فاكر يا حبيبى ؟؟؟؟؟

[خالدابوالنجا]

فى احيان كتيره بيمر على الانسان مواقف صعبه مبيبقاش عارف يتصرف ازاى.
من اكتر المواقف دى ان واحد يقابلك انا فاكره بالشبه وعارف انه كان زميلى فى الجامعه او الجيش وياخدك بالحضن وواحشنى يا ابوالنجا اخبارك ايه وانته فين دلوقتى واتجوزت ولا لسه
ووووووووووو. وفاكر الموقف الفلانى لما قلت كذا وكذا.
وطبعا مش معقول تقول مش فاكر اقوله طبعا ياه دى كانت احلى ايام العمر هيه دى ايام تتنسى ربنا يرحم الايام دى ويعيدها تانى . ويسلم عليا ويقولى خلينا ننشوفك يا ابو النجا ويروح واخدنى بالحضن . اقوله ان شاء الله ياباشا ( انا مش فاكر اسمه اصلا)
المشكله الكبرى بقه فى المدام : نسمع اغنيه لعمرو دياب وتقولى فاكر الاغنيه دى ياحبيبى
طبعا يا حبيبتى وهيه دى تتنسى . طب ايه مناسبتها واول مره سمعناها فين
اقولها اخص عليك هوه ده سؤال تساليه برده طب والله منا قايل هيه.
تقولى طب خلاص خلاص انا اسفه بس والله اول مبسمعها بفتكر يوم الخطوبه على طول
اقولها طبعا يا حبى انا اول مبسمعها بفتكر اليوم ده كانه لسه امبارح
نعدى على كوافير تقولى ده ايه
اقولها ايه يعنى مقلة لب طبعا كوافير
بس كده . اقولها لا طبعا وفيه ناس بتيجى تعمل شعرها عنده .
تقولى : لحقت تنسى الكوافير الى جيت ختنى من عنده ليلة الفرح.
اقولها يا هبله دنا بختبرك بشوفك فاكره ولا لا
وحاجات كتير من دى . اول مسمع كلمة فاكر يا حبيبى اعرف ان فيه مصيبه جايه ولو مجوبتش حلو يبقه النكد هيكون للركب وتبقه ليله كوبيا لو انا طلعت ناسى اى شىء من مناسباتنا معا ولازم افضل اذاكر فى هذه المناسبات الهامه للبشريه جمعاء............
المشكله فعلا ان انا بنسى والذاكره عندى مش قوى طيب اعمل ...........
ماذا تفعل لو كنت مكانى ؟؟؟؟؟؟؟؟؟؟؟؟؟؟؟؟؟؟

[memo_hefnawy]

و الله يا خالد باشا إجاباتك نموذجية :) و هى دى الردود الدبولماسية

المشكلة تكمن فى تعابير الوجه لو بان عليك :(

[PRO-DRIVE]

احلى تصريفات :mrgreen: :mrgreen: :mrgreen: اجاباتك فعلا نموذجيه :mrgreen:

[Ahmed Hassan]

كوافير ايه و اغنيه ايه يا عم خالد.... انا اعرف واحد بينسى تاريخ جوازه و تاريخ عيد ميلاد مراته :?

[tamohsen]

انسي يا معلم عمرك ماهتلاقي حل للمشكله دي ابدا
خد عندك كمان كام سؤال:
فاكر انا كنت لابسه ايه يوم ......؟
فاكر اول عيد مياد ليا بعد الخطوبه روحنا فين؟
طب فاكر اول عيد مياد ليا بعد الجواز روحنا فين؟
طب فاكر......؟

[Dr Ahmed]

ههههههههههههههههههههههههههههههه

سبحان الله ، يبدو فعلا اننا كلنا مشتركين فى أشياء كثيرة مع اننا نتخيل أننا نعانى وغيرنا لا يعانى مثلنا...

طبعا الموضوع بحذافيره كما ذكرت مررت عليه ولا أشك أن الجميع مر عليه..

بخصوص (الأصدقاء) القدامى لا أخجل من عدم تذكر الإسم وأقول له: معلش لو سمحت فكّرنى.. وساعات ييجى واحد ويعمل الكلام دا كله ويطلع غلطان ولا عمره شافنى !!!
بخصوص ذكريات البيت لا أذكر منها إلا القليل وما لا يزيد عن 1% من اللى المدام فاكراه ، وللأسف ليست عندى دبلوماسية أخى الكبير خالد فبقول: "إيه؟ مش فاكر"..مع نظرة بلاهة... فتقوم المدام تقوللى تفاصيل أكتر فيا إما أفتكر وأقول: آآآآآآه صح .. يا إما أقول: مش فاااااكر حاجة خالص ، وهى اتعودت على كده ومبقاش فيه مشاكل الحمد لله لأنها عرفت ان "رامات دماغى" اتملت من زمان وأى حاجة جديدة بتعمل "ديليت" للى قبلها ، وبيتهيألى انى عملت "فورمات" أكتر من مرة بسبب الامتحانات المتكررة وبيانات المرضى ونوائب الدهر....

هم أكيد هيعذرونا..

[memo_hefnawy]

و الله يا دكتور أنا مش عايز أقولك أنا دماغى بقت تنسى لدرجة لا تتخيلها مش عارف تركيز الواحد بيقل ولا إيه إللى بيحصل

المشكلة إن في حاجات تلاقينى أفتكرها من عصر الهكسوس و حاجات لا يمكن أفتكرها لدرجة إنى بكون نازل أجيب حاجات للبيت لو حتى 3 طلبات ممكن أنساهم على ما أوصل و أفتكر حاجة من أصل 2 و بقيت أكتب كل حاجة البيت عايزها فى ورقه لأن الذاكرة مش فورمات لأ دى Rom و واضح إنها بتعمل restart كل حبه فكل إللى عليها بيطير أول بأول

مالقيش عندك علاج يا دكتور :) أصل خايف صراحة كمان 10 سنين أنسى عنوان بيتنا

[Dr Ahmed]

لأن الذاكرة مش فورمات لأ دى Rom و واضح إنها بتعمل restart كل حبه فكل إللى عليها بيطير أول بأول

مالقيش عندك علاج يا دكتور :) أصل خايف صراحة كمان 10 سنين أنسى عنوان بيتنا

ههههههههههههههههههههههههههههه

بتسألنى؟؟؟؟؟؟؟؟؟
هو أنا لو كنت أعرف كان دا حالى؟؟؟؟؟

بس بدرى عليك قوى يا ميمو ، وفعلا أفضل حل مؤقت هو كتابة المهام المطلوبة ، وأحيانا كتابة "المذكرات" للى عنده وقت علشان ينعش الذاكرة، وعموما علشان ما نفتكرش اننا معوقين من المعروف ان الذاكرة عند النساء أقوى ، ودا يفسر انهم أنجح فى الكليات النظرية وأفشل فى العملية، يعنى أعتقد ان طاقات المخ عند أغلبنا متجهة للتطبيقات والمهارات وليس للتخزين الصرف... يعنى بروسيسور ممتاز وهارد كام ميجا ، هم بقى بروسيسور على قد حاله وهارد سبعتلاف جيجا...

[modux]

انا عندي بقي مشكلة نسيان اللاسماي و الوجوه كمان

و علي طووول

ازيك يا باشا ( عشان اكيد مش فاكر الاسم )

ده انا بغلط في اسامي اعز صحابي و هما قاعدين قدامي :lol:

[Hazem Salah]

Brain Electricity not fully stable
Short Term Memory on behalf of Long Term One
Aging and Pollusion would defect any machine :)
Change life style (also Retaleen Tab would help at certain dosage ) :lol:

[eng_elnaggar]

والله موضوع ممتاز يا عمنا السلطان لأنه بيمسنا كلنا...
بس أنا بيتهيألي ان للكمبيوتر دور كبير في زيادة مشكلة النسيان لدينا لأن بيخلينا نتعود على اننا ممكن نسترجع اى حاجة بدون ما نتعب دماغنا وبالتالي تلاقي الواحد عطل دماغه كسلا من انه يفتكر...
انا افتكر ان انا كنت سريع جدا في حفظ الارقام وتذكر اى شيئ او اى موقف بأدق تفاصيله دلوقت بأحس كتير جدا اني مشوش وبأفكر في امور كتير في نفس الوقت يمكن بسبب ضغوط العمل..
اما بخصوص اعياد ميلاد المدام واولادي واخواتي والوالدين وتواريخ الجواز والخطوبة وكمان كتب الكتاب فدول مستحيل اقدر انساهم وانا كاتبهم على ميموري الموبيل وعلى الكالندر بتاعة الأوتلوك اكسبريس تحسبا لأى ظروف.
موضوع انك تتذكر اصحاب قدماء دي بقى اللي مشكلة كبيرة ودايما اضطر اقول اخبارك ايه يا باشا واعمل زى السلطان ما بيعمل وبتعدي احيانا وبتتكشف غاليبا وبأضر اعتذر وكده وامري لله.

وشكرا جزيلا