افلام العيد .. شفت فيلم ايه ورأيك ايه

[مصراوي جدا]

بما ان الافلام نزلت في العيد قلت الناس تفيد بعضها واللي شاف فيلم عجبه يقول عليه واللي شاف فيلم معجبوش يقول برضه

انا شفت فيلم هنيدي (رمضان مبروك أبو العلمين حمودة) قصة يوسف معاطي ، فيلم مناسب للأسرة محترم وهادف

الفيلم فعلا أكثر من رائع .. برافو عليك يا محمد يا هنيدي ..برافو عليك يا يوسف يا معاطي

[EslaM_NagY]

شوفت فيلم هنيدى
لذيذ
بس معجبنيش انو اتجوز نجلا دى

يعنى منين هو مربى فاضل
ومنين اتجوز مطربة ومكنش عاجبو ان العيال بتحبها !!!!!!

[EslaM_NagY]

اه وبرضو مشهد العربية لما بتتقلب

يعععععععععععععععععععععععععع

دى لو 128 فى نفس الملابسات كبيرها حتخبط فى الرصيف

مش بى ام وتتقلب والعيال تتكسر !!!

دول كانوا ماشين على 20 ازاى تتقلب ثم ان دى Bmw يعنى لو ماشى على 160 ولفت الدريكسون عشان يفادى العربية الى واقفة مش حيتقلب بالصورة دى.

بصراحة مشهد غاية فى الهبل

[NaviGator_13]

الحقيقة باباشمهندس الظروف مخلتنيش اشوف ولا فيلم
بس كان نفسى ادخل فيلم هنيدى مش عارف ليه

[mido_919]

انا دخلت فيلم هنيدي وهو فيلم جامد جدا وهادف بس في شوية حاجات كده قلش زي حوار المطربة ده

[ouba2]

رمضان مبروك أبو العلمين حمودة

[itsonlyme]

لسه جاي من فيلم "بُلطيَّة العايمة" بطولة عبلة كامل وتأليف الصحفي الشاب بلال فضل.

الفيلم بيتكلم عن مشروع سياحي كبير عشان يتعمل لازم يطردوا سكان منطقة الماكس في اسكندرية. طبعاً عبلة كامل ح ترفض و يبتدي الصراع بين الفقر وقلة الحيلة من جهة والغنى الفاحش والظلم والجبروت من جهة تانية

الفيلم طبعاً نكد "آخر حاجة" بس يستاهل. أول فيلم عربي أدخله من زمان مافهوش سفالة أو سفاهة.الحمد لله ظهرت سينما هادفة جنب السينما التافهة. كان ممكن أخش الفيلم ده أو فيلم لروبي عاملة فيه فتاة ليل! طبعاً اخترت فيلم بلال فضل

[zAzU]

فيلم هنيدى وعجبنى جدا فيلم محترم

[AhmedGen2]

شفت اعلان هنيدى ومش عارف ايه الحلو اللى فيه حاسس إنه عينة فول الصين العظيم ، الناس عاجباها الفيلم ليه؟.

[mokhtar]

شفت رامى الاعتصامى لاحمد عيد وبصراحه لا قصه ولا هدف ولا اى حاجه وكله اشتغالات هو شاب هاى بس مزاجه local وعامل جروب على الفيس بوك لتغيير النشيد الوطنى مش عشان هو وطنى انما عشان يلفت نظر البنت اللى بيحبها والموضوع يكبر زى فيلم عايز حقى وحوارات فاشله وفيلم ملوش اى لازمه




..mokhtar..

[sab3aawy]

انا اتفرجت على فيلمين قدام شوية اشتريتهم على CD لأن دخول السنيما بالنسبة لى فى العيد مغامرة غير مأمونة العواقب (لو مانضربتش على شباك التذاكر ممكن الاقى نفسى لابس قضية تحرش ههههههههههه، وانا يا حسرة لا ليا عضل لخناقات العيد ولا ليا كوسة تخرجنى من قضية)

الفيلمين هم "حوش اللى وقع منك"، و"الشبح"

حوش اللى وقع منك بطولة احمد رزق، ومحمود عبد المغنى، وعلا غانم، وبشرى، و طلعت زين،ومشاركة من سعيد طرابيك وسامى مغاورى الفيلم عاد باحمد رزق الى صف النجوم الأول بعد ان قدرم مجموعة افلام دون المستوى فيما سبق، وتيمة الفيلم مأخوذة عن الفيلم الأمريكىthe game من بطولة مايكل دوجلاس وشين بين، لكن مع اعادة صياغة الأحداث بشكل شبه كامل، ويدور فى اطار فكرة تليفزيون الواقع حيث يتم اغراق شخص عادى فى مجموعة من الاحداث المثيرة المختلقة التى تتلف اعصابه ويتم تصوير كل ذلك تليفزيونيا، الفيلم قصته مكتوبة جيدا والأحداث متلاحقة وسريعة وكوميديا الفيلم عالية وراقية جدا، فيلم يستحق المشاهدة

اما الشبح-من بطولة احمد عز وزينة ومحمود عبد المغنى، وصلاح عبد الله ومشاركة محمد الصاوى وباسم السمرة ، قصة الفيلم تقليدية سبق بناء كثير من الأفلام عليها وهى فكرة الشاب فاقد الذاكرة الذى يبحث عن اصله ويعترض لمجموعة من الأشخاص والأحداث والمؤمرات خلال رحلته للبحث عن اصله، الجديد والجيد فى الفيلم هو سرعة الاحداث وتناسقها والاستخدام الجيد للفلاش باك، كما ان التعامل مع فكرة استعادة الذاكرة فى الفيلم كان واقعيا جدا باسلوب الذكريات المتقطعة التى تثيرها استجابات شرطية لمشاهد معينة يراها البطل، وليس بالشكل الهزلى الذى كان يحدث فى الأفلام القديمة عندما يتلى البطل شومة على رأسه فيستعيد ذاكرته، المؤثرات البصرية والتصوير من افضل ما فى الفيلم واداء احمد عز اكثر من جيد، لكنه لم يخرج عن اسلوبه فى الفيملين السابقين(ملاكى اسندرية) و(الرهينة) ، ولا يزال احمد عز لديه ما هو اكثر ليقدمه

الفيلم بشكل عام جيد بدوره،

[أشرف العدوي]

فيلم الدادة دودي اتفرض عليا
و الي خفت منه حصل
فيلم مالوش اي لازمة خالص و عيال دمها تقييييييييييييييييييل
فيلم نجلاء فتحي و محمود يس برقبته ( هو هو نفس القصة بالظبط )
لا انصح احد بدخوله

[tamohsen]

بلطيه العايمه : فيلم واقعي مستواه الفني واقع
الوعد: فيلم تجاري غير عائلي مستواه متوسط يعيبه النهايه الغير جيده

[Hussein_Ramdan]

بلطيه العايمه : فيلم واقعي مستواه الفني واقع
الوعد: فيلم تجاري غير عائلي مستواه متوسط يعيبه النهايه الغير جيده

فعلا انا دخلت فلم الوعد بس
على فاكرة كل المناظر الخارجة والكلمات الخارجة بردو الى جت فى الاعلان يعنى غير كدة الفلم كلو مفهوش حاجة كلام خارج او مناظر غير الى جة فى الاعلان
هو الفلم حلو بس فعلا زاى ما قولت النهاية عبيطة
والهدف من هذا على ما اظن انهم عايزين يعملو جزء تانى عشان كدة سابو النهاية مفتوحة بس دة تقليد عبيط الى عايز يعمل فلم جزئين يسيب النهاية مفتوحة

[itsonlyme]

بلطيه العايمه : فيلم واقعي مستواه الفني واقع
الوعد: فيلم تجاري غير عائلي مستواه متوسط يعيبه النهايه الغير جيده

تقصد ايه بالمستوى الفني الواقع؟
الفيلم على المستوى الفني (من ناحية التصوير والموسيقى التصويرة) جيد. ان كنت تقصد أن وتيرة الفيلم بطيئة فهذا ليس عيب "فني" بل هو عيب في السيناريو والاخراج.