عايزين رخصة بسرعه

[نور القمر]

واحد مهندس قريبي عايز يقدم على وظيفة جديدة بالنسبة له هتكون فرصة كويسه ان شاء الله
مشكلته انه لسه مش معاه رخصة
طبعا نسبة كبيرة مننا طلعت الرخصة عن طريق معارف وواسطة
وانا واحدة منهم طلعتها من غير اختبارات ومن قبل ما اتعلم سواقة من الاساس بس الموضوع ده كان من زمان والرجل معرفلوش طريق ولا فاكراله اسم بصراحة
دلوقت ياريت اللي يعرف حد ممكن يساعدني في موضوع الرخصة لقريبي يقولي
ويعرفني الموضوع يكلف كام

[egyptianmafia]

You can go to the licence place and just pay the sayes or one of the ameens there and he will split the money with the bigger guys.

[نور القمر]

thx mafia boss

[نور القمر]

بس الافضل يروح لواحد شخصيا ويكون متفق معاه من الاول علشان ميحصلش او موقف ممكن يسبب له احراج

[verysad]

اولا خلى بالك من النصابين
ثانيا هوه هيمتحن فين و ايه ظروف المرور اللى هوه تبعه يعنى ممكن يعدوه و لا اللى ماسك اللجنه صعب التفاهم عن طريق الواسطة او معرفة

رايى انا
اولا (اختبار الكمبيوتر) موجود هتا بالمنتدى اختبارات الكمبيوتر مصورة لو عملتى عليها search هتلاقيها + كتاب المرور + كارت النت
التلاته دول ان شاء الله يضمنوا النجاح بالكمبيوتر
ثانيا (اختبار القيادة ) يروح يشوف الامتحان عامل ازاى و يروح يتدرب مع المدرب كذا مرة ب 10 جنيه او يحاكى الاختبار بعربية حد من زمايله

بما انه مهندس المشوار ده كله ماياخدش اسبوع و يطلع رخصة


و هوه ده اللى حصل معايا حيث ان رئيس وحدة المرور لا يعرف الواسطة لأنه من عيله كبيرة ومسنودة فمكنش بيعمل اى اعتبار لواسطة
على فكرة هوه ده اللى انا عملته و كان فى الأول واحد حاول ينصب عليا و مرجحنى أكثر من شهر و الحمد لله اعتمدت على نفسى وطلعتها ليا و للمدام بالطريقة السابقة

على فكرة انا مهندس و حمايا رئيس جهة قضائية عليا و خالى عقيد سابق و عمى رئيس محكمة !!!!

[نور القمر]

الف شكر ليك بشمهندس اكيد مفيش احسن من الواحد يمشي صح من البداية
لكن هو مستعجل على تقديم الاوراق للوظيفة الجديدة
هو مش عايزة واسطه علشان ميحملش نفسه جمايل
بالرغم ان ليا عمي رئيس محكمة وقرايب اخرين في مراكز يقدروا يساعدوا وبالفعل عمي ده مطلع رخص لناس كتير
لكن انا نفسي ملجأتش ليهم للواسطة لان صعب عليا اوي اطلب من حد خدمة وبصراحة دفعت فلوس والرخصة طلعت وانا واقفه كل الي عملته اتصورت بس
لكن مامرتش باي اختبارات ولا اعرف بيعملوها ازاي
ده غير اني طلعت الرخصة من مرور انا مش تبعه

[rockana9112007]

على فكرة انا طلعت الرخصة من غير واسطة او جنية رشوة
وطلعت رخصتين كمان واحدة خاصة وواحدة مهنية عشان ساعات بسوق عربية الشغل النقل
المهم امتحان الكمبيوتر دة من اتفهه مايمكن انا قبليها قريت كتاب المرور بتمعن وتركيز من الجلدة للجلدة وحليت كل الاسئلة
ثانياا الامتحان العملى احسن عربية لية الماروتى واللى فى حجمهااا عشان تقدرى تناورى بيها كويس بين الاقماع
دة ممكن تحطيهاااا بالعرض بين القمعين
وميزتها برضة انك فى الامتحان مطلوب تمشى نصف دايرة وترجعيها بضهرك تانى فمعظم العربيات العادية الكبوت بيخبط فى القمع وانتى بترجعى لورا عشان بوزها طويل لكن فى الماروتى مظنش
ومتسمعيش كلام اللى بيهولو ويقولو ان الموضوع مش هيمشى الا بواسطة بس فى رخامة من مرور للتانى
انا مرور اكتوبر
خالص تحياتى

[نور القمر]

بس انا معايا رخصة وبسوق من 5 سنين
الرخصة لقريبي

[rockana9112007]

ايوه ماأنا فاهم بس انا بكلمك مش بكلم قريبك
فحبيت اخاطبك انتى معلش صعيدى حبتين

[SaLM!Na]

موضوعالرخصة ده ممكن يخلص في يومين بالظبط ده عندنا هنا في اسكندرية
اليوم الاولاني يروح يعمل كشف طبي ده اذا ما طلعش في ساعتها
و اليوم التاني يروح بدري يقدم و يمتحن اشارات و سواقة و يتصور و شكرا على كده

بس المهم يكون عنده كتاب للاشارات و الاسئلة اللي بتيجي
يعني يكون عنده خلفية
ده غير انه برضه مايستغناش عن مساعدة الراجل او الست اللي قاعدين جنبه قدام الكمبيوتر
و مش هيدفع تعريفة زيادة غير بس ممكن للسواق اللي بيعقد جنبه و مش كتير اخره 30 جنيه
انا عملت كده و طلعت في يوميها
ربنا يسهلوا بس فكرينه انه يجيب الكتاب هوا عموما بيتباع في المرور