50جنيه مزورة (ممكن فكة خمسين؟إتفضل. شكراً- إختفى-)

[ahmed1981]

النهاردة تم النصب علي بخمسين جنيه مزورة
بالطريقة التالية:
ممكن فكة خمسين ؟
آه ممكن
إتفضل (سلم وإستلم)
مشيت حوالي خمسين متر
ببص في الخمسين لقيتها مزورة ببشاعة
رجعت فوراً لقيت الحرامي إختفى
الموقع : مدينة نصر أمام البحوث الإسلامية

ربنا يعوض علينا

يا رجالة تستلم أي فلوس ورقة ورقة ولا تعطي الأمان أبداً وخاصة في فئة الخمسين والمئة

[mahamedaraby]

ببص في الخمسين لقيتها مزورة ببشاعة

يعنى حتى حرامى غبى مش عارف يزور الفلوس

وربنا يعوض عليك وياريت لو تتخلص منها

[ahmed1981]

وربنا يعوض عليك وياريت لو تتخلص منها

أنا كتبت عليها بقلم فلوماستر عريض من الأمام والخلف (مزورة)
وسايبها في البيت عشان الأجيال تأخذ حذرها

[mohmd76]

دى موجودة منذ فترة كبيرة هى واختها ال 100

[ouba2]

حصلت معايا قبل كدة

[essa]

انا جيت افك 100 من محل فقالى مفيش فواحد واقف قالى هاتها اناا هفكلك وقعد يبص ويبص ويحطها على الشمس ومش عارف ايه
قولتله مش للدرجه دى قالى لا للدرجه
قولتله حقك بس ياريت تنجز علشان انا مستعجل قالى طيب خد الفكه اهى بس بص دى !!!!!
وورانى 100 جنيه نسخه طبق الاصل من اللى كانت معايا بس فى الوان مختلفه ماتتلاحظش واستغربت جدا وقالى انه مخليها معاه علشان ينبه بيها كل واحد ومايضحكش عليه
قولتله طيب خلى بالك بقى ليقولوا عليك انت اللى بتزورهم

[Tamer-Ezzat]

دا انت جاى ع الجرح
لسة النهاردة واخد واحدة ...
مدسوسة فى 10 ورقات
وانا باقفل آخر اليوم شكيت فيها ..
وفى اختبار حلو قوى حطها فى كوب مياة ...
لقيت المية اتلونت والورقة بقت آخر بهدلة ...
طبعا اتخلصت منها وحرقتها خصوصا انى بتاع كمبيوتر ويامكتر البرنترات فى المكان"يعنى ممكن تبقى مصيبة "

الذ ما فى الموضوع واحد من اللى شغالين معايا قالى طب ما احنا نحط كوب مباة جنب الدرج وكل فلوس داخلة نغمسها فيه .. قلتله لا يامفتح ده يبقى غسيل اموال وبردة حنروح فى داهية

[ahmedsmg]

اول حاجة : تكتشف به الورقة المزيفة هو الملمس ...
الورقة المزيفة يكون الملمس أنعم وسمك الورقة أرق .

ثانى حاجة : شريط الامان الفضى والموجود على وجه الورقة ...
الورقة الاصلية الشريط الأمان الفضى يلمع ويشف ماتحته من نقوش وكتابات
الورقة المزيفة يرسم هذا الخط بقلم دوكو فضى رفيع بشكل متقطع وبأستخدام مسطرة فلا يلمع ولا يشف ماتحته ... وهناك طريقة اخرى هى لصق قطع صغيرة من السلوتيب على انها شريط الامان ولكنها فى هذة الحالة لا تظهر باللون الفضى المعتاد .

وطبعا المظهر العام للورقة المزيفة والألوان تكون أما باهتة أو قاتمة عن الورقة الصحيحة
ويلزم الكشف على الوجهين الامامى والخلفى لان هناك اوراقا يسهل اكتشافها من الوجه الامامىوأوراق أخرى من الوجه الخلفى نظرا لوجود عيوب اكثر فى وجه دون الاخرلاختلاف الشخص الذى زيفها والطريقة التى استخدمها .
وعلى فكرة القانون يعاقب بالحبس المشدد كل من :
1/ الشخص المزيف
2/ المستفيد من التزييف (الذى اشترى خدمات المزيف )
3/ كل من تداول الورقة المزيفة سواء كان من العوام (بائع فى محل /فى محطة بنزين/فى محل حلويات ....)و من المختصين (بنوك /شركات صرافة/صرافين بالشركات....) .


وهناك 5 درجات من التزييف ( مفضوح- متوسط-جيد-جيد جدا-متقن)
يسأل وبحبس العوام من الناس عن المفضوح ويسأل ويحبس المختصين فى جميع الدرجات ماعدا المتقن وهى نسبة ضئيلة للغاية .

أسف على الاطالة ولكن شعرت بأن هذا الجانب مهم للغاية ولايعلم الناس عنه الكثير
ومن دواعى سرورى الاجابة على أيه استفسارات ومواقف تحتاج اليها السادة اعضاء المنتدى

وتقبلوا تحياتى

[AboMaro]

كان عندي محل دهب وكان بيجيلي من النوعيه دي كتير و بالوفات مش 50 جنيه بس
الحمد لله عمري ما اتخدعت منهم و مره واحده منهم سلمتها للحراسه و غير كده كان اول ما يعرفوا اني كشفتهم يعملوا هبل وياخدوا الفلوس ف ايديهم ويا فكيك
و اللي عايز دروس في كشف العمله المزوره يتفضل
و لو ان لو في حد من الاساتذه موظفين البنوك هنا هيفيدوا الناس اكتر
وبرده احب اقول ان مابيقع الا الشاطر و الشاطر وقعته اكبر والله الستار ف الكل يحذر لان الفلوس دي ماليه السوق وربنا يستر علينا جميعا

[AboMaro]

انا اسف مكنتش قريت مشاركه الاستاذ احمد ( المشاركه السابقه )
احب اشكره على المعلومات القيمه
واحب اضيف نقطتين :
1- ان الورقه الاصليه لو كرمشتها ف ايدك تفتح نفسها تاني لكن المزوره اول ما تكرمشها تتكسر بسهوله
2- لو الفلوس المزوره باكو على بعضه و طبعا لان المزور لازم يكون جديد فانت المفروض تبص على الترقيم المسلسل فلو هي فلوس صحيحه هتكون يا اما مسلسله يا اما لا ولو لأ فبص على الارقام هتلاقيها يا اما مكرره بالكامل لها نفس الرقم يا أما لها 14 رقم مكرر وبيتعادوا تاني وليه 14 بس لان عادة اللي بيجيب طابعه عشان يزور بيجيب واحده صغيرة مقاس الفرخ بتاعها بيتقسم على 14 ورقه عمله ولو بيجيبوا حتى طابعه اكبر فممكن 28 او 56 وده اقصى عدد ممكن يكون مسلسل

[Terrible_DaRsH]

ربنا يعوض عليك ال 50 ب 500 إن شاء الله ...
و لكن ده شيء عادى النصب مالى البلد .. الناس مبقاش عندها ضمير اساسا ...
احمد ربنا انها جت فى 50 بس ..

[elassar2010]

الحمد الله خد بالك كويس بعد كدة وخصوصا الفلوس الورق الجديد خالص لان اللعب فية
انا اعرف واحد اضحك علية فى ورقة 500 جنية طلعت اشاعة ان البنك المركزى نزلها واحد راح فكها من واحد وفى الاخر طلعت العملية نصب والسبب الجرايد الى بتكتب وخلاص والناس بتصدق

[Miss_Pharma]

الذ ما فى الموضوع واحد من اللى شغالين معايا قالى طب ما احنا نحط كوب مباة جنب الدرج وكل فلوس داخلة نغمسها فيه .. قلتله لا يامفتح ده يبقى غسيل اموال وبردة حنروح فى داهية

هههههههههههههههههههههههه جامدة جدااااااا

[احمد عز]

حسبى الله ونعم الوكيل

[sab3aawy]

فيه اسلوب تانى انا اعرفه كمراجعة اولية للورقة الصحيحة، انت لما تمسك الورقة وتبرمها كانها اسطوانة وتجيب آخرها قصاد اولها بتلاقى النقشة مكملة بعضها، يعنى كل خط رفيع فى نهاية الورقة بتلاقى ان كمالته موجودة فى اول الورقة كأنها اسطوانة منقوشة بالكامل بدون فواصل، والكلام ده ينطبق على وجهين العملة ، وينطبق لو برمت العملة بالطول او بالعرض ،وده صعب جدا المزور يظبطه بسبب انحراف الورق ولو بقدر بسيط اثناء الطباعه وعدم دقة قص الورق وعدم دقة ضبط ظهر الورقة على وشها