ليه N 95 ممنوع !!

[Lion_Heart]

ياريت حد يعرفنا هوه N 95 فعلا ممنوع ؟؟ و ليه ؟؟ ولو الواحد اتقفش بيه ايه اللى هيحصل ؟؟

[sherif_84]

هو ممنوع عشان بيلقط اشارات الارسال بتاعت الشرطة والمخابرات

[دموع الثلج]

اتقفش بيه يعنى ايه هو N 95

مجدول ولا ايه

يا سيدى مفيش الكلام ده ولا حد يقدر يقولك نص كلمه

هو فعلا ممنوع من الحكومه يعنى شركه نوكيا مدخلتش الموديل ده بطلب من الحكومه

لانه بيشوش على اجهزه الرادار واللاسلكى

بس البلد مليانه وربنا يخلى لنا حبايبنا اللى فى الخليج ويخلى لنا الصين

[brown-eyes]

يا جماعة الموضوع مش كده خالص مفيش حاجة اسمها بيشوش علي اجهزة الحكومة ولا حاجة هي المشكلة في الاول وفي الاخر ان الحكومة متخلفة وده رايي
السبب التاني ان الجهاز في تكنولوجيا اسمها gps ودي عبارة اتصال بين الجهاز و الاقمار الصناعية لتحديد مكان الجهاز او النقطة اللي موجود فيها علي الخريطة ودي شغالة في اي مكان في العالم لان دي اتصالها بيكون بالقمر الصناعي مش الشبكة وهي مجانية

بمعني :
كلنا عارفين طبعا ان في خطوط طول وخطوط عرض الجهاز ده بيحدد بالظبط انت في اني نقطة بالظبط
يعني خط طول كذا علي خط عرض كذا

الفكرة من ده كله ايه بقي وده استنتاجي انا
اني ممكن اروح اي منطقة عسكرية او مكان مهم وحدد مكانه بالظبط وده بيبقي دقيق جدا
وممكن بعد كده المكان ده يضرب بصاروخ من اي مكان
يارب اكون وضحت وافدت ولو حد عايزني اوضح اكتر اوك!

[نور القمر]

طيب ما انا لسه محملة برنامج gps ايرث جوجل من المنتدى وسطبته على ان 73 وشغال كويس
يبقه يمنعوا بقه كل الموبايلات الحديثة علشان ال gps !!!
وبعدين ماهو ناس كتير جيباه من بره
اول مرة اعرف انه ممنوع في مصر
كنت معتقدة انه بيتباع عادي

[hotboja]

ياعمى انا لسة جاى من شارع عبد العزيز وهناك العدد كتير قوى منه ان 95 وان 82 وغيرها والشرطة جنبهم بموتوسيكل وعقيد قاعد وعادى خلاص والكلام دة مجرد تهويش

[جمال]

هو فعلا ممنوع فى مصر علشان فيه Gps وال Gps ممنوع فى مصر الا بتصريح
وده طبعا غباء لان الجهاز موجود فى كل حته عادى جدا
وسمعت ان شركة نوكيا اصدرت نسخة مخصصة لمصر بدون خاصية ال Gps

[MEDO_AHMED2]

مع احترامى موضوع قديم كيك بس فى محل ( من غير تريقة اسمة العفريت ) جاب التيليفون دة تانى يوم كان عندة قلق وامن مركزى بسببة بس كانت حوارات
ويقلك بيلقت ويشوش ... زى ال3310 وقالك بيلموة وممنوع بس لكن كل دة فكس فى فكس انا
عل 81 فية gps وزى الفل
* بس للامانة انا سمعت ان فى عدد 81 اتلمت وخط الانتاج اتوقف ونزلت عدد بتكنولوجيا اقل عشان الاشاراتوتحديد الاماكن العسكرية والحوارات دى *
بس من الاخر لو العدة داخلة دماغك قوى دوس مع ان فى عدد اشد وكتيييييييييييييييييييييييييييير

[theking2690]

على فكره انا معايا n81 ومفيهوش gps اللى فيه ديه maps مش gps

ولو مش مصدق كلامى بص فى اللينك ده http://www.gsmarena.com/nokia_n81_8gb-2085.php

[youssefmustang]

وبردو فكرة تانية عشان الحكومة عارفة ان الشعب المصرى بيعرف يحور وكده الـ Gps ممكن يعرفك فن فيه ردار او كمين على بعد معين من الكليو مترات منك وده يخليك تهدى سرعتك او ما تقرب منه.
اخوكم يوسف

[Michael_Lanos]

من الاخر يا شباب
موديلين فى نوكيا ممنوعين هما N95 & N82
والسبب لان فيهوم جي بي اس gps مرتبط بالقمر الصناعي مباشره، اما باقى الموديلات اللى فيها gps بيكون مرتبط بالبلوتوث فقط لاغير ولا ليه اى لازمه اصلا علشان كده بينزلوه بالضمان

اما فكره انه بيلقط اشارات الارسال بتاعت الشرطة والمخابرات دي اشتغاله كبيره جدا

وانا معايا نوكيا N82 وشغال بيه بقالى سنه اهو وهو موبايل رائع ومنزل عليه خرائط مصر وايطاليا وشغال تمام وبيفيدنى كتير، والمفروض مصر كلها تستعمل ال gps علشان هو مفيد جدا
اما بقه اننا خايفين من استعمالات اخرى ليه، يبقى المفروض مثلا مانبيعش سكاكين علشان الناس ما تموتش بعض

وعلى فكره العالم كله بيستعمله ونازل فى اغلب العربيات بره مصر وبيتباع لوحده كمان

يارب يحنوا علينا هنا بقه

[D . a .\ AYMAN]

مع إحترامي لكلامكوا جميعا بس كل معلوماتكوا في الموضوع ده ينقصها التصحيح

الـ N95 مش ممنوع في مصر عشان هوة فيه GPS ولا حاجة ... ولا كمان عشان بيتداخل مع موجات الشرطة أو المخابرات

لكن في نطاق في مصر من الترددات الموجية والصوتية والكهرومغناطيسية ممنوع إستخدامه قانونا بقرار من رئيس مجلس الوزراء (مش متأكد من سلطة إصدار القرار بصراحة) ودا لأسباب أمنية منها كفائة الإعتراض للموجات الداخلة في النطاق ده وتتبعها ومنها إن النطاق غالبا بتستخدمه الأجهزة الأمنية في مصر ولأسباب تانية أيضا مش فاكرها بصراحة ( والتليفون ده وبعض التيليفونات التانية برضه بيستخدموا بعض البروتوكولات الحديثة -بالنسبة للعامة- للإتصال بتدخل جوة النطاق ده من الترددات )

طبعا الكلام ده كان زمان قبل ما ثورة تكنولوجيا المعلومات تبقى متاحة للعامة في التليفونات وأجهزة الريسيفرات الفضائية وأجهزة ال GPS اللى بقت موجودة في كل حتة

على فكرة الموضوع ده كان أساس الحرب بين المخابرات المصرية والإسرائيلية في زمن الحرب وهو إن إزاي كان كل جهاز يقدر يوصل لعدد من الترددات القصيرة والقوية في نفس الوقت وتقدر توصل لحدود الدولة التانية من غير ما أجهزة الإعتراض تقدر تلقطها ... ولو تفتكروا إن مسلسل جمعة الشوان كانت هية دى مهمته إنه يجيب جهاز الإرسال اللى كانت أمريكا سلمته للمخابرات الإسرائيلية وهو ده كان بداية نشأة قسم الإعتراض في المخابرات المصرية وإدراكهم لأهمية تكنولوجيا الإتصالات لتبادل المعلومات في العصر الحديث

للأسف الكلام ده كان زمان وإحنا لسة عايشين فيه ... ولسة عندنا أجهزة كتير ممنوعة منها أجهزة رسيفرات عادية حتى وتلفونات وبعض أجهزة ال GPS ... وكل ده برغم أن التكنولوجيا دي بقت حتى مع الشحاتين برة وبقت من أرخص أنواع التكنولوجيا في العالم

[Dr. Elsaadani]

والله يا استاذ مايكل انتى دخلت N82 دماغى وخلاص قربت اشتريه

طبعا حستشيرك الاول بما انك خبير التكنولوجيا بالاسكندرية

[Michael_Lanos]

قريبا شرح وافى للميزات النوكيا N82 & N95 وكيفيه الاستفاده القصوى من امكانياتهوم

[GoldenManEye]

سبب المنع الحقيق هو التخلف!!!

سبب المنع الظاهر هو وحدة الـGPS الموجودة داخل الجهاز. والدليل أن جمع الأجهزة التى بها GPS ممنوعة

جميع أجهزة HTC التى بها GPS ممنوع
جميع أجهزة نوكيا التى بها GPS ممنوع
حتى الـIPhone ممنوع لحد مشالوا منه هذه الخاصية
وما يستجد!!

خدمة تحديد المواقع تعمل من خلال الأقمار الصناعية Global Positioning System وهى عبارة عن ما يقرب من 30 قمر صناعى
منتشرين حول الكرة الأرضية وأى جهاز لديه GPS Unit يمكنه إستقبال إحداثيات موقعه على الكرة الأرضية من الأقمار التى تغطى هذه المنطقة!

و هذه الخدمة أطلقتها الولايات المتحدة الأمريكية لأغراض عسكرية ثم بعد ذلك أطلقتها مجانا للعالم أجمع زى الإنترنت ما بدأ بالظبط!

يعنى أمريكا حطت 30 قمر صناعى و قالت للعالم إستفيد و مصر الوحيدة "أعتقد سوريا و كوريا الشمالية أيضاً " قالوا لا دى خطر وباقى دول العالم بلا إستثناء تستخدمها!