ومن وقتها وأنا بطلت أحسبها .................

[A.Saad]

القصة دى كانت على الفيس بوك
ممكن تكون مش صح والله اعلم وممكن تكون صح
بس حتى لو مش صح فهيا بتبين فعلا ان الواحد يتعب وربنا اللى بيكافيء


ومن وقتها وأنا بطلت أحسبها و أيقنت إن رزقي جاي جاي)
كنت قاعدة مع أحد أصحابي نتكلم عن الرزق و عن انشغالنا به ليل نهار، فقال لي أحدهم: هحكيلك على حاجة حصلت لي من بعدها قررت عمري ماهحسبها ..
كنت مرتب مع صحابي اننا نسافر العين السخنه و حددنا اليوم و ركبنا العربية وطلعنا علي الطريق وقعدنا نرغي ونتكلم مع بعض حوالي ساعتين وفجأه اكتشفنا حاجة ما تتصدقش!! لقينا نفسنا قدام قرية الأسد!!!!! اكتشفنا اننا بدل ماناخد طريق السخنة اخدنا طريق مصر إسكندرية الصحراوي إزاي معرفش!
والأعجب من كدة ان ولا واحد فينا كلنا اخد باله!!
المهم طبعا كان مستحيل نلف ونرجع السخنة لأن اليوم كده إتفرتك، فقررنا نشوف أي حد بتاع سمك ناكل عنده اكلة سمك و بعدين نرجع و نكون طلعنا من السفرية دي بأي حاجة.
فضلنا سايقين لحد ماشمينا ريحة سمك حلوة قوي، دخلنا لقينا واحد بتاع سمك كده على قده، وقفنا نختار السمك اللي عايزينه ووقف الراجل يتبله و كان شكله مهموم هم السنين، وفجأة لقيناه بيعيط!! اتفاجئنا، سألناه مالك وبعد محايله كتير قال لنا ان الحال بقاله كام يوم واقف، وبنته تعبانه قوي و محتاجة دواء غالي ضروري و أخيرا ربنا بعت بينا الرزق!!!!
و من كتر فرحته استأذننا ياخد الحساب مقدم علشان يبعت ابنه يجيب الدواء ويوديه البيت!!
طبعا احنا كلنا تنحنا! وبعد ماكنا عمالين نتكلم و نضحك و نستغرب احنا ازاي ماخدناش بالنا اننا واخدين طريق تاني خالص، سكتنا.. كلنا سكتنا! علشان فهمنا ان ربنا كاتب رزق للراجل دة لعلاج بنته واستخدمنا احنا لتوصيله رغماً عن أنوفنا كلنا!!!
ومن وقتها وأنا بطلت أحسبها و أيقنت إن رزقي جاي جاي.
أما أنا علي بس أسعي وأدعي وأتوكل على الله وأنا متأكد ان اللي مكتوب لي جاي لي جاي لي

[أبو_يوسف]

مش بعيد تكون حصلت فعلا وبيحصل اكتر من كدا ..

يقول ﺍﺑﻦ ﺍﻟﻘﻴﻢ
ﻟﻮ ﻋﻠِﻢ ﺍﻟﻌﺒﺪ ﻛﻴﻒ ﻳُﺪﺑّﺮ ﺍﻟﻠﻪ ﻟﻪ ﺃﻣﻮﺭﻩ .. ﻟﻌﻠِﻢ ﻳﻘﻴﻨﺎً ﺃﻥ ﺍﻟﻠﻪ ﺃﺭﺣﻢ ﺑﻪ ﻣﻦ ﺃﻣِﻪ ﻭﺃﺑﻴﻪ! .. ﻭﻟﺬﺍﺏ ﻗﻠﺒﻪ ﻣﺤﺒﺔً ﻟﻠﻪ ..
ﻭﻣﻦ ﺭﻭﺍﺋﻊ ﻛﻠﻤﺎﺕ ﺷﻴﺦ ﺍﻻﺳﻼﻡ
{ ﻟﻮ ﻛﺸَﻒ ﺍﻟﻠﻪ ﻟﻚ ﺍﻟﻐﻴﺐ ﻣﺎ ﺍﺧﺘﺮﺕَ ﺇﻻ ﺍﻟﻮﺍﻗﻊ } !..

[ahmedfor3]

حتى لو القصه غير حقيقيه فد مش بعيد على الله وقدرته على كل شئ

[hugan]

فعلا لو توكلنا علي الله حق التوكل
لتيسرت كل امورنا

[mr_vampire]

انا عن نفسي لي اشياء مشابهة في عدم منطقية حدوثها ولكنها بتدبير رباني حصلت وكانت افضل من ماكنت اتمناه او اخطط له.

خليها علي الله.

[gade2]

انا هقول على موقف حصلى قريب كان فى فرصه عمل ممتازه وانا كان نفسى فيها وظبط نفسى كورسات وجام امريكي وورش عمل ولغه
دخلنا الامتحان وكنا حوالى 12 باين ان فينا 4 كويسين يخشوا التصفيات المهم اللى فا زبالوظيفه دى واحد عادى جدا
ولا واسطه ولا كورسات زيينا وكان بيسألنى على كلمه بالانجليزى يكتبها ازاى
اول لما عرفت فضلت اضحك وافتكرت جملة جرى الوحوش
الرزق دا نصيب بتاع ربنا وبس

[A7medelfe2y]

جميله اوي
لك الاجر من الله علي التذكره

[lena jo]

جزاك الله خيرا . بيحصل اكثر من كدة كمان. بيحصل ان احيانا في توقيت معين بتستغني عن حاجة زي غسالة او ثلاجة و او ما شابه وتلاقي بالصدفة حد من معارفك يسألك لو تعرف حد مستغني عن نفس الحاجة دي لانه يعرف واحدة غلبانة عايزة تشتريها مستعملة في الوقت اللي انت هتوزع الحاجة طبعا ببلاش و كأن ربنا مسخرك تزهد فيها عشان غيرك محتاجها. حصل امامي الموقف دة كثير.او شخص مريض عايز يطبق ( داووا مرضاكم بالصدقات ) فيبحث عن مريض اخر لكن فقير ليعطيه فيظهره الله في طريقه . احيانا بتحصل مواقف اخري مشابهه و بقول وقتها ان فعلا ربنا بيسخر ناس لمصلحة ناس مثل الموقف اللي في قصة حضرتك . و احيانا بعيدا عن الرزق تجد ناس بتفتري علي غيرها اللي ملهاش حد يدافع عنها و مع ذلك ربنا بيسخر لهم شخص اقوي يساعدهم لان مصلحته تستدعي ذلك فيقف هو امام من يفتري عليهم . الواقع احيانا بيكون اغرب من الخيال