احذروا السرقة بالموتسيكلات

[Abdo_Eldesokey]

امبارح واحدة قريبتي كانت ماشية في شارع منتصر في المنصورة ، والشارع مليان محلات وناس

جه اتنين من وراها بموتسيكل صيني من غير نمر وخطفوا شنطتها وخلعوا

طبعا ً من الخضة هيا معرفتش تعمل إيه !

المهم راحت عملت محضر في قسم المنصورة الظابط قالها كل يوم بيجلنا في حدود خمس بلاغات عن الموضوع ده ، والعيال دول بيقلبوا الشنطة ويشوفوا الي ليه قيمة وبعدين يرموها في النيل

لو كان في شارع ضلمة ومهجور كنا قلنا البنت هيا الي غلطانة وماشية في شارع ضلمة ، لكن ده شارع مليان ناس طول اليوم

يبقى البنات يقعدوا في البيت ولا إيه الحل ؟

[nazaryia]

ربنا يعافينا و يحمينا و اخواتنا من السرقات ان شاء الله

[ابو فرح]

من ساعه ماطلعت الموتسيكلات الصينى وموضع السرقه بالموتسيكل رجع تانى واكتر من زمان

[elassar2010]

المشكلة ان الموتسيكلات دى بتبقى من غير نمر وماشية فى اتخن شارع وقدام العساكر والعساكر بيخافوا يكلمهوهم لانهم بيبقوا سوابق وبلطجية
والمحاضر تتكوم فى الاقسام
والنتيجة ولا حاجة لحد مايخطفوا شنطة بنت حد من الناس الى ليها قيمة فى البلد هتلاقى البلد كلها مخبرين وهيجيبوا الى سرقة الشنطة والى باع المتسيكيل الطبيعى بتاع وزارة الداخلية

[AboELsoud]

الكلام ده حصل في الفيوم من حوالي شهرين
قاموا عاملين حمله و موقفين ظباط و عساكر امن مركزي و اي موتوسيكل يخدوه و يحطوه في المرور و اللي عايزه غرامه 2000 جنيه (اغلى من الموتوسيكل ذات نفسه)
و اللي ميرضاش يقف و الله كانوا بيزقوه يقوم واقع و ياخدوا الموتوسيكل قدام عينه
فمتقلقش كلها كام يوم و يعملوا نفس الحركه في المنصوره

[youssefmustang]

الناس تمشى بسلاح فى الشارع يعنى ولا ايه
ولا يلزقو الشنط بتاعتهم بكولا ولا ايه
البلدى ما ينفعش معاها غير قانون الغاب
اخوكم يوسف

[Abdo_Eldesokey]

الكلام ده حصل في الفيوم من حوالي شهرين
قاموا عاملين حمله و موقفين ظباط و عساكر امن مركزي و اي موتوسيكل يخدوه و يحطوه في المرور و اللي عايزه غرامه 2000 جنيه (اغلى من الموتوسيكل ذات نفسه)
و اللي ميرضاش يقف و الله كانوا بيزقوه يقوم واقع و ياخدوا الموتوسيكل قدام عينه
فمتقلقش كلها كام يوم و يعملوا نفس الحركه في المنصوره

طب يا ريت الموضوع ده يحصل

الموتسيكلات دي بقت وباااااااااااء عندنا

[Abdo_Eldesokey]

الناس تمشى بسلاح فى الشارع يعنى ولا ايه
ولا يلزقو الشنط بتاعتهم بكولا ولا ايه
البلدى ما ينفعش معاها غير قانون الغاب
اخوكم يوسف

والله يا باشا المشكلة مش في الشنطة

المشكلة إن الي سرق ده ممكن بنفس الموتسيكل يضرب أو يتحرش أو يعمل الي على مزاجه

وساعتها الخسائر مش هتبقى موبايل ومحفظة بس ؟!

[msobhy]

واحده قريبتى الساعة 3 ظهرا ضربوها على دماغها وسرقوا شنطتها فى شارع رئيسى
وفى النهاية فى القسم كانوا بيزعقوا فينا ويقولوا لنا هيه يعنى الدنيا اتهدت
الست اللى اتسرقت عندها 54 سنة وقعدت شبة مرعوبة تخرج الشارع بعد اللى حصل

[نور القمر]

حصلت مع واحدة اعرفها في شارع الهرم في عز الضهر
والشنطة كان فيها فلوس وهي قاومتهم لدرجة انها وقعت على الارض واتبهدلت وفي الاخر اخدوا الشنطة بردو