إلى هواة صيد الاسماك!

[goodwave]

الاخوة الاعضاء

بما إنني إسكندراني والبحر هو عشقي الأول وصديقي العزيز فاني امامة انسى كل شئ ولا أمل ابدا من ملازمتة فإنني اعشق كل الأنشطة المتعلقة بالبحر وخاصة صيد الاسماك. ولقد كلفتني هذة الهواية الاف الجنيهات بس على قلبي زي العسل. مرة شراء بوصة جديدة ومرة مكنة ومرة عدة وهكذا . المهم كل دة بيتنسى اول ما تقعد قدام البحر ويا سلام لما ربنا يرزقك بسمك وياسلام ياسلام لما تاخد السمك دة البيت وتقعد تشوية وتاكلة طازة! اه يا عيني يا سيدي!

طبعا في ناس حيقولو يا عم بلا صيد بلا صبر بلا وجع دماغ بس اللي بيصطاد حيفهم انا قصدي اية اصل يا جماعة دة هوس!

فكدة بسم الله اللي عندة تجربة حلوة في الصيد او صورة حلوة لسمكة كبيرة اصطدها او اللي عندة مكان حلو للصيد يقول علية ! وكمان اليي مش بيصطاد يقول راية اية في الصيد واهو يشاركنا!

يا جماعة دة موضوع خطير واحنا على سبيل المثال في اسكندرية بننتج كل يوم صياد

:lol: :lol:

يالا بسم الله ومستني مشاركتكم

[Ahmed Hassan]

الشيء الاكيد ان الصيد ده هوايه ممتازه لأنها على الأقل بتهدي الأعصاب.. و دي اكتر حاجه احنا محتاجينها اليومين دول. بس مين بقه فاضي يروح يصطاد؟ بصفتي من بورسعيد انا بشوف الناس اللي بيروحو يصطادو.. و خصوصا لما بشوفهم في الشتاء في عز البرد بليل بعرف اد ايه هيه حاجه مهمه بالنسبه ليهم و انها غيه و موضوع كبير... بس بصراحه انا شخصيا محصليش الشرف... بس بعرف اكل السمك كويس اوي لو حد محتاج مساعده :mrgreen:

[goodwave]

طب اتفضل عندنا في اسكندرية علشان في موضوع اكلة سمك عاوز رايك فية! :lol:

[Ahmed Hassan]

:mrgreen:

[emadfk]

وانا من افضل هواياتى صيد السمك و خصوصا فى الاسكندرية معشوقتى والى لمل باروح علشان اصطاد فيها على بير مسعود بنسى الدنبا و مافيها و خصوصا لما تصطاد سمكة حلوة كدة وتبذل مجهود كبير فيها حتى تصل اليها ياسسسسسسلااااااااااام شعور لايوصف

وياريت الى يعرف اماكن فى الصيد فى الاسكندرية او فى القاهرة ينفع فيها الصيد بالمكنة يقول عليها

وشكرا على الموضوع الجميل ده

[goodwave]

شوف بقى! صيد المكنة دة لعبتي!

1- انت ممكن تاخد مركب من ميامي او من بحري الصبح ودة بيخدك في عرض البحر لمدة ساعتين وبعدين بيوقف في اماكن هو عارفها ان فيها تجمعات سمكية. وانت ورزقك. بس ان شاء اللة حتاخد سمك يعني حتاخد.

2- ميناء الاسكندرية ودة بيتعمله تصريح دخول وتصريح صيد بتكلفة بسيطة جدا. بس انصحك تروح مع حد عارف المكان علشان يدلك على اماكن تجمع السمك وبردة انت ورزقك!

3- تيجي بقى للغرب ودة مكاني المفضل وهو الساحل الشمالي من اول كرير لحد سيدي عبد الرحمن. تقف على البحر بمكنتك وتحدف وماتقلش لعدوك لو ضربت معاك سمكة كبيرة. هدوء اية وطبيعة اية بس في الصيف مش كل الاماكن متاحة علشان بلبطة المصيفين ودة بيطفش السمك بس بردة في اماكن كويسة!

4- قرية مارينا الساحل الشمالي وما ادراك ما مارينا في الصيد بس بردة عاوزة حد فاهم الاماكن الحلوة وانواع الطعم!

كفاية كدة بقى علشان قربت اعيط بجد اصلي نفسي اروح اصطاد ومش فاضي اليومين دول

[AlmAhAtmA]

مع اني اسكندراني لكن ما ليش في الصيد خالص
انا ليه في الغطس
خالد اخويا وصل لمرحله الهوس في الصيد
يعني بيسافر هوه و صحابه يصطادوا
و لو تشوفه و هوه بيوضب السمك اللي بيجيبوا بيكون في حاله هيام مع العده
و يا سلام و هوه و الحاجه منكبين علي الغنيمه و بيفصصوا مع ان ساعات بيكون فيه سمك لا يري بالعين المجرده بس بيكون فرحان قوي
واضح انها هوايه بترتبط بالشخص و بترتبط بتفكيره و مشاعره

يعني حنشوف من حبايبنا هواه الصيد في المنتدي رحله صيد بالعربيات ولا كلام و بس
عايزين نعمل انشطه نستخدم فيها العربيات
رحلات خروجات مقابلات اي حاجه فيها ات في الاخر

[aboalm]

فكره حلوه ممكن نضيف ليها التجارب الشخصية من حيث الوقت فى السنه اللى بيكون فيه السمك كتير لانهة مواسم و دى عن تجربة فى النيل و كمان انواع الطعم ( دود , سبيط , جمبرى , ريم ) حتى تعم الفائده
بالنسبه ليا بأصطاد فى النيل ووجدت ان افضل الشهور هيا فى الصيف و خصوصا لما يكون يوم الجو فيه حر زى اليومين الحلوين قوى دول بيكون السمك باليلل تقريبا بيطلع يتمشى على الشط

[Karim_Monir]

بضم صوتي لحبايبي احمد حسن(اللي زعلان اني ما شوفتوش المرة دي) وهاني
اكل سي فوود انا معاكم
اسوق لكم ان شالله لحلايب
لكن اقعد امسك صنارة وكدة
اموت من الجوع ولا اعملهاش
ماليش في الصبر ده خالص
ابن خالتي مهندس كمبيوتر وعنده محل بيع ادوات وعدد صيد وبينظم رحلات لحلايب وحاجات كدة
حفي وراي ياخدني معاه مرة وانا ابدا
اكل بس :mrgreen: :mrgreen:

[Ahmed Hassan]

و الله يا كيمو غصب عني.. انا متاخرش عنك ابدا.. بس الشغل اللعين!!!

انا بقه بالنسبه للسي فود في مطعم فتح جديد عندنا تحفه... تعالو كلكم اصطادو... و انه وانته بس نروح ناكل هناك :mrgreen:

[goodwave]

"رحلة صيد بالعربيات"

واللة فكرة جامدة وانا عندي مكان تحفة في اسكندرية في الساحل الشمالي!
صحرا ومية وهوا وحاجة متعة يعني تصطاد وتشوي وتاكل وتعوم وووووووو احمدك يا رب :o :o :o :o

[Mohsens]

"رحلة صيد بالعربيات"

واللة فكرة جامدة وانا عندي مكان تحفة في اسكندرية في الساحل الشمالي!
صحرا ومية وهوا وحاجة متعة يعني تصطاد وتشوي وتاكل وتعوم وووووووو احمدك يا رب :o :o :o :o

طب متكمل جميلك و تدينا درس خصوصي Online في الصيد :) علشان أنا معلوماتي عنه صفر و نفسي أفهمه....يعني الصنارات بتتجاب منين؟...ايه الأنواع الكويسة و بكام؟...كل انواع ايه الطعم بتاعها؟...و كل اللي ربنا يفتح عليك بيه :)

[hazem_khidr]

فكره حلوه موضوع الصيد دا.
انا كنت بقي هاوي صيد و بصطاد السمك المشوي بس :mrgreen: و الطحينه كانت بتيجي معاه كمان.
ياااااااااه اقولكم ايه ولا ايه لو حكيت علي مغامراتي حتتعقدو و خوصا لما اصطادت الحوت و ركبته لحد ما وصلت للشط. :D :D
الكلام الجد بقي.
لما كنت في الامارات كان في مهندس معانا هناك اكبر مني بكتير و كان غاوي صيد و كل اسبوع يوم الخميس الفجر بياخدني و نروح نصطاد و نرجع علي الصبح و كنا بنجيب سمك حلو اوي الصراحه و بكميات كمان.
اكتر حاجه اتعلمتها من الموضوع دا بخلاف الصبر هو اني اتأمل الاشياء كويس .يعني لما تبقي قاعد قدام البحر بالنص ساعه و نرك متحدد في مكان واحد و تتأمل في كل حاجه حواليك و تركز فيها حته لو شويه رمل الحكايه دي بتخليك تتأمل في كل حاجه قدامك .
هوايه جميله فعلا

[Migo123]

اسمه ايه المحل الجديد ده يا أحمد ............. انا ممكن قوي اجي اصطاد هناك ... انا من زمان مدمن صيد في البرج :lol: :lol:

[goodwave]

غالي والطلب رخيص يا استاذ MOHSENS

شوف يا عم!

لو حتصطاد في الاسكنرية علي الكورنيش او على البلوكات الممتدة في البحر فيلزمك الاتي وبالاسعار كمان:

1- بوصة فيبر 5 متر (20-40 جنية)
2- بكرة شعر (خيط صيد) مقاس 30 مم (2 جنية)
3- بكرة شعر مقاس 25 مم ( 2 جنية)
5- عدد 5 فلة (بكسر الفاء) مقاس متوسط بحجم مقلة العين. ( 50 قرش)
6- عدد 10 hooks مقاس 7 كفتة (1 جنية)
7- ربع متر شريط رصاص ( تقل ليساعد على غطس الطعم) ( 1 جنية)
8- ربع جمبري صيد (برغوت) من الميدان في بحري ( 3 جنية)

طريقة العمل:

1-تفتح البوصة وهي عالبا مكونة من خمس قطع متداخلة في بعض.
2-تربط الشعر مقاس 30 مم جيدا في الطرف الرفيع في نهاية اعلى البوصة وتمدة الي ما قبل نهاية اسفل البوصة ب 50 سم.
3- تدخل الشعر في الفلة وتجعل الون الابيض للفلة مواجه للارض واللون الاخر للسماء
4- تاخذ الشعر مقاس 25مم وتقطع منة 30 سم وتربط عدد واحد صنارة في كل طرف (استخدم الرابط التالي في معرفة كيفية ربط الصنارةhttp://www.fishingcairns.com.au/page6-1.html)
5- قم بربط الشعر الاساسي المتدلي من البوصة مقاس 30 مم بمنتصف قطعة الشعر مقاس 25مم التي اعددتها بالصنانير
6- اقطع قطعة صغيرة من شريط الرصاص بشرط ان تكون مناسبة لطفو الفلة ولفها حول نقطة تلاقي الشعر 30 مم مع الشعر 25مم
7- عدل ارتفاع الفلة حسب عمق المكان اذ تصطاد فية وذلك باستخدام عود كبريت لتثبيت الفلة
8- قم بادخال سن الصنارة من ذيل الجمبرية وقم بدفع السن ببطء الى ان يستقر في جسد الجمبرية بالكامل
9- بسم الله وارمي في البحر وانت ورزقك

لما تهوى الصيد حبقى اشرحلك صيد المكنة علشان دة اصعب شوية

على فكرة في على طريق كرير (طريق مطار برج العرب المؤدي الي الساحل الشمالي) بحيرة صغيرة فيها سمك بلطي صغير بس صيدة سهل والقعدة هناك بعد المغرب تحفة. خد معاك كرسيين وروح جرب وحتدعيلي.