عشان انت مصرى .. احمد فؤاد نجم

[bassam266]

عشان انت مصرى .. احمد فؤاد نجم


عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى


عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت


عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

طبعا ده كلام احمد فؤاد نجم مش كلامى بس انا حبيت انقلهولكوا لانى بصراحه بحترم الراجل ده و نفسى اعرف اشمعنى ده اللى مرحش ورا الشمس؟؟

[Osama_soliman]

كله كلام كله كلام

[sasatony]

شكرا ياباشا
وهو مرحش ورا الشمس عشان ببساطة النظام ذكي جدااااا
لما يسيبو واحد زي ده يقعد يشتم ويهلل يخلي الناس تقتنع ان فيه ديمقراطية في البلد ونفس الحال مع جرائد المعارضة

[samo9992003]

عنده حق
ربنا يخلصنا منها على خير

[memoo_1st]

جامدة مووووووووووووووووووت تسلم ايدك يا غالي

[Ibtal]

عشان انت مصرى .. احمد فؤاد نجم


[SIZE=4][COLOR=navy]عشان انت

طبعا ده كلام احمد فؤاد نجم مش كلامى بس انا حبيت انقلهولكوا لانى بصراحه بحترم الراجل ده و نفسى اعرف اشمعنى ده اللى مرحش ورا الشمس؟؟

أنا الحقيقة لم بشوفه في التلفزيون بأحس إنه عمره ما إستحما ولا غير هدومه.
هو عايش في قبو يعني لو حصل أي حاجة في الدنيا هو مش حيحس بحاجة وكلامه حيفضل هوا هوا لا بيقدم ولا بياخر.

[Imhotep]

اللى يقرا عنه شويه هيعرف هو قد ايه عانى فى حياته بسبب قصايده..... فقد اعتقل فترات متفاوتة فى الستينات و السبعينات بسبب جرأته الزائدة فى نقد الاوضاع السائدة، هو و رفيق عمره الشيخ امام.
وعلى فكرة الراجل ده تاريخ كبير، ودفع كتير من عمره تمن لاراؤه، فبرجاء عدم الاستهزاء به.

[Imhotep]

وعلى فكرة برضه: هو مش فقير و لا حاجة، لان اعماله و قصائده التى مازال يعاد طبعها الى الان تدر عليه الكثير، لكن سكنه فى حوش ادم بالغورية فوق السطوح، هو "موقف" كما يقول هو دائما، كما ان استمراره فى لبس "الجلابية" رغم انه كان "افندى" فى الستينات هو موقف ايضا. الراجل ده كانت قصايده بترج البلد عند صدورها فى الستينات، وكان يتم تداولها سرا، نظرا لمنع تداولها الرسمى و العلنى. برجاء عدم الحكم على الظاهر، فالحكم الظاهر هنا هو على قمة جبل الجليد، التى تظهر بهذه المظاهر البسيطة، اما الحقيقة فهى بغاية العمق و البساطة المصرية الشعبية الممزوجة بسرعه بديهه و خفة دم يندر ان توجد فى مكان آخر.

[bassam266]

السلام عليكم

اللى يقرا عنه شويه هيعرف هو قد ايه عانى فى حياته بسبب قصايده..... فقد اعتقل فترات متفاوتة فى الستينات و السبعينات بسبب جرأته الزائدة فى نقد الاوضاع السائدة، هو و رفيق عمره الشيخ امام.
وعلى فكرة الراجل ده تاريخ كبير، ودفع كتير من عمره تمن لاراؤه، فبرجاء عدم الاستهزاء به.

عندك حق و انا بحترم الراجل ده جدا علشان صراحته اللى ملهاش حدود و كمان مبيهمهوش حد حتى لو على الهوا اللى متابعه حيعرف انا قصدى ايه (;

[badry]

بحيى العبقرى سليط اللسان....احمد فؤاد نجم.......

و بوجهله التحية لمركز قيادة السطوح اللى هو عايش فيه (على حد تعبيره) فى سطح احد بلوكات منطقة الزلزال فى المقطم.....

و بقوله:

مبروك يا عريسنا يا أبو شنه و رنه


و شكرا و كفاية قوى على اد كده

[AhMeD EzZ]

الله يا عمنا
بجد الراجل دة دماغ

[AhMeD EzZ]

الله يا عمنا
بجد الراجل دة دماغ

[pro_samir]

مش انت اللى مصرى؟؟؟ جتك القرف

هما كل المصريين قرفانين كدة ؟

مين مش قرفان طيب ؟

فى حد هنا مش قرفان ؟

[bassam266]

فى حد هنا مش قرفان ؟

طيب هو فى حاجه متقرفش اصلا :(

[Ibtal]

السلام عليكم



عندك حق و انا بحترم الراجل ده جدا علشان صراحته اللى ملهاش حدود و كمان مبيهمهوش حد حتى لو على الهوا اللى متابعه حيعرف انا قصدى ايه (;

هي الشتيمة و قلة الادب دلوقتي بقيت حاجة حلوة.
هو إلي شكله مستحماش بقاله سنة و يطلع يهرش في التلفزيون يبقى ميقرفش بس كل المصريين هما المقرفين.
هو لو شاعر بجد كان وصل رسالته بطرق مهذبة و فعالة في نفس الوقت .
هو يظهر عايز ذي كتير يهاجر إلى قطر و يعيش على شتيمة مصر والمصريين . ماهت بقيت موضة اليومين دول كل واحد يقدر يشتم مصر يبقى ليه ساعة على قناة الجزيرة