علاقتى بزوجتى بتدمر

[Mr. Bean]

سلام عليكم

انا عضو قديم معاكم بس عملت اكونت تاني حالا لحساسية الموضوع شوية ( بعتذر لإذارة المنتدى )

محتاج رأيك ياجماعة بس استحملوني احكي الموضوع

انا متجوز بقالي 10 سنين وربنا رزقني بولدين ... اجمل حاجة في حياتي

علاقتى بمراتى خلال العشر سنين دول متقلبة شويتين بمعنى مافيش حاجة إسمها حلوة علي طول ومافيش حاجة إسمها وحشة علي طول .. بس الغالب الكويس

انا مقيم برا مصر وهي معايا بقالنا دلوقت 5 سنين

الجديد اللى حصل معايا في حياتي .. مراتى إتغيرت اوي قبل كده كانت تحصل مشكلة بينا كان كبيرنا يوم او اتنين ونتصالح وخلاص .. بقالي فترة لما بتحصل مشكلة بينا لازم نزعق جامد اوي وخناقة ونوصل للتهديد بالانفصال وانا اللى برجع في كلامى .. رجوعي في كلامى من الحالات اللى بتحصل ادامي .. الاولاد بيتمرمطوا بين الاب والام وحياتهم بتدمر .. دا في كذا حالة ادامي .. وارجع واتصالح وخلاص واعدي

ابوها وامها دى حياتها اولا واخيرا وإنا بعتبر نفسي مش موجود ادامهم .. بننزل مصر .. المغناطيس يشتغل التأثير في كل حاجة رأيهم هو الاول .. بعديها وومشي حياتي وخلاص بس بقف في نقط هى بتفهم وتفوء للحظات وترجع تاني بس بتعرف إنى رفضت عشان دى مش دماغها ابدا

الجديد دلوقت اى مشكلة بتحصل بنزعق جامد اوي لمرحلة فوق الوصف

حاليا دلوقت .. العلاقة بينا مقطوعة بقالها 4 ايام وهتطول اكتر من كده عشان حصل بينا مشكلة وكل واحد فينا في حاله .. المشكلة إني مش بعرف اتعامل مع الاكل وهي شايفاني متمرمط في الاكل وهي عادي ولا في دماغها تأثير اهلها اعتقد بنسبة كبيرة إنهم قالولها تعمل كده بس إن بعض الظن اثم عشان بكون في الشغل فترات طويلة .. ومش عارف اعمل

ياريت حد يقدر يساعدني عشان بجد حياتي بقت مقرفة جدا وصعبة بس دايما الاولاد هما في دماغي قبل اى شئ

آسف عالاطالة

[hilal]

نوعية المشاكل؟
مادية؟
عاطفية؟
متعلقة بالاولاد؟

[Ahmed abdkarim]

ربنا ييسر لك الحال

انا اسف بس انت غلطان من الاول المفروض كنت تتعود الخناق يكون على الحاجات المهمه بس و تحاول تكبر عن صغائر الامور او التوجيه بطريقة كويسة ومتحاولش ابدا تهدد بالطلاق لو متقصدوش فعلا علشان بعد كده حتعرف انها حتبقى لبانة و ملهاش لزمه .

حركة وحشة جدا جدا منها انها مش بتحضر لك الاكل علشان متخاصمين يعنى بنفس المبدأ مثلا لو انتو اتاخنقتوا تقولها اطلعى بره بيتى او ملكيش اى مصاريف خالص هى كده سايقه فيها شوية حاول تعرف اذا كانت هى عاوزه تكمل العلاقة اصلا ولا لأ ولو لأ طلقها و ممكن تردها بعد كده و تبقى قرصة ودن ليها طول حياتها

[Mr. Bean]

نوعية المشاكل؟
مادية؟
عاطفية؟
متعلقة بالاولاد؟

مشاكل عادية

يعنى مثلا قولتلها علي حاجة حصلت .. نفس الكلام بالظبط راح لاهلها برغم إنى مأكد عليها اى حاجة بينا ما تطلعش برا

المشكلة المرة دى عمري ما تخيلت إنها تكبر بالشكل دا

حاليا عندى ضغط مالي شويتين .. مزنوق اوي هي في الاول كانت بتهدينى بعد كده بقي كل حاجة عادي

[Mr. Bean]

ربنا ييسر لك الحال

انا اسف بس انت غلطان من الاول المفروض كنت تتعود الخناق يكون على الحاجات المهمه بس و تحاول تكبر عن صغائر الامور او التوجيه بطريقة كويسة ومتحاولش ابدا تهدد بالطلاق لو متقصدوش فعلا علشان بعد كده حتعرف انها حتبقى لبانة و ملهاش لزمه .

حركة وحشة جدا جدا منها انها مش بتحضر لك الاكل علشان متخاصمين يعنى بنفس المبدأ مثلا لو انتو اتاخنقتوا تقولها اطلعى بره بيتى او ملكيش اى مصاريف خالص هى كده سايقه فيها شوية حاول تعرف اذا كانت هى عاوزه تكمل العلاقة اصلا ولا لأ ولو لأ طلقها و ممكن تردها بعد كده و تبقى قرصة ودن ليها طول حياتها

يهمنى رأيك ... اتكلم معاها المرة دى

معلومة .. كذا مرة نتخانق واقول بلاش الزعل يطول انا مابحبش كده .. هي عادي

ولا اسيب القطيعة اللى بينا تفضل ؟؟؟؟؟

معلومة اخيرة .. انا حالي متبهدل جدا جدا جدا جدا بس بحاول بقدر الامكان اتظاهر إني عادي عاوزاحسم الموضوع بس بتردد عشان العقبة الكبيرة .. الاولاد

[hugan]

في ايه
الحريم مالهم دا يمكن رابع موضوع عن ستات مستهتره بالبيت والزواج والزوج

[hilal]

طالما أن المشاكل عادية أنصحك بالآتي:
اولا: لا تعود للتهديد بالطلاق ولا تعود لسانك على نطقها
ثانيا: خليها تعرف بطريقة غير مباشرة انك داخل في مشروع زواج ثاني ولن تطلقها مهما حدث لانها أم اولادك
ثالثا: لا تعود للمنزل إلا عند النوم حتى تزيد الشكوك حول مشروع الزواج الثاني
خلاصة تجارب السابقين أنه لن يؤدب المرأة إلا امرأة مثلها
وأدعو لك بالتوفيق

[midoabdeen]

أنا من رائي أنك تسببها شويه علشان تعرف قيمه بيتها
كل المشاكل ممكن تعديها الا ان مراتك تخرج أسرار بينكوا لأي مخلوق ثاني حتى لو اهلك
واضح أنها اتعودت علي الخصام كثره الخناق بينكوا

[م أحمد]

رأييى ان حساسيتك زايدة شوية بسبب الضغط العصبى و المشاكل المادية عندك ، و اللى منتظر منها تقف بجانبك و هى و لا كأنها موجودة

لو حضرتك مسلم انصحك بقراءة القرآن الكريم سور بتحبها مثلا هتلاقى جبال انزاحت

حاجة تانية فى الموضوع اللى هى نقطة المشاكل الجنسية ، يعنى هل فى جفاء بينكم او مشكلة معينة ، لان بتحصل مشاكل ضخمة جدا و فعليا اللى تحت السطح هى دى المشكلة الرئيسة

[عبدالحكيم]

أخي الكريم،


أولاً: لا يخلو بيت من مشاكل أو عدم وفاق بين الزوجين في جانب من جوانب الحياة أو عدم رضا.. كم بيت مقفول عليه بابه وهو من الداخل لا يعلم به إلا الله؟


ثانياً: راجع نفسك أنت أولاً. ما الذي أوصل الأمور بينك وبين زوجتك إلى هذا الحد؟ كيف تعاملها؟ هل تقلل من شأنها أو تهين أهلها؟ أو تُسفِّه من رأيها؟ هل تصرخ في وجهها على أتفه الأسباب ولا تقدر تعبها في البيت، الخ؟.. هذه أشياء بسيطة بالنسبة لنا نحن الرجال لا نلتفت إليها لكنها عميقة الأثر بالنسبة للنساء. كلمة طيبة أو نظرة حنونة ترفع زوجتك إلى السماء وتغرس حبك في أعماق قلبها..

ثالثاً: لا أنصحك أبداً بتهديدها بالزواج من أخرى، لأنها لن تنسى ذلك لك أبد الدهر، ولن تثق فيك، ولن تضمر لك الخير حتى وإن كان كلامك مجرد تهديد. ذلك لأن هذه الفكرة تنسف إحساس الأمان عند المرأة تماماً وتهز الثقة في شريك حياتها هزاً عنيفاً..

رابعاً: توقف تماماً عن ذكر كلمة الطلاق أو التهديد به لأنه أولاً مدخل للشيطان، ثانياً يقلل من هيبتك عندما تتراجع مراراً بدون تنفيذ، ثالثاً يجعل زوجتك تستهين بما تقول مهما ارتفع سقف التهديد..

خامساً: من أجل بيتك.. من أجل أولادك.. من أجل زوجتك التي أظن أنها باقية عليك وإن حصل الخصام.. أنصحك بأن تدعوها الليلة للحديث بعد رجعوك من صلاة العشاء وضع النقاط على الحروف بهدوء ودماثة خلق، أي بدون تعصب أو تهديد من أي نوع. افتح قلبك وقل لها أن أهلها أهلك لكن توجد حدود وللبيوت أسرار. ولا تنسى أن تذكّرها بأنها رغم ما حدث لا زالت حب حياتك وأول فرحتك..

أو الأفضل: ادعوها إلى العشاء خارج المنزل مع أطفالك وستجد الحياة اُستأنفت تلقائياً بدون عتاب

[elpilot]

انا عندي نفس مشاكلك دي ويمكن اكتر وبحس دايما ان زوجتي بتتغير بعد كل زياره لاهلها وترجع تهدي تدريجيا حتي موعد الزيارة التاليه تعود للجنان حاولت اقلل من الزيارات دي قدر الامكان ولكن منفعش والان انا وضعت خطه للزواج الثاني وطلاقها ان ارادت ولكن امامي عقبة واحده فقط ان تغلبت عليها حلت جميع مشاكلي الا وهي وضع الطفلين اولادي لو وجدت لهم مخرج ووضع وتربية تليق بهم لطلقتها فورا حتي لو لم اتزوج لان راحة البال بالدنيا هنعيش في مشاكل وخلافات ليه

[Ahmed abdkarim]

يهمنى رأيك ... اتكلم معاها المرة دى

معلومة .. كذا مرة نتخانق واقول بلاش الزعل يطول انا مابحبش كده .. هي عادي

ولا اسيب القطيعة اللى بينا تفضل ؟؟؟؟؟

معلومة اخيرة .. انا حالي متبهدل جدا جدا جدا جدا بس بحاول بقدر الامكان اتظاهر إني عادي عاوزاحسم الموضوع بس بتردد عشان العقبة الكبيرة .. الاولاد

خليك مقاطعها بس بينها و بينك بس انما قدام الناس عادى وحاول تحسسها انك مستغنى عنها او مش فارقه معاك يعنى هى بتضغط عليك بحاجات أسف ( عبيطه ) زى الاكل وكده لان هى عارفه ان مفيش فى ايدها حاجه غيرها حاول مثلا تأكل فى الشغل او بعد الشغل او تأكل عند والدتك بس اوعى تعرف انك اكلت عندها علشان متكرهش والدتك ومفيش مشكلة انك تاخد يوم اجازة و تروح اى مكان مع اصحابك .
ولو الموضوع اتفتح كلمها جد وقولها انا فضلت مستحمل الفترة اللى فاتت علشان خاطر البيت و اولادنا بس مش حينفع استحمل زيادة عن كده واسكت خالص متتكلمش فى نقاشات خالص

[volociximab]

خناقة عادية بس دلع الست زيادة حبتين

[samyyousef]

يا صاحب البوست اؤيدك تماما في ان الطلاق عواقبه وخيمة و اكثر من اية اضرار تتوقعها، يكفي انك ستحرم من اولادك و يحرموا منك و انت على قيد الحياة....لاتطلقها الا اذا استحالت العشرة بينكما...مفيش حاجة اسمها تطلقها قرصة ودن

[samyyousef]

انا عندي نفس مشاكلك دي ويمكن اكتر وبحس دايما ان زوجتي بتتغير بعد كل زياره لاهلها وترجع تهدي تدريجيا حتي موعد الزيارة التاليه تعود للجنان حاولت اقلل من الزيارات دي قدر الامكان ولكن منفعش والان انا وضعت خطه للزواج الثاني وطلاقها ان ارادت ولكن امامي عقبة واحده فقط ان تغلبت عليها حلت جميع مشاكلي الا وهي وضع الطفلين اولادي لو وجدت لهم مخرج ووضع وتربية تليق بهم لطلقتها فورا حتي لو لم اتزوج لان راحة البال بالدنيا هنعيش في مشاكل وخلافات ليه

سيدي الفاضل
العقبة الوحيدة التي تتحدث عنها هي ام العقبات...هي العقبة الاولى و الاخيرة
و اقولها لك بصراحة من يطلق زوجته و له اولاد فاليعتبر نفسه لم ينجب من الاساس لان الامر لن يقف عند عدم القدرة على تربية الابناء و رؤيتهم فحسب، بل قد يصل الامر الى كره هؤلاء الابناء لابيهم بسبب ما ستقوله لهم امهم
مستحيل ان تجد في مصر طلاق متحضر الا ما ندر...