ايهما افضل قبل الزواج ام بعده

[ams]

انا شايف ان مفيش حاجه اسمها احسن قبل الجواز او بعده انما هى مراحل فى حياة الانسان مش حلوه او وحشه و دايما لازم يكون فى حد بيكملك و يدعمك ماديا ومعنويا سواء وانت طفل هتلاقى والديك كبرت شوية و عملت سبع رجاله هتلاقى اصحابك كبرت كمان شويه هتلاقى شغلك و زمايلك كبرت تانى و حبيت تنتحر قصدى تتجوز هتلاقى مراتك
و بعد شوية سنين هتلاقى عيال يملو عليك حياتك-قال يعنى كانت فاضية؟- وبعدين تربيهم و متنساش تتخانق مع حماتك شويه على سبيل التسليه و هكذا حتى يحين الاجل و مضى قطار العمر يا والدى

المهم تبقى عندنا القدرة على الرضا فى و جود الامل و الطموح

[ehabradwan]

حتى لو كان في رحرحة قبل الجواز و حرية و بتاع بس مالهاش طعم
وانت مبسوط مع مراتك هتبقى فعلا اسعد انسان في الدنيا ده مايمنعش انك وانت متخانق معاها بتبقى اتعس انسان في الدنيا بس بتبقى فترة
الجواز على اد ماهو التزامات و مسؤليات بس التزام طعمه لذيذ
صدقني يا باشا احلى حاجة الراجل بيحب يعملها انه يفرح مراته وولاده و احلى حاجة الست بتحب تعملها انها تربي ولادها و تسعد جوزها مهما قيل غير ذلك ، دي فطرة مجبولين عليها

[أشرف العدوي]

شايف ان مفيش حاجه اسمها احسن قبل الجواز او بعده انما هى مراحل فى حياة الانسان مش حلوه او وحشه و دايما لازم يكون فى حد بيكملك و يدعمك ماديا ومعنويا سواء وانت طفل هتلاقى والديك كبرت شوية و عملت سبع رجاله هتلاقى اصحابك كبرت كمان شويه هتلاقى شغلك و زمايلك كبرت تانى و حبيت تنتحر قصدى تتجوز هتلاقى مراتك
و بعد شوية سنين هتلاقى عيال يملو عليك حياتك-قال يعنى كانت فاضية؟- وبعدين تربيهم و متنساش تتخانق مع حماتك شويه على سبيل التسليه و هكذا حتى يحين الاجل و مضى قطار العمر يا والدى

المهم تبقى عندنا القدرة على الرضا فى و جود الامل و الطموح

هو ده الكلام الي كنت عايز اقوله بس ما بعرفش اعبر
بس لازم و لابد تحسن الاختيار

[human]

مش عارفة ليه الرجال مركزين أوي على موضوع الحرية ده و الدخول و الخروج براحتهم؟ لأ و بيسموا بيت الزوجية قفص الزوجية.. أمال الزوجة تقول ايه؟ ده بالنسبة لها قفص و مفتاحه في إيد الزوج.. على الأقل الزوجة مالهاش حكم على زوجها انه مايخرجش من البيت؟

جميل قوى

طيب هى مش عايزاه يخرج و هو خرج بقى

تخيلى ايه اللى بيحصل

بوووووز ملوى و عكننه و قرف و جو مكهرب

يا سيتى ده الستات ينكدوا بلد لو اى حاجه مش على مزاجهم

و بعدين احنا غلابه احنا فاكرين بالغلط ان احنا اللى بنعمل اللى عايزينه

[أشرف العدوي]

دا كان رد من احدى العضوات من منتدى اخر ولى اساسه كان الرد
طب ايه رأيك تجرب إنت تطبخ بدل منت قاعد تكتب شعر في الستات؟؟



جرب كده تكنس وتغسل وتمسح وتاخد بالك من البيت والعيال كل يوم، وشوفه هتقدر تستحمل ولا لا؟؟


بس إنت عاوزها تتعدل صح؟؟ سهل خالص .. هددها إنك هتتجوز عليها، تلاقيها بقت ست بيت خمس نجوم!



كمل يا أستاذ سامح عشان نشوف أخرتها مع الرجال





ودا كان رد فعل النصيحه


=================


مصدقت القول وجريت علطول





وعملت بنصيحة صاحبتنا



غسيل وغسلت طبيخ وطبخت



مافاضلش باقي غير غرفتنا



روقت البيت غدا واتغديت



أنا والأولاد واتمددنا



تانى يوم علطول من غير ماتقول



كان عندي غسيل بالليل بايت



خَتََّلى فُومَّين كدا ع الماشي



ودخلت المنشر أنشرهم



واتارى اخويا للبيت ماشى



له عندي حاجات جاى يطلبهم



وفتحت الباب وبقيت مكسوف



من شكلى ومن نظرته ليا



والبيت شكله يضرب يقلب



والحاجه مكركبه حوليا



المهم



خلصت اخويا بطلباته



وبقيت ف البيت كدا وحديا



وأنا واقف بنشر ف غسيلي



ولا كان لا بيَِّا ولا عليَّا



لقيت واحده بتكلمنى



اتاريها شيفانى م البلكونه



ودي جاره جميله مقدرش احكيلك



في شقه قصادى ومسكونه



وطال بينا كلام وشامم شياط



اتاريها طابخه مكرونه



سابت البلكونه طلعت تجرى



ع المطبخ زى ألمجنونه



ماهى دى الستات طبعها غلاب



والطبع عمره ما يتغير



وأنا قاعد كدا ولا على بالى



لقيت اللى بيخبط على بابى



اتاريها ألجاره اللى قصادى



جايه بتسالنى على مراتى



وفضلت قاعده وهاتك ياكلام



وبترغى كتير وأنا ف سكاتى



وف لحظه كان الجو سكون



وسمعت دبدبه ع السلم



وبسرعه كان جمبى ايد الهون



قلت يا تصيب يا إما تسلم



اتاريها كانت الست مراتى



واقفه ع الباب وبتتصنت



والطبع ده طبع الستات



على اى حاجه بتتصنت



من غير مطرود خرجت علطول



الست جارتنا وبتعيط



وسمعت كلام م الست مدام



وزعيق ونعيق وبتصوت



بتحكوا ف ايه وبتقولوا ايه



أنا سمعاكوا وبتصنت



روحي ياشيخه منك لله



سمعت نصيحتك روحت ف داهيا



ودي أخره المشي ورا الستات



يا ينتحر يا تجيله كافيا


منقــــــــــــــــــــــــــول

[sab3aawy]

مش عارفة ليه الرجال مركزين أوي على موضوع الحرية ده و الدخول و الخروج براحتهم؟ لأ و بيسموا بيت الزوجية قفص الزوجية.. أمال الزوجة تقول ايه؟ ده بالنسبة لها قفص و مفتاحه في إيد الزوج.. على الأقل الزوجة مالهاش حكم على زوجها انه مايخرجش من البيت، في حين ان الزوج ممكن يمنعها من زيارة أهلها لو حكمت معاه.

الزوج كمان عادي جدا انه يخرج مع أصحابه، اما بالنسبة للزوجة فمصطلح خروج مع أصحابها ده مقصور على قبل الزواج بس، انما بعد الزواج مافيش حاجة اسمها تخرج مع أصحابها.. فما بالك بأه لو الزوج قرر انه يسافر يومين مع أصحابه يريح أعصابه من البيت و الأسرة و دوشة العيال، هي بأه آخرها يوديها عند أهلها اليومين دول عشان ما تبقاش لوحدها.. انما هي فين؟ هي مع العيال.. و هو فين؟ هو بيريح أعصابه.

لو حصل بينهم شد على حاجة هو لما بيزهق بيقوم لابس و نازل و رازع الباب وراه و هي تقعد في البيت تهري و تنكت لحد ما ييجي.. امال تفتكروا الزوجة بتكمل الخناقة مع جوزها لما يرجع هو من برة ليه؟ ماهو عشان هو خرج يروق نفسه مع أصحابه أو يقعد ع القهوة يغير مناظر و هي بتقعد في البيت تعيد و تزيد في سيناريو الخناق مع نفسها عشان طبعا مش هاتخرج هي كمان تغير جو الشقة المنكد و ترجع تاني عشان هي ست.

و جايين تقولوا حرية قبل الزواج؟ امال الستات يقولوا ايه؟

اوافقك على كل كلمة قلتيها،
حينما يكف نصف الناس فى بلدنا عن اعتبار النصف الثانى جزءا من ممتلكاتهم فسنكون قد خطونا خطوة كبيرة فى طريق التحضر

[zeyad1810]

اكيد بعد الجواز افضل بكتيييييييييييييير
احساس ان يكون معاك حد بيحبك وخايف عليك ومهتم بيك بيكون احساس ممتع
كفاية انك لو اتعريت وانت نايم هتلاقى اللى بيغطيك ويخاف عليك من البرد
لو كنت عيان هتلاقى اللى يريحك ويعملك كل اللى انت عاوزة علشان بيحبك
كفاية انك تلاقى حد فاهمك يعرف اللى فيك من غير ماتتكلم ولو لاقك مخنوق مايسيبكش غير لما تخرج من خنقتك
كفاية انك تبقى قاعد فى بيتك بتعمل حاجة مهمة وتلاقى عيالك عمالة تتنطط حواليك:k38: وتبهدلك اللى بتعملة ومش سايباك فى حالك بس بيكونوا على قلبك زى العسل

رغم ان اى اتنين متجوزين لازم يكون فى بينهم مشادات ومشاكل بس دة الطبيعى لان الحياة مش ممكن تكون كلها نعيم بس اهم حاجة ازاى الراجل يعامل مراتة لان الست دى بصراحة اضعف مننا بكتيييييييير علشان كدة عايزة اللى يقدر يحتويها علشان تكون الحياة حلوة مش اللى يعمل عليها راجل وخلاص

[أبو إياد]

بعد الزواج افضل

[mohamed_kta]

السلام عليكم

و الله يا جماعة الأثنين حلوين لكن بعد الزواج فعلاً أحسن وكلامى للأخوة الخائفين من الزواج لو دعيت ربنا بصدق أنه يزوجك الزوجه اللى تصلحلك و الله هتكون أسعد و أنجح الرجال مع قدرتك على التحكم فى أنفعلاتك و قراراتك داخل البيت ، و تكون بتفهم معنى شريك الحياة مش "سى السيد" .

[MEMES]

بصراحه ولا قبل ولا بعد
الفتره اللى فى النص (الخطوبه وتجهيز عش الفراخ! قصدى الزوجيه والحياه لونها بمبى بمبى وخد عليهم هديه شهرين تلاته سته انت وشاطرتك فى العسل وبعدين............).
قدر الله وما شاء فعل.

[samirayad]

الموضوع لاهو قبل ولا بعد الزواج....انما الزواج فى حد ذاته قدر لابد منه.....وعلى حسب نيتك بتكافأ بالزوجه أو الزوج الصالح.......ولولا الزواج لما كان هذا التحاور

[kliken]

بعد الزواج احسن اكيد استقرار و حب و تعاون و اطفال بيحلوا الدنيا كلها ربنا يرزق الجميع الاطفال
بس المهم التفاهم بين الطرفين

[youssefmustang]

اعتقد بعد الزواج افضل حتي لو في شويه عكننه بس في حد بيحبك بيقلق عليك ويخاف عليك لما تتاخر حد يتخانق معاك وتطلع عينك عشان تصالحه وده ليه طعم حلو لانه بيحس انك خايف علي زعله وانت بتحس انك هتموت لو فضل زعلان
مش عارفه بقي المجوزين رايهم ايه فالموضوع ده

كلامك منطقى وجميل
وكمان بيشيل هم تقيل على حياة شاب او شابة من تسأولات وهم الصايعة وهم الضياع فى عالم المخدرات وهم الشقة والعفش والللللللخ
فهو نعمة من الله ومحدش بيحس بالكلام ده غير فى حالتين :
يا اما مراته تموت (لاقدر الله)
يا اما الطلاق
ومين اللى قال انه بيمنعك عن صحابك واحبابك والخروج اعمل اللى تعمله بالعقل بحيث لا تقصر فى حق مراتك وعيالك ولا حق نفسك
وربنا ما يجيبش حاجة وحشة

اخوكم يوسف