ماهى الاجراءات لنقل ملكية عربية والدى المتوفى

[fast07]

السلام عليكم
بستفسر بخصوص نقل ملكيه سيارة والدى المتوفى (اسألكم الدعاء) رحمه الله
بحيث تكون باسم الورثه فى حيازة احدهم
مع العلم لوجود قاصر وان رخصه السيارة ليست باسم الوالد اشتراها بتوكيل بيع ولم يقم بنقل مليكه له

[أبو صلاح]

البقاء لله وربنا يرحمه ويدخله فسيح جناته
والله اعلم
في حدود معلوماتى التوكيل بالبيع يعتبر لاغى بوفاة احد الطرفين سواء كان المشترى او البائع
ارجع لمحامى بسرعة لان غالبا هيحصل تفاوض مابينكم وبين البائع ويارب يرضى يعمل توكيل اخر باسم الورثة كلهم او احدهم

الا اذا كان والدك عمل عقد بيع نهائى لنفسه يبقى المشكلة محلولة وتدخل ضمن الورث

[fast07]

الدوام لله
رجعت للمحامى واكدلى ان التوكيل زيه زي عقد البيع وبالتالى هى ملكه وتركه لورثته

[أبو صلاح]

الدوام لله
رجعت للمحامى واكدلى ان التوكيل زيه زي عقد البيع وبالتالى هى ملكه وتركه لورثته

طيب خليه يروح معاك الشهر العقارى ويعمل عقد بيع نهائى

[أبو صلاح]

التوكيلات بالبيع للنفس وللغير فى


العقارات والسيارات


وهل تكفى كأحد إجراءات نقل الملكية


ومتى تكون منتهية أو موقوفة


ــــــــــــــ



الشائع فى العمل بين الأفراد عند إتمام اى صفقة بيع (( عقارات – سيارات – أراضى ...)) أن يكتفى المشترى بالحصول من البائع له على توكيل يبيح له البيع لنفسه أو للغير غير قابل للإلغاء إلا بوجود الطرفين بجانب عقد البيع الابتدائي إلا أن المشترى غالباً ما يتباطىء فى إنهاء الإجراءات اللازمة لنقل ملكية المبيع لنفسه أمام مصلحة الشهر العقارى بل يصل الأحيان الى قيام المشترى بالبيع مرة أخرى بموجب ذلك التوكيل اعتمادا منه على ان التوكيل غير قابل للإلغاء الا بوجود الطرفين .


الا أن مثل تلك التوكيلات معيبة بعدة عيوب خطيرة سواء للبائع أو للمشترى :-


1- فالمشترى قد يفاجئ عند نقل ملكية المبيع لنفسه آن التوكيل الذى تحت يده لم يعد صالحا لنقل الملكية لكون الموكل قد توفاه الله تعالى – ووفقاً للمادة 174 من القانون المدنى التى تنص على تنتهى الوكالة بموت الموكل أو الوكيل فإذا توفى الموكل كان التوكيل منتهيا وفى هذه الحالة يتعين على المشترى أن يحضر جميع ورثه البائع له أمام الشهر العقارى لإنهاء إجراءات نقل الملكية وأن يكونوا مجتمعين ولديهم إعلام وراثة . وهو أمر قد يعانى منه المشترى لا سيما تبين سفر أحدهم للخارج أو كان أحد الورثة قاصراً أو .....))


2- كذلك الحال لو توفى المشترى نفسه (( الوكيل )) ففى هذه الحالة يتعين على ورثته إحضار البائع لنقل الملكية لانتهاء سند الوكالة بوفاة الوكيل .


3- كذلك هناك فرض آخر يستوى مع فرض وفاة الموكل (( البائع )) وهو حالة فقده لأهليته وفقاً للمادة 45 , 46 من القانون المدنى لجنون أو سفه أو ثبت بقرار قضائى غل يد الموكل البائع عن التصرف فى أمواله بالحجر عليه أو تعين قيم عليه فلا يجوز استخدام التوكيلات حيث أن الأصيل نفسه ممنوع من التصرف وقت نقل الملكية وإن كان أهلا لذلك وقت تحرير التوكيل ويعد التصرف فى هذه الحالة باطلاً , وليس أمام الوكيل سوى التعامل مع من يمثل موكله سواء ورثه أو قيم أو وصى ... أو نقل الملكية بطريق غير مباشر (( دعوى صحة ونفاذ وهى أمور تحتاج إلى كثير من الوقت والجهد والمال .


4- كذلك تكمن خطورة مثل تلك التوكيلات فى جملة (( البيع للنفس أو للغير )) فكلمة الغير تتيح للوكيل أن يبيع باسم الأصيل أكثر من مرة فإذا أساء استخدام التوكيل وقام ببيع المبيع أكثر من مرة لاكثر من شخص بتلك الصفة مما يعرض الأصيل لما لا يحمد عقباه


وعلى ذلك يتعين ألا تتضمن صياغة التوكيل عند تحريرة جملة "البيع للغير" حماية للبائع من سوء استخدام المشترى ذلك التوكيل هذا من جانب , ومن جانب آخر أن عدم ذكر جملة البيع للغير ستجعل المشترى يهم بالإسراع فى إنهاء إجراءات الملكية تحسباً لوفاة الموكل أو فقده أهليته

المصدر
منتدى المحامين العرب

وفيه كمان تعديل على القرار ده يؤيد صحة كلام المحامى بتاعك :
أولا : تضاف فقرة ثانية للمبادة (19 مكرر) من تعليمات الشهر طبعة 2001 المضافة بالمنشور الفني10 لسنة 2001 (كما يمتنع على مكاتب التوثيق وفروعها للقيام بإلغاء التوكيلات العامة أو الخاصة التي تتضمن شروطا بعدم جواز إلغائها إلا بحضور الطرفين أو عدم إلغائها نهائيا وكذلك التوكيلات المذكورة المتضمنة شرطا باستمرار التوكيل بعد وفاة الموكل أو فقده لأهليته ويسري ذلك على التوكيلات المذكورة التي تتضمن مصلحة للوكيل أو للغير كحق البيع للنفس أو الغير.

[fast07]

طيب خليه يروح معاك الشهر العقارى ويعمل عقد بيع نهائى

متشكر لحضرتك جدا
طيب
وف حاله انه قانونى عادى لانى حتى روحت المرور واتقالى من الموظف خلى الورثه يبعولك لو انت اللى هتسوقها وهى والدتى واختى القاصر
ولما روحت اعمل عقد بيع منها ليا اتقالى لو الرخصه منتهيه هات شهاده بيانات السياره من الدراسه
ف حاسس بلبس شديد وتقريبا محدش عارف يدلنى اعمل ايه

[OMAR11112010]

اولا هتروح تعمل اعلان وراثة فيه اسامي كل الورثة
ثانيا هتروح الشهر العقاري وتخلي الورثة يبيعولك العربية
بموجب عقد البيع دا تقدر تعمل نقل ملكية وتقدر تتعامل مع المرور في استخراج شهادة البيانات والترخيص وخلافه والبيع للغير ايضا
هذا والله اعلم

[wawamoha]

معلش كلام الاستاذ ابو صلاح هو ال صح ............................
التوكيل كده لاغي بوفاه احد الطرفين ............................
و لو معاك توكيل من الوالد عام او مخصص لسسياره دي ممكن تروح تنقلها باسمك فقط .[س فيها مخاطره كبيره لان لو حد اشتكى ان الوالد اتوفى هاتروح النيابه ......

الحل الوحيد انك تجيب البائع و تخليه يعملك او يعمل للورثه توكيل ............
و في حاله انه عمل للورثه .....زيبقى لازم الورثه يعملولك توكيل بالاداره و تسيبه في الملف علشان مش كل مره تطلعه .....
بس بصراحه مش متاكد من حكايه القاصر دي هاتبقى والدتك هيا الوصيه عليها و للا لا و هاتمشي ازاي .........
---------------------------------------------

لو ليك واسطة تقيله في المرور .لواء فما فوق ........... ممكن يستخدم التوكيل و يسجلها باسم الوالد و تاني يوم يعملك نقل ملكيه للورثه .....................
بس برضه لو حد اشتكى هاتروح في سين و جيم ............

[عبدالله برعى]

نسال الله ان يتغمده بواسع رحماتة وينير قبره ويجعلة روضة من رياض الجنة

[fast07]

نسال الله ان يتغمده بواسع رحماتة وينير قبره ويجعلة روضة من رياض الجنة

اللهم يتقبل
جزاكم الله خير
فعلا انتو نبهتونى ان المحامى اللى معايا ده ضايع
وروحت لغيره وفعلا التوكيل لاغى بموت صاحبه لكن هناك عقد غير مسجل وبالتالى قضيه صحه ونفوذ لتسجيل العقد ومن بعد ان شاء الله تبقى العربيه بالتبعيه ملك الورثه والاجراءات تبقى سهله باذن الله

بس بعد ماخلص القصه دى
ايه بقى الاجراءات المعتاده لتجديد رخصه سياره شاهين 2008 منتهيه من 7 شهور فى مرور حلوان

[أبو صلاح]

اللهم يتقبل
جزاكم الله خير
فعلا انتو نبهتونى ان المحامى اللى معايا ده ضايع
وروحت لغيره وفعلا التوكيل لاغى بموت صاحبه لكن هناك عقد غير مسجل وبالتالى قضيه صحه ونفوذ لتسجيل العقد ومن بعد ان شاء الله تبقى العربيه بالتبعيه ملك الورثه والاجراءات تبقى سهله باذن الله

بس بعد ماخلص القصه دى
ايه بقى الاجراءات المعتاده لتجديد رخصه سياره شاهين 2008 منتهيه من 7 شهور فى مرور حلوان

على حد علمى ان لما تاخد صحة بيع ونفاذ بتطلع بيه على طول على المرور وتنقل ملكية العربية عادى باجراءات نقل الملكية وهي كالاتي :
اولا بتروح المرو اللي انت تبعه وتعمل فحص وبعد كده تروح على مرور العربية تعمل مطابقة بصمة وترجع على مرورك تدفع ضريبة وتامين اجبارى وتستلم الرخصة الجديدة

[mohamed2002]

طيب ما تشوف اللي باع العربية للحاج الله يرحمه يمكن يكون محترم ويعملك توكيل باسمك

[fast07]

الحمد لله تواصلت مع الشخص البايع وطلع شخص جدع وشهم جدا وعملي توكيل وعملت بيه عقد فالشهر العقاري

اللي عرفته اني اجيب شهاده المخالفات من الدراسه هل لازم قبلها اطلع شهاده بيانات اروح بيها عشان الرخصه منتهيه
لاني طلعت شهادتين للشهر العقاري
وايه باقي الاجراءات وهتكلفني كام

[ahmedwagdy03]

البقاء لله أولا

كان لي تجربة مشابهة لشراء سيارة صاحبها متوفي و له ولد قاصر بس السيارة كانت من ضمن التركة و علشان كدة لازم يدخل فيها المجلس الحسبي لوجود قصر .

أحسن حاجة إن البائع عملك التوكيل مباشرة . إلحق إعمل صحة توقيع