينات اللي في النص انت وحظك.

مافيش مدن ولا خدمات إلا في مدينة نخل اللي هي في نص الطريق بالظبط. ودي أصلاً مدينه صغيره جداً والخدمات فيها ضعيفه جدا. يعني لا قدر الله لو العربيه عطلت هاتعاني أوي.

القلق الأمني. الطريق ده يعتبر الفاصل ما بين جنوب وشمال سينا. وطبعاً الشمال فيه قلق جامد وساعات بيحصل مشاكل على الطريق ده. الجيش ساعات بيقفله وبيعمل تفويج للعربيات. يعني ممكن مثلاً الجيش يوقفك في كمين الفجر ويقولك استنى معانا لحد الصبح والصبح بيطلع فوج عربيات ملاكي مع بعض. وساعات بيطلع مع الفوج عربية تأمين من الجيش وساعات لأ.

[hesham fawzy h]

الكمين بتاع النفق بيبقى مش زحمة بالليل

[mohammadrashee]

أنا باحب طريق نخل جداً عشان طريق مستقيم من غير ملفات وأخره في مناظر طبيعيه رهيبه قبل طابا بشويه وفي المسافه بين طابا ونويبع. بس انا وغيري بطلنا نستخدمه للأسباب دي:

تقريباً ما فيش ولا بنزينه عدله في الطريق إلا التعاون اللي في أول الطريق خالص والبنزينه اللي في طابا. وبرضو دول ساعات مش ببكون فيهم بنزين. البنزينات اللي في النص انت وحظك.

مافيش مدن ولا خدمات إلا في مدينة نخل اللي هي في نص الطريق بالظبط. ودي أصلاً مدينه صغيره جداً والخدمات فيها ضعيفه جدا. يعني لا قدر الله لو العربيه عطلت هاتعاني أوي.

القلق الأمني. الطريق ده يعتبر الفاصل ما بين جنوب وشمال سينا. وطبعاً الشمال فيه قلق جامد وساعات بيحصل مشاكل على الطريق ده. الجيش ساعات بيقفله وبيعمل تفويج للعربيات. يعني ممكن مثلاً الجيش يوقفك في كمين الفجر ويقولك استنى معانا لحد الصبح والصبح بيطلع فوج عربيات ملاكي مع بعض. وساعات بيطلع مع الفوج عربية تأمين من الجيش وساعات لأ.

شكرا ليك جدا
فعلا انا سمعت عن المناظر الطبيعيه في الطريق ده
لو في حد مشي في الطريق ده الفترة اللي فاتت ممكن يفيدنا

[afzaki7]

تجربتى على الطريق

السلام عليكم ورحمه الله وبركاته

أنا كنت مسافر على الطريق ده من حوالى 3 شهور متجها من القاهره إلى دهب
وكانت الملاحظات كالآتى
1- الطريق فاضى جدا وفين وفين لما تقابل او تعديك عربيه
2- كماين كتير جدا اكتر من 13 كمين هتقابلهم لحد دهب وده بيدى أمان للناس بس بيخنق فى الوقت وانك كل شويه تقف وتتفتش
3-الرست العدل اللى ممكن تقف عليه هو فى نخل وفى بنزينه وطنيه فى نخل وفيها الرست برده وفيه رست تانى بس موقفناش فيه عمتا نخل هى تحس انها قريه وفيها خدمات وناس بس طبعا مش كتير وبرده فيها كمين بس معظم اللى عايزه هتلاقيه وانصح بانك تاخد الرست زى معظم الناس فيها وتمون كمان منها
4- انا كنت طالع رحله بأتوبيس بس الطريق عليه ملاكى كتير وشوفنا ناس كتير بعربياتها فى الرست فى نخل وفيه اللى رايح وفيه اللى جاى اول ماتدخل طابا وبعدها لحد دهب فيه رست كتير وفيه بنزينات كمان وطبعا هاتعدى على نويبع ودى مدينه فيه كل حاجه فمتقلقش من اى حاجه بعد ماتدخل طابا يعنى
5- الطريق فى أوله فيه بيبقى زى رمل متحرك طالع على الطريق وده بيضيق الطريق فلازم تبقى واخد بالك وفيه برده حتت فيها تكسير وحفر بس مش اللى هى حفر موت يعنى لكن حفر تهبد شويه فى العفشه لو انت واخدها على سرعه
6- نصيحتى بالنسبه للى سايق وبيحب السرعه الطريق فاضى وماظنش عليه اى رادار بس نصيحه ماتسرعش اوى خليك فى المضمون برده وماتسرعش فى حته انت مش شايف الطريق فيها فيه حتت كتير هتلاقيها مستقيم وهاتبقى شايف بتاع 20 كيلو قدامك سرع فيها براحتك لكن لما تلاقى الطريق لافف هدى وخش براحه عشان ربنا يحفظك ويسترها عليك
7- الطريق مناظره الطبيعيه جميله أوله صحرا اه بس بعد شويه المناظر بتبقى جميله جدا ومريحه ليك وانت سايق وفى الكماين وحنا واقفين كان بيبقى فيه انواع طيور اول مره اشوفها وقبل طابا فيه طريق كله جبال ومنحنيات ومش محتاج احذرك منها لكن قبل الحته بتاعت المنحنيات فيه مجموعه مناظر طبيعيه لجبال وتكوينات صخريه رائعه ومهما صورتها مش هاتحس بجمالها الا لماتكون شايفها بعينك وبالنسبه لواحد بيعشق المناظر دى تستاهل انى اخد الطريق ده عشانها كمان بعد طابا هتلاقى الفويرد باى وطبعا دى منطقه مشهوره وممكن تشوفها على النت لو مش عارفها
8- نصيحتى لحد رايح دهب أو راس شيطان انه ياخد طريق نخل على الأقل وهو رايح وممكن يرجع من شرم وهو راجع لو عايز كمان يتفرج على طريق شرم او متعود عليه فيكون أسهل فى الرجوع خصوصا بتبقى خلاص تعبت من الرحله وعايز توصل البيت على طول فتمشى فى طريق عارفه اسهلك
9- بالنسبه للامان مافيش أى مشاكل قالبتنا على الطريق الكماين كتير وفى حتت كتير شوفنا عربيات راكنه والناس بتتصور على الطريق قابلنا عربيات نقل كتير منها لمصنع اسمنت فى المنطقه وكمان عربيات شايله عربيات جديده وعربيات رمل
انت المهم تظبط عربيتك وتأخذ بالاسباب وتصلى استخاره وتدعى دعاء السفر وتتوكل على الله وربنا هايكرمك والطريق هايبقى جزء من متعه الرحله لما فيه من مناظر وراحه نفسيه جميله يفتقدها من يعيش مثلى وسط الغابات الأسمنتيه فى القاهره
ملحوظه الفرق فى المسافه بين طريق نخل وطريق شرم بالنسبه لدهب من 35 ل 40 كم يعنى طريق نخل اقصر من شرم وطبعا المسافه دى مش كبيره اوى لكن للى رايح راس شيطان الفرق هايبقى اكبر طبعا وأوقع انه ياخد طريق نخل رايح جاى