إيه كانت تصوراتك الساذجه عن الكمبيوتر قيل ما تجيبه؟

[marsguy]

السلام عليكم ورحمة الله وبركاته،،،

أكيد كلنا قبل ما نجيب كومبيوتر وقبل ما نعرف نشتغل عليه كان لينا بعض التصورات الساذجه عنه وعن الإيميل والإنترنت.

أنا مثلاً أول جهاز جبته كان في آخر 1997 وكان هو يعتبر أول تعامل حقيقي لي مع الكومبيوتر مع الأخذ في الإعتبار إني مش معتبر الكومبيوتر الصخر كومبيوتر حقيقي.

زي ما قلت ده كان أول جهاز أشتريه بس أنا كنت مهتم جداً بالكومبيوتر من الناحيه النظريه وكنت متابع أخباره كويس جداً، وكان أي خبر مثلاً في الجرنال عن نوع جديد من المعالجات كنت باقص الخبر ده وباحتفظ بيه عندي.

انا فاكر في سنة 1994 أو سنة 1995 مش متذكر بالظبط قرأت خبر في الأهرام عن شبكة معلومات بدأت في الإنتشار والتوسع وكان إسمها ساعتها (الطريق السريع للمعلومات) أو الإنترنت.

وكان مكتوب إن الدخول على الشبكه دية كان عن طريق إنك تركب كارت في الكومبيوتر بتاعك إسمه كارت مودم والكارت ده بيتوصل بخط تليفون وإلى آخره ....

أنا فاكر إني كان لي 2 أصحابي عندهم أجهزه ساعتها وحكيتلهم على الخبر ده راحوا ضحكوا علي، وقالولي "إنت عاوز توصل الكهرباء بالتليفون!!!! إنت عاوز تعمل قفله يا عم ولا إيه؟ "

انا كمان لما بدأت أسمع عن الإختراع اللي إسمه إيميل كنت كتير باتسائل "إيه اللي هايحصل لما حد يبعتلي إيميل وجهازي كان مقفول؟"

وكان في بعض الناس إن ممكن الفلوبي الديسك يجيله فيروس لو إتحط في حته مش نضيفه!!!!

وكنت باسمع أساطير لما بدأت أخش في مواضيع الشات والـ mIRC والـ ICQ عن الهاكر اللي ممكن يفجرلك الشاشه أو يبوظلك البروسيسور لو إنت ضايقته

أكيد كلنا لينا خبرات مشابهه وأحب إنس أسمعها منكم ....

شكراً

[mohmd76]

كانت اضحوكة من والدى عندما كنت اقول له ان الكومبيوتر يعمل بدون برامج هههههههههههه

[EslaM_NagY]

كنت متخيل اول الانترنت ما دخل مصر انى لو فتحته وكتبت "فين الشبشب بتاعى" النت حيعرف

ههههههههههههههه

[Ahmed Selim]

أول كمبيوتر جيبته كان سنة 1995 وكان بنتيوم 133 و 32 ميجا رام بحالهم.....وهارد ديسك 4 جيجا تقريباً....الراجل اللى عملهولى كان معرفة فكنت بقوله نخلى الهارد 6 جيجا بدل 4 جيجا.....قالى بس أنت أتجدعن وأملى ال 4 بس

أول مودم جبته كان سرعته 28800 و كان ب 350 جم.......و أول دخول ليا على النت أقعدت حوالى 11 ساعة أونلاين متصلين....و النت مفصلش غير مرة واحدة أو أتنين.

بصراحة مكنش عندى تخيلات كتير عن الأنترنت لأنها كانت جديدة نوعاً ما....على الأقل فى مصر....و مكنتش أعرف غير واحد بس اللى دخل على الأنترنت من أجمالى 25 صديق.

ال ICQ ده كان أختراع وقتها......هو وال free tel لو حد فاكره.

[Ahmed Selim]

فى سنة 97 أو 98 تقريباً مكنش فى غير مكانين فى مصر بيقدمو خدمة الأنترنت....مجلس الوزراء و الجامعة الأمريكية.....
وكان فى كام أكونت مصر كلها بتخش بيهم و كنت بقعد يوم الخميس بالليل من ساعة الى ساعتين بعمل ريدايل على أرقام مجلس الوزراء عشان بتبقى مشغولة على طول

هيييييييييييييييه أيام

[moh_kamal67]

اول كمبيوتر لى كان سنة 1992 وكان 33 ميجاهرتز mytac تايوانى واول معرفة لى بالانترنت كانت سنة 1995 فى السعودية كنا بنبعت ايميل فقط عن طريق شبكات bbs ترسل البريد عن طريق خط دولى ، ثم اول دخول لى على الانترنت فى مصر عام 98 عن طريق الدايل اب ، ثم dsl من حوالى 4 سنين ودام لنا عز الانترنت
كنت فاكر الكمبيوتر هايعلم ويصنفر وحاجة كده سحرية بس مع التعود اصبح حاجة عادية ، واخذت الفيروسات وتسطيب السيستمات ساعات طويلة واوقات هنية
والحاجة دلوقت بقت سهلة زى المية النازلة من الحنفية

[shery103]

انا فاكرة اول تعامل ليا مع الكمبيوتر كان فى المدرسة ، ايام ما كان بقية السستم بيتحط على الفلوبى الكبير اوى ده
و كان شغال بويندوز 3.11 ، ايااااااام بجد

و بعدين لما جبنا الكمبيوتر عندنا فى البيت ، كنت بخاف اسطب برامج ، مش عارفة ليه كل ما كنت اجيب اى برنامج ( كنت بجيب لغة العصر ) و يفتحلى السيت اب ، كنت اتنح و اكنسله
و كان ويندوز 98 ( الله يمسيه بالخير ، كان طيب و ابن حلال ) ، و كان بنتيوم 3 800 ميجا ، و هارد 30 جيجا ، و رام 128 ميجا ، و كان ساعتها حاجة فوق الفظيعة ، اللى هو يعنى صاروووووووخ ، بس الكمبيوتر ده هو اللى حببنى فى المجال كله و انا دلوقتى فى كمبيوتر ساينس :D

و فاكرة اول مرة ادخل على النت
و كان فى موقع مشهور اوى كان اسمه نسناس ، و كنت بدخل العب جيمز عبيطة على موقع ديزنى ، و فاكرة اول مرة الويندوز وقع ، و لبست انا انى اصلحه ، و دى كانت بداية قصة الحب بينى و بين الكمبيوترات

[Ahmed Selim]

و فاكرة اول مرة الويندوز وقع ، و لبست انا انى اصلحه ، و دى كانت بداية قصة الحب بينى و بين الكمبيوترات

أهى دى حكاية معظمنا مع الكمبيوترات......الويندوز باظ أجرى على المهندس عشان يصلحه....مرة فى التانية فى التالتة.....وبعدين قولت لنفسى هو أيه الهم ده....ما أحاول أجيب سى دى ويندوز وأعمله أنا....ما هوه كده كده بايظ....هيبوظ فيه أيه تانى يعنى...... وبعد العديد من المحاولات بقى كل لما الويندوز تضايقنى...أروح منزل ويندوز تانى على طول

[Abdo_Eldesokey]

انا فاكرة اول تعامل ليا مع الكمبيوتر كان فى المدرسة ، ايام ما كان بقية السستم بيتحط على الفلوبى الكبير اوى ده
و كان شغال بويندوز 3.11 ، ايااااااام بجد

و بعدين لما جبنا الكمبيوتر عندنا فى البيت ، كنت بخاف اسطب برامج ، مش عارفة ليه كل ما كنت اجيب اى برنامج ( كنت بجيب لغة العصر ) و يفتحلى السيت اب ، كنت اتنح و اكنسله
و كان ويندوز 98 ( الله يمسيه بالخير ، كان طيب و ابن حلال ) ، و كان بنتيوم 3 800 ميجا ، و هارد 30 جيجا ، و رام 128 ميجا ، و كان ساعتها حاجة فوق الفظيعة ، اللى هو يعنى صاروووووووخ ، بس الكمبيوتر ده هو اللى حببنى فى المجال كله و انا دلوقتى فى كمبيوتر ساينس :D

و فاكرة اول مرة ادخل على النت
و كان فى موقع مشهور اوى كان اسمه نسناس ، و كنت بدخل العب جيمز عبيطة على موقع ديزنى ، و فاكرة اول مرة الويندوز وقع ، و لبست انا انى اصلحه ، و دى كانت بداية قصة الحب بينى و بين الكمبيوترات

ياااااااااااااااااااااه ... أنا فاكر موقع نسناس ده ، هوا لازم أي حد يخش جديد على النت يعدي على الموقع ده وا إيه

أنا كمان كان أول تعامل ليا مع الكومبيوتر في المدرسة على أجهزة قديمة جدا ً شغالة DOS وديسكات 5.25 قد فردة الشبشب ، وكانت البرامج عبارة عن برنامج رسم اسمه Logo بيشتغل بأوامر ، ولغة برمجة الـ Basic

الكلام ده كان وأنا عندي 4 سنين ، فا الحمد لله الواحد مكنش لحق تتكون عنده انطباعات غريبة عن الكومبيوتر لأن شفناه على طول في المدرسة

وأول جهاز كومبيوتر جبته في البيت كان سنة 97 وكان عمري 8 سنوات ، كان بروسيسور 233 ورامات 32 وهارد 2.5 جيجا تم تحديثه بعد بفترة إلى 8.5 جيجا بحالهم

أنا فاكر أول مشكلة قابلتني في الجهاز في ويندوز 98 كانت تاني يوم ما جبته ، أول ما يخش على الويندوز الشاشة تطفي ؟؟ فكلمنا المهندس قال هجيلك بكرة، طبعا ً مقدرتش أصبر لحد بكرة وصلت لحل عجيب إني أسيب الشاشة مقفولة لحد ما الويندوز يفتح وبعدين أشغلها ، وفعلا ً نجح الموضوع ، وبكده تنبأت إني لازم أبقى مهندس كومبيوتر ، والحمد لله الواحد في هندسة حاسبات دلوقتي ، ولغاية دلوقتي معرفش سبب المشكلة الي كانت حاصلة دي أو علاجها

[hossaam]

اول جهاز كمبيوتر اشتغلت عليه
كان سنة 87
طبعا كان بس البيسك..وبرنامج الرسم..
والعاب

بس فعلا انا فاكر في بداية التسعينات
كان حتى الناس اللي بتكتب عن
الكمبيوتر بتبالغ فعلا..وتقولك
خلاص هيعملوا مش عارف جهاز
هيطبخلك طبختك..
وواحد تاني يختار لك الاكل
..وحاجات زي كده
ما حصلتش بالشكل اللي كان بيوصفوه..
وده كوم واللي كان بيتقال عن الانترنت
وقدراته الخارقة في حل كل مشاكلك..
ده كوم تاني..

فعلا كان فيه مبالغات جامدة

[ahmedsamir79]

أول كمبيوتر كان 80286
ديسكات 5ز25 و بدون هارد

[emadkamel]

اول جهاز كان صخر حبيب الملايين فى التمانينات ...كانت 600 جنية تقريبا (مبلغ مهول يدفع فى "لعبة" فى ذلك الوقت) كنت فى اعدادى تقريبا ...وفاكر اول يوم قعدت حوالى 8 ساعات مش عارف اشغله انا والعيله الكريمة ...اتارينا مش ظابطين التليفزيون على قناة الفيديو
وابتدت بقى رحلة الجيمز اللى بتتحمل من الكاسيت والكتب اللى اكتب منها برامج البيسك الساذجة .....
فاكر اول ما سمعت عن الفيروسات .. وقعدت اتخيل ازاى حاجة مش بيولوجية يدخلها فيروس ... إزاى الفيروس ده هايكون اليكترونى ويتنقل فى الجو ... وهايدخل الجهاز ازاى ومنين اصلاً ...... طفولة

[نور القمر]

عندي كمبيوتر تقريبا من سنة 96
قبلها كنت معتقدة اني لو دخلت معادلة او مسألة هندسية او اي سؤال في اي مادة الكمبيوتر هيجاوبني على طول
كان نفسي في كمبيوتر علشان متحوجش للدروس الخصوصية
ولما جبت الكمبيوتر حسيت انه خذلني ههههههههههه ملقتش حاجة اعملها عليه في البداية غير برنامج الرسم وكنت مبدعه بجد
وبرنامج تاني مش فاكره اسمه كنت تقدر ترسم بيت به وتقسمه غرف ومطبخ وحمام وتنظم الموبيليا وما الى ذلك

دلوقت طبعا سهل اوي يحل لي مسألة او يجاوبني على اي سؤال اونكل جوجل مخلاش نفسنا في حاجة خالص

[aboelnagah]

انا اول جهاز جبته حوالى فى سنة 98 وكان بقا اوعى وشك يابو احمد ايام ما كان النت ده حاجة كده ايش خيال ياناس وكانت الساعه ب7 جنيه من البيت وكنت جايب معاه ماوس عاملة زى فردت الشبشب

وكنت حاطط جمب الكمبيوتر كراسة وقلم واكتب مثلا (( علشان تفتح ملف الاغانى عبدالحليم حافظ اضغط كذا وكذا )) وياه لما الويندوس وقع خفت خالص وقلت بس ابويا هيكرشنى بره البيت لان الكمبيوتر باظ

وعلى سنة 2000 جبت ماوس ليزر كانت عاملة 250 كان صحابى بيتحيلوا عليا علشان يمسكوا الماوس دى , ودلوقتى الماوس الليزر تجاريها 7 جنيه انضف نوع

وحاليا الحمد لله عندى محلين كمبيوتر صيانه وبيع وانا بحب جدااا الكمبيوتر
بس على فكرة ودى حقيقة والله الاجهزة الجديدة مش حلوة زى الاجهزة بتاعت ايام زمان يعنى كلها ارقام وبس

[marsguy]

أول جهاز جبته كان يوم 25/12/1997

وكانت مواصفاته كالآتي:

Pentium MMX 200 MHz
32 MB Ram
3.2 Hard Disk Western Digital
CD Rom 24 x creative
floppy drive
Opti 16 bit sound card
Trident 2 MB VGA card

كان عامل 3200 جنيه

وجبت برينتر HP 670c بـ 800 جنيه

أنا فاكر كل التفاصيل دية لإن الكومبيوتر ده غير مجرى حياتي تماماً الحمد لله، وأنا شغال في مجال الكومبيوتر بقالي سنين دلوقت.

من تصوراتي الساذجه اللي كنت متخيلها هي إني ما رضتش أجيب كارت فاكس وقولت أجيب فاكس مودم خارجي عشان كنت معتقد إن كده أحسن عشان لو المودم باظ أروح أوديه يتصلح لوحده من غير أما أفك الجهاز كله

وطبعاً بعد كده عرفت إن ده كلام مالوش أساس من الصحه

وما كنتش أصلاً أعرف إن في حاجه إسمها كارت شاشه، كنت فاكره مجرد مكان بيركب فيه كابل الشاشه.

أول دخول لي على الإنترنت كان في صيف سنة 1998

كنت عند واحد صديقي لسه جايب جهاز جديد وجالنا واحد صاحب صاحبنا عشان يظبطلنا النت :) وكان جايب معاه account لسه فاكره برضه لحد دلوقت

كان الـuser name هو isproj97 والـ Password كانت cocacola وكان الإشتراك تابع لشركة wayout.

وفاكر أول إيميل عملته وأول رقم Icq وفاكر وفاكر وفاكر ...