حل عملى للتخلص من رائحه التكييف

[salam100100]

اتبعت طرق كتير لتنظيف التكييف الاسبليت لازاله الريحه
استخدمت مياه فقط
استخدمت مياه وخل
استخدمت مياه وديتول
استخدمت مياه وكلور
كل الطرق دى كانت بتشيل الريحه مؤقتا وبترجع تانى

قررت اجرب طريقه شفتها على يوتيوب
اشتريت اسبراى اسمه Max Clean من محطه البنزين ب48 جنيه
دا اسبراى بيطلع فوم لتنظيف فرش العربيه والموكيت- بيشيل البقع وبيسييح الزيوت البسيطه
العلبه استخدمتها ل3 تكيفات ولسه ممكن تعمل 3 تانى

طريقه التنظيف:
شيلت الفلاتر وغسلتهم بالمياه فقط
رشيت الاسبراى الفوم على السرابنتيته وسيبتها 3 دقائق
جبت بخاخه وملتها مياه وشطفت السرارنتينه
ركبت الفلاتر
شغلت التكييف على اعلى سرعه وعلى درجه حراره 17 لمده 10 دقائق وسيبت الغرفه مفتوحه عشان الريحه بتاعت الاسبراى تطلع

ياريت لو حد جربها يبلغنا ولو حد عنده طريقه تانيه يشاركنا بردو وهو نستفيد كلنا
الطريقه دى هجربها فتكييف العربيه وهبلغكو بالنتيجه

[Egymagic]

ياريت انت تقلنا تجربتك بعد فترة الريحة راحت ولا لسه

[salam100100]

ياريت انت تقلنا تجربتك بعد فترة الريحة راحت ولا لسه

شكرا لمشاركتك.
حاضر هبلغكم بالجديد
انا اتوقع ان المده هتكون اطول من الطرق اللى جربتها قبل كدا
هل فى طرق تانيه حضرتك جربتها؟

[A_H_M_A_D]

اعتقد ان الريحة بتاعة التكييف بتكون جايه اساسا من الاتربة اللي لازقه على مروحة التكيف في الجزء الداخلي مش الخارجي ، لو تقدر تفك المروحة دي وتنضفها كويس الريحة هاتروح ، او هات حد من الصيانة يفكهالك وينضفها

[mikho83]

متابع، وياريت لوحد يقدر يعرفنا ازاي اخلي ريحة العربية حلوة ولأطول الفترة، بس مش بحاجة تكون بتضر بالصحة زي المعطر السائل اللي في الأكياس

[mbx4e]

من اي بنزينه ؟؟؟وصوره للمنتج يافندم لو سمحت

[salam100100]

من اي بنزينه ؟؟؟وصوره للمنتج يافندم لو سمحت

من On the Run

[م/أحمد عبد الفتاح]

سبب الروائح هو نمو البكتريا على اجزاء التكييف المختلفة زى الفلاتر والسربنتينة ومجارى دخول الهوا وفتحات وخراطيم تصريف المياة بتاعة التكثيف .
الاول نقضى على المشكلة بتنظيف كل هذه المكونات وتغيير الفلاتر والتنظيف يكون بخليط الخل والمية بنسبة ١ : ٣ وتحطهم فى بخاخة زى بتاعة الزجاج وترش على الاجزاء دى وتتركهم ساعة واعادة الرش وبعد ربع ساعة يتم اعادة الرش والمسح بقطعة قماش نظيفة - والخرطوم بتاع التصريف لو كان مسدود او جواه رواسب يتم تنظيفه وتسليكه او تغييره وتنظيف المخرج بتاع التكييف اللى راكب فيه الخرطوم - وعلشان تجفف التكييف يكفى انك تشغله على وضع التهوية مش التبريد لمده ساعة - كمان لازم تشغل وضع التهوية مرة على الاقل كل اسبوع لمده ربع ساعة - وفى فصل الشتاء لابد ايضا من تشغيل التكييف كل شهر على الاقل مرة واحدة لمده ٥ دقايق تبريد وربع ساعة تهوية . واهم حاجه مراجعة مسار الخرطوم بتاع التكثيف للتأكد من عدم وجود اى تنيات فيه تعوق تصريف المياه

[mbx4e]

شكرا للمتابعة ياشباب والردود المفيده

[mbx4e]

اتبعت طرق كتير لتنظيف التكييف الاسبليت لازاله الريحه
استخدمت مياه فقط
استخدمت مياه وخل
استخدمت مياه وديتول
استخدمت مياه وكلور
كل الطرق دى كانت بتشيل الريحه مؤقتا وبترجع تانى

قررت اجرب طريقه شفتها على يوتيوب
اشتريت اسبراى اسمه max clean من محطه البنزين ب48 جنيه
دا اسبراى بيطلع فوم لتنظيف فرش العربيه والموكيت- بيشيل البقع وبيسييح الزيوت البسيطه
العلبه استخدمتها ل3 تكيفات ولسه ممكن تعمل 3 تانى

طريقه التنظيف:
شيلت الفلاتر وغسلتهم بالمياه فقط
رشيت الاسبراى الفوم على السرابنتيته وسيبتها 3 دقائق
جبت بخاخه وملتها مياه وشطفت السرارنتينه
ركبت الفلاتر
شغلت التكييف على اعلى سرعه وعلى درجه حراره 17 لمده 10 دقائق وسيبت الغرفه مفتوحه عشان الريحه بتاعت الاسبراى تطلع

ياريت لو حد جربها يبلغنا ولو حد عنده طريقه تانيه يشاركنا بردو وهو نستفيد كلنا
الطريقه دى هجربها فتكييف العربيه وهبلغكو بالنتيجه

بس ايه الاخبار؟ عن النتيجه بعد فتره و هل فيه فرق في اداء المكيف ؟

[salam100100]

بس ايه الاخبار؟ عن النتيجه بعد فتره و هل فيه فرق في اداء المكيف ؟

داخل على شهرين ومفيش ريحه
الاداء هو هو مفيش اختلاف
انا كانت مشكلتى الاساسيه هى الريحه