تعبت من الإيجار الجديد وعاوز شقة فى مكان محترم

[خالد]

بالله عليكم تساعدونى لأنى تعبت بجد ومش قادر أستحمل
حالياً أنا قاعد فى شقة إيحار جديد بــ 3000 ج فى الشهر وتعبت من الإيجار الجديد وعاوز شقة فى مكان محترم ومعايا 100000 ج مع العلم أنى عندى شقتين فى بيت العيلة بس فى منطقة شعبية جداً وزحمة ودوشة الــ 24 ساعة ، بالله عليكم اللى يعرف شقة إيجار قديم أو تمليك بالمبلغ ده ولايزيد عنه أبداً وممكن بعد كده تقسيط لباقى المبلغ ، بس أهم حاجة شارع هادى لأنى بكره الدوشة والإزعاج جداً
ربنا يبارك فيكم

[mahmoudselim]

عليك و علي العبور

[mk3]

بتدفع 3000 ايجار
ده انت تدفعهم قسط فى اجدعها مكان

[bluemail]

شوف مدينة جديده، العبور او الشروق او بدر
شوف الاقرب لمكان شغلك ايه
بالتوفيق

[خالد]

متشكر لردودكم الجميلة
أنا مأجر جديد فى مصر الجديدة جنب شغلى 5 دقايق بالعربية ، 20 دقيقة مشى من البيت للشغل
وجنب شغل المدام ومدارس الأولاد 5 دقايق مشى ، أنا عارف أنه مبلغ كبير بس الحقيقة أشتريت راحتى بالفلوس
دلوقتى داخل على سنتين يعنى دفعت حوالى 70 ألف جنيه ، بفكر فى حاجة إيجار قديم أو تمليك وأدفع أقساط بمبلغ الإيجار ده ، بس حابب يكون قريب من مصر الجديدة وقريب من شغلى ، لأنى بصراحة لقيت موضوع أن السكن يكون قريب من الشغل ده حاجة رائعة جداً توفير صحة ومجهود ووقت وهلكة عربية وبنزين وكل حاجة ، بس بصراحة حسيت أن مبلغ الإيجار الجديد عالى وأنى هفضل كده طول عمرى
أيه رأيكم أدور فى العبور بس سمعت أنها مليانة تكاتك ومدمنين والسرقة فيها كتير بالإضافة أنها تبع القليوبية ، ولا أروح الشروق مع أنها أبعد شوية ، ولا أدور فى الأماكن القريبة زى الزيتون وزهراء مدينة نصر بس أنا المهم عندى الهدوء والبعد عن المحلات والتلوث والتكاتك
معلش أستحملونى شوية ، وياريت لو حد يعرف رينج الأسعار يدلنى

[bluemail]

طيب ما تدور في النزهه الجديده، هتكون ممتازه بالنسبه ليك

[خالد]

طيب ما تدور في النزهه الجديده، هتكون ممتازه بالنسبه ليك

أعتقد الأسعار فيها عالية ، ألا لو حضرتك تقصد النزهة 2 ، ودى زحمة جداً وكلها أبراج ومفيش طبعاً مكان لركن العربية ودوشة جداً والمياه بتقطع فيها بإستمرار وفيها مشاكل كتير ، أنا كنت بسأل فى قباء ولكن قالولى أنها نفس الوضع ونفس مشاكل النزهة 2

[mahmoudselim]

العبور انا ساكن فيها وشغلي في شارع ابن بطوطه جنب قصر البارون بروح الشغل في 20 دقيقه اما موضوع التكاتك دا هو موجود بس مش بكثافه بالنسبه للمدمنين والكلام دا انت محتاج تنل العبور لفه كدا علشان شكلك واخد فكره غلط عنها واو بتتكلم عن مدينه السلام

[mahmoudselim]

من العبور لكوبري الحرفيين شارع جوزيف تيتو لصلاح سالم 20 دقيقه

[خالد]

العبور انا ساكن فيها وشغلي في شارع ابن بطوطه جنب قصر البارون بروح الشغل في 20 دقيقه اما موضوع التكاتك دا هو موجود بس مش بكثافه بالنسبه للمدمنين والكلام دا انت محتاج تنل العبور لفه كدا علشان شكلك واخد فكره غلط عنها واو بتتكلم عن مدينه السلام

ربنا يباركلك أستاذ محمود ، فعلاً أنا محتاج أنزل العبور مرة كده لأن فكرتى عنها كانت من خلال صفحة المدينة على الفيسبوك ، بالنسبة للأسعار كام تقريباً السعر لشقة 3 غرف ؟ وحضرتك ترشحلى أنهى منطقة أدور فيها هادية وبعيد عن الزحمة وسعرها معقول يعنى مقدم لايزيد عن 100 ألف ، وحضرتك تفضل العبور ولا الشروق ومتشكر لتعب حضرتك معايا

[mahmoudselim]

لا تعب ولا حاجه والله انا متابع تقريبا كل الصفحات الخاصه بالعبور علي الفيس وفي حملات لازاله التوكتوك مع الجهاز واستبدالها بمواصلات تانيه بس المدمنين دي فعلا مش موجوده غير في المعدل الطبيعي زي مصر الجديده كدا بليل انما مش زي المناطق الشعبيه نهائي بخصوص السرقات فا معدلها اكيد زاد جدا في الفتره الخيره بطبيعه الحال في مصر كلها بس هتلاقيها اقل معدل سرقه في المدن الجديده علشان فيها حركه اكتر بكتير بس استثني الرحاب والقاهره الجديده والاحياء الاكثر في السرقه هي الاحياء اللي لسه ماسكنتش اوي زي التاسع مثلا. ال 100 الف عامتا ممكن يشتروا شقه اللي هي تبع البنك ودي بتكون 63 متر بس ماتعجبنيش . انت عامتا ممكن تشتري شقه في بيت واحد بانيه بتكون في حدود 250 الف ودا منتشر اوي وربنا يوفقك في شخص محترم. عامتا الاحياء اللي فيها حركه اوي هي الحي الاول والتاني والشباب وكلهم جنب بعض يعني لو سكنت في اي واحد فيهم الباقي هيكون قريب منك وهما دول قلب المدينه حاليا خصوصا الحي الاول . الحي التاني في مدارس كتير وكبيره ومحترمه جدا العبور عامتا فيها مدارس كتير وانترناشيونال . بس عامتا لازم تنزل بنفسك تشوفها وتتفرج علي المدينه بنفسك . العبور انا فضلتها عن الشروق علشان اقرب مدينه جديده للقاهره وخصوصا مصر الجديده والحركه والنشاط فيها اعلي بكتير وكام ميزه تانيه كدا بالنسبالي. كمان الحركه هناك مش معناها زحمه نهائي الحركه يعني محلات كتير وناس كتير حواليك عايشين ودا فادنا اوي وقت الثوره بجد. عامتا حضرتك شوف محتاج تعرف ايه بالظبط واسألني عليه. حاجه كمان العبور فيها مزارع خاصه بتروح تشتري الفاكهه من علي الشجر او تختار حاجه وتتدبح قدامك ودي من الحاجات اللي عجباني دا غير سوق العبور بروح اشتري منه الحاجه طازه وبسعر كويس

[خالد]

بجد مش عارف أشكر حضرتك إزاى ، ربنا يباركلك ياأستاذ محمود
إن شاء الله نويت على العبور وهحاول أدور على حاجة كده بالمبلغ اللى معايا ، وبالنسبة لشقق البنك دى حضرتك تقصد التعاقد مع البنك ولا مالكها يعنى اللى بيبيعها وهيا أسمها كده شقق البنك ، وحضرتك مش بتفضلها ليه ؟ حضرتك تنصحنى أدور على النت ولا مكاتب السماسرة ولا شركات ؟
ربنا يكرمك ويرزقك من حيث لاتحتسب

[mahmoudselim]

شقق البنك دي كانت تبع البنك بالقسط بمبالغ بسيطه جدا شهريا ماتتعداش 200 جنيا والناس اشتريتها من زمان في اللي خلص اقساط وبيبيعها وفي اللي بيبيع ولسه فاضل كام سنه مثلا من القسط في نوعين من اسكان البنك هرفعلك صور الاتنين بس النوع الاول انا مابفضلهوش شكلا ولو ان الساكنين هناك اشخاص محترمين النوع الثاني دا اللي بيقولوا عليه اسكان الشباب ودا افضله شكلا وهو علي شارع الشيخ شعراوي شارع رئيسي ومنطقه حيويه جدا وقريبه جدا جدا من الحي الثاني والمدارس يفصلهم فقط شارع الشيخ شعراوي وقريبه ايضا من الحي الاول والاسعار هناك اقل من 200 الف للتمليك. طبعا يفضل ماتتعملش مع سماسره نهائي ممكن النت افضل في جروب علي الفيس اسمه خدمات مدينه العبور دا هيفيدك جدا ولو موصلتش لحاجه عرفني وهخليك تتواصل مع المقاول اللي بنشتغل معاه هو ادري بمخابئ المدينه وهو راجل متدين بالمناسبه ولو ان دلوقتي مابقتش فارقه اوي بس اقصد انه محترم مش بتاع التلات ورقات. بس انصحك الاول تروح تشوف المدينه وياريت وقت العصريه علشان تتفرج عليها في النور وبرضوا تشوفها في الليل وقت المغرب والعشا عامله ازاي وركز فقط في الحي الاول والثاني وحي الشباب هما افضل الاماكن ليك . هبعتلك في المشاركه التانيه صوره مساكن البنك القديمه وصوره اسكان الشباب وكفايه دعوه حضرتك وربنا يوفقك للخير

[mahmoudselim]

مساكن البنك القديمه

[mahmoudselim]

اسكان الشباب وشارع الشيخ شعراوي ودي الافضل طبعا