محتاج رأيكم في فتح شركة خاصة

[shod90]

السلام عليكم ورحمة الله و بركاتة
كنت محتاج رأي الناس الخبرة اللي في المنتدي و استشارة المحامين القانونين اللي في المنتدي
نويت إن شاء الله أنا و أخويا نفتح شركة كاميرات مراقبة و برامج حسابية و كل ما يخص ال it من حيث عقود صيانة و شبكات
كنت محتاج أعرف أخد بالي من ايه و لو في أفكار بحيث اننا نضمن أستمرارية هذة الشركة

أما بخصوص الإستشارة فكنت محتاج أعرف تفصيليا أيه الأوراق المطلوبة و الوقت و التكلفة أدد ايه عشان أبقي قانوني و شغال علي ماية بيضة
أيضا كنت عايز أعرف موضوع الضرائب ايه قصتها

أسف لو كنت طولت

[Hany Adel]

انا كنت رديت على حضرتك قبل كده .. في موضوع الاستشارات القانونيه .. لكن المشكله المطلوب من حضرتك ده لازم يكون من خلال محاميك المباشر .. لان الكلام عبر الانترنت او التليفون لا طائل منه .. فلو كان الامر نشاط بسيط معتاد .. فالاجراءات التأسيسيه بسيطه وستجدها على الانترنت ..

اما لو كان الامر طموح وعايز تكبر فده خط تاني .. وحتحتاج معاك طاقم عمل مستشارين .. يعني محامي ومحاسب قانوني غير الفنيين ..
عشان تقدر تحافظ على الشغل ..

مشكلة مصر
ان معظم رواد الاعمال .. بيعملوا حساب الفلوس فقط .. وعينهم على الفلوس والمكسب فقط
لكن رواد الاعمال اللي بينجحوا فعلا .. بيجهزوا العنصر الاهم في اي عمل .. وهو العنصر البشري .. لانهم رأس مالك الحقيقي اللي حيدفع العمل لفوق

وده اللي كنت بأعمله انا وزمايلي في الخليج لما كنت باشتغل في شركات اجنبيه كمستشار قانوني ومدير للعقود .. تفكيرنا مختلف وطاقة العمل مختلفه ..
الروح مختلفه تماما عن مصر .. لان الشركه الاجنبيه جايه بعقليه رجل الاعمال ... مش عقليه التاجر ..
وده اللي كان بيخليني كمحام ومدير عقود اني اتدخل في الامور الماليه او الاتش ار مثلا .. كعامل مساعد وحافظ للشركه ..
مش بس كده .. ده احنا كنا بنجيب شغل للشركه كما بارقام لا احد يتخيلها من خلال علاقتنا الخاصه في البلد ..

رجل الاعمال الناجح بيختار عنصر بشري في كل قطاع صح .. بتكون النتيجه ان القطار يتحرك على القضبان الصلبه بهدوء وقوة .... نحو الامام ...

الخلاصه
حاول تستعين بمستشارين فنيين وقانونيين ذوي خبره .. يقدروا يساعدوك بجد .. ولازم تعمل حسابك ان لا شئ مجاني ابدا ..

وان شاء الله يكون الامر فاتحة خير لك

ربنا معاك