شوروا عليا قبل ما ارتكب جناية

[shaaban2008]

بصى انا كدة مع شريكتى فى الحياة قبل الزواج وبعدة
لاني بحبها وغيور عليها
ومن حقها عليا اني اصونها من اللي بيحصل في الشارع
====================
ربنا يملا حياتكم ود وتفاهم ان شاء الله

[Qamar]

اطلبي منه يحط تصور منطقي ليوم من حياتك المعتادة.
لما ما يلاقيش حاجة يكتبهالك في اجندة اليوم (ماهو كله ممنوع) هايبدأبالتنازل من طرفه . أقصد انه من نفسه مش انت اللي ها تحتاجي تطلبي الحاجة.

[AshTurbo]

أنا مش بحب أتدخل في حياة الآخرين بس بما أنك عملتي الموضوع في المنتدى الأجتماعي يبقى طلبتي مشاركة الناس بآرائهم وأنا رأي أنك لو زهقانه ومخنوقه ومش طايقه الزهق والملل والرفض المتكرر من الطرف الآخر أيه اللي جابرك على الأستمرار معاه ؟ ممكن ببساطة تنفصلوا لو مش عاجبك تصرفاته وعلى فكرة اللي بيحب بيضحى ... بيضحى بالزهق بيضحى بالملل بيضحي بعمره عشان اللي بيحبه ولا أيه رأيك ؟ وعموماً الشغل مع تربية الأولاد مع الأهتمام بالزوج كفيلين بأنهم يشغلوكي تماماً ويملوا وقتك على الآخر فحضرتك أقعدي قعده صفا مع نفسك وقرري هتعملي أيه وهتعيشي بقية حياتك أزاي ومع مين وربنا يوفقك ويباركلك في زوجك ويهديكم أنتم الأثنين اللهم آمين .

[ahmed_gamal]

انا هقول لحضرتك حاجة واحدة بس
تفتكري هو دلوقتي مش في ممل ووحدة و هو متغرب وطالع عينه علشان الجواز و متطلباته و مستقبلكوا بعد كده
وجواه اكتر من اللي جواكي ده 100 مرة
اه علي فكرة انا زيه بالظبط في كل حاجة رفضها

[Qamar]

انا هقول لحضرتك حاجة واحدة بس
تفتكري هو دلوقتي مش في ممل ووحدة و هو متغرب وطالع عينه علشان الجواز و متطلباته و مستقبلكوا بعد كده
وجواه اكتر من اللي جواكي ده 100 مرة
اه علي فكرة انا زيه بالظبط في كل حاجة رفضها

مش معنى انك متكتف يبقى تكتف الناس معاك. ممكن يكون حفاظا عليها...غيرة عليها... بس برضه لازم يكون الأمر منطقي و يكون فيه ثقة فيها و مراعاة لها

[Terrible_DaRsH]

احمدك يا رب ..
اخيرا شفت حد مخنوق من الفراغ والملل زيى ..
ده انا كنت حاسس انى الوحيد اللى فى الكون ده مبعملش حاجة خالص ..

[A.Saad]

هنا احمد
بصى يا سندريللا
انا جايز يكون كلامى قاسى ، بس لمصلحتك
الجواز : الطبع يغلب التطبع بمعنى ان اللى فيه طبع مش بسهولة يغيره ، ممكن يتغير فترة الخطوبة بس غالبا بيرجع تانى
فيه عيوب فينا كلنا وفيه مميزات
يبقى : قارنى المزايا والعيوب
انا عملت دبلومة استثمار ، مرة الدكتور قال فيها الاتى
اى حاجة فى حياتك استثمار
قارن بين تكاليفه وعائده
وقارن بين العائد اللى جاى فعلا واللى انت هتدفعه
يعنى تقارنى بين موضوع الشغل والجواز
مين الاهم عندك
مع ملاحظة ان :
لو سبتيه ممكن العريس الاخر يقولك بردة مفيش شغل
هل هتقدرى اما تنجبى تستمرى فى الشغل ولا لا
مخاطر قلة العرسان الجيدين وبكرر الجيدين

مش المهم فى الجواز الحب
الاهم التفاهم والمودة ، يعنى طريقة تفكيركم ازاى سوا فى كل الدنيا مش النقطة دى بس
انا واختى بنحب بعض ، بس دايما مختلفين وساعات متخصمين لانى بفكر بطريقة غيرها تماما

لو هتاخدى قرار الاستمرار :
ممكن تروحى جمعيات خيرية ، تساعدى فى جمعيات المكفوفين ودول بيدوكى كتب تكتب كمبيوتر علشان تتحول لطريقة برايل او كتب تسجليها على شرايط علشان تتسمع

المشكلة انك حاسة انك مجبرة منه وانك بتحبى مجال العمل ، يعنى لو هوة مش اجبرك كان ممكن انك مش عايزة تشتغلى عادى

[mohamed_kta]

السلام عليكم

أنا هنصح حضرتك شوية نصائح ممكن تفيد و الله الموفق :
1 - ممكن تتصلى بكل مكاتب المحاسبة اللى فى 140 أون لاين مثلاً و تعرضى عليهم خدماتك من خلال البيت زى عمل ميزانية مثلاً أو ما شبه ذلك .

2 - تشوفى حضرتك أى دار أيتام أو مسنيين و يكون قريب منك " بدون مواصلات مثلاً" و تشتغلى فيه حتى لو بتطوع .

3 - مكتب كتابة أوراق أو محاضرات على الكمبيوتر و ممكن من خلال البيت .

- موضوع الشغل للنساء فى وجهة نظرى " الست زى الحديدة لو تركتها فى البيت هتصدى" مقصدى الشغل بيفتح مدارك و أبتكارات و ده هيكون ليه عائد على البيت المهم الشغل تحت الضوابط .
- أنا هقولك على نصيحة و حاولى تعمليها مع زوجك و هيكون ليها أثر كبير بينكم قريباً أنشاء الرحمن : ( طبعاً هو مسافر أتوعدوا أنتى و هو على صلاة قيام فى وقت واحد مثلاً الخميس باليل أو قبل الفجر و أنتى فى مكانك و هو فى مكانه لكن بتكونوا فى نفس الوقت و الصفحة و بعد الصلاة مباشرة الدعاء ) صدقينى و عن تجربة فيها خييييير كتييييييييير .

و الله الموفق.

[waled369]

شوفي يا ست سندريلا

أنا تقريبا كده زي البيه جوزك اللي بتشتكي منه و أنا شايف ان وضعه طبيعي و مش أنانية منه و لا حاجة و أكيد بعد الجواز هتكوني معاه و الوضع هيختلف و دا نفس اللي حصل معايا برضه و أكيد هتكوني معاه في البلد اللي بيشتغل فيها و ربما هوه اللي يشجعك أنك تشتغلي كمان و جايز لأ .

عامة الوضع هيختلف معاكي كلية بعد الجواز و بكرة ربنا يرزقك بطفل يملى عليكي حياتك و مش هتلاقي وقت أساسا للبيه جوزك .

المهم لا تستعجلي الأمور و ان شاء الله تكون للأحسن . و مبدئيا اشغلي وقتك بأي حاجة لغاية ما تتجوزوا و مبروك مقدما .

[نور العمر]

سندريلا ... أنا واحدة من الناس مقدرش أعيش من غير شغل وحياة أخرى غير روتين الزواج ومسئولياته لازم أجد لنفسي نافذة لأتنفس الصعداء بعيدا عن مشاكل الأولاد والبيت والخناقات الزوجية + إن الحياة الخاصة دي بتفتح قدامي مشاكل غيري فلما بتديق الأمور قوي بحس إني احسن حال من ناس تانية كتيير ...
أنا آسفة يا سيندريلا .... أنا مش حنصحك بشئ بس حقولك رأي الشخصي لو كنت مكانك ... كنت اخترت مستقبلي وشغلي وحياة مع شخص نوعا ما متفاهم .... لأن الخنقة دي خطر ... ولو النت مسليكي دلوقتي بعد زواجك حيمنعك منه غيرة بردوا .. وكمان مفيش حب بيدوم مشاكل الحياه بتخنقه ثم بتقتله...
انا شايفة اتجوزي وسافري وكرسي حياتك لبيتك وعودي نفسك على كده طالما بتحبيه ولو هو في دولة كويسة زني عليه تشتغلي ولو مدرسة في حضانة ولو حتى لحد ما يبقى في بيبي ........... وربنا يوفقك

[EZABY]

انا معاااااااااااااااك فى الكلام دا مع انك زملكاوى وهنغلبكو ان شاء الله يوم الاحد

سوري ياسندريلا جملتين كده بره الموضوع

هنقطعكوا
انتوا هتلعبونا من غير وائل وحسام وياسر واحتمال السيد كمان وابو تريكه مش في حالته

[muslimah_dentist]

أختى سندريلا

نصيحة من أخت كبيرة لكى و خبرت الكثير فى هذه الحياة و رأيت الكثير من أصناف البشر و طرق تعاملهم مع المواقف.

نصحك الكثير من الأخوة و الأخوات بالكثير من النصائح الرائعة و اشترك الأخوة فى المنتدى فى وجهة النظر مع زوجك المُستقبلى و تحدثوا بوجهة نظرهم كرجال و لكن سؤال يجب أن تسأليه لنفسك و لا يستطيع أى أحد أن يرد عليه سواكى؟

ماذا أريد حقا؟ماذا أريد أنا؟ماذا تريد سندريلا؟

انتى الآن تشعرين بالملل و السأم الشديد و الفراغ و لكن لماذا قرنتى هذا الشعور بالملل بعدم العمل أو عدم الانشغال بأى شئ ، مثلاً ممكن أن تعملى و فى نفس الوقت تشعرين بالملل ، ففى كلامك انتى قرنتى سعادتك بالعمل فى مجال (المُحاسبة) فقط ظناً منكى أن هذا هو الأفضل لكى و لكن حبيبتى كما قال الله تعالى فى سورة البقرة ( و عسى أن تكرهوا شيئاً و هو خير لكم و عسى أن تحبوا شيئا و هو شر لكم و الله يعلم و أنتم لا تعلمون) اعلمى يقيناً أن كل شئ بقدر و أن قدر الله لا يأتى الا بخير و أن زوجك المُستقبلى ما هو الا وسيلة من وسائل الله فاذا أراد الله لكى أن تعملى فسيلين زوجك و يوافق.

و لكن نصيحتى لكى هو أن تنظرى للموضوع بأفق أوسع و لا تقصرى سعادتك فقط فى العمل و الخروج فهناك أشياء كثيرة تشغلى بها وقتك تعود بالنفع الشديد عليك و على كل من حولك مثل:

الذهاب الى أى مسجد قريب و الالتحاق بحلقة تحفيظ(و انتى قلتى انها يومين فقط فى الأسبوع و لكنكى عندما تنشغلى بحفظ كتاب الله ستجدى نفسك مشغولة طوال الأسبوع)

تعلم العلم الشرعى مثل الذهاب الى المسجد و حضور مجالس الذكر.

أن تنشغلى بالعمل الخيرى التطوعى حتى و انتى جالسة فى بيتك بالقيام مثلاً بعمل اطعام يومى لعدد من الأسر.

و الله اذا قمتى بهذه الأمور ستجدى أنه لا يوجد للملل طريق فى حياتك

و كما قال جميع الأخوة و الأخوات ما خوف زوجكى عليكى الا هو علامة حبه لكى و هذا يكفى حبيبتى لأن قوام أى علاقة انسانية الحب و المودة و الرحمة.

وفقك الله لما فيه الخير كله.

[Hossam.Hamdy]

مستر حسام
اشكرك بجد على كلماتك العطرة
بس موضوع التجاوزات ده انا شايفة ان البنت هي اللي بتضع خطوط عريضة لكل واحد و من هنا بتتحدد طريقة تعامله معاها يعني هي اللي تسمح بالتجاوزات او هي اللي تمنعها
و اهم حاجة موضوع الناس اللي بتلعب في الدماغ ده
اصلها بتحصللي و بيتلعب في دماغي كتير اوى هههههههههههههههههههه
بس المرادي لا والله
انا فعلا حاسه ان في ايد ملفوفه حوالين رقبتي بتخنق فيا
و ربنا يوفقكوا جميعا و بجد تسلم ايد كل واحد تعب نفسه و كتب لي نصيحة هي مهما كانت اكيد غالية جداااااااااااااااا
ربنا يخليكم جميعا و يجازيكم خير




بس ميمنعش برده انى اشتغل او اخد كورس او اتفسح مع اصحابي او ....... الخ

التجاوزات اللى قصدى عليها اللى عى كلام الشباب و الرجاله مع بعض عادى مع عدم مراعاة وجود بنات فى الشغل يؤدى الى سماع كلام و تصرفات مش لذيذه خالص....
طبعا البنت هى اللى فى استطاعتها تححد اسلوب التعامل وده اكييد...

حاولى معاه يوافق على كورس و جيم حتى ولو مشتركه فى نادى روحى امشى كل يوم فى التراك

[نور القمر]

و ياريت الموضوع موضوع شغل و بس
ده كل حاجة
سواقة
كورسات
خروج
تحضير دراسات عليا
جيم
....................... الخ

يعني البنت فكرت في كل حاجة ممكن تشغل وقتها مش موضوع انها مصرة على الشغل بالذات
يني مهما اقترحتوا عليها من افكار جديدة مش هيوافق هو عليها مدام الموضوع هيكون فيه خروج من البيت
مع انه لو سمح لها بتعلم السواقة مع مدربة سيدة ممكن تقضي اي مشاوير بعربيتها وما تضطرش لغلاسة المواصلات
لكن حتى تعلم السواقه والسواقه في حد ذاتها ممنوعه

وواضح ان تفكير معظم الرجال واحد وتفكير معظم الاناث واحد
ومحدش بيقدر يغير تفكير حد

مفيش غير اني اقول ربنا يوفقك ويرزقك بالذرية الصالحة ويسعدكم طول العمر مع بعض وان شاء الله في حياتك الجديدة تكوني مبسوطة اكتر

[A.Saad]

حاولى انك تعرفى ايه تفسيره للامور دى
يعنى ليه مش عايزك تشتغلى
علشان الناس هتضايقك ولا غيرة ولا علشان تبقى فاضية للبيت
كل سلوك بشرى له دافع

فيه حكمة عجبانى جدا بتقول :
سبب تعاسة البشر هو اختلاف تقيييماتهم للاشياء