التسول

[hazem_khidr]

يا تري شفت موقف من دول و يا تري كان ردك ايه او اتصرفت ازاي؟؟؟
1.و انت في اي حته و ماشي في امان الله و فجأه يطلع ليك واحد و ينادي عليك باي اسم المهم انت ترد و يقولك انا شوفتك فين قبل كده انت كنت شغال في الحته الفلانيه و انت تحاول تتكلم معاه و فجأه تلاقيه بيقولك انا مش عارف انا ازاي قدرت اتكلم معاك رغم فارق السن اللي بيني و بينك و انا المفروض ما اعملش كده لكن هيا الحاجه اللي دفعتني اني اتكلم معاك .انا واقعع في رف و ربنا عالم باني ما بكدبش عليك و الظرف دا علشان يتفك محتاج مبلغ 48.5 جنيه بالضبط و صدقني اول ما ظروفي تتحسن حردهم ليك و انا بجد لولا المزله اللي انا فيها مكنتش اتكلمت معاك ولا قولتلك حاجه ولو مش مصدقني اديني الكبلغ و خد الساعه بتاعي و اديني رقم تليفونك علشان ابقي اسددهم ليك او خد بطاقتي معاك اللي انت شايفه تعمله و اللي يحكم بيه ضميرك .
و تقوم انت بعد دا كله تروح تطلع اللي فيه النصيب و تديهوله يقوم يقولك طب انا الرف اللي عندي محتاج ال 48.5 دول بس لو معايا حالا 20 جنيه جقدر اني احل جزء كبير من الورطه و صدقني انا عارف اني كده بشحط بس اعذرني في اللي انا بعمله و ربنا ما يحوجك لحد و انت شخص طيب و محترم و ........ الخ؟؟؟؟؟ و انت بكلامه ممكن تطلع كل اللي في جيبك و تديهوله.




2.و انت معدي برضه في اي مكان و خصوصا لو قدام جامع مثلا و تلاقي واحد بيكشف رجله المبتوره او اللي فيها حرق جامد قدام الناس علشان يشحط بالعاهه بتاعه و كانه بيعترض علي اراده ربنا .و دا اكتر نوع بيضايقني اللي بيشحت بالعاهه و انا بصراحه مش ببقي قادر اني ابص ناحيته .



3.النوع التالت اللي تلاقيه في المترو او مواصلات عامه زي القطر و تلاقيه لابس معقول جدا و في وشه كسوف و خجل و بيوزع عليك ورق مطبوع بالكمبيوتر و مكتوب فيه حالته انه مريض و بيحتاج غسيل كليه مرتين في الاسبوع و عنده او عندها تلات اربع عيال بتجري عليهم!!!!




4.المتسولين العاديين و خصوصا الاطفال اللي يجيلك علي شباك العربيه و يحاول يمسحهالك في الاشاره و انت تقوله لاء يجيلك عند الشباك طب و النبي يا بيه اي حاجه لله اجيب بيها حاجه افطر بيها و تحس ان الدمعه خلاص نازله من علي عنيه.
الخلاصه يا تري قابلك نوع من دول و يا تري بتتصرف ازاي و يا تري مين اللي بتديله حسنه و مين مش بتديله؟؟؟؟؟
يا تري الناس دي تستاهل فعلا؟؟يا تري بيصعبو عليك؟؟
و ايه الحل بالنسبالك للظاهره اللي بقت منتشره بطريقه بشعه في مصر اليومين دول اوي كده؟؟؟
مستني ردودكم و تجاربكم

[Nader]

والله يا حازم كل النمازج دي منتشرة "بغباء" في البلد وللاسف 99% منهم بيمثلوا وبتلاقيهم في نفس المكان او في مكان تاني قريب بعد فترة وجيزة ،دة ان ماكانش تاني يوم، انا عن نفسي شايف ان كبار السن منهم هم الاولي، مش هيقدروا يشتغلوا زي الشباب او حتي الاطفال وهم كمان في الغالب مش بيطلبوا، انت بتديهم من نفسك، انا شايف ان اضمن حاجة تحط فلوسك في جامع وهو اليوزع لانهم بيعملوا بحث حالة لكل واحد بياخد مساعدة منهم. كمان طول ما الشحات لاقي ناس تدفعلة عمرة ما هيبطل وهيعيش كدة طول عمرة اية الهيخلية يدور على شغلانة حيى لو كان هيبيع مناديل، الشحاتة هتكسبة اكتر.

[Powert]

انا بيصعب عليا الناس الكبيرة راجل او ست عواجيز وبحس انهم يستهلوا

اما المشوهون فادول مش بعبرهم خالص لاني بقرف منهم

والعيال الصغيرة دول بيطلعوا لما يكون معايا ازازة بيبسي

او كيس شبس يقولوا ونبي واحد او بق اقولهم خدوه وابعدوا عني

وللعلم في نوع تاني من التسول

وهما المنادى اللي بيتطلعلك من اي حته ومتعرفش منين ويعقد يقولك اي كلام

علشان تديلوا جنيه ولا اي حاجة بعد ما تركن او يفتحلك الباب بس

وكمان عند عمارات العبور اللي بيعقد يقولك انا بأجر الركنة هنا من الحكومة ويقولك الركنة

بفلوس ب 3 جنية الساعة وانا بدفع في السهر الف جنية تمن الاجار وكلمتين مالهمش لازمة

ويديك ورقة هو طابعها في اي حتة ويضحك بيها عليك

"على العموم انا بتخانق معاهم واسبهم وامشي"

[Nader]

وللعلم في نوع تاني من التسول

وهما المنادى اللي بيتطلعلك من اي حته ومتعرفش منين ويعقد يقولك اي كلام

علشان تديلوا جنيه ولا اي حاجة بعد ما تركن او يفتحلك الباب بس

وكمان عند عمارات العبور اللي بيعقد يقولك انا بأجر الركنة هنا من الحكومة ويقولك الركنة

بفلوس ب 3 جنية الساعة وانا بدفع في السهر الف جنية تمن الاجار وكلمتين مالهمش لازمة

ويديك ورقة هو طابعها في اي حتة ويضحك بيها عليك

"على العموم انا بتخانق معاهم واسبهم وامشي"

دول مش شحاتين لا دول حاجة تانية دول بلطجية.

[goodwave]

والله موضوع حيوي جدا ويمس كيانا كلنا!

اتفق معاك ان البعض يشعر ليس بالاشمئزاز ولكن بقشعريرة تسري في جسدة عندما يسالة شخص المساعدة مستندا على عاهتة! بصراحة بعمل زيك وبدور وشي واقول الدعاء " الحمد لله الذي شفاني وعفاني مما ابتلاك به وفضلني تفضيلا. اللهم اشفي كل مريض مسلم وعافي كل مبتلا مسلم" طبعا ده اضعف الايمان!

اتفق مع الاخ نادر ان مساعدة العجائز مستحبة لانهم لا يقدرون على العمل ولكن للاسف بعضهم احترف التسول الى ان بلغ من الكبر عتيا (والله اعلم)!

طيب المعاق او المبتور او المحروق "عافانا وعافاكم الله" هل هذا الشخص له من يكفلة بموجب قانون الدولة؟ على حد علمي لأ! طب حيصرف على علاجة منين؟ بعضهم يستطيع الوصول لموءسسات خيرية وعلاجية بالمجان وايضا الجرائد وقنوات ال TV ولكن ماذا عن الجزء الاخر؟! لهم الله هو اكرم وارحم.....

يا اخ نادر اتفق معاك انك تحط فلوسك في جامع او موءسسة خيرية وهي توزع بمعرفتها ولكن دة بردة اضعف الايمان! اكيد جنبك جار او قريب محتاج انت عارف حالتة كويس اعتقد ده اولى بالصدقة في المقام الاول (واله اعلى واعلم).

[Nader]

يا اخ نادر اتفق معاك انك تحط فلوسك في جامع او موءسسة خيرية وهي توزع بمعرفتها ولكن دة بردة اضعف الايمان! اكيد جنبك جار او قريب محتاج انت عارف حالتة كويس اعتقد ده اولى بالصدقة في المقام الاول (واله اعلى واعلم).

مختلفناش بس مش هيجي يشحت مني، انا هكون عارف حالتة اصلاً.

اتفق مع الاخ نادر ان مساعدة العجائز مستحبة لانهم لا يقدرون على العمل ولكن للاسف بعضهم احترف التسول الى ان بلغ من الكبر عتيا (والله اعلم)!

اتفق معاك برضة، انا قلت:

طول ما الشحات لاقي ناس تدفعلة عمرة ما هيبطل وهيعيش كدة طول عمرة اية الهيخلية يدور على شغلانة حيى لو كان هيبيع مناديل، الشحاتة هتكسبة اكتر.

[tamohsen]

معلش يا جماعه أنا مختلف معاكم
الناس اللي بيقفوا في الإشارات و الشوارع دول محترفي تسول
وأغلبهم فعلا مش محتاج أدني مساعده

تخيلو لو أي واحد فينا حصل له أي كارثه ماديه و اجتماعيه
هل أول حاجه هاعملها اني هقف في الشارع اشحت؟
بجد كل واحد يسأل نفسه السؤال ده؟


أكيد هاتعفف عن ده
المتعففين هم فعلا المحتاجين للمساعده
بعضهم بيلجأ للمساجد والجمعيات الخيريه و يسجلو حالتهم فيها ( إحتياج أدويه أو اشياء عينيه أو فلوس )
عشان كده دورنا أننا نوجه مساعدتنا للأماكن ديه عشان تقدر توفي بالتزامتها
أو نبحث بنفسنا عن أشخاص محيطين بينا يستهلو فعلا المساعده
انما تشجيع المحترفين في الشوارع هيزيدهم عددا
ويبقي عندنا شحات لكل مواطن

[مهندس محمد صلاح]

تذكر قول الله تعالى واما السائل فلا تنهر .. فيه فرق بين محترفى التسول وبين واحد او واحدة شكلها محتاج .. انا اترك احساسى هو اللى يوجهنى فى النقطة دى ان احساسى قال لى ان الشخص ده فعلا محتاج باديله حاجة واقول لوجه الله فحتى لو هو محترف تسول وخاننى احساسى فربنا سبحانه وتعالى سيعطينى الثواب لانها ابتغاء وجهه الكريم وعلى فكرة محترفى التسول بيتعرفوا بسرعة .. واحده شابه وحلوة وشايلالى عيل صغير تبقى بتستعبط .. واحد قاطع رجليه وايديه ومعريهم للناس يبقى بيستعبط .. عيل صغير ماشى يتلزق فيك ويحلفك بكل ايمانات الدنيا تديله حاجه يبقى بيستعبط .. واحد جايب لك شهادات واختام وورق بتقول انه عيان وعاوز يعمل عمليه يبقى بيستعبط .. الغلبان بيبان عليه واللى بيستعبط بيبان عليه .. ودائما المحتاح تلاقيه يتعفف من السؤال .. ودايما وانت بتعمل الشىء قول لوجه الله تعالى

[أبوسيف]

Re: التسول

1.و انت في اي حته و ماشي في امان الله و فجأه يطلع ليك واحد و ينادي عليك باي اسم المهم انت ترد و يقولك انا شوفتك فين قبل كده انت كنت شغال في الحته الفلانيه و انت تحاول تتكلم معاه و فجأه تلاقيه بيقولك انا مش عارف انا ازاي قدرت اتكلم معاك رغم فارق السن اللي بيني و بينك و انا المفروض ما اعملش كده لكن هيا الحاجه اللي دفعتني اني اتكلم معاك .انا واقعع في رف و ربنا عالم باني ما بكدبش عليك و الظرف دا علشان يتفك محتاج مبلغ 48.5 جنيه بالضبط و صدقني اول ما ظروفي تتحسن حردهم ليك و انا بجد لولا المزله اللي انا فيها مكنتش اتكلمت معاك ولا قولتلك حاجه ولو مش مصدقني اديني الكبلغ و خد الساعه بتاعي و اديني رقم تليفونك علشان ابقي اسددهم ليك او خد بطاقتي معاك اللي انت شايفه تعمله و اللي يحكم بيه ضميرك .
و تقوم انت بعد دا كله تروح تطلع اللي فيه النصيب و تديهوله يقوم يقولك طب انا الرف اللي عندي محتاج ال 48.5 دول بس لو معايا حالا 20 جنيه جقدر اني احل جزء كبير من الورطه و صدقني انا عارف اني كده بشحط بس اعذرني في اللي انا بعمله و ربنا ما يحوجك لحد و انت شخص طيب و محترم و ........ الخ؟؟؟؟؟ و انت بكلامه ممكن تطلع كل اللي في جيبك و تديهوله.

الموقف دة حصل معايا أكتر من مرة وكل مرة كنت بوافق انى أساعد الشخص دة بس مش بالفلوس ، ولكن بأنى أحل المشكلة اللى هو واقع فيها ، يعنى مثلا مرة واحد قالى انه من محافظة تانية وانه محتاج مبلغ علشان يروح بلده لأن فلوسه كلها اتسرقت منه والمهم ان شكله كان محترم قوى لدرجة انك تحرج منه. انا قلتله ماشى تعالى انا وانت نروح للموقف بتاع العربيات وتركب العربية اللى رايحة بلدكم وهادفعلك الأجرة لسواق العربية ، طبعا اتهرب ساعتها وقالى انه مستنى ناس واتحجج بحجج فاضية وسابنى ومشى :lol:
ودلوقتى ومن كتر ما قابلت الناس دى بقيت حافظ أسلوبهم وكل لما حد يحاول يكلمنى منهم ما بردش عليه اصلا وبعمل نفسى مش سامعه.

[hazem_khidr]

الموقف دة حصل معايا أكتر من مرة وكل مرة كنت بوافق انى أساعد الشخص دة بس مش بالفلوس ، ولكن بأنى أحل المشكلة اللى هو واقع فيها ، يعنى مثلا مرة واحد قالى انه من محافظة تانية وانه محتاج مبلغ علشان يروح بلده لأن فلوسه كلها اتسرقت منه والمهم ان شكله كان محترم قوى لدرجة انك تحرج منه

و برضه الموقف دا حصل معايا كتير اوي اوي و المشكله اني و هو بيتكلم ببقي عارف حيقول ايه لكن برضه نظراته بتخليني اضعف :( :( .
لكن فعلا زي ما ابو سيف قال بعد ما فهمت اللعبه كويس اول ما يجي حد يقولي عاوز اسافر اقوله تعالي الموقف اسفرك يتهرب يقول محتاج مساعده اقوله تعالي الجمعيه الخيريه اوصلك و هما يقوموا معاك باللزم و ساعتها بيتهرب برضه.

فكرة محترفى التسول بيتعرفوا بسرعة .. واحده شابه وحلوة وشايلالى عيل صغير تبقى بتستعبط .. واحد قاطع رجليه وايديه ومعريهم للناس يبقى بيستعبط .. عيل صغير ماشى يتلزق فيك ويحلفك بكل ايمانات الدنيا تديله حاجه يبقى بيستعبط .. واحد جايب لك شهادات واختام وورق بتقول انه عيان وعاوز يعمل عمليه يبقى بيستعبط .

+1

ودائما المحتاح تلاقيه يتعفف من السؤال .. ودايما وانت بتعمل الشىء قول لوجه الله تعالى

المشكله ان النوع الاول اللي حكيت عنه دا بيبقي نصاااااب لكن تلاقيه يتعفف في السؤال برضه يبقي الصح ان كل واحد يبقي عارف اسم جمعيه او جامع بتقدم الخدمات دي و يقوله تعالي اوديك لو هو فعلا يستحق حيقولك وديني و لو نصاب حيتهرب

[eng_elnaggar]

انا هأحكيلكم عن حادثة حصلت قريب وهى ان كان فيه واحد شكله غلبان جدا يقف قدام صيدليه ويقابل اى واحد شكله نضيف شويه ويقوله والنبي يا بيه انا مراتي بتموت والدكتور اللي كشفت عنده الله يكرمه كشف عليه ببلاش بس كتبلي روشته ومفيش معايا فلوس اجيبها انا ظروفي وحياتي والدنيا عملت فيا .... المهم انه يصعب على سعادة البيه ويدخل يشتريله الروشته من الصيدلية ويمشي...

بعد شوية يدخل صاحبنا الصيدلية تاني ويدي الدوا للدكتور وياخدله 5 جنيه عن كل روشته ويتضح فيما بعد ان الدكتور الصيدلي هو اللي مسرحه :lol: وطبعا اتقبض عليهم لما اتكشفت الحكاية

وبالتالي انا من رأيي ان قابلك اى سائل فأهم حاجه انك تستفتي قلبك زى ما قال مهندس صلاح ولو حسيت انه فعلا محتاج فاعطه اما لو حسيت انه فعلا بيستهبل فلا تنهره فقط اتركه وامشي.

وشكرا جزيلا

[M_Abdallah]

المشكلة ان المتسولين عددهم بيزيد يوم بعد يوم.ومفيش حاجة تحط حد ليهم.










__________________
محمد عبدالله

[hazem_khidr]

المشكلة ان المتسولين عددهم بيزيد يوم بعد يوم.ومفيش حاجة تحط حد ليهم.

في قوانين لكن مش بتتنفذ او قوانين هزيله يعني عمري ما سمعت عن واحد اتسجن علشان كان بيتسول؟؟ هما يدوب بيروح القسم ياخد علقه او اللي فيه النصيب و يتعرض علي النيابه و يفرج عنه و يرجع تاني الشارع.
طب ما المفروض اننا الاول نعمل ليهم اماكن نلمهم فيها بدل ما هما ماشيين كده(زوي العاهات و الحالات الخاصه الغير قادرين علي الشغل فقط)
و الباقي يا اما يخش السجن او يشتغل شغل يقدر يفيد و يستفيد.
اصل المشكله ان المتسولين دول لو اخر النهار ما لقاش في جيبه فلوس ممكن يطلع يسرق اي وحد و اي حاجه.يبتدي بسرقه الاحذيه من الجوامع وهكذا.
و الله الواحد بيشوف نماذج لاطفال صغيره بتبقي شغاله ميكانيكيه و اي شغلانه و ببقي فرحان اوي لما بلاقيه بيفكر كده و عاوز يتعلم في سبيل انه بعد كده ممكن يفتح ورشه او حتي كشك علي قد حاجه يصلح فيه و يطبق اللي اتعلمه انما الاطفال بتوع الشوارع دول ليه ما يعملوش كده و يشتغلو ؟؟؟؟؟فعلا زي ما قال نادر انهم استسهلو التسول.يبقي هنا لازم وقفه من الحكومه علشان تلم الاولاد و الناس دي علشان قعدتهم في الشارع غلط و بتخليهم زي الكلاب السعرانه و ابسط مثل عندنا هو التوربيني و اللي كان بيعمله.