استفسارات عن مواتير المياه

[abo_hosni]

السلام عليكم

كانت الحياة جميلة من كام سنة قبل الكم الكبير من الأبراج اللي حول بيتنا ما تطلع. و كل واحد دلوقتي مركب موتور مياه و هاتك يا شفط. حتى اللي قاعد في الدور الأرضي. متهيألي لو استنيت شوية كمان و فتحت الحنفية هاتشفط و أطلع في أحد هذه العمارات
المهم يعني أن قوة المياه عندنا اتأثرت بشكل ملحوظ مما تطلب موتوراً :)

عايز أعرف من أصحاب الخبرة إيه المواصفات المناسبة و المواتير نشتريها منين و إيه أحسن الأنواع و صناعتها إيه و صيانتها إيه و كده
حالياً احنا ساكنين في الدور الأول (علوي) و بعد كام سنة هيكون لحد الدور الثالث اشتغل.
نفسي في موتور أغيظ بيه سكان الأبراج اللي جنبنا بقى

دلوقتي سألت واحد صاحبي قال لي كان عندهم في بيت قديم موتور 0.5 حصان ألماني و صغير مالوش صوت و كان كويس جداً. و بيقول في بيتهم الجديد ركبوا موتور كالبيدا 1.5 حصان أبو بالونة أو عوامة مش فاكر بس مش عاجبه زي الموتور القديم.

إيه رأيكم؟

[youssefmustang]

بقولك ايه لا المانى ولا اى حاجة من زمان ايطايا معروفة بمواتير المياه وانزل اسأل فى السوق (هتلاقى كل اللى بيكلمك يقول ده ايطالى يا باشا )
لو العمارة اكتر من اربع ادوار تجيب 1 حصان من غير كلام لان احنا كانت عندنا مشكلة بسبب الموضوع ده ولا اقل من اربع ادوار هات نص حصان بس خلى بالك ماتخليش حد يقنعك بغير الايطالى احنا معانا موتور ايطالى بقاله 13 سنة ولا اشتكى ولا قال يا بس وشغال زى الموس
اخوكم يوسف

[د./اليشع ثابت]

بقولك ايه لا المانى ولا اى حاجة من زمان ايطايا معروفة بمواتير المياه وانزل اسأل فى السوق (هتلاقى كل اللى بيكلمك يقول ده ايطالى يا باشا )
لو العمارة اكتر من اربع ادوار تجيب 1 حصان من غير كلام لان احنا كانت عندنا مشكلة بسبب الموضوع ده ولا اقل من اربع ادوار هات نص حصان بس خلى بالك ماتخليش حد يقنعك بغير الايطالى احنا معانا موتور ايطالى بقاله 13 سنة ولا اشتكى ولا قال يا بس وشغال زى الموس
اخوكم يوسف

كلام الاخ يوسف مظبوط
ممكن بقة تجيبة
اما من السبتية
او العتبة
و هتغيظ بتوع الابراج إن شاء الله
و نعيمأ مقدما

[ehabradwan]

طب ايه احن الانواع يا رجالة عشان انا كمان عايز واحد للوالدة

[د./اليشع ثابت]

طب ايه احن الانواع يا رجالة عشان انا كمان عايز واحد للوالدة

احن حاجة هو حنان الأمن طبعااااااااا
ربنا يخليهالك يا باشا
لكن قصدك أحسن موتور فأعتقد أنة الكالبيدا
على الاقل هو الاكثر شهرة فعلا

[A.Saad]

كالبيدا افضل لانه معمر
توكيله
شركة الشرق للهندسة والتوكيلات
شارع الجمهورية - وسط البلد
وبعدين
ممكن تروح شركة المياه
تعمل مقايسة تزود مقاس الوصلة اللى داخلة المنزل

الشركات التانية بتققل السعر عن التوكيل لانها بتدى اوتوماتيك او بالونة مش اصلية

ممكن تروح الشركة دى وهما عندهم جداول تحدد لك انت عايز قدرة اد ايه بناء على قطر مواسير الدخول والخروج والسعة المطلوبة

[أحمد سالم]

السلام عليكم
والله انا كمان محتاج اركب ماتور لان كل الناس حوالينا ركبو مواتير ولما بيشغلوها الميه بتبقى ضعيفه جدا عندنا انا فى الدور الثالث لاكن عايز اعرف ليه فيه ناس بتعمل خزان فوق السطح وناس بتركب الماتور من غير خزان ومادام اتكلمنا عن ماتور رفع المياه عايزين نصائح بافضل خزانات المياه وياريت اللى يعرف الصيانه الدوريه اللى بتتعمل للماتور والخزان للمحافظه على الصحه يقولنا
اشكركم جدا

[maka]

احن حاجة هو حنان الأمن طبعااااااااا
ربنا يخليهالك يا باشا

انت راجل زى العسل خالتنى ابتسم وان كنت هموت من الغيظ

[MEMES]

انا لسه جايب واحد كالبيدا ايطالى 0.5 حصان وشغال معاى الحمد لله وسعره 400 وأوعى تجيبه ببلونه واوتوماتك سعرهم فى حدود 200 وملهومش لزمه(المفروض ان وظيفتهم انهم يخلوا الماتور يشتغل اول ما تفتح الحنفيه) بس بيعطلوا على طول.
كمان اتفق مع السباك قبل التركيب لان متفقتش معاه ونصب على.
وبالنسبه للكهرباء هاتلوه مفتاح بتشينو ايطالى او مصرى.

[A.Saad]

انا لسه جايب واحد كالبيدا ايطالى 0.5 حصان وشغال معاى الحمد لله وسعره 400 وأوعى تجيبه ببلونه واوتوماتك سعرهم فى حدود 200 وملهومش لزمه(المفروض ان وظيفتهم انهم يخلوا الماتور يشتغل اول ما تفتح الحنفيه) بس بيعطلوا على طول.
كمان اتفق مع السباك قبل التركيب لان متفقتش معاه ونصب على.
وبالنسبه للكهرباء هاتلوه مفتاح بتشينو ايطالى او مصرى.

البالونة والاوتوماتيك اكيد عندك اتعملوا غلط
البالونة بتتنفخ على ضغط هوا معين
الاوتوماتيك فيه كهرباء 380 فولت ،

[ahmed_su]

افضل نوع هو الكالبيدا ويليه نوع أخر اسمه ساير وهو ايطالى ايضا ولايقل كفأة عن الكالبيدا وان كان أقل فى السعر

الاتوماتيك والبالونة بالعكس معمرين وأفضل للموتور لانه يعمل مع استخدامك للمياه المهم التركيب السليم

وقدرة الموتور حسب احتيجاتك المستقبلية بمعنى لو فيه ادوار هتذيد فى المستقبل يفضل تعمل حسابك علشان متغيرش الموتور كل شوية

[د.أبونضال]

فعلا أفضل نوع هو الكالبيدا وهو الوحيد على حد علمي اللي لسة ما اتقلدش . النص حصان الحقيقة مش نص هو 0.45 حصان وفيه قديم ب 440 وفيه معدل ب 400 . التاجر بيقول إن القديم ممكن يتصلح لكن المعدل الجديد ده ما بيتفتحش. القديم كرتونته لون الكرتون بيج غامق يعني أما المعدل فأزرق في أبيض. فيه بقة 0.75 حصان وده ب 1100 جنيه وفيه طلمبة تحضير . وفيه كمان 1 حصان بألف ومتين وبرده فيه طلمبة تحضير.
ويلي الكالبيدا في الجوده على طول نوع اسمه لورا لكن سعر النصف حصان 0.5 390 جنيه وفيه منه صيني زي الإيطالي بالظبط ما تفرقهومش عن بعض ب 200 جنيه وده له أسماء مختلفة يعني أنا اللي أنا جايبه مكتوب عليه Saho تقريبا وشغال زي الفل بخاف على المواسير منه وأنا شقتي في الدور الثالث. وشفت منه بنفس الكرتونه لكن بأسماء مختلفة.وفيه منه بسلك نحاس وبسلك ألمونيوم وطبعا النحاس أغلى

[abo_hosni]

أشكركم جداً على التفاصيل دي كلها و إن شاء الله لما أجيبه و أركبه هاكتب لكم التجربة

[sab3aawy]

من واقع خبرتى مع مواتير المياه فان كل شقة يلزم لها نصف حصان من قدرة موتور المياه مع مراعاه عامل التشتت، يعنى لو شقة واحدة هات موتور نص حصان، لو شقتين هات موتور حصان، لو تلات شقق هات 1.5 حصان، لكن لو اربع او خمس شقق ممكن برضه تجيب 1.5 حصان لان مش كل الشقق هتفتح المية فى وقت واحد، الحسبة تكون فى حدود عدد الشقق مضروبا فى 60% عامل تشتت مضوربا فى نصف حصان،
الحاجة التانية اوعى اوعى اوعى تركب موتور من غير اوتوماتيك وبالونة، يبقى كدة انت مستغنى عنه لأن عاجلا او آجلا ستأتى تلك اللحظة التى يشغله فيها احدهم وينساه شغال وهى ديتها ساعتين تلاتة وتلاقى الحاكم الميكانيكى بتاعه mechanical seal باظ والمتور جاب مية ، ما نسميه شعبيا باسم اوتوماتيك هو ببساطة وحدة بسيطة اسمها (pressure switch) او مفتاح ضغط، يشبه فى وظيفته حساس الزيت اللى فى موتور اى عربية اللى بيخلى لمبة الزيت تطفى لما ضغط الزيت يوصل للقدر المناسب، وظيفة مفتاح الضغط ده ان الموتور يشتغل لوحده لما الضغط فى الخط ينزل الى حد معين ويفصل لوحده لما الضغط يعلا الى حد معين ، وفيه جواه صامولتين واحدة بيتظبط منها ضغط الفصل والتانية بيتظبط منها ضغط التشغيل، اما البالونة فوظيفتها انها تحافظ على الضغط المرتفع لفترة علشان الموتور لما يفصل ما يشتغلش تانى غير بعد فترة زمنية كافية لانه يبرد ويريح، وكذلك لما يقوم ميفصلش بسرعة، يعنى اللى بيحصل لو البالونة اتخرمت والمتور شغال على الاتوماتيك انك بتلاقىالمتور بيشتغل ويفصل بمعدل 100 مرة فى الدقيقة الواحدة(الرقم واقعى وليس فيه اى مبالغة) لحد ما الموتور يتحرق ،والبالونة مكونة من وعاء معدنى بداخله بالونة مطاط، البالونة المطاط هى اللى بتتملى مية من الموتور، اما المسافة الفاصلة بينها وبنين الوعاءس المعدنى فيتم نفخها بالهواء على ضغط 2 بار(28 رطل على البوصة المربعة-مثل كاتش السيارات تماما) وذلك من خلال بلف نفخ موجود فى اعلى الوعاء المعدنى يشبه تماما بلف نفخ كاوتش السيارات ويتم نفخها اما عند بتاع الكاوتش او بمنفاخ يدوى او كهربى،وطبعا لتركيب اوتوماتيك وبالونة على الموتور لازم يركب معاهم عداد ضغط pressure gauge علشان تضبط عليه الأوتوماتيك، والبالونة والعداد والأتوماتيك جميعهم بيركبوا على وصلة واحدة تباع خصيصا لهذا الغرض، من المعلومات الخاطئة الشائعة ان البالونة والعداد والأوتوماتيك لابد من تركيبهم على الموتور مباشرة، هذة معلومة غير حقيقية لان البالونة والأوتوماتيك والعداد يمكن تركيبهم على اى مكان فى الخط بعد مخرج الموتور، انا شخصيا مركب الموتور فى الدور الأرضى فى منور العمارة ولكن مجموعة الأتوماتيك والبالونة والعداد مركبها عندى فى مدخل المياه فى حمام البيت فى الدور الخامس، وذلك لسهولة الصيانة ولسهولة تعديل وضع الأوتوماتيك ليناسب سحب المياه فى الأيام المختلفة(يعنى مثلا ظبطة طول الأسبوع ممكن تخلى الموتور يفضل ينحر ومايفصلش يوم الجمعة قبل الصلاه لأن كل شعب مصر بيكون فاتح الحنفيات فى تلك اللحظة وبالتالى سحب المياه ضعيف جدا ولذلك ممكن اقلل ضغط الفصل شوية يوم الجمعة وارجع اعدله بعد كدة فى دقيقة واحدة لأن الاوتوماتيك امام عينى) كما ان وجود الأتوماتيك فى البيت بيتيح ليا تشغيل الموتور مانيوال او اوتوماتيك(يعنى بشكل متصل او مع تغير ضغط المياه)، كل الفكرة انك لما تظبط ضغط الفصل والتشغيل فى الأوتوماتيك لازم تقللهم بمقدار 1 بار لكل ثلاثة ادوار ارتفاع بين النقطة اللى فيها الموتور والنقطة اللى فيها الأوتوماتيك، يعنى مثلا انا ظابط ضغط التشغيل عندى على 1 بار وضغط الفصل على 2.5 بار فى النقطة اللى الأوتوماتيك راكب فيها فى الدور الخامس، ده معناه ان الموتور بيشتغل فعليا عند 2.5 بار و يفصل عند 4 بار فى نقطة تركيبه فى الدور الأرضى لأن المية بيقل ضغطها 1 بار كل ما تطلع 10 أمتار ارتفاع (البار هو وحدة قياس الضغط وتساوى واحد ضغط جوى او وزن عمود من الزئبق ارتفاعه 76 سم او وزن عمود من الماء ارتفاعه 10متر و 30 سم)

لتركيب موتور لازم تركب صمام عدم رجوع قبل مدخل المتور وصمام عدم رجوع بعد مخرج المتور (اللى بيسموه شكبلف او سكس بلف) علشان يفضل الضغط بعد المتور ثابت لضبط تشغيل الأوتوماتيك ومحبس بلية قبل الموتور وآخر بعد المتور ، وكذلك خط بديل by passيتيح فك الموتور للصيانة فى اى وقت دون الحاجة لقطع المياه عن المكان ويكون الخط البديل به محبس عدم رجوع ومحبس بلية، يبقى لنا انه فى حالة شرائك لموتور غالى فلابد من شراء وحدة حماية ضد انقطاع المياه تمنع تشغيل الموتور بدون ماء حيث ان تشغيل الموتور والمياه مقطوعة كفيل بتدمير الحاكم الميكانيكى فى دقائق

جميع هذة المكونات وقطع غيارها موجودة فى شارع نجيب الريحانى المتفرع من شارع الجمهورية بجوار محطة مترو العتبة واسعارها بسيطة جدا، يعنى مثلا البالونة تمنها فى حدود 60 جنيه، غيار بالونة مطاطى 15 جنيه، اوتوماتيك متور ايطالى 25 جنيه، عداد ضغط 15 جنيه، وصلة اوتوماتيك موتور ايطالى 20 جنيه، بلف عدم رجوع 20 جنيه، محبس بلية 10 جنيه، حاكم ميكانيكى(ميكانيكال سيل) لموتور 1 حصان 15 جنيه ، موتور 1/2 حصان صينى 90 جنيه، موتور 1/2 حصان ايطالى 400 جنيه، موتور 1 حصان صينى من أول 180 جنيه ، موتور 1 حصان اتحاد اوروبى 300 جنيه، موتور 1 حصان ايطالى من أول 800 جنيه، وهكذا

[Samir Elshahawy]

الحاجة التانية اوعى اوعى اوعى تركب موتور من غير اوتوماتيك وبالونة، يبقى كدة انت مستغنى عنه لأن عاجلا او آجلا ستأتى تلك اللحظة التى يشغله فيها احدهم وينساه شغال وهى ديتها ساعتين تلاتة وتلاقى الحاكم الميكانيكى بتاعه mechanical seal باظ والمتور جاب مية ، ما نسميه شعبيا باسم اوتوماتيك هو ببساطة وحدة بسيطة اسمها (pressure switch)

أنا كنت مستني ردك بفارغ الصبر علشان أستمتع بالبربوزال الجميل ده و كأني بأتعلمه من أول و جديد في الكلية

بجد شرح تفصيلي رائع ماحدش يقدر عليه ألا سبعاوي