هندسة طيران ولا مدني ؟؟

[Mostafa Bedo]

السلام عليكم....
الموضوع باختصار ان انا دخلت السنة دي كلية الهندسة جامعة عين شمس وهتخصص السنة اللي جاية بأذن الله فكنت عاوز آخد آرائكم انهي افضل كشغل ف مصر و عموما هندسة مدني ولا احول طيران ف القاهرة ؟؟ وعلي اساسها هحدد المذاكرة من دلوقتي هتبقي عاملة ازاي..
وشكرا.

[Omar.Shawki]

نصيحة بلاااااااش طيران الا لو معاك واسطة كبيرة ومتأكد انه هيشغلك

[ahmedwagdy03]

طيران مالوش مستقبل في مصر

[م أحمد]

هندسة طيران أنشأ أيام عبد الناصر لان مصر كانت بتصنع او بتجمع طيارات بمساعدة العلماء الألمان و كان فى نشاط صناعى الفترة دى...إنما دلوقتى الوضع مختلف تماما لو جيت تعمل عربية مش طيارة هتلاقى حرامية التوكيلات الكبار بيحاربوك و مفيش ارادة من اساسه...و فى الآخر ممكن تلاقى واحد معاه معهد طيران معاه واسطة واقف فى سكتك..و مع احترامى للرأى انك تعتمد على اسنان علشان بعد 5 سنين هو اللى يشغلك دا مش صح...فى مقولة لسيدنا على " إذا استطعت ألا تجعل بينك و بين نعم الله أحدا فأفعل " علشان ما يمنش عليك بعد كدة و ينسيك صاحب الفضل
هندسة مدنى قسم محترم بس انصحك ما دمت فى عين شمس تدخل كهربا.... بتدخل علم جديد اضافة لحياتك ان شاء الله و لشغلك
الاقسام فى كهربا كلها قوية جدا و محترمة خصوصا اتصالات

[7oda]

ادرس حاجة تقدر تشتغل او تكمل بيها بره مصر
شوف كهربة
ميكاترونيكس
طاقة جديدة

[ahmed_eng2001]

العنوان لفت نظرى جدا .... محسوبك خريج قديم من طيران القاهرة ...

حضرتك بتقارن بين حاجتين ملهمش علاقة ببعض

هندسة الطيران دمها تقيل جدا .... نظريات و اثباتات و شيتات و امتحانات و كوزات لغاية لما تزهق من نفسك .. ده اذا ربنا كرمك وتحولت الى انسان الى يذاكر فقط

زمايلنا فى ميكانيكا لما كانوا بيقدموا شيتين ( 2 sheets ) فى مادة فى الترم .. كانوا بيقولوا احنا تعبنا فى المادة دى ... احنا كنا بنقدم شيت كل اسبوع فى 3/4 المواد الى فى الترم الواحد
يشترك مع قسم اتصالات انهم القسمين الوحيدين الى بياخدوا رياضيات لغاية السنة التالتة الترم التانى .. و من ساعتها و انا بكرة الاحتمالات و التقاطع و الاتحاد

يشترك مع قسم انتاج انهم القسمين الوحيدين الى بياخدوا تصميم و رسم هندسى لغاية السنة التالتة ... انا كنت بنام و ارسطو و المسطرة ال تى جنبى على السرير

من الاخر ... تعب كبير و مجهود كتير اوى .... على الفاضى

نصيحة ليك .... مفيش حاجة اسمها انك حتحدد من الان طريقة المذاكرة بناء على القسم الى انت حتخشه .... انت تذاكر على اد ما تقدر ... مفيش هزار .. مفيش فسح كتير ... مفيش فرجة كتير على المتشات .... مفيش صوت يعلو على صوت المذاكرة

شدة اعدادى دى البداية .... و لازم تزود عليها كل ما تنتقل لسنة اعلى ... على خلاف المثل المعروف ... اعدادى اصعب سنتين فى هندسة ... ابسلوتلى .... كل لما تعدى سنة ... تعرف انك كنت بتهزر فى المذاكرة

حتعرف يعنى ايه تطبق باليومين صاحى بتذاكر او بتشتغل فى ريبورت علشان تقدمه

لو الكلية كانت جنب البيت حتوفر عليك حاجات كتير جدا .... وقت كبير و مجهود حيضيع فى المواصلات

و بعدين انت لسة بادئ اعدادى السنة دى .... و بتدور على التخصص ؟؟ّّّ!!!! ... ياراجل بس انت خلص اعدادى الاول ... و حتلاقى فيه حاجات كتير وضحت .. بعد ما رجلك تكون جات فى الخية :)

يااااه ... فكرتنا بالذى مضى ....
ربنا يوفقك

[Mostafa Bedo]

طيب ايه أفضل قسم ؟؟ انا مفيش قسم معين انا حابه يمكن بميل للمدني عشان خالي استشاري ف مدني وولاد خالاتي مهندسين مدني وممكن يوفرولي شغل. لكن لو في قسم افضل هخشة طبعا وبالنسبة للكلية انا مش فاهم حاجة فعلا الكلام كله بالانجليزي وانا كنت عربي .

[ahmed_eng2001]

طيب ايه أفضل قسم ؟؟ انا مفيش قسم معين انا حابه يمكن بميل للمدني عشان خالي استشاري ف مدني وولاد خالاتي مهندسين مدني وممكن يوفرولي شغل. لكن لو في قسم افضل هخشة طبعا وبالنسبة للكلية انا مش فاهم حاجة فعلا الكلام كله بالانجليزي وانا كنت عربي .

عادى جدا ... كلنا فى الاول كنا بنعانى جدا من المصطلحات الانجليزية .... و لكن حتعتاد عليها بعد فترة ان شاء الله
بعد ما تعدى اعدادى على خير ... ممكن تشوف نفسك بتميل لأى نوع من الدراسة ... و الشغل ده رزق من ربنا .. متشغلش دماغك بحاجة مش فى ايدك .. و تأكد ان رزقك حتشوفه ...

انت بس عليك انك تذاكر كويس اوى ... من اول يوم ... متاجلش حاجة من المذاكرة ... شيتاتك و لوحاتك تتسلم فى ميعادها ... متاجلش مذاكرة الامتحانات لاخر ليلة ....اهتم جدا باعمال السنة ..... اعمل حسابك ان السنة قصيرة فعلا .. اوعى تقول ان المقبول حلو اوى .... و تذاكر علشان يادوب تنجح ...

ربنا يوفقك

[mbx4e]

خش تخصص انت تكون غاويه او حابه وليه سوق عمل يعني عليه طلب هو زي ما الزملا قالولك وباشمهندس احمد بالاخص
هندسة الانتاج مثلا ( تخصص انتاج حقن او نفخ او سحب بلاستك) تخصص حلو ومربح
شغل كهربا و plc وكونترول وميكاترونكس و كهربا باور
انت اثناء او بعد الدراسة تاخد كورسات فنيه متخصصه هاتنفعك وعلى حسب التخصص
بس فعلا شدة اعدادي
وتوفير وقت المواصلات
والشلة كل دي عقبات بتأثر على مستقبلك
واذا كنت فاكر ان فيه راحة خلاص انت. دخلت الجامعة انسى ياحبيبي مش هتلافي تعبك وكل سنة اصعب من اللي قبلها دراسيا
بس اول سنة اصعب في التأقلم على جو الجامعة والدراسة كمجال او بيئه محيطه ارمي التفاهات وراك وبص لمستقبلك وحط هدف انت عايز تبقى ايه خلال 5 سنين

[mbx4e]

خد لك كورس انجليزي اول شهرين تلاته هايزبط معاك مافيش امكانيات اتعلم self study
النت بحره واسع علم نفسك بنفسك

[hitman235]

مدنى متشبع و السوق فى النازل بسبب ان الخليج اتضرب و ناس كتير بتدور على شغل و متوقع الحال يستمر على هذا الوضع مش اقل من 10 سنين ....
نصيحه ليك انا خريج مدنى من 9 سنين ... المقاولات اسوء مجال عمل كله مرتع فساد و تعريص و الشغلانه سهله فبينافسك فيها الهنود و الفلبينيين و الخلايجه نفسهم .......... سواء دخلت مدنى او غيره قدامك فرصه مش هتتكر تانى انك تخلص بتقدير و تتعين فى الجامعه او تعمل ماجستير و تهاجر ده افضل حل انا للاسف محدش وضحلى اهميه الطريق ده و انا قدك ........ ماجستير و دكتوراه هيبقى عندك 28..29 و فى المقابل هترتاح بقيه عمرك

[ahmedwagdy03]

ادرس حاجة تقدر تشتغل او تكمل بيها بره مصر
شوف كهربة
ميكاترونيكس
طاقة جديدة

الميكاترونيكس بتفكرني بأواخر الثمانينيات و أول التسعينيات عندما بدأت هندسة الكمبيوتر و كانت أمنية كل شاب و كل فيتاة أنه يطلع مهندس كمبيوتر و الحياة الوردية بتاعت إيهاب نافع فى فيلم النداهة .و فى الآخر طلع خريج معهد الحاسب بيشتغل عن مهندس الكمبيوتر . لسبب لم يفطن إليه أحد وقتها هو أنه غير مسموح لمصر أن تكون دولة منتجة للحواسب و البرمجيات . وحتى لو كان مسموح لها فهل ممكن لشعب كل تفكيرة فى الأكل و الجنس و الفهلوة أن يكون منتج للحضارة.
بلاش الميكاترونكس مش علشان وحشة لكن مستقبلها فى مصر من وجهة نظرى معدوم طالما نستورد من الصين كل حاجة .
أنا مهندس مدنى و أنصحك بميكانيكا قوى أو كهربا أى تخصص و لو مجابتش معاك يبقى مدني بس إبعد عن عمارة لإن ملهاش شغل كتير

[7oda]

الميكاترونيكس بتفكرني بأواخر الثمانينيات و أول التسعينيات عندما بدأت هندسة الكمبيوتر و كانت أمنية كل شاب و كل فيتاة أنه يطلع مهندس كمبيوتر و الحياة الوردية بتاعت إيهاب نافع فى فيلم النداهة .و فى الآخر طلع خريج معهد الحاسب بيشتغل عن مهندس الكمبيوتر . لسبب لم يفطن إليه أحد وقتها هو أنه غير مسموح لمصر أن تكون دولة منتجة للحواسب و البرمجيات . وحتى لو كان مسموح لها فهل ممكن لشعب كل تفكيرة فى الأكل و الجنس و الفهلوة أن يكون منتج للحضارة.
بلاش الميكاترونكس مش علشان وحشة لكن مستقبلها فى مصر من وجهة نظرى معدوم طالما نستورد من الصين كل حاجة .
أنا مهندس مدنى و أنصحك بميكانيكا قوى أو كهربا أى تخصص و لو مجابتش معاك يبقى مدني بس إبعد عن عمارة لإن ملهاش شغل كتير

يبدو أن حضرتك قريت نص الكلام.
الغرض من التخصصات الى زكرتها هو انه يقدر يكمل بيها بره مصر. بحيث أن سوقه يبقى اكبر