العمل في امريكا أفضل ولا الاكمال في دراسة الطب في بريطانيا ؟

[إنسانة]

مساء الخير

انا محتاره جدا وفي امس الحاجة للمشورة

حاليا انا في مفترق طرق ومش عارفة اخد قراري

الاول البعثة من وزارة الصحة لدراسة الطب ليها عيوب كتير وقيود مخلياها صعبة جدا

من مشاكلها انهم بيلزموني بالتعقد معاهم لمدة طويلة من السنين في العمل داخل السعودية بعد الدراسة

وغير اني مقيدة طول سنين البعثة بقيود كتير والتزامات فوق الحد

الطريق التاني معايا عقد عمل لامريكا في مصنع ادوية في ولاية كاليفورنيا المرتب هو الحد الادنى للمرتبات وهبدا من الصفر خالص يعني 3400 دولار في الشهر

العقد لمدة سنة وحدة بس بس هكون خسرت البعثة وهي مصدر دخلي الوحيد

مشكلة امريكا ان مفهاش امان زي اوروبا درست فيها كورس لغة وكنت بترعب كل يوم وانا ماشية في الشارع انا جربت بريطانيا كانت امانة جدا


فهل اسيب البعثة واخد العقد دا واحول اجدده وانا هناك ولا اكمل في البعثة افضل وجايز السنين دي حاجة تتغير في قوانين السعودية الصعبة جدا بالنسبالي

[م/أحمد عبد الفتاح]

البعثة هى استثمار طويل الامد او بلغة الطب والادوية واسع المدى - بمعنى ان الطب بالذات عالميا كل مازادت الدرجة العلمية زاد النفع المادى - وكمان بالنسبة لعقد امريكا اول حاجه المرتب ده يعتبر قليل وكمان هل الاقامة والانتقالات عليكى ولا عليهم ؟؟؟ التأمين الصحى هل يشمل العيون والاسنان ولا تأمين صحى عادى بدون اسنان وعيون لانهم على حسب علمى تم خروج الاسنان من التأمين الصحى من زمان وقريب شالوا كمان العيون من التأمين الصحى - بس عموما المرتب مش كويس ابدا ومدة العقد غير مطمئنة - العيشة هناك رخيصة كأكل وملبس لكن السكن والانتقالات غاليين .
اعتقد البعثة افضل وبرضه استخيرى وخدى رأى الاقارب ( الوالدين ) ورأى الاطباء الكبار ذوى الخبرة - وربنا يوفقك للخير ان شاء الله

[Imhotep]

لندن جميلة..... عيبها الوحيد و بريطانيا عموما الجو السئ اوقات كثيرة من السنة..... غير كده لندن افضل..... انا بقول كده عشان عارف إنك هدفك كمان انشاء حياة جديدة...... ربنا يوفقك للاختيار الكويس و اللى فيه الخير لحياتك

[imnotim]

البعثة هي مستقبلك لانها حاجه رسمية او حكومية رغم الصعوبات بس اعتقد القانون هناك بيطبق بحزم لكن المرتب ضعيف بالنسبة للعقد للاسف وهيبقى مشكلة كبيرة لو كان السكن وما الى ذلك عليكي بس انا خايف عاداتك وتقاليدك تتغير واحنا ناس شرقيين وهما لا دين لهم يعني دينهم حتى مبيطبقهوش
المهم بعثتك لامريكا هترفع راتبك كثيرا في السعودية ومستقبلك هيبقى كويس احنا عايشين في عالم مادي بحت اهم شيء فيه المظهر والفلوس للاسف وانا لو مكانك هختار البعثة اما اكمل تعليمي في بريطانيا لا او اختار العقد اللي مدته سنه حتى لو السكن وغيره عليهم لا وألف لا .... البعثة الحكومية ملايين بيتمنوها وانا عاوزك تفكري بهدوء وتستشيري اطباء اكبر منك في السن اكيد هيعطوكي النصيحة الصحيحة لو الاغلبية رشحت لك البعثة فاعرفي انها في مصلحتك

[ESO101]

لو الهدف الهجرة يبقى أنا رأيي مش هيتغير
البعثة شكلها مغري .. لكنها أكبر فخ
هرد رد مفصل بعد ما أتفرغ
وهقولك قائمة بالبلدان ونفضل كل بلد
وطريقة علمية لإتخاذ قرار السفر بنفسك
وعايز أعرف السبب اللي خلاكي عايزة تسافري خلال شهرين
بحسب ردك في الموضوع السابق

[عبدالحكيم]

أختنا الفاضلة


الاختيار الصحيح واضح أمامك وضوح الشمس: البعثة الدراسية.

أولاً: ما تسميه أنت عقبات وقيود، هي في حقيقتها فرص كبيرة إن نظرتِ لها بإيجابية. مثلاً، إلزامك بالعمل في المستشفيات بعد التخرج ليس أزمة أو محنة. هي في جوهرها منحة تشرئب لها أعناق الآلاف ممن يحدوهم الأمل للفوز بمثلها... أقلها ستضيف لك خبرة عملية، وثقة في النفس، وأمان وظيفي، وراتب جيد... وهي في الغالب لمدة زمنية محددة

سبق لي أن شاركت شخصياً في وضع شروط برنامج لمنح دراسية في دولة خليجية وكان هناك شرط أساسي يصرون عليه وهو إلزام الطالب بالعمل لدى الجهة المانحة مدة سنتين أو يزيد قليلاً... وبالتالي، مدة العمل في الغالب محدودة ولا تلزمك العمر كله... وستكون لك جميع الامتيازات الوظيفية...

تحملي تلك المدة واعتبريها تدريباً عملياً لصقل مهاراتك ثم بعدها يمكنك السفر والعمل في أي مكان في العالم...


ثانياً: بالنسبة لعامل الأمان، دعك من وساوس الشيطان! لن ترسلك الدولة لمنطقة غير آمنة. هناك آلاف الطلبة مثلك من شتى بقاع الأرض يدرسون معك ويسكنون من حولك. وحتى يطمئن قلبك، اسكني في السكن الجامعي (كامبس) أو مع زميلاتك...


ثالثاً: بالنسبة للفرصة الوظيفية التي ذكرتيها في أمريكا هي في حقيقتها مضيعة للعمر والمستقبل بكل ما تحمله الكلمة من معنى. ستكونين مجرد عاملة في مصنع أدوية ولمدة سنة واحدة وبراتب هزيل...


أين المستقبل...؟ كيف أصلاً تفاضلي بينها وبين البعثة الدراسية؟ أين الثرى من الثرياً ؟


أخيراً: استعيني بالله أيتها الإنسانة، طبيبة المستقبل، وشمّري عن ساعد الجِّد والتحدي... امضي قدماً في البعثة الدراسية وبإذن الله تعالى ستكون أحلى أيام عمرك وأصوب قرار اتخذتيه في حياتك...

[Egymagic]

احسبي الاهم عندك واعمليه
عايزه فلوس يبقي البعثة ودول الخليج , عايزه حرية وديمقراطية يبقي الغرب
مفيش حد بياخد كل حاجة

[amr011111]

البعثه طبعاً وكون انك هتاخدى شهادة الطب من دوله اجنبيه فده هيفرق معاكى كتير لما تشتغلى فى اى دوله. واعتقد ان عدد سنوات دراسة الطب فى لندن مش كتير زى مصر وبالتوفيق

[lena jo]

فكري علي المدي الطويل. انا في شركة قطاع عام و جت لي فرصة دراسة mini mba في مركز اعداد القادة مع تفرغ يومين للمحاضرات. طبعا مفيش شغل بيقدم منحة دراسة او سفر للدراسة الا بمقابل. الشرط كان النجاح و عدم ترك الشركة لمدة 7 سنوات او دفع كافة التكاليف. و الحمد لله نجحت و استفدت و كمان السبع سنين عدت و لم اترك الشركة.
المهم ان المنحة تبع شغلك . يعني بتدرسي و لك مصدر رزق و شغلك مسئول عنك و اما يوفر لك سكن او مصاريف السكن و المعيشة ، يعني تذاكري و متشليش هم حاجة. و بعدين الزامك بالعمل لمدة بعد الدراسة دة طبعا مقابل طبيعي.مش هتخسري حاجة . اكيد ان شاء الله الدراسة هتخليكي مميزة و طبعا دخلك المفروض يكون كويس . علي الاقل ضمنتي شغل و دي ميزة مش عيب. السنين هتعدي و ان شاء الله لو عايزة تسافري او تستمري براحتك بس هتكوني وقفتي علي ارض صلبة.
اما عقد العمل سنة فانتي مع نفسك سكن و معيشة و طبعا ليس لك خبرة في الحياة لتبدئي وحدك تماما في بلد غريب و كمان مش مضمون و هل سيجدد كما انك لن تكوني متميزة و كمان المرتب ضعيف. فكري كويس و استخيري ربنا و قرري
ربنا يوفقك للخير ان شاء الله

[ESO101]

مبدئيًا .. لازم تحددي سببك للسفر ..
هجرة ( مفيش فلوس فيه راحة نفسية )..
تعليم ( فيه فلوس كتير بس قلق نفسي)
ثانيًا ... لازم تعرفي إن البعثة لو وفقتي في دخول الطب .. ( ودا صعب )
هتكوني تحت سلطة طليقك طول سنين دراستك و طول سنين عملك
بالإضافة للقوانين اللي هتصعب عليكِ الحياة بدون ولي أمر ( زوج ) بعد العودة
وفي حالة تزوجتي هتتاخد منك بنتك
عمرك هيضيع في المشكلة نفسها وهتفضلي في نفس الدائرة المغلقة

الطب على الأقل 6 أو 7 سنين ( ضغط نفسي شديد )
لو زيهم ملتزمة بعقد عمل هتوصلي للـ 40 سنة في نفس الدائرة المغلقة إياها
فالبعثة يعني عمرك وشبابك وربما بنتك وتدهور نفسيتك لحد ماتوصلي للـ 40

عايزة فلوس .؟ آه فيه فلوس كتير .. بس نفسيتك هتدمر
لاتقدري ترتبطي عشان ماتخسريش بنتك .. ولا تقدري تفضلي بدون زوج
لإنك بالفعل هتعاني في كل لحظة بسبب قوانين ولي الأمر
إنتِ وظيفتك اللي كنتِ فيها في السعودية كانت كويسة وبمرتب كويس
على ما أتذكر كانت 9 آلاف ريال ..
لو عايزة فلوس التجارة تجبلك فلوس بدون كل السنين المهدرة دي

عايزة تربي بنتك في السعودية .. عيزاها تعيش حياة شبه اللي عشتيها ؟
لسه لما أهلها يعرفوا إن ليهم بنت .. أبوها لو مات هتبقى في سلطة عم وأخ ميعرفكويش

قدامك .. كندا واستراليا هجرة
( تخصصك مطلوب وسنك عليه نقاط ولو حصلتي على 7 في IELTS وسنة خبرة يبقى ممكن جدًا تهاجري ) ..

سويسرا .. لو عندك إستعداد تتعلمي لغة وظيفة مكتبية هتعيشك كويس موجود

وأخيرًا بخصوص عقد أمريكا
أنا مش عارف إيه طبيعة الوظيفة في العقد
( ياريت تكتبي المسمى الوظيفي والمهام المطلوبة منك )
بس على أي حال السكن في كاليفورنيا مش هتلاقي أقل من 1500 دولار studio نظيف في مكان آمن
فواتير وخلافه 500 دولار
بنتك دراستها مجانًا .. الأكل واللبس مش مكلف لو جبتي عربية هتزيد مصاريفك
يعني ممكن يكفيك كمعيشة متوسطة بشكل مناسب
وممكن جدًا يتجدد

عايز أقولك إنك لو حابة أمريكا كل اللي جايين من برا بدايتهم بتكون كدا
لإنه لاعنده تاريخ عمل ولا تاريخ مالي ولا خبرة
لكن لما يتكونلك تاريخ عمل وتاريخ مالي وخبرة وتعادلي شهادتك
هتتعرض عليكِ وظائف بمرتبات عالية وبمدد أطول
لكن إنتِ وتميزك إثبتي نفسك ويجددولك .. أو دوري وإنتِ هناك
هي دي الحياة ..

[إنسانة]

شكرا لكل الاعضاء الكرام

مش عارفة اقرر بس ايميل لعدم ربط نفسي بمشاكل الماضي فاحتمال اضحي بالبعثة لهذا السبب

موضوع الفلوس انا مش مهتمة يكون معايا فلوس كتير


فانا عندي ميول شديد اني اتخذ قرار الغاء البعثة لاني مش عايزة المشاكل اللي هتيجي من وراها ومش عايزة امنع نفسي بقيت حياتي من الزواج

بس لو لغيت البعثة واخدت العقد وماتجددتش مانا هضطر ارجع تاني للمشاكل دي خلال سنة بس

فعايزة ادرس موضوع الهجره بجد ياريت توضحلي ممكن اهاجر كندا او استراليا ازاي

تركيزي 0 بسبب حالتي النفسية وكل همي الان اني لو فقدت مصدر دخلي هعيش منين


المسمى في عقد العمل data planner

مهامي كتابة تقارير و بيانات

هيكون عندي قائمة باسماء الحالات هزور مراكز ذوي الاحتياجات الخاصة والمستشفيات ودور المسنين واعمل تقارير عن بعض المرضى من ذوي الاحتياجات الخاصة بعد اخذ ادوية معينة وادخل البيانات مقابل كل دواء للنظام

فكل اللي بطلبه معلومة اهاجر ازاي النت مليان معلومات مغلوطة وبسالك عشان انت اللي كبرت مسالة الهجرة في دماغي وممكن تعرف تدلني على مصدر اخد منه المعلومة بثقة

انا 7 في ايلتس

[ESO101]

أنا متفائل بالكلام دا .. ولكن الميول لرأي لا يكفي ..
الخطوة الحقيقية المبشرة لما تاخدي قرار نهائي
بس لو قررتي .. متلغيش البعثة دلوقتي .. إلغيها في بريطانيا ..
عشان تقدري تسافري
فتوفيرًا للوقت خلي البعثة عادي جدًا ..
إلغيها بعد ماتضمني الهجرة

و إسمعي نصيحتي وهتوفري على نفسك جهد ووقت كبير
( أنا لو مكانك هعمل كدا )
المصدر المضمون هوا المحامي يسهل عليكِ الإجراءات
أفضل من إنك تضيعي وقت كبير في البحث

الوظيفة في العقد في مجالك ولكن المهمة متعبة على المرتب القليل ..
أنا شايف إن الهجرة أفضل

الموضوع محتاج تخطيط كويس بس المحامي هيجبلك من الآخر

[إنسانة]

أنا متفائل بالكلام دا .. ولكن الميول لرأي لا يكفي ..
الخطوة الحقيقية المبشرة لما تاخدي قرار نهائي
بس لو قررتي .. متلغيش البعثة دلوقتي .. إلغيها في بريطانيا ..
عشان تقدري تسافري
فتوفيرًا للوقت خلي البعثة عادي جدًا ..
إلغيها بعد ماتضمني الهجرة

و إسمعي نصيحتي وهتوفري على نفسك جهد ووقت كبير
( أنا لو مكانك هعمل كدا )
المصدر المضمون هوا المحامي يسهل عليكِ الإجراءات
أفضل من إنك تضيعي وقت كبير في البحث

الوظيفة في العقد في مجالك ولكن المهمة متعبة على المرتب القليل ..
أنا شايف إن الهجرة أفضل

الموضوع محتاج تخطيط كويس بس المحامي هيجبلك من الآخر

مش عارفة اخد قرار لسه لما اشوف ظروف الهجره

تكاليف المحامي كام تقريبا ؟ واجمالا الهجره ممكن تكلفني كام ؟ وهل الهجره مضمونة ؟ وهل التكاليف تسترد في حالة لم اقبل؟

وهل لازم محامي يمثلني امام جهات الهجره في كندا او استراليا ؟ ممكن اهاجر بدون ما ارجع لمحامي ؟

ابدا منين بالبحث عن محامين لو لازم ؟

[ESO101]

المحامي عشان يسهل عليكِ ويرشدك لكن مفيش قانون يلزمك ..
فـ لاء مش لازم حد يمثلك .. لا كندا ولا استراليا
بس المحامي ضروري .. أنا عن نفسي بدي كل شيء للمختص فيه .. دا أدق
وتكلفته ( من 5 إلى 7 آلاف دولار أمريكي ) المحترف أقل من كدا متضمنيش الكفاءة وممكن أقل شوية لو شركة جديدة
( أنا سألت عن أسعار محامين كندا قبل كدا ومفتكرش استراليا أقل )
باقي التكاليف ( رسوم فيزا + ورق + تذاكر + سكن + تأمني نفسك بمصاريف لحد ماتلاقي شغل .. إلخ )
متقلقيش من أي تكلفة ( مهما وصلت ) لحد ماتهاجري و تستقري في سكن وتحصلي على وظيفة ملائمة
أنا متكفل بالموضوع من الألف للياء ..
في حالة فضلتي المحامي سيبي مهمة إختيار محامي والتعامل معاه عليا
وياستي لما تهاجري وربنا يوفقك في وظيفة مناسبة إبقي رجعي المبلغ على مهلك
( هكلمك عن نفسي أنا استلفت من أقرب حد ممكن يسلفني وسددت بعدين للي سلفني أو لأولاده لو توفى
يعني أخدت مدة طويلة لحد ماتمكنت من السداد ...)
أي حد بيجي عليه وقت ويمر بظروف وبيستلف .. ولما يرد دينه أو صاحب الدين يتسامح محدش له عنده حاجة ..
اللي استلفت منهم بعد ردي للدين .. شكرتهم برسائل إيميل ومشفتهمش لا أثناء ردي للدين ولا بعد ردي للدين .
وطبعًا لن يكن هناك أي شيء مكتوب أنتِ لستِ ملزمة على السداد ولن تكوني مدينة بشيء أساسًا .. لكن ليطمئن قلبك
بخصوص سؤال ضامن الهجرة
فمفيش حاجة مضمونة في الحياة .. لا أحد يستطيع أن يضمن لك إلا ماتحت يديه
والمحامي لو واثق 100% إن كل شيء سليم بيقولك إن إحنا عملنا اللي علينا وهتقبل بنسبة كبيرة
ولكن لا يؤكد ولا يضمن ولو وعد بالقبول يبقى مش محترف وتقلقي منه
وجوابًا على سؤال التكلفة مستردة أو لاء في حالة عدم القبول
من خبرتي في الأمور دي التكاليف كلها غير مستردة في حالة الرفض سواء محامي أو غيره
أساسًا لو حد قالك مستردة يبقى شيء غريب عن المعتاد
( وفي حالة الرفض ولم تستفيدي من الهجرة يبقى أنا مدين لك بإعتذار )
إذًا أرجو أن لا تشغلي نفسك بموضوع التكاليف نهائيًا وتوجهي كل تفكيرك على الهجرة

[إنسانة]

المحامي عشان يسهل عليكِ ويرشدك لكن مفيش قانون يلزمك ..
فـ لاء مش لازم حد يمثلك .. لا كندا ولا استراليا
بس المحامي ضروري .. أنا عن نفسي بدي كل شيء للمختص فيه .. دا أدق
وتكلفته ( من 5 إلى 7 آلاف دولار أمريكي ) المحترف أقل من كدا متضمنيش الكفاءة وممكن أقل شوية لو شركة جديدة
( أنا سألت عن أسعار محامين كندا قبل كدا ومفتكرش استراليا أقل )
باقي التكاليف ( رسوم فيزا + ورق + تذاكر + سكن + تأمني نفسك بمصاريف لحد ماتلاقي شغل .. إلخ )
متقلقيش من أي تكلفة ( مهما وصلت ) لحد ماتهاجري و تستقري في سكن وتحصلي على وظيفة ملائمة
أنا متكفل بالموضوع من الألف للياء ..
في حالة فضلتي المحامي سيبي مهمة إختيار محامي والتعامل معاه عليا
وياستي لما تهاجري وربنا يوفقك في وظيفة مناسبة إبقي رجعي المبلغ على مهلك
( هكلمك عن نفسي أنا استلفت من أقرب حد ممكن يسلفني وسددت بعدين للي سلفني أو لأولاده لو توفى
يعني أخدت مدة طويلة لحد ماتمكنت من السداد ...)
أي حد بيجي عليه وقت ويمر بظروف وبيستلف .. ولما يرد دينه أو صاحب الدين يتسامح محدش له عنده حاجة ..
اللي استلفت منهم بعد ردي للدين .. شكرتهم برسائل إيميل ومشفتهمش لا أثناء ردي للدين ولا بعد ردي للدين .
وطبعًا لن يكن هناك أي شيء مكتوب أنتِ لستِ ملزمة على السداد ولن تكوني مدينة بشيء أساسًا .. لكن ليطمئن قلبك
بخصوص سؤال ضامن الهجرة
فمفيش حاجة مضمونة في الحياة .. لا أحد يستطيع أن يضمن لك إلا ماتحت يديه
والمحامي لو واثق 100% إن كل شيء سليم بيقولك إن إحنا عملنا اللي علينا وهتقبل بنسبة كبيرة
ولكن لا يؤكد ولا يضمن ولو وعد بالقبول يبقى مش محترف وتقلقي منه
وجوابًا على سؤال التكلفة مستردة أو لاء في حالة عدم القبول
من خبرتي في الأمور دي التكاليف كلها غير مستردة في حالة الرفض سواء محامي أو غيره
أساسًا لو حد قالك مستردة يبقى شيء غريب عن المعتاد
( وفي حالة الرفض ولم تستفيدي من الهجرة يبقى أنا مدين لك بإعتذار )
إذًا أرجو أن لا تشغلي نفسك بموضوع التكاليف نهائيًا وتوجهي كل تفكيرك على الهجرة

مش عارفة اقولك ايه كلمة شكر لا تكفي اخجلني كرمك

وانا بحثت ولكن الموضوع محتاج وقت كبير في البحث وانا احتاج فقط طرف الخيط وانا هكمل واشوف امكانياتي واقرر بناء عليها

ولكن مش عايزة احملك تكلفة واحمل نفسي فوق طاقتها وخاصةانه كما اوضحت في ردك ان الموضوع في النهاية ممكن يترفض ومش مضمون واناا عندي البعثة والعقد يعني مش في حالة اضطرارية على الاقل الان

فخلاص بلاش محامي لان المبلغ كبير واذا فيه امكانية اني انا انجز الامر بنفسي فبلاش هذه التكلفة لاني لا اعلم عن بكرا فيه ايه

فشكرا ليك بجد مش عايزة اكلف عليك ولا على نفسي امر بامكاني انجاز جزء مكلف منه خاصة فيما يتعلق بالمصاريف المتعلقة بالمحامي

ولكن ابدا منين كندا واستراليا هل اكلم السفارة او اتواصل مع مين في الدول دي