رسالة لكل حالة داخلة على ؟؟؟؟؟؟؟؟؟ للأسف

[نور العمر]

وبعدين يا جماعة ......... ده شيء يحزن القلب ..... فيه إيه .... ليه كدة ...... ليه القسوة والجبروت والعناد والأنانية إللي بتنزل على قلوب الأزواج وقت شدة الخلاف وذروته..... إزاي بيجلكوا قلب تنفصلوا ... إزاي بيجلكو قلب ... تبهدلوا بعض في المحاكم ... وندخل في حرب بين ... كيد النساء وقهر الرجال ..... ليه كدة ..... لكم مطلق الحرية لو وحدكم دون شريك .... لابد وأن تعلموا ان لأبنائكم عليكم كل الحق .... وحقوقهم في المرتبة الأولى قبل أي شيء تاني .... هدووووووووووووووء .... سلااااااااااااااام ... رحمــــــــــــــــــة ..... زوجتك قطعة من نفسك ( وخلقنا لكم من انفسكم أزواجاً ) خلقت لك وحدك .... سبحان الله .. ( وجعلنا بينكم مودة ورحمة ) ستقابلوا الله باي وجه .... عندما يسألكم عن المودة والرحمة والسكن ( أين هي وماذا فعلتوا بها ) والذرية التي تمنيتموها ( ماذا فعلتوا لها ) ... فتحنا الباب على مصراعيه للشياطين .... تفضلوا اهلا وسهلاً ومرحباً خدوا حياتنا وافسدوها ... بس يا ريت تتوصوا وتخالو النهاية ( جهنم ) عشان بس الواحد يسخن ناره ........ ألم نتعلم من حديث الرسول (ص) أمك ثم أمك ثم أمك... وحديث ( رفقاً بالقوارير ) وحديث ( لأمرت الزوجة تسجد لزوجها لو كان جائز السجود لغير الله )لم يقول الرسول (ص) هذا من فراغ وإنما .... لاعتبار الزوج هو النفس التي خلقت منها ومثلما تهتم المرأة بذاتها فنفسها التي خلقت منها أولى ... وهذا من عطاء الزوج لها واعتباره أحن مخلوق عليها في الكون .... أرى في حديث الأم المذكور لفظها 3 مرات من عدة جهات ( الأم التي تحمل - الأم التي تلد - الأم التي ترضع وتربي وتنشئ ) ( الذي حملتك في رحمها امك ... والذي حملت لك طفلك زوجتك - وحبك الغالي عليك وإللي تتمنى له كل حاجة حلوة بنتك ) طيب امك غالية وبنتك أغلى .... طب زوجتك ( محور حياتك ) في غلاوتها فين تقديرك ليها .... عصبية شوية ........ مين هادي دلوقتي ...... مهملة شوية ....... مين A1 .... أهلها حاجة صعبة ..... كلنا فينا العبر كبير وصغير .... ( خاليك صريح مع نفسك وشوف عيوبك وعيوب أهلك ) حتلاقينا كلنا في حلقة واحدة ..... عندية ..... شديدة .... أي حاجة في الدنيا ممكن تتعالج ... عشان أطفالنا الصغار ... يعيشوا زي كل الأطفال الطبيعيين في جو هادي وجميل وصحي ( اعينوا أبنائكم على بركم ).... نظلم ونقهر ونفتري ... وفي كبرنا وعجزنا ... نستنى من ولادنا كل البر لأن ده امر من الله ومفروض ... صعب ... صعب ... صعب .... صعب تجد براً من مَن جحدت بهم وظلمتهم وجرحتهم منذ الصغر ... والحب والاحترام سيكون قناع تفرضه العادات والقيم الأخلاقية .... لكن الأفظع إنهم لن يكون لهم وجود ...
بامانة ...... كفاية على مجتمعنا لحد كدة .... كفاية تفكك وانفصال وعدم الاحساس بالمسئولية ... كفاية تجريح ... وتشويه ... وتأهيل جيل فاسد غاضب ... المعروف هو المطلوب اولاً وأخيراً .... المعروف مطلوب في الرباط ... أو بعد فك الرباط .... من أجل تربية أبناء في جو هادئ خالي من المنازعات ... لك الحق ( في مثنى وثلاث ورباع ) وساعات كتير التعدد بيكون سبب لاستقرار البيوت يا جماعة ده حقيقي ... بس اعدل في كل شيء .... في كل شيء .... ( وإن خفتم ألا تعدلوا فواحدة ) ( ولن تعدلوا لأن العدل لله وحده ) أما رسول الله (ص) فهو حالة خاصة لها رسالة وهدف من الله سبحانه وتعالى .. وإن بحثنا فحبه الحقيقي كان ( زوجته الأولى خديجة - وزوجته عائشة ) رضي الله عنهن وأرضاهم ( امهات المؤمنين ) وحب عائشة كان بعد موت خديجة ... واخلاصه لخديجة أم بناته كان لا يوصف حتى بعد وفاتها وهو يسترجع ذكراها ......... هيهات ......... هيهات يا جماعة .... عزيزي الزوج أنت صاحب الأمر في الزواج فكن على قدر المسئولية أمام الله .... عزيزتي الزوجة .... راعي الله في زوجك ....حب ابنائك أكتر من حبك لنفسك ولرغباتك وأمنياتك .... اتنازلي عشان أسرة ناجحة ... تعيش وتنجح وتعدي لبر الأمان
ويا ستي ( الحياة بتبدأ تاني وعلى أحلى بعد الـ 60 أوعدك بذلك ) ( كلام في سركوا أنا مستنية الـــ 60 بفارغ الصبر )
أرجوكوا .... من أول قواعد الاحترام والخصوصية ... مدخلوش مخلوق بينكوا ( وخصوصا الأهل بيشعللوها ) ولو حتنسوا وتسامحوا هما بيسمحوش عشان انتو حتة منهم وده طبيعي والمودة والرحمة ( بين الزوجين أكتر) من الأهل ... بلاش الحسابات المادية المفسدة ( قايمة - وشقة - وحاضنة - ونفقة - ومحامي - وقضية - وخلع - لا طلاق - لا طاعة - لا سب وقذف -لا بلاغ كاذب - طب خد دي بقا ... تبديد منقولات زوجية - لا ده يالدفع يالحبس - لا إنسي ده لو طلتي من حاجة - طب روحي وانت مش طالق وخاليكي زي البيت الوقف - ورؤيا - وبهدلة - ونفقة صغار - ومسكن زوجية - لا أجرة مسكن - لأ مسكن حضانة - لأ ده إيجار - لا ده تمليك - لالالالا انت تقفل على الشقة ومتديهاش الشبكة - لا انتي تعمليلوا محضر ضرب وتعدي - لا ده تمكين - لا ده انا حقطع عليها نور وتليفون وخاليها تتهنى بقا - مش حدفع ولا شلن وخاليلها العيال مش عايزهم كرهتهم من وشها - لا ده انت تخطف الأطفال عشان نثبت الاهمال وتحرق قلبها - وأيااااااااااااااااااااااااااااااااااااااام سودة ملهاش نهاية - وإديلواااااااااااا) سامحوني أصلي كنت محامية والحمد لله اعتزلت المحاماه من بدري
وبعدين حرام - حرام - حرام - حرام نسبة الطلاق وصلت ل 40% ونسبة الانفصال إللي معلق على المحاكم 35% يعني نسبة الاستمرار وأحيانا بتكون بالعافية 25% دي مصيبة والله العظيم .... لا إله إلا انت سبحانك إنا كنا من الظالمين .... إهدوا يا بشر ده احنا بني آدم ... مش بني الشيطان ... لا حول ولا قوة إلا بالله العلي العظيم .. لطفك ورحماك يا الله
تعبت مش قادرة أكمل ... بس لازم كل واحد حواليه حالة من النوع ده .... يساهم في حلها لوجه الله تعالى

[Casio2000]

ربنا يهدي - الواحد بيدعي يتوفق في الجواز احسن الواحد شايف حواليه مصايب من اللي "يشيب لها الولدان"

ملحوظة بس صغيرة عشان انا تعبت قوي في القراءة

دايما يا جماعة سيبوا فواصل بين كل فقرة و فقرة

و شكرا

[SHNORY]

موضوع كبير وبقي جزء من حياتنا اليوميه ومش عارف ارد علي ايه ولا ايه فيه
ولقيت ان انسب رد هو ايميل جالي النهارده بيتهيالي ان ده الرد النهائي للموضوع
تعلموا شوية كيف تعاملوا زوجاتكم فالحين بس تتامروا
قام في احدى مساجد السعودية في جدة في خطبة الجمعة الفائتة حدث غير طبيعي حيث شكى احد الرجال زوجته للخطيب امام الملأ فرد عليه الشيخ بأن المراة تتحمل وتصبر اكثر من الرجل مئات المرات فحتى وان كان للرجل الكثير من المصائب فأن صبر الزوجة اعظم واكبروقد ارتفعت نبرة صوته على زوجته عندما قال له :تحملتك واطفالك تغسل لك وتقف على رجليها كي تصنع لك قوت يومك وتغسل لك وتعتني بكو قد اوصى الرسول عليه الصلاة والسلام على بن ابي طالب اوليس من حقها ان تحترمها ؟تقدرها ؟ولا تنقص عليها قوتا او حاجة؟ فوالله لو اغضب زوجا زوجتة وقفى عنها راحلا تاركا اياها حزينة فان الله يكتب له في كل خطوة لعنة ويبعد عنه رزقه ويقلل من عافيته ويكتب له من كل دمعة من عينيها الف جمرة في كل ليلة نصفها في الدنيا والنصف الاخر في الاخرةقائلا اعمل بلآتي ولا تستخف به ولا تقل بأني فعلت هذا سابقا لأنك لو فعلت ما سأقول فأنك لن تشتكي من زوجتك : فصمت الرجل في المسجد فهب فيه الشيخانتبهوا لما سأقول لأن هذا ما تعلمته من زوجتي ولم يكلفني الكثيرهذه طرق الرجل التي يجب ان يعامل بها المرأةكي يبقى الحب موجود لاخر العمر

(

عندما تمشى مبتعدة عنك (إلحق بهاعندما تدفعك أو تضربك ( امسك بها ولا تتركها )

عندما تطيل لسانها عليك (قل لها انك تحبها )

عندما تكون صامته ( اسألها ما المشكلة )

عندما تتجاهلك ( أعطها اهتمامك الكامل )

عندما تريد الابتعاد عنك قليلاً ( لاتوافقها الرأي )

عندما تراها في أسوأ حالاتها ( قل لها أنها جميلة )

عندما تكون خائفة ( أحميها )

عندما تأخذ منك شيئاً عزيزا ( دعها تأخذه فلن يكون أعز منها )

عندما تمازحك ( مازحها وأضحكها )

عندما لاتجيب الهاتف لفترات طويلة ( أكد لها أن كل شئ على مايرام )

عندما تشك بك ( انسحب قليلا لتعطيها وقتا للتفكير )

عندما تقول أنك تعجبها ( فهي حقا تكن لك مشاعر اكبر مما قالت )

عندما تمسك يديك ( أمسك يديها وداعب أصابعها )

عندما تقول لك سرا ( أحتفظ به ولا تخبر به أحداً )

عندما تنظر إلى عينيك ( لاتلتفت حتى تلتفت هي )

عندما تفتقدك ( فهي تتألم من الداخل )

عندما تحطم قلبها ( الألم لن يزول بل سيستمر )

عندما تقول أن العلاقة انتهت ( فهي لازالت تريدك )

عندما ترسل لك هذه الرسالة ( فهي تريدك أن تقرأها )

أبق على خط التليفون معها حتى لو لم تقل شيئا

عندما تغضب احضنها بقوة ولا تتركهاعندما تقول أن كل شئ على مايرام لا تصدقها بل تحدث معها عن المشكلةلأنها بعد عشر سنوات ستظل تتذكرك
عاملها كأنها كل شئ مهم لك في الحياةمازحها ودعها تمازحكابق معها طوال الليل عندما تكون مريضةأعطها العالمعندما تحس بالملل أو متضايقة اخرج معها واجعلها تتسلىدعها تحس أنها مهمة لديكعندما تجري لك باكية ، أول سؤال تقوله لها ، مين اللي زعلك حبيبتيكل هذا لن يكلفكم شيئاً يا شبابهذا هو الحب الحقيقيولا تنسون يا شباب ان اغلاط النساء اقل من اغلاطنا فنحن دوما نحتاج السماح منهن والتعقلوالله يهدي الجميعفانفجر كل الحاضرون بالبكاء من كلام الشيخ ووروعته وفصاحته

[ahit]

جزاكم الله خيراً
شكراً للأخت/ نور العمر
شكراً للستاذ / محمد الشنورى

كلام سليم 100%
المودة و الرحمة و السكينة و الحب و التفاهم أساس الحياة الزوجية و لا يوجد إنسان على وجه الأرض معصوم من الخطأ و ربنا يهى نفوس الجميع

[نور العمر]

الله أكبر... الله أكبر .... ما شاء الله يا شنوري ... ما شاء الله أبدعت بهذا الميل
يا رب ... الرسالة توصل ... والأزواج ترحم بعضها يا رب

[نور العمر]

ربنا يهدي - الواحد بيدعي يتوفق في الجواز احسن الواحد شايف حواليه مصايب من اللي "يشيب لها الولدان"

ملحوظة بس صغيرة عشان انا تعبت قوي في القراءة

دايما يا جماعة سيبوا فواصل بين كل فقرة و فقرة

و شكرا

تأمر يافندم واحنا ننفذ

[د./اليشع ثابت]

الله أكبر... الله أكبر .... ما شاء الله يا شنوري ... ما شاء الله أبدعت بهذا الميل
يا رب ... الرسالة توصل ... والأزواج ترحم بعضها يا رب

شكرااا جزيلا للأستاذة نور --- موضوع هام جدااااا
شكرااااا جدااا لمحمد باشا شنورى
شكراا لكل الردود
انا يا جماعة عايز بس اضيف حاجة صغيرة جداااا
هى بسيطة قوى سهلة التنفيذ
( الجواب اللين يصرف الغضب )
لازم علشان المركب تمشى و توصل لبر الأمان
كلا الطرفين يكون على قدر المسؤلية
و يحاول من ناحيتة يفوت شوية و لو حاجة بسيطة جدااا
مافيش بيوت بتخلو من المشاكل احيانا شد احيانا اخرى زعل عصبية نرفزة
لكن فى النهاية لازم التفاهم لاجل اهم شىء فى الحياة
وهم ثمرة ارتباطهم و هم الاطفال
فليس لهم زنب اقترفوة و هم الضحية فى حال حدوث اى شرخ
و هم امانة سوف نحاسب عليها فى كل شىء
نعدى يا جماعة الضغائر و نهدىء الاجواء مرة عليكى و مرة علية و تمشى الامور على خير
اتمنى ان يسود الحب كل أسرة فى كل العالم
لصلاح المجتمع كلة
لكم جميعا كل الشكر و التقدير

[نور العمر]

تمام د/ إليشع .... ويا ريت الكل يفهم كدة ... بس الراجل المصري .... مبيفوتش .... وعنده معتقدات إنه لو ريح زوجته حيبقة في نظر الناس ( ؟؟؟؟؟؟؟ ) حاجة غريبة كدة .....
والست المصرية نوعين إما زوجها سي السيد ودي نادرة دلوقتي وبتمشي حالها وخلاص ....
وإما لها شخصيتها ... ودي بتبدأها صبر ومحاولات في الأول ... وبعد كدة ممكن تقلب التربيزة على إللي فيها ....
موضوع معقد ويتعب القلب .... أنا نفسي نغير معتقداتنا المادية كبداية
يعني ....
ليه القايمة ... كل واحد ياخذ عفشه مثلاً ... ولو في ابناء ... فالشقة بعفشها بتعتهم هما مش بتاعة الزوجين المتخلفين عقلياً ( آسفة من عصبيتي ) .
ليه المؤخر .. فلوس على الفاضي ومبتدفعش ... كفاية شبكة معقولة وخلاص ... نخف على العرسان في الطلبات ... ليه متبقاش كل حاجة النص بالنص .... ليه كل واحد ميجبش على قد إمكانياتي ... وإللي بيبدأ بسيط بيكبر ...ليه بنتباها بكلام فارغ ... وفي الآخر نندب حظنا بردوا
ليه فرح مكلف جداً .... ليه ميبقاش في المعقول واستفيد بفرق الفلوس في حاجة أهم .... يعني مثلاً تحبي فرح واللا سهرة شيك عائلية وبالفلوس نسافر وممكن أجيبلك عربية ( مثلاً )
كل واحد اناني ... والستات مبقتش بتستحمل لأن الضغط عليها كبير... ليه محترمش حريتها فإنها إنسانة خلقها ربنا مش عابدة عندي تخدمني
ليه احتكرها لنفسي واهلي بس وحقوقها وحقوق اهلها تقال على قلبي
ليه مسبهاش تشتغل وتشيل المسئولية أكتر لوعايزة وهو كل لصالح كيان الأسرة
ليه بحسب كل شيء من وجه نظر ذكورية ... وكأن الملائكة خلقت للعنة السيدات دون الرجال ( لما تغضبيني الملائكة تلعنك حتى أرضى عنك )
يا سلام ... بتفسروها على مزاجكوا وكأن الثواب والعقاب خلق على المرأة دون الرجل
أول من خلق آدم ... وأول من سيحاسب آدم
أهو شنوري رد بنفسه - عن طريق رجل دين - جت من حد غيري - عشان متبقاش خناقة
ليه مريحهاش - ليه عايشين دور الزوجة والصحبة - دي مصيبة تاني
في فيلم آخر الدنيا وفيلم عن العشق والهوا - الزوجة والصاحبة والعشيقة
دي مصيبة اخلاقية بكل المقاييس
عاوز تتزوج - احترمها واحترم ولادك وبيتك في المقام الأول
مش عايز - خاليك في حالك ومتوجعش قلب غيرك
مفيش حاجة اسمها صحبتي ومراتي .... الصديقة ممكن تكون موجودة بس في إطار عائلي محترم ... يعني صديقته من أيام الجامعة وزوجها واصدقاء معك وزوجتك
شارك زوجتك في كل شيء - متخبيش عنها حاجة - ومتعملش أسرار عليها
وافتكر إنها أعطتك اغلى حاجة عندها - عمرها كله وصحتها لخدمتك وخدمة ولادك

[msobhy]

مجهود رائع يا نور وانا متأكد ان فى شخص قريب منك مر بالمشكلة ديه وعلشان كده اسمحوا لى احكى لكم قصة كل احداثها كانت امام عينى - والله العظيم مفيش اى مبالغة أو تحريف فى القصة ديه - والهدف الرئيسى مش القصة لكن اللى حصل بعد القصة
فى اتنين اعرفهم اتجوزوا جواز صالونات لكن عن معرفة تزيد عن 8 سنوات بين العائلتين / فترة الخطوبة مفيش اى مشاكل / قبل الجواز بشهر بدأت سيطرة الام على البنت تظهر / بدأت ردود الافعال تظهر من ناحية ام الابن بشكل مبالغ فيه / الولد والبنت قاعدين بيتفرجوا على التروس اللى بتطحن فى بعضها وهما فى النص / الولد والبنت تزوجوا / أول اسبوع شهر عسل وكانوا مسافرين قمة السعادة / تانى اسبوع رجعوا لكن اهل البنت كانوا مسافرين قمة السعادة / رجوع اهل البنت حرب بشعة بين كل الاطراف بدون اى سبب / الولد والبنت لسه عايزين بعض / البنت حامل الف مبروك وقمة الاهانات من والدتها بسبب انها حامل (باللفظ ياما جاب الغراب لأمه _ده كلام ام البنت مع انها فعلا ست محترمة أو ده كان اعتقادى)/ المشاكل بتزيد بين الطرفين اهل الولد واهل البنت لكن الولد والبنت لسه مع بعض لكن الاول كانوا بنسبة 100% دلوقتى 70% / اهل البنت عازموا الولد والبنت على الفطار فى رمضان والولد مرحش (قليل الادب - لازم يتربى) البنت لازمتتطلق من الولد بعد شهر ونص جواز**اسف للتعبير لكن يا نهار ازرق** الولد والبنت اتطلقوا فعلا والسبب انه لم يذهب للفطار / اعلان فى محكمة تبديد قائمة المنقولات - طلاق - نفقة / تزوير فى قائمة المنقولات وتزويد قيمتها بالضعف تقريبا / الولد والبنت بيتقابلوا من ورا اهليهم ونفسهم يرجعوا لبعض لكن أم البنت اصبحت هيه المسيطر على الموضوع بالكامل حتى انها مش بتدى لأهل الولد يقوموا بأى حاجة غير الهجوم / اهل الولد صبروا علشان خاطر الولد بالاضافة ان البنت حامل ومفيش اى ردود هجومية / ام البنت افتكرت انها اقوى شخصية فى العالم وقالت باللفظ الواحد عايز يشوف ابنه يشترى شقة باسم بنتى ويكتب لى انا وصل امانة ب 100000 جنية بالاضافة لقائمة منقولات جديدة اكتبها على مزاجى علشان اضمن حق بنتى /فى اللحظه ديه اهل الولد تدخلوا بكل ثقلهم وكل معارفهم واثبتوا بالفعل ان الست ديه ولا حاجة مقارنه بيهم ازاى - لو الببنت كانت هاتاخد بالمحاكم 100 جنية هما صرفوا 1000 رشاوى ووسايط وهدايا ومحامين من العيار الثقيل لمجرد ان الست وبنتها مايخدوش حاجة وفعلا ده حصل/خليكو فاكرين ان البنت كانت حامل / بعد لعب فى المحاكم استمر سنتين ونصف مقابل شهر ونصف زواج فقط ام البنت استسلمت وطلبت الطلاق ودى مقابل ان البنت تاخد حاجتها الشرعية بدون التزوير اللى حصل**وطبعا الولد وافق بدون حتى الرجوع لأهله وذلك لوقف نزيف الرشاوى والوسايط والقرف اللى هو عايش فيه**


طيب فين الدرس المستفاد مفيش غير حاجة واحده مش هاتكلم على الولد لأن سبحان الله ربنا كرمه بشكل رائع - البنت اللى طلبت الطلاق وزورت فى القايمة وسمعت كلام امها ودمرت حياتها / البنت فعلا ضاعت بكل ما تعنيه الكلمة / امها وعدتها انها تشترى لها عربية وتخليها تاخد كورسات وتبدأ حياتها علشان تعرف ان حياتها كان ممكن تضيع / البنت شغاله فى مكان اقل ما يقال عنه انه مكان حقير ده عن لسان البنت / عندها 22 سنة مطلقة بعد شهر ونصف جواز (وللأسف كلنا عارفين ده معناه ايه عند المصريين) ومعاها طفل رضيع / الغريب جدا جدا جدا فى الموضوع ان البنت صعبانه على اهل الولد بشكل غرييييييب لكن كل لما تيجى سيرتها يتقال واسف للتعبير تغووور من وش امها / قبل السؤال طيب فين الرجالة اللى فى عائلة البنت ديه / للأسف ابوها راجل بسيط ومالوش فى اى حاجة / اخوها مكبر دماغة من كل حاجة / ليها ابن خاله وهو راجل فعلا جدير بالاحترام بعد كلامه مع الولد واهل الولد والبنت وخالته كان رده باللفظ للولد (يا ابنى انا غلطان انى اتدخلت لخالتى ولبنت خالتى لأنهم فعلا مجانين ومش عارفين هما بيعملوا ايه)
يا جماعة الطفل
الكل بيتكلم عن المحاكم والقضايا
طيب الطفل
الكل بيتكلم عن القايمة
طيب البنت
الكل بيتكلم عن ام البنت وام الولد
طيب والعائلة اللى اتدمرت
حسبى الله ونعم الوكيل فى كل شخص كان السبب فى المأساه ديه
لكل واحده عايزة تطلق بسبب الزهق / الملل / قلة الفلوس / كلام والدتها / ياريت تقرأ الكلام ده
فى كلمة كان اهل الولد دايما يقولوها واهل البنت كانوا دايما بيقولوا لأ
يا جماعة لو فى مشكلة روحو لدار الافتاء واعرضوا مشكلتكم
يا جماعة احنا مسلمين والناس ديه هما المرجع بتاعنا
هما اللى يحددوا من الصح ومن الغلط
الحياة مش وردى ولازم يكون فيه مشاكل
لكن اعتقد ان كل المشاكل عباره عن مشاكل وهمية
لكن المشكلة الحقيقة للأسف الطلاق

[نور العمر]

شوف يا أستاذ أبو مروان
قصة صعبة وبتحصل 100 مرة
ورأي حيخالف كل القواعد
بس لو فيه نسبة رجوع هذا الشاب لزوجته
ترجع وتقاطع اهلها وتعيش في سلام وتربي طفلها مع ابوه
دي مش أم ( دي ست معقدة ) بطلع عقودها ومشاكلها على بنتها
ربنا يحفظنا ويحمينا من إن يجي يوم من الأيام نعمل كدة في ولادنا بغباء
مصلحة الطفل فوق كل المقاييس
والبنت غلطانة من البداية إنها مشيت ورا كلام امها
حاول توفق بينهم ... يا رب يرجعوا لبعض طالما الولد جواه حلو كدة
يسافروا برا مصر ...... أو حتى يسكنوا في محافظة تانية
حرام والله العظيم حرام ..... منهم لله الاهل إللي بيدمروا كل شيء

قبل ما حد يهاجمني أحب أقول ( إن لو رجعوا لبعض واختارو النجاح لأسرتهم ... المياه حترجع لمجاريها بالتدريج بس بعد ما الأسرة اصبحت قوية بشكل يكفي للتصدي لأي مشاكل )
الام دي مش حتخلد ... وللإنسان عمر افتراضي
عاوزة تفارق الدنيا وتسيب بنتها كدة ... في وقت والله العظيم ما حد بيقدر يشيل غير همه وهم بيته حتى بين الاخوات ..... سبحانك يا رب

[نور العمر]

رفقاً بالقوارير
رفقاً بالأطفال
رفقاً بالأجيال
رفقاً بالمجتمع
رفقاً بالقلوب

[msobhy]

شوف يا أستاذ أبو مروان
قصة صعبة وبتحصل 100 مرة
ورأي حيخالف كل القواعد
بس لو فيه نسبة رجوع هذا الشاب لزوجته
ترجع وتقاطع اهلها وتعيش في سلام وتربي طفلها مع ابوه
دي مش أم ( دي ست معقدة ) بطلع عقودها ومشاكلها على بنتها
ربنا يحفظنا ويحمينا من إن يجي يوم من الأيام نعمل كدة في ولادنا بغباء
مصلحة الطفل فوق كل المقاييس
والبنت غلطانة من البداية إنها مشيت ورا كلام امها
حاول توفق بينهم ... يا رب يرجعوا لبعض طالما الولد جواه حلو كدة
يسافروا برا مصر ...... أو حتى يسكنوا في محافظة تانية
حرام والله العظيم حرام ..... منهم لله الاهل إللي بيدمروا كل شيء

قبل ما حد يهاجمني أحب أقول ( إن لو رجعوا لبعض واختارو النجاح لأسرتهم ... المياه حترجع لمجاريها بالتدريج بس بعد ما الأسرة اصبحت قوية بشكل يكفي للتصدي لأي مشاكل )
الام دي مش حتخلد ... وللإنسان عمر افتراضي
عاوزة تفارق الدنيا وتسيب بنتها كدة ... في وقت والله العظيم ما حد بيقدر يشيل غير همه وهم بيته حتى بين الاخوات ..... سبحانك يا رب

للأسف يا انسة نور رجوعهم لبعض اصبح المستحيل بعينة
القصة ديه من 3 سنوات والولد تزوج من زوجة صالحة وربنا كرمه منها بطفل بالاضافة ان البنت كلما ظهر منها بادرة احترام تراجعت عنها بسرعة البرق بمجرد معرفة امها بها
ربنا يهدى العاصى
نصيحة لكل زوجة
لزوجك الحق وكل الحق ان يأمرك كيفما شاء وقتما شاء
بمجرد زواجك يجب ان تعرفى معنى كلمة زوجة - أم - اسره
بمجرد زواجك اصبحت جزء لايتجزأ من عائلة زوجك وفعليا اصبحتى اقرب لهم من اهلك (انتى شايله اسم جوزك واسم اهله)
الحياه مليئة بالمشاكل والمحن والطلاق ليس حل على الاطلاق
ان تحصلى على لقب عانس افضل الف ممره من لقب مطلقة او ناشز
ارجعى للدين قبل اى شئ وحافظى على اسرتك كما تحافظى على حياتك
الحب سواء للزوج او الابناء ليس كلام فقط انما هو فعل وتضحية
نصيحة لكل زوج
اذا اردت ان تطاع فأمر بما يستطيع
لا تسمح لزجتك بالتفكير حتى فى تلك الحلول (بالحسنى وليس بالقهر)
اذا كنت تتصور انك تعمل الكثير فأن زوجتك تعمل الكثير والكثير والكثير
نبرة الكبر والتعالى انما اساسها نقص شديد فلا تحمل الاخرين بعيوبك
أمك ثم أمك ثم أمك
برجاء ملاحظة ايضا ان زجتك هى ام
قبل عمل اى شئ يعتبر اهانة لزوجتك توقع نفس الشئ لأمك ولأختك اذا كنت ترضاه لهما فلتبدا بعملة مع زوجتك
للزوج والزوجة معا
ليس الزواج حرب وفرض للسيطرة
ليس كل دور الزواج تنفيذ طلبات الزوجة المادية
ليس كل دور الزوجة تنفيذ ما يطلبه الزوج منها
الى كل اخوتى تعاملوا مع الزواج على ان تجارة كلما تابعتوها ورعتوها كلما زادت وكبرت / هل يمكنك اهانة عميل لديك / اذا كان عندك وقتك فانك تستثمرة فى مشروعك وتجارتك / اذا كان عندك أموال فانك تستثمرها فى مشروعك وتجارتك /اذا كنت تستطيع التضحية بعمرك من اجل حلم حياتك فانك تستثمرة فى مشروعك وتجارتك
لا تنسوا المودة والرحمة
مراعاة الله فى كل صغيرة وكبيرة بينكم

[msobhy]

تذكرت كلمة البنت كانت بتقولها دائما
انا لو لفيت الدنيا مش هالاقى راجل زيه
والولد كان بيقول ان بسبب ان البنت بعدت عنه صحته ادهورت وانه تقريبا مش بينام غير 3 ساعات فقط يوميا
سبحان الله العظيم / الكبر بيودى فى داهيه
ارجو ان مفيش حد من الاطراف يقرأ الكلام بتاعى / كل الكلام ده اتكتب لسبب واحد لو مش عارفين نصلح اللى اتكسر على الاقل نحافظ على اللى فى ايدينا ونعلم غيرنا يحافظوا على اللى فى ايديهم

[mada121977]

الف شكر على الموضوع الجميل يا اخت نور ..والواحد استفاد منه ومن ردود الاخوه الافاضل وربنا يبعد عنا كلنا المشاكل دى
انا ليا 2 اصحابى حصل معاهم مشاكل مع زوجاتهم وللاسف انتهت المشاكل بالطلاق وكل واحد تقريبا قعد متجوز سنه ونصف بس وكل واحد منهم ربنا رزقه بطفل بس للاسف الاسره اتفككت والاتنين مش عارفين يشوفوا اولادهم وفيه حرب طاحنه بين الطرفين فى المحاكم كالعاده .. الواحد لما ييجى يشوف الموضوع ده بيتخيل يعنى الحب اللى كان بينهم ده راح فين ... يعنى اكيد وهما مخطوبين كان فيه لحظات رومانسيه وحب وهيام بين الطرفين راح فين كل ده ولا هوا كان سؤ اختيار فى اول الامر ولا الطرفين كانوا معتقدين ان الجواز حاجه تانيه ومش هايبقى فيه مشاكل ولا تفاهم متبادل واحساس بمشاعر الطرف التانى ... ربنا يهدى الجميع ويبعد عننا المشاكل

[elassar2010]

اولا شكرا على الموضوع الممتاز
انا ليا وجهة نظر مختلفة شويه هى المشكلة فى نظرى مش فى الطلاق نفسة لان الجواز زى المشروع نسبة النجاح ونسبة الفشل متساوين
المشكلة ان لما بيحصل طلاق كل واحد بيحاول ينتقم بالقانون من الطرف الاخر وكل واحد منهم بيلاقى الاصدقاء والمعارف بيولعوها وكل واحد عارف طريقة قذرة فى القانون بيدل صاحب المشكلة علشان يعملها
حضرتك حاليا لو لحظتى اى اتنين مطلقين حضرتك بتلاقى الزوج بيروح يتجوز عالطول لية ؟؟؟؟؟؟؟؟
علشان مراتة الجديدة ترفع علية قضية نفقة فمراتة وطليقتة تشترك فى النفقة وطليقتة متخدش منة فلوس كتير اهى دى طريقة معروفة لاانتقام الزوج من طليقتة
انا شايف ان المشكلة هى بعد الطلاق كل واحد من الطرفين بيحاول ينتقم من التانى وبيستخدم الاطفال لو فى وبينزلوا طحن فى المحاكم قدام بعض وتوديلة اعلان على الشغل بالقضية علشان تفضحة قدام زمايلة وحاجات كتيرررر والنتيجة اطفال محطمة نفسيا ومعقدين من الجواز