علاج القولون العصبى

[amr011111]

السلام عليكم ورحمة الله وبركاته
ياريت لو حد الاخوه يعرف دكتور باطنى لعلاج القولون العصبى
انا بقرأ على النت ان المفروض الدكتور يعمل سونار ويطلب تحاليل بوتاسيوم وكذا حاجه
والواحد لما بيروح لدكتور بيكتبله علاج من غير ما يطلب اى حاجه وتحس ان الدكتور عاوز يقلب المريض مش غرضه يعالج المريض

الحاجه التانيه الدكتور بيكتب قائمة ممنوعات هوه نفسه مش مقتنع ان اللى قدامه يعملها
فياريت لو حد له تجربه فى موضوع القولون او يعرف دكتور كويس

[pepo2011]

بص ياباشا
القولون لعلاجة لازم تسير علي خطين متوازين وهما العلاج اي الدواء مع الممنوعات اي نوعية الاكل والمواعيد اهم
مش شرط السونار لانه كده كده بيبقي باين ولازم تعرف انه مش هايخف لكن انت بتحافظ علي سكونة وهدوءة فقط
الدكتور مش عاوز يقلب المريض ولا حاجة لكنه عارف ان كلامه مش هايتنفز لانه مفيش حد في مصر بيحترم القولون فهو بيعمل اللي عليه ويكتبلك الدوا ويقولك الوصايا وبس الدور الاكبر عليك انت واسلوبك وتصرفاتك وطريقة الاكل والانتظام علي الدواء

[Mohamed_Hamid]

شوف انا عندى القولون العصبى والتهاب فى المعدة والحمد لله رب العالمين
طول مانا ماشى على الدوا وبظبط الأكل بتاعى كله تمام
اول ما الخبط واكل مسبك وبتاع اول مرة سماح لكن لو كررتها ورا بعض فى نفس الأسبوع بزعل زى امبارح كدة كان شادد عليا جدا :) والحمد لله
الخلاصة يعنى هو عايز مسايسة مش اكتر والموضوع بسيط ان شاء الله

[punisher]

انا بعاني من القولون العصبي بقالي ٣ سنوات

ملخص القولون العصبي حاجتين هما تظبيط الاكل وتحاول متتنرفزش

انك تظبط الاكل دي ممكن تتعمل بس انك متتنرفزش دي مستحيله في البلد دي

من غير ما تدوخ علي دكاتره ملخلص العلاج
spasmodigestin
librax

اول ما بحس ان القولون هيقلب باخد برشامه من كل واحد علما ان ليبراكس مهدأ عام للجهاز الهضمي

[tasaka]

لازم تنظيم الاكل و البعد عن الممنوعات .. و زى ما قال احد الاعضاء .. العلاج هو لعدم الاحساس بالمشاكل .. اما انه يخف خالص .. ده صعب

و عموما امراض الجهاز الهضمى بتأخذ وقت طويل جدا للتحسن ( زى مشاكل العظم تماما ) .. يعنى ممكن الدكتور يديك علاج و يقولك امشى عليه سنه و تعالى لى بعدها نشوف حنكرر العلاج تانى ام لا !!

اما بالنسبه للمنظار .. انا رفضت اعمله .. خفت من التلوث و نفسيا رافضه

القولون عندىبدأ بضغط عصبى شديد نتيجه الحزن على وفاه والدتى الله يرحمها و يحسن اليها و يتقبلها فى الفردوس الاعلى .. ( و فى نفس التوقيت جاء لى ايضا السكر و الضغط .. كله مره واحده كده )

القولون تسبب فى حدوث مشاكل و مضاعفات فى الجهاز الهضمى .. يعنى دلوقتى انا اصبح عندى قولون ضعيف .. سواء كنت منفعل او هادئ .. مع مرور الوقت و الالتزام منك ( بالنسبه لى ده كان عده سنوات ) .. بعدها ستستطيع الاكل بصوره شبه طبيعيه بدون مشاكل

اتبع نظام غذائى يكتبه الدكتور لك .. كان بالنسبه لى طريقه معينه جزء من الوجبه ثم مشروبات دافئه ( حلبه + اى مشروب أخر ) ثم استكمال الوجبه + الفاكهه .. كل ده بترتيب معين .. الصبح عكس العشاء .. الغداء طبيعى بدون نظام اكل ( طبعا ما عدا المنوعات ) .. النظام ده حسن صحتى جدا جدا لما كنت ماشى عليه

ابعد عن الفلفل الاسود نهائيا و مطلقا .. و طبعا الشطه

بالشفاء ان شاء الله

[3abdo.it]

انا كرهت حياتى للاسف بسبب القاولون العصبى

لو فرحت بطنى تكركب
لو زعلت اتعب ويبقا عندى غثيان
لو كلت اكلة تقيلة بشكل بسيط . انتفاخ وغازات ومغص
لو كلت اى اكل خفيف الم فى فم المعدة وحرقان

لنا الله

[ahmedfor3]

ام م الظاهر ان الشعب المصرى بيعانى من القولون انا عندى التهاب فى المعده شديد والتهاب فى القولون رحت كشفت عند الدكتور احمد عبد السميع طلب منى اشاعه تلفزيونيه وشوية تحاليل الحمد لله الاشاعه تمام بس التحاليل طلع فيها ميكروب حلزونى ودهون فى الدم بسيطه المهم كتبلى على 3 انواع من المضادات الحيويه لمدة اسبوعين وعلاج تانى لمدة شهرين والحمد لله ماشى على العلاج وفى تحسن

[amr011111]

لازم تنظيم الاكل و البعد عن الممنوعات .. و زى ما قال احد الاعضاء .. العلاج هو لعدم الاحساس بالمشاكل .. اما انه يخف خالص .. ده صعب

و عموما امراض الجهاز الهضمى بتأخذ وقت طويل جدا للتحسن ( زى مشاكل العظم تماما ) .. يعنى ممكن الدكتور يديك علاج و يقولك امشى عليه سنه و تعالى لى بعدها نشوف حنكرر العلاج تانى ام لا !!

اما بالنسبه للمنظار .. انا رفضت اعمله .. خفت من التلوث و نفسيا رافضه

القولون عندىبدأ بضغط عصبى شديد نتيجه الحزن على وفاه والدتى الله يرحمها و يحسن اليها و يتقبلها فى الفردوس الاعلى .. ( و فى نفس التوقيت جاء لى ايضا السكر و الضغط .. كله مره واحده كده )

القولون تسبب فى حدوث مشاكل و مضاعفات فى الجهاز الهضمى .. يعنى دلوقتى انا اصبح عندى قولون ضعيف .. سواء كنت منفعل او هادئ .. مع مرور الوقت و الالتزام منك ( بالنسبه لى ده كان عده سنوات ) .. بعدها ستستطيع الاكل بصوره شبه طبيعيه بدون مشاكل

اتبع نظام غذائى يكتبه الدكتور لك .. كان بالنسبه لى طريقه معينه جزء من الوجبه ثم مشروبات دافئه ( حلبه + اى مشروب أخر ) ثم استكمال الوجبه + الفاكهه .. كل ده بترتيب معين .. الصبح عكس العشاء .. الغداء طبيعى بدون نظام اكل ( طبعا ما عدا المنوعات ) .. النظام ده حسن صحتى جدا جدا لما كنت ماشى عليه

ابعد عن الفلفل الاسود نهائيا و مطلقا .. و طبعا الشطه

بالشفاء ان شاء الله

الله يرحم الوالده ويرزقها الفردوس الأعلى وربنا يشفينا جميعأ

[hobiko]

احب اضيف لأدوية القولون ....... دوا لطيف و رخيص ......... كولونا

كولونا انه فيه مادة بتفك تقلصات القولون و ديه نفس المادة اللى موجودة فى كل ادوية القولون تقريبا

الميزة ..... ان معاها مادة تانية بتعمل تحسين للحالة المزاجية ........ بحيث ان التوتر العصبى اللى هو سبب القولون يقل شوية و المزاج يتحسن شوية

و ربنا يشفيى مرضانا و مرضى المسلمين جميعا

[أبو إياد]

اكتشفت مؤخرا ان كل ما جسمى يتعرض للبرد القولون عندى يتبهدل ومن ساعتها الحمد لله مفيش اى مشاكل عندى

[tasaka]

الله يرحم الوالده ويرزقها الفردوس الأعلى وربنا يشفينا جميعأ

اللهم أمين لجميع امه الاسلام

[samyyousef]

سمعت و الله اعلم ان هناك (بعض) الحالات شخصت على انها قولون عصبي...لكنها في الواقع كانت صورة من صور حمى البحر الابيض المتوسط
تحياتي