سلوكيات القيادة

[ehab77]

انا ليا استفسار :
لما اكون فى العربية والطريق واقف مابيتحركش " شلل مرورى " على راى اخونا رجال المرور وتلاقى العربية اللى ورايا عمالة تقلب النور وكمان تدى كلاكس وبيشوح كمان " مع ان الطريق واقف والله "
المفروض الواحد يعمل ايه ؟؟؟
طبعا اول ماتبادر لذهنى انا شاورت وقلت الطريق واقف .... اعتقد ردى برىء وطبيعى ومنطقى ؟!!!!
يقوم يرد ويقول ماتخش ياستاذ اكبس على اللى قدامك
ياجماعة والله الطريق واقف
افيدونى بالله عليكم اعمل ايه مع ملاحظة تكرار هذا الموقف من جميع الفئات ملاكى وميكروباصات وتاكسيهات ...الخ
لدرجة انى حسيت اننا فى سباق سيارات مش طريق عام
مع انى على فكرة بمشى بسرعة معقولة مش متهورة لكن معقولة برده

[EslaM_NagY]

متردش عليه اصلا

[نور القمر]

اسلوب مستفز ديما نقابله
زي ما يكون النص متر اللي هاتمشيه وبتكبس بيه على العربية اللي قدامك هو اللي هايفتح الطريق
بس زي ما بيقولوا كل واحد عاجبه مخه
احسن حاجة التجاهل في المواقف دي

[Busquets]

قله له استنى اشغل الجناحات و اطير!!!!

والله انا لما حد بيعمل كدا ولو الطريق ماشى بشاور له فى المراية هطييييير! :) مش عارف اوصفهالك بس بتبقى مستفزة :)

[R A N A]

ياااااااااه الموضوع حصللي كتير لدرجة اني فعلا بحس ان في حاجة غلط واقعد ابص حوايلا واكلم نفسي واقول طب هو عايز ايه يعني باللي بيعملة ده هل مطلوب مني اسند كبوت عربيتي على شنطة عربية اللي قدامي عشان ارضي سيادته؟ ولا مطلوب مني اني اضغط على زرار التبخير تقوم عربيتي تتبخر عشان الباشا يعدي وبعدين ارجع اضغط على زرار التكثيف وارجع اقف مكاني مش فاهمة .
يكونش فاكر ان عربيتي فيها جناحات المفروض اشغلها واطير من قدامه لما يقلبلي نور او يديني كلكس؟

انا عن نفسي حاجة من الاتنين يإما اعمل نفسي مش واخدة بالي خالص (كإنه هواا ياثامح) وكإن الكلاكس ده مش ليا اصلا بس الحركة دي بتقتلهم مني جدا وتخليهم اول مالعربيات تبتدي تتحرك والطريق يمشي يحاولوا ينتقموا بأي شكل ويعدوني ويمكن كمان يحاولوا يعاقبوني وحصلت قبل كده وكان في واحد عايز يلبسني في سور الكوبري عشان بطأت قدامه شوية في مطلع الكوبري ومستجبتش للكلكس بتاعه من اول مرة .
الحاجة التانية هي اني اوسعله واسيبه يغور عشان يرحمني من قرفه واقول في نفسي يالا خليه يمشي المستعجل افندي ده اصل هو مستعجل ووراه اشغال وانا نازلة اتفسح وعاجباني الزحمة اوي ومنسجمة بيها وساعات اضربله النور العالي عشان يحس اد ايه النور ده بيضايق
امال انا عملت الموضوع ده من شوية ماهو من غٌلبي :K_crying[1]::

http://www.nilemotors.net/Nile/showthread.php?t=39721

ده غير طبعاً اللي ييجي وراك واول مالسكة تفتح سنة صغيرة يقلبلك نور عشان يحفزك انك تكبس انت الاول قبل ماللي بيقطع الشارع من اليمين او الشمال يكبس ويقفلها عليك :k46: ولو انت حاولت تكون ذوق وتخلي اللي بيقطع الطريق يعدي (نتيجة لتعاطفك معاه مثلا أو نتيجة لإنه هو رمي بوز عربيته قبلك فإنت طلعت عاقل ووقفت تستناه لحد مايعدي) طبعا هاتلاقي في المرايا نظرات الغضب والثورة وعينيه بتطق شرار :k26: ويمكن يكون بيشتم في سره كمان على اساس انه لو كان هو اللي مكانك (على اعتبار انه عبقري سواقة وطرق ) كان مشي الطريق ده زي الفل لكن امثالنا من سواقين الملاكي (الفرافير علي حد قولهم ) مش بنعرف نسوق وبنزحم الطريق ونوقفه .

[A_H_M_A_D]

أنا غالبا في المواقف اللي زي دي بأشغل المراوح ولا كأني سامع حاجة
و أعلى ما في زمارته يشغله
لأن مالوش لازمة إني أحرق في أعصابي مع عالم غريبة جدا وأنا الخسران في الاخر (ضغطي حايعلى عشان إيه يعني)
فلقيت إن التجاهل التام في المواقف دي هو أحسن علاج

المشكلة الحقيقية في الموضوع (واللي كان نفسي أفتح فيها النقاش في موضوع منفصل) هو ليه مابقاش في حد عنده صبر على اللي قدامه
الصبر إنعدم عند 99.99% من الناس اللي سايقه عربيات في الشارع
وكأن كلهم مرة واحده وراهم مواعيد هامة جدا و حاتضيع منهم صفقات بمليارات لو إتعطل ثواني لأي سبب كان
دون مراعاة للعربية اللي قدامه دي موقفها إيه ولا إيه اللي خلاها تضطر إنها تهدي شوية

هو ليه الناس باقو كده ؟؟؟ نفسي حد يفهمني ؟؟؟

[دينا أبوالعلا]

ايه يا بيردي كل ده انت محروقه قوي
الحق يتقال عندك حق وفعلا شئ مستفز وانا زي ما تقولي عندي فوبيا طبعا دي غير لوبيا من الاصوات العاليه واللي ملهاش لازمه لكي ان تتخيلي بحس بايه من الاصوات دي وممكن ازعق واتنرفز حتي لو الكلاكس مش ليا يعني نعملك ايه وافضل اكلم نفسي ويا سلام بقي علي اللي بيبقي جاي بسرعه من علي بعد كيلو ورا بيقلب نور عشان علي ما يوصل حضرته نكون فاضيني الطريق للموكب بتاعه ويا عيني بقي لو مركب زينون انسي عينيكي بعدها .لسه اول امبارح كنت ماشيه فشارع بيوصل بين فيصل والهرم رايح جاي واللي جاي فوشي معلي النور وانا معلياه لما قرب مني وطيت نوري وهو فضل معلي لغايه لما عماني بجد لدرجه اني دوست فرامل و قولت انا مش شايفه حاجه فعلا مكنتش شايفه حاجه بمعني الكلمه
طولت عليكو
نفسي ينورو الشوارع ويلغو النور العالي من العربيات ويعملو كلاكسات تشتغل اوتوماتيك في الضروره معرفش ازاي بس اهو بقي عشان اللي بيجيلهم تخلف من الصوت العالي زيي

[R A N A]

ايه يا بيردي كل ده انت محروقه قوي
الحق يتقال عندك حق وفعلا شئ مستفز وانا زي ما تقولي عندي فوبيا طبعا دي غير لوبيا من الاصوات العاليه واللي ملهاش لازمه لكي ان تتخيلي بحس بايه من الاصوات دي وممكن ازعق واتنرفز حتي لو الكلاكس مش ليا يعني نعملك ايه وافضل اكلم نفسي ويا سلام بقي علي اللي بيبقي جاي بسرعه من علي بعد كيلو ورا بيقلب نور عشان علي ما يوصل حضرته نكون فاضيني الطريق للموكب بتاعه ويا عيني بقي لو مركب زينون انسي عينيكي بعدها .لسه اول امبارح كنت ماشيه فشارع بيوصل بين فيصل والهرم رايح جاي واللي جاي فوشي معلي النور وانا معلياه لما قرب مني وطيت نوري وهو فضل معلي لغايه لما عماني بجد لدرجه اني دوست فرامل و قولت انا مش شايفه حاجه فعلا مكنتش شايفه حاجه بمعني الكلمه
طولت عليكو
نفسي ينورو الشوارع ويلغو النور العالي من العربيات ويعملو كلاكسات تشتغل اوتوماتيك في الضروره معرفش ازاي بس اهو بقي عشان اللي بيجيلهم تخلف من الصوت العالي زيي

يالهوي يادينا انتي قلبتي عليا المواجع بموضوع النور ده كمان ده انا عملتله موضوع مخصوص هنا في المنتدي بعيط فيه من العمي اللي كان بيجيلي بسبب الزفت الزينون والنور العالي وبسأل الناس عن حلول خشي شوفي العجب يادينا
http://www.nilemotors.net/Nile/showthread.php?t=40931

انا مش بس شايلة ومحروقة دانا كنت بعيط من حرقة الدم كل يوم :K14::K14:.

تعرفي رغم اني مضايقة اني بعت عربيتي واني مش معايا عربية حالياً الا اني اترحمت من القرف ده ودلوقتي بركب التاكسي واقعد ورا هانم :k52: وسواق التاكسي بقي يعافر براحته مع الناس واللي يقلبله نور براحته ويضربله كلكسات براحته وانا احط الموبايل في وداني واسمع اي حاجة ومحلاها عيشة الحرية بجد :k52:.

اينعم المرحلة دي ليها مساوئ طبعا ان الموضوع مكلف شوية واني مش كل مرة التاكسي هايرضي يوصلني مشواري بس اهو كإني اخدت بريك من السواقة لحد ماجيب العربية الجديدة ان شاء الله

[M.Gamaledeen]

ياااااااااه
وانا اللي كنت متصور اني لوحدي اللي ب أعاني من العقليات العجيبة في الشارع
صحيح اللي يشوف بلاوي غيرة تهون عليه بلوتة
ده انا كنت خلااااااااااص ها طق من الشارع واللي ماشيين فيه وخصوصا المعجزة العلمية اللي اسمها التوك توك

ربنا يرحمنا منه ومن اللي سايقينه قادر كريم

[MoToRiZeR]

أول كلاكس نفض .. تاني واحد نفض .. تالت مرة بطل العربية و توقف تماماَ و شاورله "وقفت .. قاعد شوية" .. و اقفل السنتر لوك و ولع سيجارة و علي الكاسيت و رجع الكرسي لورا (لو تحب تطلع رجليك عالتابلوه ممكن بس انا مبحبش عشان ميتوسخش)

اما الطريق يمشي و ييجي يبرطك جمبك علي الكاسيت كمان و شاورله ببرود و تناكة كدة "مش سامعك .. عدي عدي" .

ده أفضل تكنيك لقيته للتعامل مع الكائنات الفضائية من النوع ده .

[bassam266]

أول كلاكس نفض .. تاني واحد نفض .. تالت مرة بطل العربية و توقف تماماَ و شاورله "وقفت .. قاعد شوية" .. و اقفل السنتر لوك و ولع سيجارة و علي الكاسيت و رجع الكرسي لورا (لو تحب تطلع رجليك عالتابلوه ممكن بس انا مبحبش عشان ميتوسخش)

اما الطريق يمشي و ييجي يبرطك جمبك علي الكاسيت كمان و شاورله ببرود و تناكة كدة "مش سامعك .. عدي عدي" .

ده أفضل تكنيك لقيته للتعامل مع الكائنات الفضائية من النوع ده .

بعملها كتير و ده فعلا احسن طريقه للتعامل مع الكائنات الغريبه ديه.

وفىطريقه الثواب و العقاب يعنى اللى يحترمك تحترمع و اللى يغلس يتعاقب.

مره من كام يوم كانت السكه واقفه من وادى القمر لحد الدخيله بيعملوا تصليحات و واحد بنوبيرا ورايا شغال نور و كلاكسات و الطريق فتح مره واحده و انا طلعت و المعلم ورايا و شغال نور و كلاكسات برضه انا قلت فى بالى لازم تتعاقب و المعلم لبس احلى مطب فى الطريق و بعدين سبته يعدى و اديته العالى يظبطه شويه لحد ما ركن على جنب و مشيت انا.

انا عارف انى شرانى شويه بس النوعيه ديه لازم تتأدب علشان تحرم تعمل اللى بتعمله فى الناس ده.