معقوله !!!!!!. ثورة 23 يوليو .

[goodwave]

بصراحة احب ارجع للموضوع الجدي الاساسي قبل ما العملية تقلب هزار او خلاف على المعنى اللغوي (ثورة او انقلاب)!

اما عن الثورة فهي بلا شك طفرة وتغيير عظيم في تاريخ مصر ويكفي ان قام بها مجموعة من "الشرفاء" الذين كان شغلهم الشاغل تحرير مصر وتحرير الغلابة من الظلم والاستعباد.

يا جماعة الظباط الاحرار كانوا فئة متعلمة فقيرة مستنيرة قراوا في تاريخ الامم واللي بيحصل حولنا واخدوا منة الصالح لتحرير البلد!

بصوا للسد العالي وبناءة والكفاح اللي وراه اللي ممزوج بالحب! وقارنوا بكيفية حفر قناة السويس في عهد امللك!

بصوا لتاميم قناة السويس واللي عاد علينا منها من تعزيز موقعنا الاستراتيجي وحصولنا على اموال مستحقة!

بصوا للمصانع ونظام المعاشات وتوزع الاراضي الزراعية على الفلاحين!

بصوا لهيبة مصر بين العالم وبين العرب بعد الثورة وكام ثورة قامت بعدها مستمدة كيانها وروحها من ثورة يوليو!

اذا اردنا ان نتكلم عن الثورة فرجاء ان لا نغفلها حقها ونظلمها بما فعل السفهاء بعدها!

يا سادة لولا هذة الثورة المنظمة المستنيرة لكنا مملكة متناحرة مثل كثير من دول الخليج وليس كلهم او لكنا اقاليم متنازعة مثل السودان او لكنا نعاني من المجاعات والفقر مثل كثير من دول افريقيا او ما كان بيننا شيء يسمى الطبقة المتوسطة اللي زي وزيكم!

معلش طولت عليكم ولكن الساكت عن الحق شيطان اخرس.

وشكرا للاخ الذي طرح الموضوع للمناقشة !

ملحوظة
في راي الشخصي هي "ثورة" في شكل انقلاب عسكري لان الثورة ممكن يقوم بيها الشعب ضد الجيش والحكومة! يعني ثورة بس مش صح مية في المية و كلمة انقلاب مش صح مية في المية بس لو انا حاختار يبقى حقول "ثورة" زي كل الناس ووسائل الاعلام بتقول!

goodwave

[sab3aawy]

مكنتش عايز اعلق على الموضوع ده لحسن ألاقى ميت واحد طالعين يقولولى امسك حراااااااااامى بيتكلم فى السياسة اهو

لكن فى جملة واحدة: قامت انقلاب "ثورة" 23 يوليو فى عام 1952 بمبادرة من الجيش لإصلاح بعض الأحوال الفاسدة. فى مصر.......
وماتت ثورة 23 يوليو فى عام 1954حين اطاح مرتزقة الثورة باللواء محمد نجيب الذى تمسك بأهداف الثورة المعلنة، ليعود الفساد اسوأ مما كان


الثورة التى يجب ان نحتفل بها فعلا هى ثورة 1919 فهذة الثورة هى الثورة الوحيدة فى التاريخ الحديث التى نبعت من قلب الشعب المصرى وحمل لواءها كل مواطن فى مصر وتمخضت عن ميلاد مصر الحديثة فى اوائل القرن العشرين، مصر الإقتصاد(طلعت حرب-عبود) والعلم(مصطفى مشرفة-حسن فتحى) والثقافة (العقاد-محفو-طه حسين-يوسف وهبى وآلاف آخرين) التى كانت محط الانظار فى النصف الأول من القرن الماضى والتى لا نزال نعيش على ذكراها هى مولود شرعى لثورة 19 التى لا نذكرها إللا للتندر والتنكيت على بعض العبارات المأثورة عنها

وسبحان من له الدوام

[Hazem Salah]

يابو حميد

دى بتتدرس فى كلية سياسة و اقتصاد على انها ثورة

دى بتتدرس فى west point حتى ، على انها ثورة

و لا أقول اننا نغلق عقولنا و نستسلم للمسلمات ، و لكن هناك الكثير من المواضيع المترتبة على

المسلمات تقبل الرأى، لكن الثوابت أشك انه من المستحب التمطع فيها.

أنا لم أكن ولدت طبعا ، بس بحسبة بسيطة ارى ان كل المصريين باركوا و استفادوا من الثورة،

طبعا ممكن نستسنى اسر البدراوى عاشور و الأباظية و طلعت حرب و أبورجيلة و سراج الدين و

غيرها من قلة محدودة ، ممكن يكون ليهم تعليقك

و بعدين وقتها مين كان ممكن يعترض غير الجيش ( اللى كان مسموح لأبناء الشعب و فى نطاق

ضيق ) بدخوله..

و بعدين لولا مجانية التعليم ، كان فيه ناس كتير ( باستثناء القلة المتميزة) لن يتاح له دخول

الجامعة ( ده باعتراف وزراء و علماء كتير متعلمين بجد ).

و عموما هذا رأيك و أنا أحترمه

[PRO-DRIVE]

بصوا للمصانع ونظام المعاشات وتوزع الاراضي الزراعية على الفلاحين!

بصوا لهيبة مصر بين العالم وبين العرب بعد الثورة وكام ثورة قامت بعدها مستمدة كيانها وروحها من ثورة يوليو!



النقطه الاولى : حتى فى بلاد اوروبا مفيش النظام العجيب بتاع الاراضى ده تلاقى كل مستثمر عنده 5000 فدان و عنا تسمى زراعة و استثمار من 300 فدان الصح انهم كانوا يخلو الاراضى عند الاقطاعيين دول و ياخدوا منهم تكاليف اصتصلاح الفلاحين لاراضى زراعية جديده مش انك تاخد دة من ده و كده كانت مساحة الزراعة حتكبر بس فيين



2: كان فى شار بحرينى زماااان بيقول لخطيبته وجهك ولا الجنيه المصرى :D والله العظيم
و اى كرامه للمصرين اللى فى الخارج دة المصريين عشان يدخلوا اى دوله فى العالم مستحييييييل الا بطلووع الروح و اذا حصلك مشكله فالسفارة اول ناس تخلع ايدها عنك و تلاقى الفلبين عشان شغاله قالبه الدنيا

[د.أحمد سمير]

الخلاصة
ثورة 23 يوليو ألهمت شعوب العالم الثالث نحو أمرين
الأول : التحرر من الاستعمار
الثاني : الديكتاتورية وتعميق نظام حكم الفرد
وبصوا على كل الدول التي اتبعت منهج 23 يوليو الثوري ستجدوا ما أقوله متحققاً .. يمكن احنا ونحن نسعى للتخلي عن إرث الثورة مشينا بالعكس تماماً إيجاباً وسلباً .
حاولنا التحول نحو الديمقراطية والتعددية ، وفي الوقت ذاته تخلينا عن رصيدنا ومجالات نفوذنا في السياسة والثقافة والاقتصاد .
لكن ما يهمني في تجربة 23 يوليو والتجربة الناصرية عموماً قدرتها الرائعة على بناء الكوادر الشابة بغض النظر عن الهدف أو الأيديولوجيا ، والدليل أن منظمة الشباب والتنظيم الطليعي لا زال المنتمين إليها يتبوؤن مناصب القيادة في جميع التنظيمات السياسية في مصر منذ 40 سنة ، حتى في حركة الإخوان المسلمين إضافة لجميع الأحزاب والحركات السياسية المصرية .
تقبلوا خالص مودتي

[جندى مجند]

الثورة فعلاً أكيد ليها ايجابيات و سلبيات و مينفعش أى حد عاقل أو منصف يقول انها 100% ايجابيات أو 100% سلبيات ... لكن اللى عايز أقوله هو ان الثورة خلاص ماتت أو فى أفضل الأحوال بتودع ... الثورة لغت الاقطاع و النهاردة الاقطاع بيرجع تانى و بخطى سريعة ... الثورة لغت الامتيازات الأجنبية ... و النهاردة الأجانب بيعتبروا أفراد من الدرجة الأولى فى البلد و المصريين درجة تالتة ... الثورة عملت مجانية التعليم للجميع و النهاردة نبقى بنضحك على نفسنا لو قلنا ان التعليم مجانى ... الثورة لغت القطاع الخاص و عملت القطاع العام ... النهاردة القطاع العام اتلغى و القطاع الخاص بقى متحكم فى كل حاجة ... الثورة لغت البنوك الأجنبية و النهاردة معدش فى غير بنك مصر و الأهلى و الباقى كله بنوك أجنبية ... الثورة لغت الملكية ... و الله أعلم الأيام الجاية مخبيلنا ايه فى الموضوع دة ... حد يقدر يقوللى ايه اللى فاضل من الثورة؟؟

[محمدايهاب]

الثورة كانت بداية صحيحة للتغيير من اللواء محمد نجيب القائد الحقيقي وبداية الخطا هو تولي عبد الناصر الحكم لكن لا أستطيع أن أنكر الأثر الكبير الذي خلفه عبد الناصر في الأقتصاد ( السد العالي - قناة السويس - مصانع الغزل و النسيج - مصانع الحديد و الصلب - و شركة النصر ) وفي الزراعة ( زيادة الإنتاج -توزيع الأراضي الزراعية على الفلاحين ) و في الحربية و رفع مكانة مصر عاليا كما أن الثورة كانت بداية رفض الأستعمار و كان لعبدالناصر كما يشه التاريخ دور كبير في تحرير الجزائر مثلا لمن معالم الثورة و مبادئها أختفت نهائيا في العصر الحالي مثلا مصر تستورد ثلث حاجتها من القمح !!!!!

[sab3aawy]

الثورة كانت بداية صحيحة للتغيير من اللواء محمد نجيب القائد الحقيقي وبداية الخطا هو تولي عبد الناصر الحكم لكن لا أستطيع أن أنكر الأثر الكبير الذي خلفه عبد الناصر في الأقتصاد ( السد العالي - قناة السويس - مصانع الغزل و النسيج - مصانع الحديد و الصلب - و شركة النصر ) وفي الزراعة ( زيادة الإنتاج -توزيع الأراضي الزراعية على الفلاحين ) و في الحربية و رفع مكانة مصر عاليا كما أن الثورة كانت بداية رفض الأستعمار و كان لعبدالناصر كما يشه التاريخ دور كبير في تحرير الجزائر مثلا لمن معالم الثورة و مبادئها أختفت نهائيا في العصر الحالي مثلا مصر تستورد ثلث حاجتها من القمح !!!!!

الحاجة الوحيدة اللى هوافقك عليها هى السد العالى، وهو يكاد يكون الأنجاز الوحيد المحترم لعهد عبد الناصر ، مثلما نشهد لعهد السادات بإعادة الأرض المسلوبة وللعهد الحالى بإعادة بناء البنية التحية لمصر وتوفير الطعام للمصريين

اما باقى الحاجات اللى انت قلتها فتعال نناقشها واحدة واحدة:

1- قناه السويس : كان عقدها سينتهى من تلقاء نفسه بعد سنوات قليلة من التأميم وكانت ذريعة مصر وقتها للتأميم ستكون اقوى وسيقف العالم كله بجانبها، لكن تهور عبد الناصر ادى الى ظهورنا بمظهر اللصوص وجرنا الى ويلات حرب ضد ثلاثة دول قوية عسكريا فى 1956كدن ننسحق تحتها لولا تدخل امريكا-التى كانت تطمع فى مصر كحليف آنذاك-لأيقاف هذة الحرب وكان من نتيجة هذة الحرب ان فقدنا ميناء إيلات الذى كان تحت الإدارة المصرية للأبد (تخيل لو كان ميناء إيلات بين ايدينا حتى الآن، لكان الوطن العربى بالكامل متصل بريا ولما كان لاإسرائيل اى منفذ على البحر الأحمر ولما تبجحت بين الحين والآخر ببناء قناه موازية لقناه السويس)

2-مصانع الغزل والنسيج: احب اصحح معلوماتك فى هذا الصدد فعبد الناصر لم يكن له اى فضل فى إنشاء اى مصنع غزل او نسيج فكلها كانت مجهودات طلعت حرب(شركه مصر للغزل والنسيج وشكرة مصر لحلج الأقطان) وعبود باشا (كفر الدوروا للحرير الصناعى وشركات الصباغة) وكلها موجودة من قبل عهد الثورة المجيدة

3- مصنع الحديد والصلب: حلفة من حلقات نصب الروس علينا حيث ان هذا المصنع كان من المفترض له ان ينتج صلب كربونى فى المرحلة الأولى ثم يتم تطويره الى مرحلة الصلب السبائكى(الصلب عالى الشد والصلب الغير قابل للصدأ "ستينليس ستيل" ولكن ثبت مع الوقت ان هذا المصنع لا يصلح لإنتاج الصلب السبائكى لأن جودة الخامة المنتجة منه اقل من المواصفات المطلوبة لإناتج الصلب السبائكى، وكان هذا بعلم الروس وامثاله كثيرة من المصانع التى استوردناها من الروس الذين اتخذهم عبد الناصر حلفاء لأان فكرهم الشمولى يناسب نظريته الديكتاتورية برغم اعلانه طوال الوقت انه من بتوع عدم الإنحياز

4-زيادة الإنتاج الزراعى فى عهد عبد الناصر: اكبر نكتة سمعتها فى حياتى، ما اعرفه ان مصر قبل عهد عبد الناصر كان فيها فقراء لكن لم يكن فيها جوعى، بعد عهد عبد الناصر كان مواطنى الطبقة المتوسطة وفئة الموظفين يقفون فى الطوابير بالساعات للحصول على دجاجة او رغيف عيش اسود ملئ بالمسامير، ويمكن لصغار السن من القراء سؤال ابائهم عن تلك الحقبة المظلمة

5-توزيع الاراضى على الفلاحين: اكبر قرار خاطئ فى تاريخ الزراعة فى مصر، حيث قضى تماما على ريادة مصر فى زراعة القطن عالميا ، لأنها زراعة لا تنجح سوى فى ظل المساحات الواسعة والاستثمارات الضخمة، وهو ما توصل له المصريون خلال 150 سنة من التجاربمنذ ان ادخل محمد على القطن الى مصر، هناك قاعدة شهيرة فى إدارة شئون الحياه تقولnever touch a woring machine اى لا تعبث بماكينة تؤدى وظيفتها، لكن عبث عبد الناصر بآلية الرزاعة فى مصر اطاح بمصر نهائيا من سوق القطن العالمى وجوع المصريين

6-مكانة مصر الحربية فى عهد عبد الناصر: مش عارف اقول إيه، متهيالى ان دى بالذات مش محتاجة رد، فقد اسفرت مجهودات مصر الحربية فى عهد الشاب عبد الناصر الذى فوجئ وعمره 36 سنة بأنه اصبح رئيس دولة فراح يبعثر ثروتها هنا وهناك على احلام زعامته، اسفرت عن ضياع إيلات بسبب قرار تأميمم القناه الذى اختار له وقت خاطئ، وضياع كل مخزون مصر من الذهب فى حرب اليمن التى لم يكن لنا فيها ناقة ولا جمل، وضياع سيناء التى راحت بدون حرب نظرا لانها تم غزوها بجيش منظم فى مقابل جيش انشغل قادته فى نهب ثروات القصور ومواعدة الممثلات، مات عبد الناصر وقد ضاعت من مصر إيلات وسيناء وكل ذهبها، وحتى بعد ان افنى السادات آخر عشرة سنوات من عمره لإعادة سيناء فقد راحت من مصر فى خلال حرب الستة سنوات غزة التى كانت تحت الإدارة المصرية للأبد، فأين هى تلك المكانة الحربية التى تتحدث عنها

7- ثورة الجزائر: من الذى اعطى لعبد الناصر الصلاحية لانفاق ثروة مصر على مرتزقة اليمن وثوار الجزائر وتجويع الشعب المصرى، سؤال يبقى بلا جواب

8- مصر تستورد ثلث حاجتها من القمح: وذلك تقدم كبير جدا حيث اننا نتيجة لمغامرات عبد الناصر وافلاسنا الزراعى كنا نستورد 80% من حاجتنا من القمح حتى وقت قريب

وعلى ذلك ترى انه فى مقابل السد العالى دفعنا الكثير والكثير والكثير ارضاء لأحلام الزعامة للفتى الشاب ابن الستة وثلاثون عاما الذى تمكن قبل وفاته فى سن الثانية والخمسين ان يقضى على مستقبل وثروة وكرامة شعب باكمله

قال عبد الناصر: " من لا يملك طعامه لا يملك حريته"

ومات عبد الناصر وقد فقدت مصر طعامها وحريه الكثير من ارضها

وفى هذا ملخص الكلام

[وائل عطية]

برافو سبعاوي
أوافقك الرأي تماماً فيما قلت
فم نجني من وراء عبد الناصر سوى الزعامة الكاذبة

[ABU HAMZA]

رد مختصر و مفيد

و بالشفى للجميع

[PRO-DRIVE]

100% صح كلامك يا سبعاوى

[جندى مجند]

برافو يا سبعاوى .. فى سطور قليلة فندت بأسلوب "السهل الممتنع" كل غسيل المخ اللى بيتعملنا فى مادة التاريخ و ليل نهار فى الجرايد و التليفزيون

[hazem_khidr]

الف شكر يا باشمهندس علي التوضيح دا و انا معاك.
احب اضيف حاجه واحده بس يمكن ما تكونش ليها علاقه بالموضوع:
ان الحاكم الفعلي ايام عبد الناصر هو صلاح نصر رئيس المخابرات علي ما اعتقد و كان بكلمه منه بيقعد جمال عبد الناصر في البيت مجرد ما يقوله ما تنزلش انهارده في مخطط لاغتيالك!!
و طبعا ناس كتير عارفه صلاح نصر و مدي جبروته و قوته و اللي كان بيعمله مع شباب الجامعه و الممثلات
اتفرجو علي فيلم الكرنك كان كمال الشناوي قايم بدوره.
اتفرجوا علي فيلم حافيه علي جسر من ذهب كان عادل ادهم قايم بدوره.
و عادل ادهم هر في شخصيه صلاح نصر في عده افلام اخري لا تسعفني الذاكره حاليا لذكرها...

[Mina W]

قال عبد الناصر: " من لا يملك طعامه لا يملك حريته"

ومات عبد الناصر وقد فقدت مصر طعامها وحريه الكثير من ارضها

وفى هذا ملخص الكلام

بصراحة قلت اكتر من اللى كنت عايز اقوله و بشكل افضل من اللى كنت هاقوله

و زى ما بيقول اصبت كبد الحقيقة بكلامك، نفسى نقدر نقرا حقيقة تاريخنا بدل من الاكاذيب اللى عايشين فيها دى و اللى كتير بقى بيصدقها و يرفض يصدق اللى حصل و يفضل يعيش كذبة على انه يواجه اللى حقيقة اللى بتبقى مرة :!: ، خاصة فى شخص زى عبد الناصر اللى عملوا حزب على اسمه شكلهم عاوزين يكملوا على البلد

[Islam_galal]

عبد الناصر !!!!!!!!!
كم اسرة فقدت ابن من ابنائها في عهده في حروب لا قيمه لها - زنبهم في رقبه مين؟؟؟
حد يعرف يقوللي الجنود اللي حاربوا في اليمن و قتلوا شهداء و لا لأ
حد يعرف يقوللي الجنود اللي حاربوا في اليمن و عادوا هل هم قتلة ام مجاهدين
حد يعرف يقوللي ليه اي رجل كان بيخاف يتكلم في السياسة حتي في بيته
مصر كانت دولة زراعية قبل الثورة
حد يعرف يقوللي احنادولة نوعها ايه بعد عبد الناصر
و كان اقتصادنا قوي جدا بالمقارنة لما بعد الثورة و حتي الان (الجنيه الدهب كان بحوالي 95 قرش)
علي فكرة و مش دفاع او تحبيذ للملكية لكن قبل الثورة كنا اكبر دولة في المنطقة علي الاطلاق و لم و لن يكون هذا فضل للثورة و الدليل مساعداتنا لليبيا ضد الاحتلال الايطالي و حرب 1948 حيث كانت الريادة لمصر مع مراعاه فساد الجيش في حينه
23 يوليو هو ذكري الانقلاب العسكري في مصر او ممكن نقول ............... ثورة العسكر