عايز طباخ كويس !

[askoda]

يا جماعة حد عند فكرة الواحد ممكن يجيب طباخ كويس ييجي يوم واحد عشان عزومة منين ؟

لو حد يعرف ياريت يقولي مين وفين وبكام

وياترى جربو قبل كدة ولا إيه النظام ؟

[AlmAhAtmA]

لو الموضوع عزومه يوم واحد
اعتقد حضرتك ممكن تشوف فندق يعمل لحضرتك البوفيه
و للتسهيل علي نفسك
1- احصر العدد ( مع مراعاه ان فيه اطفال من عدمه في العزومه )
2- نوع المائده ( بوفيه مفتوح ولا طبق رئيسي ولا ايه )
3- حدد الاصناف ( علي حسب نوع المائده و العدد )

ممكن حضرتك تكلم اخونا كريم منير هوه عنده خبره و ممكن يدل حضرتك علي ناس كويسين جدا و احنا مجربينهم في افطار رمضان كذا مره و ان شاء الله تكون عزومه موفقه و جميله

و لو محتاج اي حاجه كلمني في التليفون

في الاسكندريه فيه مطبخ ممتاز جنب كلاسيك علي البحر بتروح تختار القايمه و همه بيساعدوك علي الاختيار و تحديد الكميات

[askoda]

شكراً يا باشا على الرد السريع بس أنا كنت عايز حد يعمل أكل لعزومة وعرفت انهم مش بياخدوا فلوس كتيرة ذي لو جبت فندق عشان كدة أنا بسأل على الطباخ دة.

غير كدة لو أنا عايز أعمل عشاء لفردين بس في البيت واخد بالك إنت ؛)

[AlmAhAtmA]

ابعت لكريم منير علي الخاص
و هوه حيخلص لك الموضوع و يدلك علي الفايده يا افندم

عشاء لنفرين يبقي اتصل بكنتاكي :k10:

[Ahmed Selim]

فى واحد فى مدينة نصر و المقطم والرحاب أسمه مطعم التقوى ( الشيف سرحان ) مجربه أكتر من مرة وعملت فيه عقيقة بنتى من 3 سنين تقريباً.......بس هو مش هيجيلك.....أنت بتختار من عنده أى حاجة أنت عاوزها وهو بيجيبها ويعملها....الحاجة الوحيدة اللى بيخليك تجيبها لو أنت عاوز هى اللحوم.....على فكرة بتاع المقطم ممكن تطلب منه أكل و تجربه

[askoda]

طيب هو بيبعت ديليفري يعني ؟

[A.Saad]

انا كنت سمعت ان فيه جمعيات للمرأة أو جمعيات خيرية بتعمل كدة ، بس مش عارف عنوانيها

[elzaradashty]

حضرموت اللى فى مدينة نصر امام اخر ساعة انت بتجيب كل حاجة وهو عليه التسوية والسرفيس والتقوى كمان ممتاز وخصوصاً فى تسوية اللحوم والارز البسمتى بالمكسرات

[Ahmed Selim]

طيب هو بيبعت ديليفري يعني ؟

أيوة يا باشا

بتروح تشوف أسعار الحاجات وبتتفق معاه....تجيب اللى أنت عاوزه....ولو مش عاوز تجيب هو بيجيب.

أنا لما عملت العقيقة عنده خليته هو يجيب...أتصل بيا وهو بيشترى وقاللى قدامى كذا و كذا وكذا و أدانى رأيه وسابنى أحدد.
والسعر اللى أشتر بيه الخروف كان سعر السوق ساعتها على ما أفتكر...كل الموضوع أنه خد 50 جنيه زيادة على تمن الخروف عشان المشوار والنقل.
وبعد كده بتديله العنوان والساعة اللى عاوز فيها الحاجة وبيجيبهالك لحد عندك....و مجاش متأخر ساعتها كمان.

[askoda]

thanks for every body

I think i'll go for Eltakwaa :)

The chef Sarhan is very good.

Thanks again