رايكم يهمنى .. وظيفة فى الرياض

[3abdo.it]

المرتب 2300 ريال
سكرتير فى مدرسة اجيال
السكن والانتقالات وكل الاشياء دى عليهم
+1500 قمية تذكرة سنوية
+ بعد سنة يمكننى استقدام زوجة وهيدونى بدل سكن للمكان الى هسكن فية



اية رايكم

[MOUSTAFA_SAAD]

بدل السكن كام
وفيه بدل انتقال ولا لا
وفيه اجازه مدفوعه ولا لا
لانك لما تجيب مراتك وتسكن بره لازم تاخد بدل الانتقال
والراتب ده تعيش بيه انت ومراتك فقط بدون اى توفير
لو لوحدك حتوفر منه

[mk3]

الطعام على مين

[ESO101]

المرتب ضعيف والرياض المعيشة فيها غالية
هتصرف مرتبك قبل آخر الشهر على أسسيات الأساسيات !
يعني يادوب تاكل وتشرب وتلبس

+ بعد سنة يمكننى استقدام زوجة وهيدونى بدل سكن للمكان الى هسكن فية

مفيش حاجة كدا
أي وعود تبقى مكتوبة في العقد بالأرقام
و أي حاجة يقولولك ( هـنعملها ) إعتبرها هراء لحد ماتحصل

[Rsarabia]

قليل جدا هتتغرب عن مراتك وولادك يبقى لازم مرتب كويس و توفر منه كتير

[Bassem Youssef]

المرتب تعبان و في اجراءات تقشفيه هناك و زياده اسعار بسبب عجز الموازنه ( 350 مليار ريال عجز تقريبا)

[midoabdeen]

اوووعي تسافر علي المرتب دا
يوم ما تقول هتسافرر مش اقل من 4000 ريال وكمان يبقي قليل
وكمان العقد لازم يبقي مكتوب فيه كل حاجة اجازات و وبدلات الانتقالات و السفر و السكن و بنسب مش اي كلام
المفروض ليك 3 شهور بدل سكن لو معاك اهلك
وربنا يوفقك
متسافرش علي مرتب قليل علشان هتفضل طول عمرك مرتبك قليل

[amrelsha3er]

قليل جدا
ربنا يوفقك

[tkamal]

انا نعرفش حالك فى مصر و لا مرتبك بس رائى

لا
كده تبقى غربه اونطه

[hh]

2300 ريال أقل من 2300 جنيه في مصر. مصاريف الحياه في الخليج غالية ده غير انك محتاج سكن و عربية و مدارس....الخ. اللي يسافر و يتغرب لازم يبقى حيعيش على الأقل زي حياته في مصر او أحسن بجانب انه يحوش مبلغ كويس و الا تبقى الغربة بخسارة.

[ahmedwagdy03]

متجيش أحسن . حتضرب نفسك 100 جزمة لو جيت على العرض ده بعد ما تتعرف على الخابور اللى أخدته.
أوعى تفكر إن 2300 ريال يعنى 4600 جنية يبقوا أحسن من ألف أو ألفين بتاخدهم فى مصر

خد عندك الآتي:

1-أول خدعة فى 1500 ريال تذكرة سنوية و طبعا سيادتك تحب تنزل فى الصيف شهر 7 أو 8 اللى هي عطلة الدراسة فى الرياض . أقل تذكرة طيران مش فى رمضان أو العيد ذهاب و عودة 2300 ريال على أعفن شركة طيران اللى هي مصر للطيران .طبعا لو عايز تنزل على عيد الفطر يبقى بتتكلم فى 2800-3200 ريال .
2-بعد أول سنة حيدولك بدل سكن و تجيب المودام و تعيش أحلى عيشة عائلية و أحلام و تطير فى السما . حيدولك كام يعنى .النظام هنا من 3-4 شهور بدل سكن يعنى ممكن تاخد 10000 ريال فى السنة .تعالى بقى شوف حتسكن فين و بكام : البطحاء و المنفوحة أسوأ مناطق الرياض مش أقل من 18000 فى السنة و لو تقدر تعيش فيها بأمان و ده مستحيل . أى منطقة تانية فى أقصى شرق الرياض مش حتقل عن 22-25 ألف .
3-طبعا سيادتك علشان تجيب المودام يبقى لازم سيارة : بعد ما تتنفخ فى إستخراج الرخصة و ده أصبح من المستحيلات إبحث عن سيارة مستعملة مش أقل من 15 ألف علشان تقدر تمشي بيها و مصاريف على الأقل 300-500 ريال شهريا .
4-طبعا أنت عايز تعيش يعنى تاكل و تشرب : حنفترض إنك حتعمل أكلك بنفسك و تغسل هدومك و تكويها بنفسك و إنك حتتقشف و تعيش عيشة أشرف عبد الباقى فى فيلم صاحب صاحبه و تاكل حبة طماطم فى اليوم (مع إن كيلو الطماطم الخضرا ب 6ريال ) مش أقل من 800-900 ريال مصروف شهري.
5-عايز تكلم أهلك و تطمئن عليهم و نت و خلافه يعنى بتتكلم فى 200 ريال شهرى على الأقل.
6-طيب مين حيصرف على بيتك و إنت غايب مش إنت برضه . شوف بقى مصاريف بيتك كام .
7- طبعا أنا مكلمتكش عن المدارس .الدولية إنسى طبعا . الأهلية هي المتاحة لإن الحكومية مش حيستفيد منها عيالك بحاجة (لو عندك عيال فى سن دراسة )
8-حتقول أطلع سنة و لو معجبنيش الوضع أرجع : يبقى بتضيع سنة من عمرك بتشتغل فيها ببلاش و يمكن بتدفع من جيبك و قد تخسر دخلك فى مصر

نسيت أقولك إن الوقود زاد 66% الأسبوع الماضى و المياة و الكهرباء و منتظر أن الأسعار تغلى أكتر من دلوقتى مع توقعات بفرض ضرائب على الدخل و الله أعلم .

يا أستاذ 2300 ريال الهندي مش بيرضى بيهم دلوقتى .إنت لوحدك بعد كل التقشف اللى تقدر تعملة كبيرك توفر منهم 1000-1200 ريال تبعتهم لأهلك .علشان تعيش مستور و معاك أسرتك مش أقل من 5000-6000 ريال فى الشهر و متنتظرش إنك تحوش منهم حاجة

و الله الموفق و المستعان