تكاليف تشتطيب الشقة

[thatha]

ازايكو يا جماعة. انا محتاج خبراتكوا . لاني استلمت شقة على الطوب الاحمر. و عايز اشتطبها. و بيني و بينكوا انا انا عايز اشطبها حاجة معقوله.يعني مش احسن حاجة ولا اسواء حاجه! و محتاج اعرف التكاليف عشان اعمل حسابي للي يعرف. و متشكر اوي على المساعده المساحه الكليه 125 متر.

[Dr.A.Nabil]

محاره سباكه كهربا نقاشه سيراميك
40 الف اقل حاجه

[homme49]

هناك عدة عناصر يجب أن تأخذها فى الحسبان
أولا : نوعية الخامات التى ترغب فى إستخدامها (سيراميك- الوميتال-خشب أبواب -محابس و خلاطات المياه-حديد تقفيل البلكونة لو الشقة دور أرضى أو الدور الأخير- أطقم الحمامات و نوعيتها )

ثانيا أجرة الصنايعية و دلعهم و فى ذلك تكتب مجلدات حيث أنه من رابع المستحيلات أن تجد صنايعى أمين يرضى ربه فى عمله و لكنها بالنسبة لهم فهلوة أو شطارة أن يسرقك فى المصنعية ويهدر فى الخامات)
ثالثا : إلجأ لمن تعرفه أو من يعرفه أقرب الأصدقاء لك بحيث يكون هناك من يقوم الصنايعى بعمل حساب له ( و بالرغم من ذلك سوف تتعرض لسرقة لو لم تكن مقيم بالشقة أو تحت نظرك يوم بيوم)
رابعا : موسم الشتاء هو موسم ركود التشطيبات فى الشقق و موسم توافر الصنايعية و الفصال معهم من منطق القوة بسبب ركود النشاط أما فى الصيف و بعد عودة العاملين فى الخارج لقضاء الأجازات فى مصر سيزيد الطلب على الصنايعية و سوف يتشرطون عليك .
و بالتالى الشهرين أو الثلاثة القادمين هم أفضل وقت للبدء فى العمل
خامس : لو الشقة فى دور مرتفع يجب أن تقوم بالتنسيق فى العمل
بمعنى تحديد إحتياجاتك من الرمل و الأسمنت و المون الخاصة بالدهانات بدقة بنسبة 10 % زيادة تحوطا للمخاطر و فى نفس الوقت الإتفاق على ونش لرفع الخامات للدور الموجود به الشقة و ذلك أجرته 250 جنيه فى اليوم
من الساعة العاشرة صباحا حتى المغرب و ذلك سوف يغنيك عن تأجير عمال يقومون برفع الخامات لأعلى إذ أن تكلفتهم سوف تكون كبيرة .
و أدعو لك ربنا يقويك و يصبرك على ما أنت مقدم عليه .

[thatha]

انا متشكر اوي يا جماعه بس انا واحد قالي اسعار عايز اتاكد منها:
قالي:
كهرباء-محاره-نجاره:15
سيراميك:11
بياض:4
سباكه:5
يعني حوالي 35 حاجه تمشي و معقوله.على اعتبار السيراميك اجيبوا من المصنع. و الخشب من المغلق. و الادوات الصحيه من رمسيس و كده يعني

[homme49]

انا متشكر اوي يا جماعه بس انا واحد قالي اسعار عايز اتاكد منها:
قالي:
كهرباء-محاره-نجاره:15
سيراميك:11
بياض:4
سباكه:5
يعني حوالي 35 حاجه تمشي و معقوله.على اعتبار السيراميك اجيبوا من المصنع. و الخشب من المغلق. و الادوات الصحيه من رمسيس و كده يعني

مكن كمان تصل لمبلغ ثلاثون ألف لو كان هناك تخفيضات موسمية فى السيراميك و أطقم الحمامات أو لو إشتريت فرز ثانى من شارع ترسا بالهرم و هى يفرق بسيط جدا عن الفرز الأول مع إنخفاض أسعار الخامات المتوقع لإنخفاض معدل التضخم و للركود المقبل عليه السوق المصرى تأثرا بالأسواق العالمية
و بالنسبة للأدوات الكهربائية فيتم شراؤها من العتبة شارع البيدق أو سكة العشماوى

[A.Saad]

السيراميك فرز تانى او اول من الفجالة


على فكرة
دايما امى تيجى تشترى روح الصبح بدرى ساعة فتح المحلات عادة 10-11
لان التاجر بيبقى عايز يستفتح وبينزل السعر جامد
بعد كدة بيستقوا

[thatha]

انا متشكر خالص على المساعده دي ياجماعة.متشكر بجد

[D . a .\ AYMAN]

لو تلحلق تتفرج على السيراميك اليومين دول فى معارض كليو باترا حاجات جميلة جدا ً وبأسعار مخفضة عشان نهاية السنة يا ريت تلحق

وبعدين حدد أنت هتعمل ايه فى كل مكان وارسم صورة عامه وفى كل مرحلة حاول تحدد اللى عايزه ولف عليه وهاتوا ومتخليش الصنايعيه يجيبولك حاجة وربنا معاك

[ihab]

اهم حاجة ما تسترخصش فى الاساسيات
يعنى لو كهرباء هات من السويدى كل اسلاكك و يا ريت من السويدى نفسه حتى لو اغلى لان الموجود فى السوق و مكتوب عليه السويدى فى جزء كبير منه مضروب
بالنسبة للسباكة خليك فى البولى بروبلين الالمانى ( B R ) و راعى ان الصنايعى يكون كويس
العزل بالنسيبة للحمام مهم جدا و اساسى علشان ما يتعبكش بعد كده
انا لسه موضب شقتى و تقريبا المتر بيتكلف 500 جنيه ( فى المتوسط )

[ihab]

و اهم حاجة الصنايعية ما يخاخذوش فلوسهم كاملة قبل الشغل
و يا حبذا لو و انت نازل تشترى الخامات و الحاجات تاخذ صنايعى معاك علشان يقارن و يشترى اللى عاجبه ( تستفيد من خبرته )

[أبو إياد]

اهم اهم اهم حاجه وباكد عليها اوعى تسيب صنايعى لوحده من غير متابعه وماتدلوش فرصه يشترى حاجه بمعرفته معلش كل اللى عليك المتابعه
بالنسبه للتكلفه فهى حسب المساحه بمعنى انك لو هاتعمل كل حاجه فى الشقه بالمعقول اقسم المساحه على 3
يعنى انت بتقول 125م يبقى بالتقريب 41الف جنيه وده حدود المعقول لتجهيز الشقه

[tiger8900]

لو عايز حد يشتغل لك فى الشقه انا عندى سباك ونجار ونقاش وسباك وبتاع بلاط والاسعار كويسه هتوفرمعاك جامد

[mohamed_kta]

السلام عليكم

النصيحة الأهم لك من خلال معاناتى لا تتوقع أن تنتهى الشقة فى الميعاد المحدد .

السباك السباك السباك لازم يكون ثقة و معرفة بسبب الغلطة فى السباكة "بفورة" مقصدى لو أى كلام ممكن يحصلك زى اللى حصل معايا و لاقدر الله تكسر و تهد و تبنى تانى بعد سنه و لا أقل .

[hdmrdash]

اهم حاجه بعد ما تلاقى صنايعى نضيف لو المصنعيه مثلا 1000اديله 100 لما يبدأ الشغل الفعلى يعنى تديله بالقطاره علشان كلهم ياخدوا منك المصنعيه ويربطوك ويشتغل مع واحد تانى
وتكون معاه وانت اللى تشترى الحاجه اللى هو عاوزها
واهم حاجه تكون نصف المصنعيه بعد الأستلام النهائى

[mohmd76]

المحارة حوالى 4 الى 5 طن اسمنت * قلاب رمل =5*500=2500 * 200= تقريبا 3000 جنية
هذا غير اجرة المحارة تقريبا المتر الان حوالى 5 جنية فى مناطق كثيرة لو لك معارف فى الاقاليم المنصورة او ميت غمر او الشرقية يكون افضل لانهم متفوقين فى السيراميك والمحارة والنقاشة

السيراميك عليك وعلى السلاب فى طريق المطار
تجيب رويال فرز اول فى غاية الروعه من تقريبا 24 الى 30 جنية
تركيب المتر هو الان ارتفع وهو لا يقل عن 8.5 9 الى 17 و 20 جنية للمتر ولكن هذا للجوهرة وكليوبترا سوبر
الكهرباء طبعا الكابلات المصرية او السويدى 2 مللى للشقة كلها والمفاتيح والازرار بتشينو اصلى هو مصرى لكن ممتاز وابعد عن اللمبات الموفرة مقلب كبير جدا ريح دماغك وخليها فلورسنت افضل الشراء من العتبة خلف المطافى واذهب الى فتحى عطوة فى شارع خلف المطافى راجل محترم واسعارة معتدلة وارخص من غيرة جدا
السباكة الاجرة تختلف من المستوى والخامات وهى الان من 500 جنية الى .... ارقام تخض فعلا وذلك حسب المكان والخامات
طبعا عليك وعلى السبتية والى مهنى الاسيوطى او المحلات التى فيها رواج وناس تشترى منها كثيرا
والى اخطر حاجة النقاشة لانها اخر شىء واهمهم جدا على الاطلاق لانها ولو اشتريت ارخص خامات فى النقاشة ولديك نقاش ممتاز يجعل لك الشقة قصرا
المعتدل فى الخامات باكين واشترى من محل كبير ولا تشترى ابدا من اى محل صغير وفى شوارع جانبية وذلك حرصا الا تكون العلب مضروبة وبخامات سيئه جدا

اهم شىء
1- الصنايعى الذى سيقوم فى اى مرحلة سباك مبلط نقاش لو غالى وعن ثقه من اى فرد تعرفه احضرة ولو غالى
2- لا تدفع كل ما تتفق عليه كل 3 او كل 5 ايام وتكون متابع معهم وباستمرار ولو لك اخ او قريب يكون افضل وملازمهم باستمرار فى اثناء الشغل
3- لا تبخل عليهم بالشاى والغذاء لان لهم حفز وعامل جيد فى اداء الشغل لكن يرجع هذا بان يكون العامل او الصنايعى راجل محترم لانهم يقدرون هذه الاساسيات جدا
وبالتوفيق ان شاء الله