طريقه استثمار الفلوس

[abdo gamil]

بسم الله الرحمن الرحيم
من فضلكم انا معايه مبلغ من المال مش عارف اعمل فيهم ايه
عاوز استثمرهم فى حاجه
محتاج مساعد من فضلكم

[ahmedwagdy03]

أصبر شوية

[egyption2012]

حولهم دولارات لحد ما تلاقي فكرة كويسة
وابعد عن الربا

[abdo gamil]

حولهم دولارات لحد ما تلاقي فكرة كويسة
وابعد عن الربا

اشكرك على الرد بس ياريت افكره حلوه

[eslamrace]

موضوع الاستثمار حتلاقي في مواضيع كتير داخل المنتدى بتتكلم فيه لو حضرتك تقدر تدور عنها حتستفاد كتير جداً

اما لو حضرتك حابب إجمالاً للموضوع لا يغنيك عن البحث فأنا حقول لحضرتك ان الجنيه المصري من ايام ثوره ٥٢ وهو بيعني من التضخم وتخفيض قيمته كل فتره زمنيه وبالتالي الاحتفاظ بيه في الصورة الورقية مش مجدي ولكن الامر بيختلف من شخص لآخر مبدأياً لازم تبقي عارف ان المخاطرة والربح بينهم علاقة طرديه يعنى كل الحاجه مكانت مخاطرتها اعلي حتلاقيها بتكسب اكتر والعكس صحيح فالفكرة انت تتحمل مخاطره بفلوسك لحد فين وخبراتك في او مجالات

وبالتالي الاستثمار في مصر إما تجاري "وده بيشمل الأنشطة التجارية والصناعية والزراعية " وإما استثمار عقاري " وده حيشمل شراء عقارات للمتاجرة او التأجير او البناء" واستثمار في أوراق مالية "سواء شهادات استثمار او المضاربه في البورصه او صناديق الاستثمار"

مبدأياً الأقل مخاطره وأقل عائد هى شهادات استثمار في البنوك وتاخد فايدتك وتبقي زى الفل ولكن للأسف حتلاقي معدل التضخم دائماً مسابقك بخطوتين تلاته بس ضامن فلوسك
الحل التانى البورصه والأوركسترا وصناديق الاستثمار بصراحه مفهمش فيهم ولكن مخاطره اعلي ولو بتفهم فيهم او حد تثق فيه بيفهم فيهم حتكسب منهم كويس بس ممكن تخسر فلوسك في ساعتين زمن ووممكن تكسب ٣٠ او ٤٠٪ في ساعتين برضه

الحل التالت وهو الأضمن ومخاطره قليله ومكسب كويس جداً وهو الاستثمار العقارى حضرتك تدور علي محل تجاري او شقه في مكان واعد وده محتاج لفه وسؤال أهل ثقته تعرفهم عن الأماكن المتوقع انتعاشها وتحط فلوسك في عقار او اتنين هناك ولو المبلغ مش حيكمل ممكن تقسط الباقي واعتبره استثمار برضه وبعد كده اما تبيع بسعر اعلي او تأمر وتستفيد بالايجار لحد متحب تاخد رأس المال وتبدأ تبيع مشكله الموضوع ده في حاجه واحده بس ان السوق غالباً مبيسمحلكش تبيع في وقت سريع بتحتاج فتره لحد متلاقي مشترى للعقار

الحل الرابع وهو التجاره ودى اعلي مكسب فيهم ولكن لو ملكش خبره فيها يبقي ابعد أحسن لان الموضوع مش سهل و حتحتاج متابعه دائمة علشان تحافظ علي فلوسك

وبالتالي أنا شايف ان الأفضل الاستثمار العقاري في الوقت الحالي
وبصراحة مش حابب موضوع الدولار او الذهب لو بكميات كبيره علشان الوضع مش أمان قوى ده اولا وثانيا بالنسبة للدولار ان لو كل واحد اشترى كم من الدولار هو مش محتاجه وشاله عنده حيكتشف ان الموضوع دايره تحلف وتأثر عليه في النهايه وحيلاقي الكسب بتاعه ضايع في انهيار عمله بلده "مش بس تضخم" وبالتالي يكون خسر اكتر من مكسبه إلا لو حيقدر يسافر يعيش في بلد تانيه بالدولارات دي .

وطبعاً اللي فات ده كله رأي شخصي يحتمل الصواب والخطأ وعلي حضرتك مراجعته وأخذ ما يناسب ظروف حضرتك والعمل بيه .
تحياتى .

[shake]

متابع

[Bassem Youssef]

اشتري دولارات و يورو

[الاسد المهاجر]

مشاريع الاكل مش بتخسر

[ali ashraf]

انت عايز ايه ؟

بسم الله الرحمن الرحيم
من فضلكم انا معايه مبلغ من المال مش عارف اعمل فيهم ايه
عاوز استثمرهم فى حاجه
محتاج مساعد من فضلكم

الموضوع اولا يحتاج تنظيم الفكرة العامة و منها للاجابة على سؤال حضرتك ........ أولا الغرض من الأستثمار ... هل المطلوب ايجاد عائد يساهم فى المصاريف الشهرية أم الغرض هو تنامى رأس المال على المدى الطويل و بدون أحتياج من دخل شهرى أو عائد على المستوى القصير. ثانيا : أعلم هناك قاعدة ذهبية فى الأستثمار هامة جدا و هى كلما زادت نسبة الأرباح تزيد معها نسبة المخاطرة يعنى هناك علاقة بين الأعمال ذات المخاطرة العالية و ذات الارباح العالية ايضا و هذه لا ينصح بها اطلاقا و خصوصا فى الوقت الحالى . القاعدة الثانية لا تعتمد على شريك معك مطلقا. أخيرا السوق المصرى يعانى حاليا من كساد ومتوقع استمراره لسنتين على الاقل , و مع الكساد يكثر الفساد و النصب ( أحترس مرة و اتنين و عشرة) .
المقترحات العامة : الحفاظ على رأس المال فى شكل عملة محلية غلط و تناقص شديد لرأس المال , شراء دولارات من السوق, فة الوضع الحالى مكلف جدا و فى نفس الوقت ضرب للاقتصاد المصرى و ده طبعا مش محبب. التجارة لو ملكش فيها مينفعش , شهادات استثمار حل سهل و مضمونة ( وشبهة الربا , ده موضوع يرجع لحضرتك مقدرش اقولك حلال و لا حرام ولكن العديد من دور الافتاء فى مصر و خارجها احلته و عموما فى الاقتصاد المتهاوى نختر اقل الضررين ) ,
الحل الأمثل : أعلم ان سوق العقار يعانى هو الاخر من الكسادولكن : أختيار المكان المناسب بمعنى منطقة اسواق مزدحمة , منطقة عليها طلب كبير هى مكسب اكيد و الخبرة كلها فى تحديد هذه الاماكن ( اللقطة) و للاسف دى بتحتاج رؤوس اموال كبيرة مثلا هناك مول شاطب على الانتهاء فى الموسكى كان المتر اللى مش على الواجهة , وغير مميز من 3 سنين 7 الاف ج دلوقت عدى 40 الف ( المتر غير المميز) ,
ممكن شقة عادية و تأجرها لحين تحسن الاوضاع و متعملش حسابك على البيع اليومين دول.
مع تمنياتى بالتوفيق.

[abdo gamil]

متشكرا جدا على الردود
الغرض من الأستثمارهو تنامى رأس المال على المدى الطويل و بدون أحتياج اليه
يعنى تقريبا 5 سنين

[Karim Alaa]

طيب يا باشا متشتريش دولارات دلوقتى الى بيقلك سعرها وصل 10 جنيه القاعده الاولى للاستثمار انك تبعد عن الشىء الى بيطلع don't torch while it's hot هتشترى غالى يعنى اقل نزول فى السعر 10 قروش هيكسرك فى مبلغ كبير

ثانيا يا شباب الصرفات ببشترى مبتبعش :D روح قولو عايز 10 20 الف هيقولك مفيش بيلمو لناس معينه :D

[elrasy]

يا سلام لو مجموعه دماغهم واحدة يشتركوا فى مشروع
احسن من الف وظيفة

بدور على مشروع و ربنا يسهل

[رحالة]

طيب يا باشا متشتريش دولارات دلوقتى الى بيقلك سعرها وصل 10 جنيه القاعده الاولى للاستثمار انك تبعد عن الشىء الى بيطلع don't torch while it's hot هتشترى غالى يعنى اقل نزول فى السعر 10 قروش هيكسرك فى مبلغ كبير

ثانيا يا شباب الصرفات ببشترى مبتبعش :d روح قولو عايز 10 20 الف هيقولك مفيش بيلمو لناس معينه :d

الكلام ده لما تكون تقلبات طبيعية للعملة
الجنيه المصري خلااااص
هيبقى زي الدينار العراقي

[رحالة]

يا سلام لو مجموعه دماغهم واحدة يشتركوا فى مشروع
احسن من الف وظيفة

بدور على مشروع و ربنا يسهل

شراكة وكمان في مصر
ربنا معاك

[NASSER 56]

يا سلام لو مجموعه دماغهم واحدة يشتركوا فى مشروع
احسن من الف وظيفة

بدور على مشروع و ربنا يسهل

لو عندك فكرة مشروع كويس تعاله ندخل مع بعض شركاء