أمثال غريبة

[Hossam_Hassan]

- اللي يعبي لك بالمعلقة عبي له بالجاروف و اللي يعمل فيك طيب ما تنساهوش

- قالوا يا نخلة هايقطعوا الجريد قالت: يفعل الله ما يريد

- إن بدك تعاشر عاشر أمير وإن بدك تسرق اسرق حرير وإن بدك تدق دق باب كبير، حتى إذا عيروك تستاهل التعيير

- ان قابلك الاعمى خد عشاه مانتاش ارحم من اللي عماه

- انا وحشه وحشه و عاجبه نفسي و اشوف الحلوين تقرف نفسي

- خد الأصيلة ولو كانت على حصيرة

- طول مانتا زمار و انا طبال تجمعنا الليالي

- خنفسه شافت عيالها علي الحيط قالت ده لولي مربوط بخيط

- مالك جاي ومعلق جرس؟
أصل ابن خالتي اشترى فرس

- جارك وراك وراك.......ان مشافش وشك هيشوف قفاك

- نغسل غسيل هلس و نتكل على الشمس

- الديب متهوم و لو بات جعان

- اللي ما تقدر تشتريه ليه بتشتهيه؟

- اللي تفكه بايدك ما تفكوش باسنانك

- للي ما يفهمش بالاشارة الكلام معاه خسارة

- من غير سنان و نفسه ف اللبان

- الغجرية ست جيرانها ان ما خافو منها خافوا من لسانها

- اللي ما يريدك ما تريده و لو كانت روحه ف ايده

- الحاجة في السوق تقول نيني نيني
بكرة يجي الخايب يشتريني

--------------------------------------------------------

منقول

[goodwave]

هي غريبة فعلا

[Nader]

الحاجة في السوق تقول نيني نيني
بكرة يجي الخايب يشتريني

:lol: :lol:

[Hossam_Hassan]

- الشايب لما يدلع يبقى زى الباب المخلع

- دلع الفقارى يفقع المرارة

- اللى تعمله الجدود تضيعه القرود

- مش كل الحلو زلابية

- حبيبك من تحب لو كان دب

- الصديق الصافي في وده لا تزعله ولا ترده

- يا نحله لا تقرصيني ولا عايز منك عس

-قليل الاصل لا تعتبه ولا تلومه ? ده زى البقعه لا ينظف برابسو ولا بأومو

-

[Islam_galal]

بصراحة تحف ومعظمهم فيه حكمه عاليه

[modux]

-

-قليل الاصل لا تعتبه ولا تلومه ? ده زى البقعه لا ينظف برابسو ولا بأومو

-

جامدة جداااااااااااااااااااااااااا

[Hossam_Hassan]

معلش يا جماعة بس كل شويهة يجيلى حبة حلوين

--------------------------------------------------

- قلت للهم انا رايح اتفسح قاللي انا جاي وراك هو انا مكسح

- أتخانئوا الفران على خميرة الجيران

- ارنب ملك ولا جموسة شرك

- قالوا ابن مين اللي محمول؟ قالوا اللي عندها مأكول .. قالوا ابن مين اللي ماشي؟ قالوا ابن اللي معندهاشي

- اصطلح الفار على العرسة و نسيوا الفضيحة والجرسة

- اعمي يقول لاعمي ليله سعيده اللي تجمعنا

- ديك اخواتــــه خروف مراتــــــــــــــه

- دق الطاسه تجيك ألف رقاصه

- ربنا ريح العريان من تعب الغسيل

- اعرج يسحب مكسح يقول له تعال نتفسح

- لا تمشى ورا اتوبيس هيئة ولا ست سايقة

- هدية الأرفان..........ليمونه

[goodwave]

- لا تمشى ورا اتوبيس هيئة ولا ست سايقة

حلوة صحيح

[Hazem Salah]

1. من طلب العلا يتفضل فى كابينة رقم واحد
2. ياخبرالنهارده بفلوس بكره ينزل عليه اوكازيون
3. اصوم اصوم وافطر على المدفع
4. نام وارتاح وكل عسل نحل التمساح
5. المضطر يركب التاكسي
6. رب صدفة خير من ألف ليلة و ليلة
7. اللى يخاف من العفريت يعمل عبيط
8. اجرى جري الوحوش اوتوبيس 710 ماتلحقوش
9. دارى على فرختك تبيض
10. مسير الحي يتسفلت
11. اللى ياكل لوحده يشبع
12. الباب اللى يجيلك منه الريح غيره الوميتال
13. اكفى القدرة على فمها يدلق الفول منها
14. اربط الحمار مطرح ما يحب هو, دى حرية شخصية
15. اللى مالوش شغله تشغله, يدور على شغل, عادى يعنى
16. علقة تفوت واللى بعدها واللى بعدها... الخ الخ
17. المركب اللى ليها ريسين ينفعوا يلعبوا سوا شطرنج
18. اللى بيته من إزاز ميغيرش هدومه فى الصالون
19. فاقد الشىء يدور عليه
21. تأتى الرياح محمله بالأتربة
22. جت الحزينه تفرح شغلت شريط حكيم وقعدت ترقص
23. قال يامحشحشين يكفيكوا شر الكمين
24. لاتبكى على اللبن فى البسكوت
25. اقطع عرق و حته بتلو
26. اطبخى ياجاريه الأنبوبه فاضيه يا سيدى
27. لو حبيبك عسل ما تحطلوش طحينة
28. اللى يتلسع من الشوربه يتصل بالمطافى
29. وبكره ترجع ريما من عند خلتها فى مارينا
30. القرش الأبيض بيعوم فى البحر الأحمر
31. ضربوا الأعور على عينه قالهم كسرتوا النضاره
32. اللى ميشفش من الغربال يكشف نظر
33. المال السايب يعلم الطلبه
34. من خرج من داره مينساش يأخد المفتاح معاه
37. اللى خدتوا الأرعه تخدو ام الخلول
38. أكل العيش يحب الطعميه
39. اد لحافك ...... اعمل الملايات
40. يا داخل بين البصلة و قشرتها........ دخلت ازاي نفسي اعرف
41. قليل البخت ..... يلاقي الخرم في اليخت
42. مد ملفك على قدر ذاكرتك
43. برنامج الالف سطر يبدا بامر
44. من كثرت ملفاته قل نظامه
45. ذيل الماوس... عمره ما يتعدل
47. ..اللي ما يعرف الكمبيوتر يقول عنه اتاري
49. ابعد عن الفيروس... وغني له
51. يدي الفيديو للي... ما عندوش كمبيوتر
52. يا هارد ما دخلك فيروس
53. ديسكك حصانك ... إن صنته صانك
54. كل واحد يعمل ايميل على السيرفر اللي يريحه
55. المكتوب على الديسك .. لازم يشوفه الهيد
56. ابن الهاكر... كراكر
57. ادي جهازك للصيانة ولو تسرق نصه
58. لا تعايرني ولا أعايرك . . الويندوز قارفني وقارفك
59. اللي جهازه من غير فايروول ما يحدفش الناس بالتروجانز
60. لو كان ليك عند الكلب حاجه قوله يا ويب ماستر
61. هذا الويندوز من ذاك الدوس
62. الديسك الي يتعبك.... فرمته

[aboalm]

طالما عايزين امثال غريبه خدو ده بقى
كل شيئى بالبخت إلا القلقاس ميه و فحت

[hazem_khidr]

خدو دا كمان
الاسد لما يواعد القرود... يعود وقت ما يعود

[Hossam_Hassan]

- من عرف منتهاه هان عليه مبتداه

- وجه الرحمة و قلب الفحمة

- رافق السبع ولو اكلك ولا ترافق النذل ولو حملك

- منظر زي النسناس و لفظ زي الرصاص

- لا تقول على اللي جرى ازاي جرى كلها امور متقدرة

- أجا و نام عنا ليلة و ساوى حاله من العيلة

- فمي مغلوق و قلبي صندوق و ربي فوق يخلص الحقوق

- عقار ما هو ببلادك ما هو لك ولا لأولادك

- اترك الهم ينساك و ان استنيته يجري وراك

- صبري عى بطني ولا صبر الجزار عليا

- هاتروح فين يا قرد ... بكرة الموز يرجعك

- للى ميخدنيش كحل فى عنية مخدوش شبشب فى رجلية

[وائل عطية]

بجد حاجة هايلة جداً
ألف شكر على الحاجات الحلوة دي يا حسام
أنا جمعتهم وباطبعهم دلوقتي

[abo3bdolrahman]

Re: أمثال غريبة

[quote="Hossam Hassan"]

- ان قابلك الاعمى خد عشاه مانتاش ارحم من اللي عماه



أخى العزيز حسام السلام عليكم و رحمة الله و بركاته
شكرا لك على هذا الكلام الجميل و لكن هذا المثل حرام شرعا و فيه تطاول على الله عز و جل.
و إنى أعلم انك لم تتنبه له.
أرجو من المشرف حذف هذا المثل.
و لكم كل الشكر.

[Hossam_Hassan]

أخى العزيز أبو عبد الرحمن

شكرا على أهتمامك بس انا محتاج بعض التوضيح لسبب حرمانية هذا المثل ووجه التطاول على الله عز و جل و ذلك من باب المعرفة و لعدم الوقوع فى مثل هذه المحاذير و لو بالخطأ