استفسارات عن مواتير المياه

[ameen_ra]

السلام عليكم
موتور المياه لازم يركب معاه خزان للمياه اعلي السطح حفاظا علي الموتور وبذلك سوف يعمل الموتور مرتين او ثلاثة طوال اليوم مع تركيب عوامه كهربائيه داخل الخزان تعمل تلقائيا بمجرد نقص المياه عن المنسوب المظبوطة عليه اما في حالة عدم تركيب الخزان سوف يظل الحمل كله علي الموتور نتيجة كثرة تشغيله عند
الحاجة
ولكن سيادتك بتقول انك تسكن في الدور الاول وان البيت حاليا دور واحد فقط وبعد فترة سوف يتم البناء اعلاه وبالتالي
ممكن سيادتك تركب خزان فقط اعلي السطح وتركب له عوامة عادية زي بتاعة السيفون لما المياه تكون في المواسير في اوقات الليل واوقات الهدوء يعبي الخزان لوحده حتي يمتليء ثم تقوم العوامة باغلاق المياه تلقائيا وكده راح تكون المياه متوفرة طوال اليوم وبدون موتور

[MEMES]

عموما انا قلت اللى حصل معى والماتور شغال بدون بالونه واوتوماتك والحمد لله زى الفل.
ووفرت تمنهم وهجيبب مفتاح تانى للحمام يعنى يشتغل من المطبخ والحمام
و الرأى الصح دايما بيكون للصنايعيه اللى شغالين فى المجال
واسف لجهلى

[sab3aawy]

عموما انا قلت اللى حصل معى والماتور شغال بدون بالونه واوتوماتك والحمد لله زى الفل.
ووفرت تمنهم وهجيبب مفتاح تانى للحمام يعنى يشتغل من المطبخ والحمام
و الرأى الصح دايما بيكون للصنايعيه اللى شغالين فى المجال
واسف لجهلى

محدش اتهمك بالجهل لا سمح الله، كل ما قلناه ان الاتوماتيك يحمى الموتور من حادث محتمل لو حد نسيه شغال، قد تمر عشرة سنوات ومحدش ينسى الموتور شغال وبالتالى هيكون الانطباع هو ان(الموتور شغال زى الفل بدون الأوتوماتيك والبالونة) ، وقد يُنسى الموتور فى اول اسبوع من تركيبه ويحترق او يضرب مية بسبب عدم وجود الاوتوماتيك والبالونة

اما بخصوص اعتقادك انك وفرت تمن الاوتوماتيك والبالونة فانت فيه عامل مهم جدا مش واخده فى اعتبارك هو استهلاك الكهرباء، الموتور لما يفضل شغال نصف ساعة كاملة تمثل الفترة اللى بتاخد فيها دش، بالتأكيد هيستهلك كهرباء اكتر بكتير من انه يشتغل ما مجموعه 10 دقائق فقط من النص ساعة لو الاوتوماتيك والبالونة راكبين، الى جانب طبعا ان الموتور عمره الافتراضى ليس مالانهاية وانما محدد بعدد ساعات تشغيل انت بتستهلكها بشكل اسرع لما تشغل الموتور طوال فترة استخدامك للمياه ،وفيه تجربة واحدة لو كنت بتمر بيها يبقى حرام انك تتكلم فى توفير تمن الاوتوماتيك اساسا، هى انك تكون مشغل الغسالة الأوتوماتيك وتفضل قاعد جنبيها علشان خاطر كل ما هى تعبى مية تروح مشغل لها الموتور المذلة دى ميساويهاش تمن مليون بالونة ومليون اوتوماتيك، على فكرة انا عملت كل اللى انت عملته، ركبت الموتور الأول من غير اوتوماتيك، وبعدين ركبت مفتاح فى الحمام ومفتاح فى المطبخ(خد بالك ان ده ممكن يلخبط لك كهرباء البيت تماما لو مصدر الكهرباء فى الحمام على مفتاح عمومى غير مصدر الكهرباء فى المطبخ) وجربت حكاية انى اشغله من هنا واجى اطفيه من هناك ميطفيش، وبعدين لجأت لقصة المفتاح الديفيتيرى اللى ممكن تشغله من نقطة وتفصله من التانية، وبعيد لقيت ان كل ده وجع قلب ممنوش فايدة و100 جنيه بالونة وعداد والوصلة بتاعتهم ارحم من الهيصة دى كلها

اما باه النقطة اللى انا مختلف معاك فيها تماما هى حكاية ان اكتر واحد بيفهم فى مجال هو الصنايعى اللى شغال فيه، للأسف الشديد ان 80% من الصنايعية فى بلدنا حافظين مش فاهمين، هو حفظ حاجة معينة من الاسطى بتاعه من 115 سنة فاتوا ، والحاجة دى اتغيرت وظهر مكانها 100 حاجة جديدة وهو على قديمه مالوش دعوه وعايش فى مية البطيخ وعامل فيها طبيب جراح، انا بتكلم عن ثقة لأن تقريبا مافيش حاجة انا مبعملهاش بايدى، وشفت الفرق الشاسع بين شغلى لنفسى بإيدى وشغل الصنايعى، بالأضافة طبعا لان طبيعة دراستى وعملى تخلينى لا يمكن اسلم دماغى لصنايعى فى مجال الكهرباء او الميكانيكا، انا ممكن اسلم دماغى لفنى اشعة طبية او فنى علاج طبيعى لأن دى حاجات انا مدرستهاش، لكن فيما يتعلق بالكهرباء والميكانيكا ومن خلال تعاملى مع مئات الصنايعية فى مجال عملى وفى الحياه العادية وقدرتى على تقييم شغلهم اقدر اقول لك ان 80% منهم متأخرين ب 30 سنة عن واقع الحياه المعاصرة

[A.Saad]

سبعاوى
انا اتاكدت انك عارف حاجات كتيييير غير العربيات
ممكن شرح عن مكوك الفضاء طيب ( بهزر )

[Samir Elshahawy]

سبعاوى
انا اتاكدت انك عارف حاجات كتيييير غير العربيات
ممكن شرح عن مكوك الفضاء طيب ( بهزر )

ممكن مايكونش هزار و تلاقي عنده رد

لأن في أعتقادي أن الباشمهندس/ خالد من الممكن أنه يقرأ في موضوع ما حتي لو في الادب و الشعر علشان يفيد الاخرين بما قرأه و فهمه

بصراحة أنا نفسي أعمل زيه بس مش لاقي وقت , بس [ ربنا يكرمه و يجازيه عنا كل خير

[abo_hosni]

يا سلام أنا متكيف قوي من كم المعلومات ده. و عجبتني وصلة ال by-pass دي ما كانتش على بالي خالص. فكرة الخزان دي مش هتنفع دلوقتي
أنا معاك يا أستاذ سبعاوي في عدم استشارة الصنايعية و الاعتماد على آرائهم بشكل أساسي. كان سهل قوي أتصل بالسباك و هتلاقيه جايب كل حاجة و يركبه و يمشي. أنا غاوي أعمل حاجتي بنفسي طالما أعرف عنها و معايا الأدوات يعني لو عليا كنت أركب الموتور كمان بس مش هاعرف أقلوظ المواسير :(

يوم السبت أنزل أشتري إن شاء الله

[sab3aawy]

. أنا غاوي أعمل حاجتي بنفسي طالما أعرف عنها و معايا الأدوات يعني لو عليا كنت أركب الموتور كمان بس مش هاعرف أقلوظ المواسير :(

يوم السبت أنزل أشتري إن شاء الله

المواسير انت بتحسب الأطوال اللى انت عايزها وتروح تشتريها من عند بتاع اللوازم الصحية وتخليه يقطعهالك ويقلوظهالك وانت واقف، انا عملت كدة لما ركبت سخان الغاز بتاعى وعملت له خط بارد وساخن جديد علشان مالغيش السخان الكهربائى ، رفعت المقاسات كلها ورحت قطعتها وقلوظتها فى محل الأدوات الصحية، لما تيجى ترفع المقاسات زود على كل مقاس حوالى 40 مللى متر قيمة القلاووظات، بس طبعا متنساش تخصم من مقاساتك قيمة الجلب والانبال والأكواع، الجلبة فى حدود 50 مللى ، النبل فى حدود 25 مللى،الكوع 40 مللى، التى 50 مللى، المحبس البلية 60 مللى، محبس عدم الرجوع 50 مللى، لاكور التجميع 25 مللى، البوش 25 مللى(القيم الموضوعة ليست الطول الكامل للقطعة ولكن مساحة عدم التداخل مع القطع الاخرى) ولو عايز تركب بيدك ممكن احسب لك كل القطع والادوات اللى انت محتاجها

[أحمد سالم]

السلام عليكم
والله يااستاذ سبعاوى حضرتك فعلا ماشاء الله عليك فعلا استاذ
انا فكرت لما اركب السخان الغاز انى ماالغيش السخان الكهربائى لاكنى حسيت ان محدش عملها قبل كده لاكن مادام حضرتك جربت قبل كده يبقى ان شاء الله انا هحاول ويارت لو فى عند حضرتك توضيح اكثر بالنسبه للموضوع ده انى يبقى عندى 2 سخان واحد غاز وواحد كهرباء
وانا ان شاء الله هحاول اصممها بنفسى
على فكره انا كنت سئلت سباك وسئلت شركة الغاز قالولى ماينفعش انك تركب الاثنين فى نفس الوقت

[maka]

السلام عليكم
والله يااستاذ سبعاوى حضرتك فعلا ماشاء الله عليك فعلا استاذ
انا فكرت لما اركب السخان الغاز انى ماالغيش السخان الكهربائى لاكنى حسيت ان محدش عملها قبل كده لاكن مادام حضرتك جربت قبل كده يبقى ان شاء الله انا هحاول ويارت لو فى عند حضرتك توضيح اكثر بالنسبه للموضوع ده انى يبقى عندى 2 سخان واحد غاز وواحد كهرباء
وانا ان شاء الله هحاول اصممها بنفسى
على فكره انا كنت سئلت سباك وسئلت شركة الغاز قالولى ماينفعش انك تركب الاثنين فى نفس الوقت

ينفع الاتنين عادى هتحطهم على الخط السخن ومع كل سخان

هتعمل ماسورة بمحبسين علشان تقدر تشيله او تخرجه من الخط

[أحمد سالم]

يعنى لازم اللى يبقى شغال سخان واحد ويبقى الثانى المحبس بتاعه مقفول ؟.

[sab3aawy]

ودى هدية منى ليك، عن طريقة ولوازم تركيب الموتور الكهربائى بالبالونة والأوتوماتيك

[sab3aawy]

يعنى لازم اللى يبقى شغال سخان واحد ويبقى الثانى المحبس بتاعه مقفول ؟.

لأ مش لازم، السخان الكهرباءى بكل الاحوال بييجى معاه بلف عدم رجوع بيكون راكب فى مدخله، لو انت ركبت بلف عدم رجوع آخر فى مدخل سخان الغاز يبقى استعمل الاتنين براحتك

[أحمد سالم]

اشكرك يااستاذنا وجزاك الله خيرا

[abo_hosni]

مش عارف أقول لك إيه يا سبعاوي و يا كل من شارك في الموضوع. أشكركم على اهتمامكم جداً و ريحتونا من فتي الصنايعية. لنا لقاء لما أركب الموتور يا مسهل.

[أحمد سالم]

حد عنده اى معلومات عن طريقة تركيب كوندينسر المواتير
هو بيبقى قطعه بيضا مرفقه مع مواتير المراوح ومواتير المياه
وده شكله

هو دايما بيبقى داخل الصندوق الاسود اللى فوق الموتور

وده شكل كوندينسر المروحه

ارجو من اللى عنده اى معلومه عن طريقة التركيب يفضل ارفاق صوره لو أمكن
وجزاكم الله خيرا