بشطب شقتى و عندى غرفة زيادة مش عارف استغلها ازاى

[Ladawy]

الســلام عليكم ،،
احبائنا الكرام ، بلف و ارجع هنا القسم استشير فى اغلب امورى الاجتماعية


انا بشطب شقتى حاليا ، و هى ما شاء الله على مساحة كبيرة
فـ الغرف فيها كتير

و آدى الرسمة بتاعتها



الاوضة اللى بين الانترية و نوم الاطفال دى ممكن تتعمل ايه ؟؟

اى فكرة جديدة أو قديمة ؟ عاقلة أو مجنونة ؟
اى حـــــــــــــــــــــاجــــــــــــــــة

لإننا حيرانين فى الاوضة دى و مش عارفين و احنا بنشطب نشطبها على اساس ايه

فى انتظار ابداعاتكم

[حسام الجندي]

وعليكم السلام ورحمة الله وبركاته أخي الفاضل

بإمكانك عمل الغرفة ( مسجد الأسرة ) مكان للصلاة وقراءة القرآن وبه مكتبه إسلامية

وألف مبروك تشطيب الشقة وربنا يبارك لك ولكل أسرتك

[Ladawy]

الله يبارك فى حضرتك ،،

غرفة المكتب ممكن تعمل العمل ده ، عشان كدا فكرنا فى الفكرة دى و شيلناها تانى علشان هاتبقى مكررة و مش مستغلة

ايه افكار تانية ممكن نعملها فى الاوضة ..

[melouk1]

اوضة لبيات الضيوف ،، للطوارئ اي حد من العائلة جي يزوركم و لازم يبات لاي غرض ما..

[dede_dodo88]

Dedicated entertainment room.

[amr011111]

انا شايف انك عامل اوضه واحده للاطفال. والصح انك فى سن معين هتفصل بينهم. فاعمل اوضه للاوﻻد واوضه للبنات. الحاجه التانيه انت ممكن تعيد فى التقسيمه الداخليه وتعمل حمام يتبع غرفة النوم وبالتوفيق

[ESO101]

dedicated entertainment room.

دي فكرة ..
أو غرفة خاصة باللعب .. هتفيدك جدًا في نمو الطفل
يكون فيها مكتبة خاصة بكتب الأطفال والمكعبات الإسنفجية الكبيرة أو الألعاب الكبيرة
لو عندك أكتر من طفل هتحتاجها لما يدخلوا المدرسة في تخصيص غرفة لكل طفل
أو للبنات والأولاد .. يعني على حسب وضع أسرتك

[rotanamasoud]

اعملها جيم منزلى ولما تحتاج تفضيها مش حتكون مشكله كبيره

[MaZaGAngeE]

غرفة واحدة اطفال مش كفاية ....... على الاقل غرفتين عشان تفصل الولاد عن البنات في المستقبل القريب

[ma7med]

اعملها living room تجيب 2 كرسي و كنبة سفنج مريح و ممكن shezlong وشاشة tv كبيرة
تكون اغرفة لتجمتع فيها مع الاسرة

[ahmedwagdy03]

لو إنت لسة صغير بمعنى أولادك لسة مش محتاج تفصل بينهم . ممكن تفرشها سجادتين حلوين و قعدة عربى و تليفزيون .

فكرة جهاز جيم حلوة برضه و صحية . مكتب صغير و كمبيوتر .آخر ما تلاقيش حاجة إفرشها سجادة و العيال يلعبوا فيها .

لاحظ لو إستغليتها بطريقة إنك تفرشها بالكامل و بعدين تحتاج تفصل الأولاد يبقى الشقة حتبقى زحمة على الفاضي بعد كدة

[hany121]

الناس اقترحت اكتر من اقتراح كويس واعتقد ان افضلهم انها تبقي غرفة اطفال اخري وتستخدم حاليا للضيوف...
لو ده مش مناسب بالنسبه لظروفك فممكن تفكر تعملها مكتب وغرفة المكتب تقفل الباب بتاعها وتفتحلها باب داخلي من غرفة النوم وتعملها dressing room...

بالنسبه للحمام الصغير اللي جنب غرفة النوم الرئيسيه. انا شايف انه صغير لانه مقتطع منه مدخل لغرفة النوم وانا بقترح انك تقفل المدخل ده وتدخله في مساحة الحمام وتفتح باب تاني لغرفة النوم الرئيسيه بدل الباب الحالي (جنب باب غرفة المكتب) اللي هيعتبر باب للحمام من غرفة النوم وبكده تبقي كبرت الحمام وخليته خاص بغرفة النوم الرئيسيه فقط

[hh]

انا نقلت قريب و عندي تلات غرف مقفولين. عملت واحدة اوضة نوم للاولاد فيها سريرين ومكتب و دولاب و التانية عملتها غرفة ألعاب ليهم حطيت فيها تليفزيون و كنبة سرير و باقي المساحة فاضية و دي اللي فيها لعب الولاد و الاكس بوكس بتاعهم و جايبالهم باقة أطفال على التليفزيون. الاولاد محتاجين مساحة يلعبوا فيها و احنا بنزحم الدنيا بالعفش.