يا عم بيع تثير أزمة حادة بين على الحجار والرقابة

[Hossam_Hassan]

يعم بيع بيع .. ما هى متباعة متباعة ..وحياتنا عملوها بضاعة
باعوا حياتنا ومصانعنا .. باعوا حديدنا وتسليحنـــــــــــــــــــــــــا
حتى قمرنا اللى جامعنا .. باعوه ولاد البيــــــــــــــــــــــــــــــــاعة
باعوا الكتاب والكلية .. باعوا الخيال والحريــــــــــــــــــــــــــــــــة
باعوا سيرتنا الهلالية.. باعوا الدوا والسماعــــــــــــــــــــــــــــــة
ياعم بيع بيع ..ماهى متباعة .. باعوها ولاد البيــــــــــــــــــــــاعة

هذا هو نص كلمات الأغنية التي أثارت أزمة واسعة النطاق بين جهاز الرقابة على المصنفات الفنية وبين القائمين على مسرحية (يمامة بيضا) التى يقوم ببطولتها المطرب الكبير على الحجار مع هدى عمار وسعيد طرابيك إخراج حسام الدين صلاح وتعرض على خشبة مسرح ليسية الحرية بمدينة الإسكندرية لصالح مسرح الدولة .

وتعود الأزمة - كما أكد مصدر مسئول بالرقابة في تصريح خاص لنا - إلى رفض الرقابة إجازة الأغنية أو التصريح بأدائها داخل العرض ورغم هذا أصر على الحجار على غنائها وتقديمها للجمهور بدعوى أن الرقابة لم تحدد موقفها من الأغنية مما يعنى موافقتها ضمنيا عليها وهو كلام غير صحيح بدليل لجوء أسرة المسرحية للجنة التظلمات بالمجلس الأعلى للثقافة ضد قرار الرقابة.

ورغم أن اللجنة لم ترد على الطلب إلا أن الحجار أصر على تقديم الأغنية وهو ما يمثل مخالفة صريحة جارى اتخاذ الإجراءات القانونية بشأنها - حسبما قال المسئول الأغنية الأزمة من تأليف الشاعر جمال بخيت والحان الموسيقار الكبير عمار الشريعى .

----------------------------------------------------------


سؤال سازج، هو ينفع يتعمل رقابة فى زماننا ده؟ :shock: :shock: :shock:

[memo_hefnawy]

سؤال تانى يا حسام هو الراجل قال حاجة غلط تستحق مقص الرقابة ؟

[Hossam_Hassan]

مقالش حاجة غلط بس اللى على راسه بطحة ........... بتوجعه

[memo_hefnawy]

المشكلة إنهم فاكرين الناس كلها هابله و نايمه بس همه ليهم حق يعملوا كده و أكثر على مبدأ ...........سألوا فرعون إيه فرعنك ؟ ..........قال مالقيتش حد يلمنى

[جندى مجند]

أنا فعلاً مستغرب ... هو لسة فى حاجة اسمها رقابة؟؟ و ممكن حد يقوللى ايه لازمتها فى وجود آلاف القنوات الفضائية و الانترنت "الفائق" السرعة؟ (طبعاً أنا كاتب فائق بين أقواس عشان لا هو فائق و لا حاجة بس دة موضوع تانى فما علينا)

[ابوحميد]

لو منعوا الاغنية تنزل اكيد حنزلها على النت وادى دقنى ان عرفوا يمنعوها

[memo_hefnawy]

هاقولك أنا يا أحمد باشا :)

دلوقت القنوات الفضائية و النت و ما إلى ذلك من وسائل تعتبر غير متوفره بالمره للطبقة الكادحة من الشعب و تتوفر للطبقة المطحونة بالعافية و المطحونة دى متعلقة فى ساقية فمفيش خوف منها و الكادحة الخوف كله منها لأنها ممكن تقوم عشان هى وصلت لنقطة أنها مفيش عندها أى شئ يمكن البكاء عليه و فى هذه الحالة تقوم ثورة جياع و كلنا يعلم ماذا تفعل ثورات الجياع التى لا تبقى أخضر ولا يابس
عشان كده الرقابة موجوده يا حاج أحمد لأن الطبقة المسكينة دى آخرها القنوات الأرضية ده يوم أصلا لما يشوفوا التليفزيون لأن أغلبهم بيشوفوا فى المناسبات

[eng_elnaggar]

الأغنية كلماتها جميلة خصوصا ان اللي كاتبها شاعر كبير واللي ملحنها احسن ملحن في مصر حاليا يبقوا هيمنعوها ازاى !!!

وبعدين الكلام مافيهوش اى حاجه بذيئة او شتيمة ده راجل بيتكلم عن واقع حقيقي احنا عايشينه في بلدنا المتباعة :)

بس لو اعرف مين اللي اشترى عشان نغيرله النشيد الوطني ويبقى باسمه وسلملي على الشفافية :lol:

[خالدابوالنجا]

والله يا جماعه دى مشكلة مجتمع ونظام معا

الان تجد اى صوت مختلف او معارض يقابل بالقمع الشديد

فان كان الاختلاف مع الحكومه يجند كل شىء لتشويه المعارض والقضاء عليه سواء من الاعلام

او الامن وجميع اجهزة الدوله تتعاون للقضاء عليه معنويا وماديا.

والاختلاف مع الاب والاسره مشكلة المشاكل فان يكون لك خط متميز عن باقى الاسره يجر عليك

من المشاكل مالاحصر له فلابد للاب ان يوافق وللام ان تبارك وللاخ ان يشارك وللصديق ان يعلم

وللجار ان يخبر ووووووووووووووووو.حاجه نخنق.

فالحكومه عارفه مصلحتنا فين والاب هوه الى يختار لنا حياتنا.

يعنى من الاخر هيه ثقافه عامه ومنزعلش من الرقابه ولا الحكومه ولا من الاب ولا من مديرك

فى الشغل ولا من مكتب التنسيق (ولا من قوانين المنتدى ههههههههههههه )ولا ولا ولا ولا .

[محمدايهاب]

الرقابة دي هايفة جدا جدا أنا فاكر مرة أن فيلم ظاظا رئيس جمهورية ( بعد التديل بقى اسمه ظاظا ) اتعمل عليه مشاكل كتيير ملهاش لزمة خالص أنا أفهم أن الرقابة تمنع البذاءة أو المشاهدة الخارجة أو حتى إلي بتهاجم بصراحة النظام السياسي المصري ( طبعا مع اعتراضي ) بس الهيافة ليها اهلها!!!!!!