نداء الى كل طبيب

[Karim_Monir]

السلام عليكم ورحمه الله

يوم الخميس الماضي كنت في مامورية عمل للمصنع بالعاشر من رمضان وانا راجع الساعة 3 وعند الهايكستب تحت كوبري المشاة اللي امام سوق العبور حادثة
انا من النوع اللي لازم اركن وانزل اشوف اقدر اساعد باية خاصة لو كانت الاسعاف او الشرطة ما وصلوش

نزلت لقيت مجند صغير خبطتة عربية وجريت بسرعة والولد متبهدل كدمة جامد جدا في جبهتة وجروح قطعية بالرجلين ونزيف مستمر من الاذنين
توقعت طبعا نزيف داخلي
ما هالني تصرف بعض البسطاء (الجهلاء) ودي مش شتيمة لكن تعبير عن واقع مؤلم
اللي بيحاول يقعدة نص قعدة واللي بيحاول يشربة شوية ميه (مش عارف ليه التصرف الغبي ده)
ومعظمهم ملموممين جامد في عز الحر ومفيش هواء جايلة
قيست النبض بما لدي مش شوية معلومات كشافة قديمة وفرقة اسعاف اولي في الجامعة
لقيت النبض بيقل
طلبوا الاسعاف
حطيت حاجة عالية تحت راسة ورفضت تحريكة تماما الا لما تيجي الاسعاف رغم اني كان ممكن اخده بعربيتي وكان فيه اكتر من ظابط ومجند شرطة عسكرية شهود الا اني رفضت نقلة عشان واضح جدا ان كان فيه نزيف داخلي كان من الاذن ومش عارفين التهتك فين بالظبط
واي نقلة غبية ممكن تكون عواقبها وخيمة (خاصة اني ذكري عمي الذي توفي في حادث من نفس النوع اثر نزيف داخلي لا زالت عالقة بذهني)
توقفت طبيبة بسيارتها واثنت علي بوضع راسة اعلي من جسدة بشيء بسيط حتي لا يتجمع الدم داخل تجويف الراس
حضرت الاسعاف - حاولت امشي وراه لكنها عبرت الطريق ومشيت في المعاكس مقدرتش اكمل
كان نفسي اطمن علية

عشان كدة بوجه نداء لكل طبيب لو شفت حادثة ومفيش اسعاف اقف وارحم المصاب من اللي هايحصلة علي ايدين الناس
خاصة ان لما الاسعاف جم ما رضيوش يشيلو المصاب من جسمة وقلبة علي ملاية ورفعوة من الملاية للسيارة خوفا من مضاعفات الكسور

نداء الينا جميعا
لو لقيت اي دورة اسعاف اولية ما تتهاونش تحضرها ولو علي حساب جزء من وقتك لانك ممكن تنقذ حياة شخص عزيز عليك قوي

لا اراكم الله مكروها في عزيز لديكم

اخوكم في الله
كريم منير

[Dr Ahmed]

طبعا يا أستاذ كريم

وأوافقك القول فى الجهل القاتل اللى بيقتل مش بيحيي..

وأحب أن أضيف أن كل نزيف بالأذن بعد إصابة بالرأس هو نتيجة كسر فى قاع الجمجمة حتى يثبت العكس ، والمصاب فى حادثة غالبا ما يكون متعدد الاصابات واستخدام الاسلوب الجحشى فى تقعيده وتشريبه ونقله كافى لقتله أو لاصابته بشلل تام أو لمضاعفة الاصابة... فإذا رأيت أحدا ينزف فبرجاء الضغط على موضع النزيف بقطعة قماش كبيرة تحمى يديك من الدماء فإذا استمر النزيف اضغط على أقرب جزء من الجرح من ناحية القلب ، ومن الممكن استخدام حزام البنطلون أو أى شئ مشابه فى ربط الساق أو الذراع بالكامل لوقف النزيف على أن يتم فكها واعادة ربطها كل حوالى ربع ساعة لعدم اصابة الطرف المربوط بغنغرينة.

ووقانا الله وإياكم شر الطريق وأهله.

[معاذ الشرباصى]

موضوعك ده يا كريم حيوى جدا جدا

لسه من كام اسبوع كنت مخلص دورة اسعافات اولية

لا يمكن يا جماعة تتخيلوا ان اللى بيحصل فى الشارع من عك و هبل و جهل هو اللى بيموت المريض

الدورة مهمة جدا جدا, و بتحصل على معلومات دقيقة هتفيدك مع اقرب الناس لك, مش شرط حادثة فى الشارع

يعنى السيدة اللى كانت بتحاضر فى الدورة, قالت ان زميلة لهم ابنها و بنتها كانوا بيغرقوا, هى انقذت ابنها و عملت له اسعافات و ملقيتش حد يساعدها و يسعف البنت فماتت

الدورة مش لازم تكزن طبيب او لك علاقة بالطب, اى شخص عادى المفروض يبقى عارفها, و لازم فى كل عربية و كل بيت يكون فى علبة اسعافات اولية, لأن فى الحالات دى الثوانى بتفرق و ادق التفاصيل هى اللى بتصنع فرق

جزاك الله كل خير يا كريم على الموضوع الحيوى ده

[NaderNabil]

where can we take such courses?

[معاذ الشرباصى]

انا اخدت الكورس فى القصر العينى الفرنساوى

ده للاسف معمول فقط لطلبة كلية طب

لكن فى مكان اخر بيعمل لأى حد

بيتاخد جزء منه برده فى القصر العينى الفرنساوى و فى محاضرات نظرى فى جامعة القاهرة

هجيبلك التفاصيل كلها فى خلال يومين

[NaderNabil]

\thanx alot Moaz

[وائل عطية]

أحييك يا كريم على تصرفك النبيل والشجاع
وياريت كل واحد يعمل اللي يقدر عليه، وبلاش شغل الفتاوى العبيطة اللي بقت في كل المجالات

[AlmAhAtmA]

طيب يا دكتور لو فيه اي امكانيه اننا نرفع الماتيريال بتاع الكورس علي المنتدي يكون بجد شيئ رائع

و ممكن دكتور شرباصي في المقابله الجايه يكلم شويه عن الاساسيات و كيفيه التعامل الصحيح مع الحوادث

و دكتور احمد ممكن يكتب لنا عن اساسيات مكونات شنطه الاسعافات الاوليه و لو ممكن نشتريها جاهزه منين

يعني ما فيش اهم من ارواحنا و ارواح الناس يا ريت نقدر نعمل حاجه مفيده تجاه الموضوع ده

[Karim_Monir]

والله يا دكتور احمد انا كنت بكتم جروح رجلة بمناديل معقمة مابشيلهاش من عربيتي
اما نزيف الاذن ده اللي كان راعبني ومخليني رافض تماما حد يقرب منه

اما عن اقتراح هاني مهاتما
اهم اعمال المقابلة القادمة دورة اسعاف اولي بسيطة مع شرح مكونات شنطة الاسعافات الاولية
محاضرة بسيطة يلقيها دكتور احمد عبد الغني
ومعاذ الشرباصي بما انه لسه مخلص دورة قريب ومعلوماتة حاضرة

ارجوا الاهتمام فع وتجهيز ما يلزم للمحاضرة

كريم

[أبو عبد الله***]

أخي العزيز/ كريم
بارك الله لك و إن شاء الله تجد ما فعلت في حياتك و في ميزان حسناتك.

أعلم تماما مقدار الضرر الذي قد يسببه نقل المريض بطريقة خاطئة- أخذت دورتين أسعاف أولي- لكن ما الحل عند تأخر سيارة الإسعاف -ساعات بتيجي بعد ساعة و أكثر- هل نترك المريض و عمل الإسعافات الأولية له قدر الإمكان مع المخاطرة بوجود نزيف داخلي أو غيره إم نقله في سيارة خاصة - مع المخاطرة بأحتمال تضاعف الأصابة نتيجة النقل الخاطئ- لأقرب مستشفي لعلهم يستطيعون إنقاذه.
ما هو الأختيار الصيح ؟

[محمد المشد]

فعلا جزاك الله كل خير يا اخ كريم واكثر من امثالك فهما ورحمه وعلماً
واضم صوتى لصوتك الكريم بالنداء لاى طبيب بأسعاف من يراة فى حاجة للاسعاف ووقانا ووقاك الله شر كل مكروة

[Karim_Monir]

مقدرش افتي يا ابو عبدالله
بس بيبقي حسب الحالة
لو علي قد كسور وكدة بيبقي سهل نقلها
لكن لو الحادثة بعيد قوي عن نقطة اسعاف وده بيبقي معروف لمتاد الطريق افضل انقل مع كل الاحتياطات والحرص ووجود حد فاهم زي طبيب او حد خد دورة اسعاف اولي

ربنا يبارك في عمركم ويوسع رزقكم
وهاخونا هاني ادم بيقوم بمجهود جامد في الموضوع دلوقتي وهايحضرلنا مفاجأة جامدة المرة الجاية
انا لسه سايبة حالا كنت معاه وهو قاللي بس افضل نخليها المقابلة الجاية ان شاء الله

[معاذ الشرباصى]

دلوقت انا كلمت المركز الثقافى الدولى

هما بيعملوا دورة الاسعافات الاولية للناس اللى ملهاش علاقة بالمجال الطبى (ناس عادية)

الدورة بتبقى قريبة جدا من اللى بياخدها الناس بتوع طب و صيدلة بس التفاصيل اقل, لأن المعلومات مش هتبقى عند ناس كتير

هما ممكن يفتحوا مجموعة لناس حسب الميعاد اللى يناسبهم

الحد الادنى للمجموعة 100 شخص, بس الانسة هناك قالت لو عاوزين مجموعة لكم وحدكم ممكن بعدد اقل من كده

سألتها على المواعيد علشان عارف ان فى ناس كتير بتشتغل, فقالت ممكن تبقى بعد الظهر من 4 الى 7 مساء مثلا

الدورة مدتها 10 ايام

بيتأخد فيها كل حاجة من تغيير على الجروح, للغرز, الكسور,معلومات عامة عن الادوية, الحقن, و خلافه.....

ده غير انقاذ الناس اللى عندها اختناق, او غرق, يعنى كل حاجة من الاخر :)

تكلفتها 65 جنيه للطلبة و 100 جنيه للخريج

فياريت بقى يا جماعة يتفتح موضوع و تشوفوا الناس اللى عاوزة تشارك و يتعمل مجموعة للموقع و تبقى الاستفادة عامة

يعنى لو حد عارف حد صاحبه او قريبه عاوز يجى, علشان يبقى عدد و الكل يستفيد