علقة موت

[OlaOsman]

أسمع كتير آباء و أمهات بيقولوا انهم مش بيضربوا ولادهم إلا قليل اوي، انما لما بيضربوا بتبقى علقة موت و على حاجة جامدة اوي عملوها و صعب تعدي من غير علقة.

الأجانب عموما ضد ضرب الأبناء و ممكن يعاقبوا بجميع أنواع العقاب و يفضلوا يخترعوا في أساليب عقاب معنوي و لا إنهمش يمدوا إيدهم على طفل لدرجة أحيانا بتستفذني و ابقى باقول في نفسي الواد ده عايز له قلمين على وشه عشان يتعدل

فيه ناس بتضرب عمال على بطال.. مش قادرة انسى زمان لما كنا في زيارة لناس قرايبنا و ازاي القلم كان بينزل يرف على وش العيل من دول يتوله على أتفه الأسباب.. انا يومها اتخضيت و حمدت ربنا ان ماما مش كده معانا، مع اني كنت صغيرة و ماافهمش اوي في الحاجات دي.

طيب، هل انتوا مع ضرب الأبناء علقة موت لما تقتضي الضرورة؟ و لا ضرب مستمر خفيف كنوع من أنواع التنبيه الوقتي للأخطاء الصغيرة؟ و لا ضد تماما استعمال الضرب مع الأطفال أيا كان السبب؟

[Islam_galal]

الضرب استخدامه ضروري و لكن ليس هو الحل الوحيد

الطفل حياته أبسط بكتير الانسان الناضج فهو يريد شئ واحد دائما قد يتغير و لكنه لا يسعي لشيئين في نفس الوقت

و بالتالي أولوياته واضحه لانها حاجة و احدة بس، المشكلة الأساسية ان الطفل بيستقبل من أبوه و أمه و جدوده (و آه من جدوده) و أي ضيف و بالتالي أسلوب واحد لا يجدي لانه يحب التقليد و كلما رأي أسلوب ممن حوله قلده (شوية أدب - شوية رزالة - شوية الحاح و هكذا) الأسلوب اللي يجيب نتيجه مرة يستمر عليه

و بالتالي المربي سواء الأب أو الأم يجب أن ينوع من الأساليب التربوية و منها الضرب

لكن الضرب علي الوجه أو الأماكن الحساسه مرفوض تماما (زي المدرس الأرعن اللي قتل ولد لما ضربه بالشلوت في صدره -تخلف تربوي مريع)

بالتعامل مع ابني باستخدم الضرب احيانا علي كف يده من الأمام أو الخلف أحيانا أو علي الضهر و بتبقي زقه أكتر منها ضرب و علي الفخذ

و لأني شاركت بجزء كبير في تربية أبنء أختي يتطلب الأمر أحيانا أن يكون الضرب قوي مع السن الكبير (من8 الي 10 سنين) في الأولاد فقط حتي لا يبدأ في أسلوب تحمل الضرب للاستمرار في العند- فعندما يكتشف مستويات قوة لم يشاهدها من قبل ، لا يتوقع أنها آخر المستويات و بالتالي يتراجع

لازم المربي يدرب نفسه علي المراقبه و المشاهده للطفل بعد أي عقاب بدني لملاحظة أي نتائج سلبيه و تعديل الاسلوب فورا

الافراط في معدلات الضرب أو بدون أسباب واضحه يؤدي إلي البلادة في الاحاسيس و الكراهيه

كل الأساليب بقدر و حسب نوعية الطفل
أحد أبناء أختي لم تمتد يدي اليه أبدا (عنده 16 سنة الآن) و الآخر اضطريت استخدم الضرب مرات قليلة و بشكل مقنن و بحيث لا يتوقع أبدا آخر طاقاتي البدنية (عنده 14 سنة الآن) و الحمد لله يحبوني جدا الآن و بشهادة كل من يعرفونهم

الضرب وسيلة وليست غاية - و سيلة تقويم و ليست وسيلة للتنفيث عن الشذوذ النفسي، أحيانا عندما أري احدهم يضرب ابنه و خلاص (تخلف تربوي) بابقي نفسي اطحنه ، لكن ما باليد حيله فنحن نعيش في مجتمع ملئ بالمبالغات و المتضادات

[MTAK]

شوفى يا علا افندم
انا كنت قبل كده ضد فكرة الضرب تماما
بس عمر بعد ما كبر شوية
بقى يعمل حاجات تخلينى اخرج عن شعورى و لا يسكت الا لما يشوف قلمين كده بس باحاول يكونوا على الرقبة مش على الوش
و حاليا باخوف بالكبريت "ياهههههههههههه"

مش عارف معسكر ابو غريب اللى انا فاتحه هايوصل لحد فين

[drhaytham]

شوفي ياعلا انا عندي بنتين مش هاقولك يعني اني مثالي وما باضربهمش لأ انا باضربهم بس في اضيق الحدود وبشرط انه يكون ضرب خفيف على الرجلين مش على الوش
لاني قريت ان من الاسباب اللي بتخلي شخصية الطفل تكون مهزوزة الضرب ع الوش و الايدين
تخيلي الضرب ع الايدين كمان غلط

[M!NA]

الضرب معناه اني عجزت عن حل المشكلة و ده بيربي في الطفل حاجتين...

أولا بيقتل فيه حتة الابتكار و البحث عن الحلول البديلة
و ثانيا بيربي فيه العنف و الجبن

احنا كلنا (او معظمنا) اتربينا عالضرب... طلعنا ايه؟؟
هل انتو شايفين ان الضرب اللي انضربناه و احنا صغيرين علمنا حاجة؟

أنا شخصيا المبادئء اللي ثبتت عندي كانت من نماذج أشخاص شفتهم بيتصرفوا تصرف معين في مواقف معينة..
يعني مثلا وانا صغير كنت بشوف في المواصلات العامة شاب يقوم عشان يقعد واحدة مسنة أو مريضة أو معاها طفل أو شخص عاجز... فبقيت أعمل زيه...

لكن تفتكروا لو طفل قاعد و انتا قلتله قوم... مرضيش ... رحت ضاربه و مقومه و مقعد مكانه واحدة كبيرة في السن .. تفتكر هيحب انه يعمل العمل ده برغبته؟؟

لو الاجابة بنعم تبقا كارثة لأننا بكدا لازم نكره (بضم النون) على عمل الأشياء حتى تصير محببة لنا...

الطفل زي الصفحة البيضا... شوف انت هتكتب عليه ايه...
ردود فعله كلها غربزية بحته ... عايز ياكل - مفيش أكل - هيفضل يزن لأنه متعلمش التحكم في ذاته زينا...

أفضل طريقة و ديه عن تجربة هي التشجيع... و انك تحسسه انه كبير و تمسكه مسئوليه (ولو كانت انه يشيل كيس نايلون مثلا و انتوا بتشتروا طلبات)
بكلام التشجيع و الحب تقدر تكسب طاعته و تضمن انه بقا تحت طوعك ... بعكس الإكراه

ملحوظة جانبية: بتعجبني جدا طريقة أحمد حلمي مع الأطفال (من أيام ما كان بيقدم برنامج لعب عيال لو حد يفتكره) :)

[tutankhamoun]

أنا مع الضرب في أضيق بعد تجربة العقاب المعنوي
أنا شفت بعيني أزاي العيال برة مصر أخر قلة أدب
علشان العيل من دول عارف أن لو أبوه مد أيده عليه
يقوم الواد رافع سماعة التليفون و يتصل بالشرطة ييجوا يأخدوا السيد الوالد و ممكن يتم حرمان الأب من أبنه لمجرد أن الواد قليل الأدب مش عاجبه أن أبوه ضربه
حتى وزارة التعليم هناك كانت بتناقش موضوع العقاب بالضرب كحل
لأن العيال هناك بقوا أخر قلة أدب
يبقى لازم تجريب أنواع العقاب المعنوي أولا و بعدين العقاب بالضرب إن لم يُفلح العقاب المعنوي

إنما اللجوء للضرب على طول بدون تفكير ....غلط طبعا
لأن فيه عيال بتيجي بالكلام ........و عيال لازم تنضرب

إنما منع الضرب تماما و الإكتفاء بالعقاب المعنوي ...... غير مُجدي في أغلب الأوقات

[haneena]

انا شايفة ان الضرب المقنن مطلوب يعنى لازم مايكونش فيه اهانة زى الضرب على الوجه او يكون مبرح او يستخدم عمال على بطال وساعتها العيل من دول جتته هاتنحس ومش هيهمه الضرب
وقبل تجربة اسلوب الضرب يجب تجربة العقاب المعنوى لانه بيجيب نتيجة مع اطفال كتير خصوصا اذا كان متبع معاه النظام ده من الاول يعنى انا بنت اختى(7 سنين) اكبر همها انى ازعل منها وخاصمها اذا اخطأت وده بيبقى عقاب كافى لها عشان ماتكررش الخطأ تانى

[محمد ابراهيم 1]

العيال بتجنن أهاليها
ورغم انى ضد الضرب تماما وبكرهه كرها شديدا الا انى بخرج عن حالتى الطبيعيه أحيانا وبلاقى نفسى بضرب وأرجع أندم ندما شديدا
بس الحمد لله الأمور دى نادره جدا

فبعيدا عن اللى بعمله أنا ضد الضرب وشايف انه موضه قديمه وشايف ان بدايله كتير وناجحه

[ehabbasha30]

اضرب ابنك واحسن ادبة
مايموت الا ان فرغ اجلة
دى حاجة من صور التعذيب اللى لازم تتم مع الاطفال الاشقياء



بعد الشر عن كل اطفال المسلمين
انا طبعا بهزر

[kh_talaat]

أعتقد أن الضرب من أسوء أساليب التربيه و بيجيب نتائج عكسية لا تعد ولا تحصى منها على سيبل المثال لا الحصر توليد مشاعر الجبن 000 مشاعر كراهيه 0000 عقد نفسية

[نور القمر]

موضوع العقاب المعنوي ده كويس لكن مش بينفع مع كل الاعمارولا مع كل الشخصيات
يعني مثلا لو حرمتي طفل من لعبته عقاب معنوي هاتلاقيه هايلاقي لعبة غيرها
ولوحرمتيه من الكمبيوتر هايروح للتليفزيون ولوحرمتيه من المصروف هاتلاقيه هايطلع من الحصالة
لما يكون الغلط كبير ومتكرر واتعاقب عليه كذا مرة ومجبش نتيجة وقتها لازم علقة بس اوعى وعلق الموت لان الطفل بيتعود عليها بعد كدة ومع الوقت بتفقد تاثيرها
كفاية علقة بسيطة بدون اهانه
يعني اوعي وضرب القلم بتفقد الطفل شخصيته خصوصا لو قدام ناس
كمان لو الطفل بيغلط قدام الناس كفاية اوي تاخديه بهدوء من غير ما حد يحس وتقوليله احترم نفسك بدل ما اهزأك قدام الناس
ساعتها بيحترم نفسه بجد وده دليل على ان العقاب قدام الناس له اثر سيء على نفسية الطفل
وفي نفس الوقت مدح الطفل قدام الناس له اثر ايجابي جميل اوي وبيديه ثقه في نفسه وبيقوي شخصيته
وربنا يعينا عليهم

[hh]

انا مش مع الضرب عمال على بطال. بس في ساعات بيبقى ضرورة لكن مش في كل وقت. انا رأي ان المشكلة الاساسية ان الاب او الام بيبقوا بيعاقبوا اولادهم عشان متنرفزين منهم و ده اكبر غلط. العقاب مش وسيلة للانتقام, ده وسيلة للتعليم. عشان كدة لازم بقدر الامكان تحاول انك قبل ما تعاقب اولادك تسيطر على انفعالك و عصبيتك عشان ما يكونش العقاب مبالغ فيه سواء ضرب او غيره.

[mohmd76]

كنت فى حفلة فى المركز الفرنسى للثقافة والعلوم فى رمضان وكانت حفلة الشيخ الهلباوى طبعا العاملين فى المركز اغلبهم فرنسيين وكان يوجد احد العاملين وزوجتة وابنه او ابنته حوالى 2.5 او 3 سنوات وكان فى غاية الشقاوة والضحك والرقص ومن شدة الشقاوة والصريخ احيانا كانت امه تمسكه وترفعه وتضرب ضرب يكاد يكون بحنان جدا على ال hunsh والطفل يضحك اكثر ويسكن قليلا ليعاود الضحك واللعب اكثر مما كان حتى بدأت الحفلة وسكت مثل الناس تماما
فكرة الضرب هذة ترجع الى ان المجتمع هذا اذا كان يوجد مجتمع اصلا لاننا فى غابة
مجتمع فاسد فيه كل الاثام والعيوب ولردع الطفل والتربية الحسنة لابد من رادع للتوجيه والردع عن السلوك الخاطىء
يا جماعه السيارة فيها 2 فرامل الاولى بالقدم لتخفيف السرعه
والاخرى لايقافها تماما اذا فقدت السيطرة

[ASKAFRAWY]

لا انا مش مع الضرب الضرب بيخلى الطفل يكره اهله ويعاند اكتر من الاول!
العقاب ممكن يكون حرمانه من حاجة بيحبها لحد مايبدأ يتعدل!بس الضرب ملوش اى ايجابيات كله سلبيات

[Terrible_DaRsH]

يجب ان تتم عملية الثواب والعقاب فى اطار من التوسط والاعتدال ...