اذا تم معاملتك بشكل حضارى - ياريت تقول لنا

[msobhy]

بما اننا فى بلدنا المحروسه دائما وابدا بنعامل معاملة المواطن الدرجه الثالثه طرأ على بالى شئ غريب
هو احنا بلدنا فعلا كلها شمال وغلط
هل الدنيا كلها ماشيه رشاوى و وسايط وخناقات وقلة أدب
مفيش حد حصل معاه موقف حسسه انه عايش فى اوروبا
مفيش حد حصل معاه موقف خلاه يسأل اذا كان الكلام ده فعلا بيحصل فى مصر

المهم انه يكون موقف من بداية لنهايته تم صح بدون وسايط - بدون رشاوى - بدون تأخبر - بدون قلة أدب
بمعنى
ان انت عندك طلب أو مصلحه أو أى حاجه واتقضت وأخدت حقك كما لو كنت عايش فى أوروبا

أنا هبدأ بنفسى
انا عندى 37 سنه - انا قاعد بفكر بقى لى اكتر من 3 ساعات فى الموضوع ده ملقتش ولا حاجه واحده اتعملت معايا بأحترام فى مصر

[prof2013]

انا شوفت الذل والهوان بداية ما دخلت المدرسة لحد ما اتخرجت واشتغلت وبعد ما اشتغلت ارتاحت من الحكومة وبدأت أشم نفسي
بدأت أشوف الذل تاني من أول ما بدأت أدور على عروسة وقلة أدب ومسخرة (ده بعد ما أتوظفت)
دالوقتي بطلت الاتنين الحمد لله
بقىى معنديش مصالح تربطني بالحكومة ولا بقيت أفكر في الجواز
دالوقتي عزلت نفسي عن المجتمع ومقضيها نت واخر روقان

[msobhy]

والله انا متفائل خير انى هالاقى حد هايبهرنا ان شاء الله

[rotanamasoud]

انا كان معايا عربيه مرور قوات مسلحه
رحت انقل ورقها لابيس
شوفت دوله تانيه خالص بشوات دخلت المرور قمه الرفاهيه استقبلنى واحد قالى اخلصلك الورق قولت اوك
اعدت انا وصاحبى على كراسى جلد وفطرنا ودردشنا مقيش ساعه كان كل حاجه خالصه متحركناش من مكانا كان فاضل تاشيره رايس الوحده طلعت لاقيته بيقول تحت امر سيادتك
رحت مرور ابيس شوفت الزل 3 ايام
باختصار احنا داخل دولتين

[Bassem Youssef]

حضرتك ممكن تسأل سكان مصر التانيه مش مصر اللي احنا عايشين فيها

[hilal]

احييك على اختيار الموضوع
بس حاسس انه ممكن يقلب سياسة ويتعرض للحذف
ولذلك ارجو ان يبتعد الزملاء عن الخوض في السياسة حتى تعم الافادة

[sherifahmed]

استريت تابلت من كارفور ماركة lenovo و طلع فيه عيب و عديت ال 14 يوم رغم بلطجة كارفور و التوكيل جهاز حماية المستهلك ركعهم بمعنى الكلمة

بالنسبة للاخونا صاحب السيارة مرور القوات المسلحة
سيادتك كنت فى قاعدة عسكرية لو مش واخد بالك و كل اللى بتعاملهم عسكريين او مدنيين جواها بيتعامل معاملة القانون العسكرى يعنى اللى يغلط بيتعلق انما التانيين مدنيين من نوعية المعترضيين على القانون الخدمة المدنية و مش عاجبهم ان الحكومة تشيل منهم حوافز 14 شهر . لو قلبناها عشاكر هايقؤلك بسقط حكم العسكر لو مشينا عليهم القانون الجديد هايقؤلك انا مضرب

ملحوظة:
الموضوع هايتقلب سياسة و هايتقفل

[hobiko]

والله فيه مواقف كويسة كتير و مواقف تانية سيئة

افتكر موقف كويس .......... كنت سايق فى عز زحمة شارع ابو قير فى اسكندرية

و مرة واحدة مراتى تعبت و داخت و اغمى عليها ........ بقيت فى موقف لا احسد عليه

المنطقة اللى كنت فيها مافيهاش ركنة .......... وقفت فى مكانى و العربيات حواليا من كل حتة و قعدت احوال اسعفها

كان فيه ونش واقف على الرصيف قدام شوية .......... ببص لقيت الظابط قدامى

لسه بيقولى و هو متنرفز ديه مش وقفه و هات الرخص ........... قلتله مراتى مغمى عليها و مش عارف اعمل ايه

لقيت ده اتنفض ......... و قالى طب اهدى ان حركنك على جمب

وقف بنفسه وقف العربيات و وسعلى مكان اقف فيه على اليمين ........ و راح الونش جاب ازازة ميه و ادهالى

كل ده و انا احاول افوقها و هو واقف معايا و عمال يقولى اطلبلك الأسعاف ....... الحمد لله فاقت بعد شوية و شكرته و اخدت العربية و مشيت

و فيه مواقف تانية برضه سيئة و مواقف كويسة

[boomboomzoro]

السلام عليكم و جزاكم الله خيرا علي الموضوع الجميل
التجربه التي لن انساها و لا أصدقها حتي الآن
هي التعامل مع مرفق الإسعاف .....يبدو الموضوع غريبا و لكن التفاصيل كالآتي:
كنت في أجازه بمصر منذ 22 أغسطس الماضي و حدث أن تعب والدي تعبا شديدا ما إضطرنا لنقله إلي المستشفي و لصعوبه الحاله
إضطررت لأول مره للتحدث إلي مرفق الإسعاف بعد أن تحججت المستشفي بعدم وجود خدمه سياره الإسعاف لديها
إتصلت ب 123 و كلي خوف من المعامله الحكوميه و بطئ الإجراءات وهو ما ظهر عكسه من الوهله الأولي
الرد كان كالآتي
لقد إتصلت بمرفق الإسعاف ننبهم بإتخاذ الإجراءات القانونيه للبلاغات الوهميه و رد فورا متلقي المكالمه متسائلا عن المكان و الحاله و مكان التوجه
بعد إخطاره بالتفاصيل أبلغني أن السياره متوجهه لي الآن و التكلفه 50 جنيها مع وجود 50 جنيها عن كل ساعه إنتظار
في أقل من دقيقه تلقيت مكالمه من مركز العمليات الذي ربطني بالسياره مباشره حتي أصف له الحاله و العنوان و في أقل من 10 دقائق وصلت السياره بها فريق مدرب و مسعف فاهم قام بكل الإجرائات اللازمه للحفاظ علي حاله المريض دون تدهور حتي وصلنا لطوارئ مستشفي بالمنيل و إنتظروني حتي تم قبول الحاله بالمستشفي و هموا بلإنصراف بعد أن أعطيتهم 100 جنيه (50 جنيها نقل و أخري للإنتظار)
المفاجأه أنه بعد مغادرتهم فوجئت بالفريق يعود و يعطيني 50 جنيها معللا أنهم إتصلوا بمركز العمليات و أخطروهم ألا يتم حساب فتره الإنتظار لأنهم إنتظروا فتره محسوبه ضمنيا من وقت النقل

ما أدهشني هو جوده الخدمه و سرعتها-حاله السياره و تجهيزاتها-خبره الفريق-الأمانه و النزاهه-الإحترافيه

تجربه فعلا تستحق الإشاده من مرفق أراه تطور كثيرا
شكرا للموضوع
كتبت الموضوع للإشاده و لإفاده الأعضاء الذين قد يظطروا لإستخدام هذا المرفق للطوارئ -لا قدر الله
جزاكم الله خيرا

[طارق _عبد السلام]

كنت رايح اقدم طلب عداد في حى ثانى عندنا في المحله اول موظف قابلته واحد كاره نفسه وكاره حياته اخد محاضر البناء وقال لى انسى طيب شمال يمين ...مش ممكن وقفت شويه مش طايق ابص في وشه قلت شويه واشوف سئلت واحد قال لى روح للموظف ده وشاور لى عليه واحد اسمه الاستاذ وحيد وتقريبا هو وحيد في المكان ده فعلا... شاف الورق لقيته قام وبيجيب لى كرسى وقال اتفضل خلص شويه طلبات ولقيته بيطلب لى مشروب...... !!!... وبعدين قال لى اتفضل انت وانا هاجى اعمل لك معاينه قلت له هنتظرك معايا عربيه قال لا اسبقنى بس.........فعلا سيبته وروحت انتظره وبعد الساعه 2 فعلا لقيته بعربيته الخاصه بصراحه مش عارف اعمل معاه ايه وواضح جدا انه عينه مليانه بس ازاى وعربيه خاصه قلت بس اكيد كل اللى بيعمله دا علشان اكراميه محترمه... وانا مش لاقى اى مدخل اتعامل بيه معاه لانى فعلا لابحب الرشوه ولا بحب التعامل بيها ...بس انا مستغرب ..الحاجه الساقعه مشربهاش وقال لى مبشرش حاجه وانا في معاينات يابشا انت عملت معايا واجب وانا في مكتبك وانت في بيتى لازم قال لى متحاولش...... خلص المعاينه وانا منتظر يطلب منى حاجه ..محصلش خرجت معاه لعربيته ..وسئلته دى عربيتك الخاصه قال لى نعم...قلتله مش انت بتحط فيها بنزين قال ايوه وضحك...قلتله والشغل بيدفع لك تمن البنزين قال لا ..بس باخد مرتبى قلت بس خلاص اخلى التفويله دى عليه انا المره دى ... ضحك وقال انسى ولولا انى شايفك انسان محترم كنت قلتلك كلام يضايقك... انا طبعا بقيت في نص هدومى................. رحت له الحى بعدها بيومين على طلبه وبصراحه مش عارف هقابله ازاى..المفاجأه نفس المقابله المحترمه وطلب منى اختم ورق من الدور التالت بستفسر فين بالظبط قال لى خليك انت وطلع هو خلص باقى الاوراق... وقال لى يومين وتابع مع الكهرباء وفعلا رحت الكهرباء ودفعت الرسوم وكل حاجه تمام.................... قلت لازم اروح له تانى اشكره وفعلا رجعت للحى..بمجرد مادخلت عليه لقيته بيقولى خير انا بنفسى اللى باعت ورقك للكهرباء...... قلت له انا راجع بس اقول لك ربنا يبارك فيك ويكتر من امثال وحييته فعلا لانى مش مصدق.............................دا واحد متربى ومحترم ... وبعده بكام مكتب واحد راضع حقد ومريض نفس بعذاب البشر

[Elawany13]

بصراحة مش لاقى موقف عدل هههههههههههههههه
المواقف الكويسه لما بتلاقى حد معرفه أو تدور على واسطه أو لما بعمل شكوى محترمة وبصبر عليها بتلاقى كل حاجه تغيرت 180 درجة
غير كده الواحد بيطلع عينه

[A_H_M_A_D]

رخصت عربية جديدة و ادوني نمر قديمة ... لغاية كده عادي

بكشف على النمر لقيت عليها مخالفات برقم كبير من المالك القديم , بصراحة اتضايقت قوي , قمت مقدم شكوى على موقع وزارة الداخلية , وانا عارف ان مش هايحصل حاجه , النهارده لقيت عقيد من ادراة المرور بيكلمني على الموبايل و بيسألني ايه المشكلة و حكيتهاله بالتفصيل , قالي اروح المرور اطلع بيان بتاريخ صرف اللوحات و اطلع على النيابة اشيل المخالفات , ولو فيه مشكلة قابلتني اكلمه على موبايله و هو هايحلها
يعني حسيت ان فيه بصيص من أمل :)

[volociximab]

مصر مش دولة واحدة
فيه دولة الجيش: لما تدخل الجيش هتلاقى عالم تانى ببشواته بعبيده بمستشفياته بخدماته
دولة السجون و المعتقلات: نفس القصة عالم منفصل تماما عن عالمنا
دولتنا: الناس الى بتشوفهم فى الشارع
دولة رجال المال: عالم مختلف تماما عننا
دولة قاع المدينه بالحرامية بالدعارة بالمخدرات

[miam0502788391]

الى الآن لم أدخل اى مصلحة حكومية والاقى معاملة آدمية
اما موظف مش فاهم يعذب الناس اوواحد علشان يقضى شغل بيستحل الرشوة

[wawamoha]

مصر مش دولة واحدة
فيه دولة الجيش: لما تدخل الجيش هتلاقى عالم تانى ببشواته بعبيده بمستشفياته بخدماته
دولة السجون و المعتقلات: نفس القصة عالم منفصل تماما عن عالمنا
دولتنا: الناس الى بتشوفهم فى الشارع
دولة رجال المال: عالم مختلف تماما عننا
دولة قاع المدينه بالحرامية بالدعارة بالمخدرات

تسمحلي اشيرها على الفيس .ز الكلام كبير فعلا...