مشكله فى الميه بعد تركيب ماتور مياه

[new_man]

فى البدايه انا ركبت من اسبوعين ماتور مياه فى جراج العماره وانا اسكن فى الدور الثامن والمواسير 44 متر مابين افقى وراسى وماتور كالبيدا ايطالى 1 حصان بالبالونه وراكب عدادات مياه كتيره فى العماره

المهم

الميه بفتحها الضغط بيكون قوى لمدة نص دقيقة ويرجع يضعف لنص دقيقة ويرجع يزيد تانى وهكذا..

والسخان الغاز مثلا يشتغل مع الضغط القوى ولما الميه ضغطها يقل يفصل ويشتغل تانى وهكذا

المشكله دى حلها ايه ومن ايه

[DreAmO]

سببها البالونه
لما الموتور بيشتغل الضغط يزيد .. ولما البالونه تتملي .. الموتور يفصل والسحب يكون من البالونه والضغط يقل
البالونه تقرب تفضى الموتور يشتغل .. وهكذا

حلها ايه ؟ .. مش عارف .. بس اتذكر موضوع هنا قديم فيه حل للحكايه دي .

[عبدالله برعى]

علي حد علمي حتقلل ال setpoint للموتور
بمعني.. (الموتور بيشتغل لما الضغط مثلا يكون في البالونة 20 psi وعند لما بتفتح المياه الضغط بيزل من 30 الي 20 دي الفترة اللي المياه شغالة الدقيقتين وبعد لما البالونه بتفضي يروح يشتغل... يبقي نعمل ايه نرفع ال20 الي 30 مثلا فالبتالي المياه المسحوبة سيكون لها تعويض من الموتور... بس كداوالله اعلم دا حسب اللي شغلي في الضغوط والقياسات
ياريت التكلفة

[new_man]

انا كنت متوقع كده
بس هل كده ده اللى اكلم فيه السباك ولا ممكن اظبط انا الضغط ده بنفسى؟؟

التكلفة للموتور بالبالونه 2000 ومصنعيه وخامات 1800

[amr011111]

اعتقد كونك فى الدور التامن انك تكون محتاج بالونتين

[A.Saad]

الضغط تظبطه لوحدك
ببنسة كهربا معزولة ترجلش مسمار الاوتوماتيك
واتاكد من ضغط الهوا فى البالونة

[احمد المصرى]

هتفتح الاتوماتيك هتلاقى عدد 2 صاموله يمين صاموله كبيره والشمال صاموله صغيره


هتروح رابط شويه على الصاموله الكبيره ال على اليمين هتلفها لفه كامله تقريبا وجرب كدا وشوف الموتور هيتظبط مكان ولا ايه

ملحوظه متلفهاش كتير علشان لو لفتها كتير الموتور مش هيفصل


ملحوظه تانيه الصاموله اليمين والشمال عكس بعض بمعنى انك لما تربط على المين يبق هتفك الشمال والعكس بس فى حالتك انت اربط على المين بس

[Salamonti]

فعلا انت محتاج بالونتين تعويض عن ضعف الماتور بالنسبة للدور الثامن خصوصا مع وجود مواتير تانية وعدادات كتير..

طبعا بالإضافة لمشكلتك الأساسية اللي حلها في ضبط الأوتوماتيك

[A7medelfe2y]

فيه مسمار كدا في الاوتوماتيك بتزود منه الضغط الي بيشتغل عنده الموتور
زود فيه زي ماحضرتك تحب الموضوع سهل وبسيط

[new_man]

الحمد لله جه السباك اللى عمل الشغل امبارح وظبط الضغط والميه بقت تمام ومبتقلش
وجربت السخان وشغال تمام بدون انقطاع
شكرا يارجاله على النصايح والمساعده
متحرمش منكم دايما :)

[new_man]

فى حاجه غريبه بتظهر احيانا مع تشغيل المياه لفتره ممكن تكون نص ساعة مثلا متواصل المياه تبدا تنزل سخنه وتسخن جامد وبعد كده تهدا لوحدها

ده سببه ايه؟؟

[amr011111]

فى حاجه غريبه بتظهر احيانا مع تشغيل المياه لفتره ممكن تكون نص ساعة مثلا متواصل المياه تبدا تنزل سخنه وتسخن جامد وبعد كده تهدا لوحدها

ده سببه ايه؟؟

عندى نفس المشكله
ممكن يكون الموتور مبيفصلش
او حد من السكان عنده سخان كهرباء والبالف بايظ
الموتور اللى عندك نوعه ايه
يعنى صينى ولا ايطالى

[new_man]

لا الموتور بيفصل وتمام وكمان ده لسه راكب من اسبوعين فا جديد
وده ماتور خاص بيا لوحدى وايطالى كالبيدا من التوكيل
هى المشكله اتحلت بغلق منفذين السخن والبارد للسخان الغاز وبقت الميه تنزل بارده عادى..مش عارف ايه علاقته بسخونة الميه بس انا جربته فنفع
رغم انى فاصل السخان الغاز من اول الصيف باور وغاز