معروض على رووف

[Mohamed_Hamid]

السلام عليكم ورحمة الله وبركاته

ان شاء الله تكونوا بخير جميعا

محتاج رأيكم... معروض عليا رووف فى منطقة المعادى الجديدة عند مستشفى اليوم الواحد كدة. اسعار الشقق فى المنطقة دى فى معدل ال 430 الف مساحات 160 م 3 اوضة و2 حمام والدور شقتين وغالبا 10 ادوار. الروف نفس الكلام والمساحة بس المقاول بانى شقتين وعامل 2 اوضة بدل 3 مع وجود مساحة ادام الشقة لو حبيت تبنى الأوضة التالتة او تستغلها كقعدة او اى شئ. طبع الرووف سعره اقل والكلام على 230 الف والنصف كاش والباقى على سنتين وطبعا تسليم محارة وحلوق... الاسانسير بيوصل للدور الأخير اللى تحت الرووف يعنى طلوع الروف دور واحد على السلم. الوسيط قاللى انك تدفع للمالك النصف تمضى العقد ويعملك عداد كهربا باسمك من اللى ابو كارت ومادمت طلعت عداد كهربا باسمك خلاص محدش يقدر يقولك مخالف او غيره من الحى.

أولا: عايز رأيكم فى الكلام ده.

ثانيا: انا لسه مبصتش على الشقة.. ايه اللى ابص عليه واركز معاه بما انها رووف؟ ايه الحاجات اللى اخللى بالى منها عموما؟

وشكرا جزيلا...

[pepo2011]

اعتقد ده شغل شمااااال
الافضل انك تسال في الحي او تروح تشوف نظام المنطقة ولو لقيت حد عامل كده من فترة وساكن يعني يبقي الافضل انك تساله هو
لان السمسار والمالك والمقاول بيبقي عاوز يبيع وخلاص

[رحالة]

عداد ابو كارت مش رسمي
العداد بالحديدة هو اللي رسمي
انت لاقي فلوسك في الشارع؟

[Mohamed_Hamid]

المنطقة كلها عاملة كدة حتى العمارة اللى انا ساكن فيها ايجار فى نفس المنطقة برضه الرووف معمول كدة والناس ساكنة عادى وموصلين كهربا وغاز

[Mohamed_Hamid]

استاذ/ رحالة: لا معلش مش فاهم وضحلى اكتر لو سمحت

[احمد المصرى]

اعتقد مفهاش مشكله بس اسال الاول يا باشا محامى شاطر وان شاء الله خير

[hugan]

الروف ممنوع سكني اتاكد الاول ان مصرح بيه

[fepsceasar]

اعتقد والله اعلم.. الروف ده خدمات للعمارة مش للتمليك ، شوف كده هل له عداد كهربا منفصل

[Mohamed_Hamid]

اعتقد مفهاش مشكله بس اسال الاول يا باشا محامى شاطر وان شاء الله خير

ان شاء الله

الروف ممنوع سكني اتاكد الاول ان مصرح بيه

على كلام الوسيط ان معاه تصريح من الحى

اعتقد والله اعلم.. الروف ده خدمات للعمارة مش للتمليك ، شوف كده هل له عداد كهربا منفصل

الكلام ان المالك هيركب لى العداد الجديد اللى بكارات وباسمى ان شاء الله ان كان فيه نصيب يعنى

[hh]

مترميش فلوسك في حاجة مخالفة

[احمد المصرى]

انا اعرف ناس فى اكتوبر ساكنه بقالها سنوات طويله فى روف ومفيش اى مشاكل اطلاقا

[mk3]

عداد ابو كارت مش رسمي
العداد بالحديدة هو اللي رسمي
انت لاقي فلوسك في الشارع؟

لا ثوانى بس
كل العدادات الجديده بكارت مدفوعه مقدمت ( الا للحبايب )
الكارت منه نوعين
نوع باسمك
ونوع كودى برقم ولا يثبت ملكيه فقط لتحصيل استهلاك الكهرباء

[رحالة]

لا ثوانى بس
كل العدادات الجديده بكارت مدفوعه مقدمت ( الا للحبايب )
الكارت منه نوعين
نوع باسمك
ونوع كودى برقم ولا يثبت ملكيه فقط لتحصيل استهلاك الكهرباء

انا بصراحة ما كنتش اعرف ان في منه انواع
انا قصدي ان الكارت لايثبت ملكيتك للشقه
بعكس اللي هو ابو حديده
لان وصل النور بحد ذاته اثبات ملكية

[hilal]

عفوا ، عداد النور مهما كان نوعه ، سواء بكارت او بحديدة لا يثبت ملكية الشقة ،
كل الحكاية ان العداد ابو حديدة لا يتم تركيبه إلا إذا كان المبنى بترخيص وغير مخالف.

وقد رأيت بعض ملاك العمارات يقومون بنقل عداد السلم إلى الروف بشكل ودي بعيدا عن مصلحة الضرائب لتسهيل عملية بيع الروف.

[Mohamed_Hamid]

طيب بعيدا عن موضوع عداد النور
ايه اللى محتاج اطمن عليه تانى فى موضوع الروف ؟