سؤال غريب وجديد فى المنتدى

[mohamed_berlitz]

معلش يا جماعة ان الموضوع دة غريب شوية بس كنت عايز استشارة فية

انا اشتريت عربية جديدة وعايز ادبح عليها اى حاجة فالسؤال هنا
لو دبحت مثلا ارنب هل الدم حيطلع ولا حيبوظ الدهان وبيطلع بي اية
وهل من المفضل انى اسيب الدم شوية امام الجيران يوم ولا اتنين ولا انضفها علطول علشان ما يبقعش
ارجو المشاركة بالحل ومعلش على الموضوع الغريب دة

وشكرا

[إسلام شاهين]

أولا :- ألف ألف ألف مبروك عليك وربنا يديلك خيرها ويكفيك شرها .

ثانيا :- هو إيه موضوع الدبح ده ؟؟؟؟ مين قال لحضرتك إن ده واجب ولا سنة ولا أي مسمى آخر ؟ ديه بدعه من البدع اللي إحنا اخترعناها معرفش ليه ؟؟؟ سيادتك ممكن تتطلع حاجة لله بقصد الصدقة مش حاجة تانية لكن تدبح على العربية ليه مش فاهم ؟؟؟ البدح ده لله وحده سبحانه وله مناسبات محدده ومعروفة ( كعيد الأضحى ، العقيقة ...... ) لكن تدبح علشان اشتريت عربية جديدة !!!!!!!!!!!!!!!!!!!!!

[أبو عبدالله]

هو مين قال لحضرتك انك تدبح عليها دي

الكلام ده ليس له صحيح

عاوز تدبح لله ادبح وملكشي دعوه بالعربيه

يعني هو لما انا ادبح لله في العقيقة علشان مولود بدبح فوق المولود ولا بجيبه ناحية الدم أصلا

[Nader]

حكاية الدبح والتخميس علي العربية علشان العين وكدة دة كلة بدع وعدات موروثة من التراث الشعبي. الحسد موجود ومذكور في القران وشئ مسلم بة ممكن تشغل قران على الكاست وتحط مصحف "وتقرة في من وقت للاخر لاتهجر كتاب الله مهواش زينة" اما لو مصر انك تدبح فادبح وخلي نيتك خالصة لوجه الله وفرق على الغلابة وبلاش حكاية التجميس بالدم على العربية علشان الحسد والله خير الحافظين.

[memo_hefnawy]

محمد باشا

موضوع الدبح ده إتكلمنا فيه قبل كده و عشان مش أطور عليك شوف:

الدبح ده هدفك منه إيه ؟ لو عشان الحسد وما إلى ذلك فده حرام شرعا

لو معمول من أجل الحمد والشكر ماشى بس مش أرنب هايبقى حاجة كبيره و مش على العربية ولا تعمل خمسات و الكلام البدع دى كلها من عادات الجاهلية

[أبو_حمزة]

أخى موضوع تلويث العربية بدم الذبيحة منهى عنه تماما
فيه من الاعتقادات البطالة ما نهى عنه بنص (للأسف لا اذكر الحديث)
و الاعتقاد بأن هذا الفعل (و هو من افعال الجاهلية) يدفع ضر أو يجلب نفعا هو مما ينتقص الايمان
و رسول الله نهى نهيا مشددا عن التمائم و هذا الفعل يعد منها

[وائل عطية]

طبعاً الأخوة الأفاضل وضحوا لحضرتك بما يكفي إن موضوع الدبح بغرض دفع الحسد دا بدعة ما أنزل الله بها من سلطان
عايز تدبح، ماشي ادبح وأخلص نيتك لله أنك تدبح شكراً له (وله فقط) على نعمته عليك، أما أنك تدبح عشان العربية ، وتخمس بالدم على العربية دي بدع غريبة، لازم نتخلص منها
لو راجعت تفكيرك بينك وبين نفسك وسألت نفسك أنا بدبح ليه دلوقتي، هاتلاقي الإجابة على طول هي علشان ربنا يحفظلي العربية، أي أنك تشترط على الله وكأنك تقول له "يارب هادبحلك بس خللي بالك لازم تحافظلي على عربيتي" وحاشا لله أن نعبده على "حرف".

[شريف]

طلع حاجة بنية خالصة لله مش اكتر

[ahmed1981]

إذبح لله بنية شكره على نعمه الكثيرة اللي منها العربية
ومفيش حاجة إسمها تدبح فوق العربية أو جواها
إدبح عند الجزار والنية تكون سليمة زي ما قلتلك