الصراع الذي يدور بين قلبي و عقلي كل ليلة.... (محتاج آرائكم)

[M.Osman]

السلام عليكم...

بصراحة انا كنت متردد جداً اني اكتب عن الموضوع دا هنا ... لكن موضوع الأخ octoo هو اللي شجعني و حسسني اني لو سألتكم ممكن الاقي عندكم آراء محترمة .... :)


احب أولاً اعرفكم بنفسي اكتر ... انا طالب في آخر سنة في تجارة إنجليزي ... قسم إدارة أعمال (Business Administration) .. المنصورة و أنا من طبيعتي اني انسان جاد مليش في التهريج و تضيع الوقت مع الأصدقاء مثلاً طالما أنا عندي إلتزامات لازم تخلص ...

في سنة 3 تعرفت على انسانة أنا شايف انها تعكس شخصيتي نوعاً ما (زميلتي) .. مهذبة , جادة , متحملة للمسؤلية ...
...
..
.
بصراحة ... I JUST LOVE HER


و انا دلوقتي في آخر سنة دراسية و بفكر اني اكلمها عن الإرتباط بطريقة رسمية و اني اتكلم مع والدها لكن المشكلة تكمن اني متردد جداً .. اقوللها ولا لأ .

خاصة اني عقلي و تفكيري بيقولولي : اية اللي يخليك ترتبط دلوقتى بس ؟ انت لسة عندك مستقبلك و شوف نفسك و ساعتها هيكون إنشاء الله فيه إختيارات تانية و يمكن افضل.. لكن بصراحة مش قادر امشي ورا التفكير المنطقي دا . زي ما قولت في عنوان الموضوع المشكلة عبارة عن صراع بين قلبي و عقلي .. مش عارف اسمع كلام مين ؟؟ مع العلم اني اتكلمت مع الوالد و الوالدة في الموضوع و قالولي فكر كويس قبل ما تاخد خطوة زي دي ... و كان وجهة نظرهم زي وجهة نظر "عقلي" بالظبط .

اية رأيكم ؟؟ اعمل اية ؟ اسمع كلام مين ؟
مستنى آراء جادة لو سمحتم :)

ملحوظة طريفة: عرفت ان والدها من عشاق السيارات ... ممكن يكون عضو هنا ؟

[muslimah_dentist]

أخى الكريم لك منى كل الاحترام و التقدير لتقدير كلا عقلك و قلبك

خلقنا الله سبحانه و تعالى بالعقل كى يُفضلنا على جميع الكائنات و لكنه جعل لنا قلب يشعر و يحب و يكره.

و يدل على شخصيتك أنك جاد فى هذه العلاقة و اذا كانت الفتاة على خير و أنت تريد الارتباط الجدى فما المانع اذن ، توكل على الله و استخير و اذا كان الأمر لك فيه الخير فسييسره الله لك و ان لم يكن لن يُيسر لك الأمر.

و أسأل الله سبحانه و تعالى أن يُوفقك لما فيه كل الخير.

[ams]

خاصة اني عقلي و تفكيري بيقولولي : اية اللي يخليك ترتبط دلوقتى بس ؟ انت لسة عندك مستقبلك و شوف نفسك و ساعتها هيكون إن شاء الله فيه إختيارات تانية و يمكن افضل.. لكن بصراحة مش قادر امشي ورا التفكير المنطقي دا

بصراحة انا مش معاك فى التفكير ده
انا ناوى ان شاء الله اول ما اخلص واشتغل اتجوز اعف نفسى و ازود الناس اللى بتحبنى و اكون اسرة و مش شايف ان ده يتعارض مع انى شاب و بعيش حياتى برضه يعنى اخرج مع اصحابى او امارس رياضة او اتعلم حاجة جديدة و المسئولية هتبقى دفعة للامام

انا شايف ان لو انت جاهز-ماديا و معنويا- توكل على الله و كلمها

[eng.octooo]

بصراحة مش قادر امشي ورا التفكير المنطقي دا . زي ما قولت في عنوان الموضوع المشكلة عبارة عن صراع بين قلبي و عقلي .. مش عارف اسمع كلام مين ؟؟ مع العلم اني اتكلمت مع الوالد و الوالدة في الموضوع و قالولي فكر كويس قبل ما تاخد خطوة زي دي ... و كان وجهة نظرهم زي وجهة نظر "عقلي" بالظبط .

]
بجد الموضوع محير زىى انا وانا بالذات مش هاعرف افيدك لانك عارف الى عملتة فى نفسى بس انت اخر سنة وكدة وتوكل على الله

[emadkamel]

انا لو
1- عندى المقدرة المادية على "فتح بيت"

2- عندى شقة او المقدرة على شراء مسكن مناسب

3- عندى النضج الاجتماعى والنفسى الكافى (وده من خلال حكم ناس كبار زى شيخ بترتاحلة او صديق لوالدك او دكتور فى الجامعة او ماشابه مش من كلام زملاء ليك او احساسك انت الداخلى)

4- اخترت البنت "من ضمن" إختيارات عدة مطروحة امامى وبعد دراسة متأنية لسلوكياتها وتدينها ومدى توافق طباعها معايا ومع اهلى ومعرفة ولو بسيطة باوضاعها الاجتماعية ورؤية حيادية لتفاعلها مع الزملاء وهل فى تكلف ولا لأ .....

5- عدى على اختيارى ليها او تعلقى بها فترة طويلة او كافية لانى أتأكد ان شعورى ناحيتها مش شعور عابر

6- معرفة تامة وبالتحديد لعيوبها - ودى مهمة قوى انك تبقى اولا عارف انها بنى ادمة طبيعية فيها عيوب زى كل الناس والمشاعر ماتبقاش مغمية عينيك، وثانيا اتك تبقى عارف العيوب دى ودارس مدى تقبلك ليها .... واعرف قاعدة هامة جدا جدا جدا جدا .... مافيش حد بيتغير ولا بعد الجواز ولا قبله .... مافيش حد بيتغير .... مافيش حد بيتغير.... عايوك تقولها 10 مرات كل يوم ..... وماتتخيلش ان اللى كل البشر فى العالم كله اتفقوا عليه ممكن انت تغيره ... كان غيرك اشطر

لو كل ده موجود .... بس لو موجود فعلا مش اخلقه انا ولازم تكون امين مع نفسك اوى فى الحته دى .... لو كل ده موجود ممكن افاتح اهلى (زى ما انت عملت) وبعدين افاتحها وبعدين لو فى قبول ازور البيت او افاتح اهلها ... وبعدين لو حصل خطوبة (سواء دلوقتى لو اهلها موافقين او بعد تخرجك)

1- هاستغل اكبر وقت ممكن فى فترة الخطوبة فى دراسة كل سلوكياتها على قد ماقدر

2- دراسة طبايعها وطبايع الاهل ومدى قربها و"تأثرها" بأراء اهلها وهل ده فى اطارة الطبيعى ام فى اطار الطاعة العمياء

3- دراسة طبيعة علاقة والدتها بوالدها - ودى مهمة وعلاقتها باخواتها

4- محاولة معرفة رأيها "الحقيقى" فى مفاهيم الاسرة، وتكوين البيت، تربية الاطفال، النظرة لدور الزوج فى الاسرة، دور الزوجة فى الاسرة، عمل المرأة، مصروف البيت، الواجبات الاجتماعية ......

ده اللى قدرت افكر فيه دلوقت ...... لو كل ده تمام - وخللى بالك تمام هنا يعنى نسبة 70-80% مثلا لانك استحالة هاتلاقى حد 100% فى كل حاجة بس المهم تكون العيوب فى اطار مقبول

وربنا يوفقكوا

[ooso28]

صلي صلاة الاستخارة
في ناس بتعتقد : لو ارتبط دلوقتي ممكن يقابل واحدة بعدين يبقي كدة دبس نفسو في الجوازة الاولي
انا بقول علي النوعية اللي بتفكر كدة ان عينيهم فارغة هيا واحدة بس وتنسي غيرها خالص ومتسمعش كلام الناس دي خالص لانهم عكس الدين والسنة
في الصحيحين قال صلى الله عليه وسلم: [يا معشر الشباب، من استطاع الباءة فليتزوج، فإنه أغض للبصر وأحصن للفرج، ومن لم يستطع فعليه بالصوم، فإنه له وجاء].
وفي صحيح البخاري وغيره: [إذا خطب إليكم من ترضون دينه وخلقه فزوجوه، إلا تفعلوا تكن فتنة في الأرض وفساد عريض]
نصيحة مني ليك تأكد الاول من حبها ليك-انت طبعا متأكد من حبك- والحب مش مجرد كلمة

[M.Osman]

شكراً اخوتي الأعزاء على النصائح ... :) و انتظر المزيد :)

[A_H_M_A_D]

أنا رأيي لو إنت مظبط أمورك المادية (شقة - شبكة - مهر- عفش - دخل معقول)
و عارف إنك ممكن تجهز الحاجات دي في فترة مش طويلة بعد تخرجك
يبقى توكل على الله و أستفتي قلبك أولا و بعد كده كلمها رسمي

[mokhtar]

سبحان الله ... صدفه غريبه ..انا وانت زملاء فى نفس الجامعه ونفس القسم ومشكلتنا شبه واحده
انا جارك من دمياط وفى سنه رابعه تجاره دمياط عربى اداره اعمال
..على فكره انا شخصيتى فيها من الصفات اللى انت قلت عليها دى شويه يعنى انا عملى جدا فى مجالى ودراستى ومش بضيع وقت ومقضيها كورسات وكده

المهم انا كنت زيك فى نفس تفكيرك انى المهم اخلص وابدا اشتغل وعارف انى هاتبهدل شويه فى الاول بس اهم حاجه انى اوصل فى مجالى وشغلى واكون نفسى براحتى اوى من غير ربطه ولا وجع دماغ مع ان امكانياتى الماديه معقوله وممكن ارتبط من بعد ماخلص على طول وقلت بقى اعيش حياتى براحتى واقضيها مع انى والله مليش فى الهلس
....بس ايه اللى حصل ؟
البتاع الللى منعرفلوش طريق ولا بييجى منين ده اللى اسمه الحب
بس الحب اللى بيدخل قلبك وعقلك
يعنى اللى انا حبيتها فى نفس الوقت اللى كنت بدات احبها فيه واحس بجديه مشاعرى ناحيتها كنت بدرسها بعقلى برضه هل هى مناسبه لى ؟ طباعها ؟ اهلها ؟ مناسبه ليا ولا لا
مع ان انا الحوار بتاعى اصعب منك بمراحل لو تعرفه على الاقل هى قدامك وانت قادر تكلمها وتعرفها وتدرسها وتعبرلها عن مشاعرك ...انما العبد لله اقع فى حب مين اخت صاحبى بس ماكلمتهاش لان اخلاقى ماتسمحليش انى اكلمها من وراه وجيت على نفسى وكاتم جوايا ومابنامش وبفكر ليل نهار لحد مايعدوا الكام شهر واخلص واتخرج والكلام ساعتها يبقى جد وارتباط رسمى

..المهم انا غيرت كل اللى كان فى دماغى لما حسيت ان هى دى اللى كنت بدور عليها من زمان وفى نفس الوقت الحمد لله ازعم انى على اعتاب تحمل المسئوليه او انى اقدر اكون قدها يعنى اهم حاجه متقفلهاش فى وش نفسك .. بس برضه ماتاخدش الموضوع حب وبس لان الحب من غير مسئوليه ومن غير تفكير عقلانى بيبقى اوهام وانكم عايشين فى جزيره بعيده ومش شايفين عيوب بعض
شوف انت تقدر تتحمل المسئوليه وتكون راجل فى بيتك ومع اسرتك
وبالنسبه للوالد والوالده لو اتكلمت معاهم بجديه وحسوا فيك الجديه دى هيقفوا معاك على طول انا لما كلمتهم فى كده هما عشان حاسين انى دلوقتى انسان راجل وقد المسئوليه وافقوا وباركوا الخطوه دى وانا فى انتظار التخرج ...

وبعدين ياراجل انت بزنس مان اد الدنيا وانجلش كمان ما شاء الله يعنى السكه سالكه
فكر فى الكلام اللى قلتهولك كويس .. متقفلهاش فى وشك ..ومتقضيهاش حب وتخيلات فقط


قولى بقى عملت ايه فى النتيجه ... و ايه اخبار القسم عندكم احنا زملاء وجيران عايزين نتواصل

[mokhtar]

انا لو
1- عندى المقدرة المادية على "فتح بيت"

2- عندى شقة او المقدرة على شراء مسكن مناسب

3- عندى النضج الاجتماعى والنفسى الكافى (وده من خلال حكم ناس كبار زى شيخ بترتاحلة او صديق لوالدك او دكتور فى الجامعة او ماشابه مش من كلام زملاء ليك او احساسك انت الداخلى)

4- اخترت البنت "من ضمن" إختيارات عدة مطروحة امامى وبعد دراسة متأنية لسلوكياتها وتدينها ومدى توافق طباعها معايا ومع اهلى ومعرفة ولو بسيطة باوضاعها الاجتماعية ورؤية حيادية لتفاعلها مع الزملاء وهل فى تكلف ولا لأ .....

5- عدى على اختيارى ليها او تعلقى بها فترة طويلة او كافية لانى أتأكد ان شعورى ناحيتها مش شعور عابر

6- معرفة تامة وبالتحديد لعيوبها - ودى مهمة قوى انك تبقى اولا عارف انها بنى ادمة طبيعية فيها عيوب زى كل الناس والمشاعر ماتبقاش مغمية عينيك، وثانيا اتك تبقى عارف العيوب دى ودارس مدى تقبلك ليها .... واعرف قاعدة هامة جدا جدا جدا جدا .... مافيش حد بيتغير ولا بعد الجواز ولا قبله .... مافيش حد بيتغير .... مافيش حد بيتغير.... عايوك تقولها 10 مرات كل يوم ..... وماتتخيلش ان اللى كل البشر فى العالم كله اتفقوا عليه ممكن انت تغيره ... كان غيرك اشطر

لو كل ده موجود .... بس لو موجود فعلا مش اخلقه انا ولازم تكون امين مع نفسك اوى فى الحته دى .... لو كل ده موجود ممكن افاتح اهلى (زى ما انت عملت) وبعدين افاتحها وبعدين لو فى قبول ازور البيت او افاتح اهلها ... وبعدين لو حصل خطوبة (سواء دلوقتى لو اهلها موافقين او بعد تخرجك)

1- هاستغل اكبر وقت ممكن فى فترة الخطوبة فى دراسة كل سلوكياتها على قد ماقدر

2- دراسة طبايعها وطبايع الاهل ومدى قربها و"تأثرها" بأراء اهلها وهل ده فى اطارة الطبيعى ام فى اطار الطاعة العمياء

3- دراسة طبيعة علاقة والدتها بوالدها - ودى مهمة وعلاقتها باخواتها

4- محاولة معرفة رأيها "الحقيقى" فى مفاهيم الاسرة، وتكوين البيت، تربية الاطفال، النظرة لدور الزوج فى الاسرة، دور الزوجة فى الاسرة، عمل المرأة، مصروف البيت، الواجبات الاجتماعية ......

ده اللى قدرت افكر فيه دلوقت ...... لو كل ده تمام - وخللى بالك تمام هنا يعنى نسبة 70-80% مثلا لانك استحالة هاتلاقى حد 100% فى كل حاجة بس المهم تكون العيوب فى اطار مقبول

وربنا يوفقكوا

ماشاء الله عليك يا استاذ عماد هو ده الكلام السليم ..والله ده اللى فى دماغى ومكنتش عارف اقوله

[AHMEDCAR]

طالما انت طالب انك تعف نفسك تاكد ان ربنا هايكون معاك

ربك اقسم على نفسه برزق طالب العفه (بس اهم حاجه يكون عندك يقين بكده)

[mohamed_kta]

نصيحة من أخ تزوج مبكراً و صلى أستخارة كتير و أدعى ربنا لو دى الزوجة الصالحة ليك دين ودنيا تكون من نصيبك وتوكل و متنساش تعزمنا على الفرح إن شاء الله.

[waled369]

الأخ الكريم أنا تقريبا قريت المشاركات كلها و الكل متفق على انك طالما لديك المقدرة المعنوية و المادية فتوكل على الله . استخير ربنا و ربنا يوفقك للخير.
أما نصيحتي باعتباري متزوج بالنسبة للزواج المبكر بالرغم أني كنت من أشد معارضيه بس من يوم ما رزقت بطفل و تقريبا تغيرت كل مفاهيمي عن الزواج المبكر و كنت باقول يا ريتني تزوجت من زمان .
ربنا يوفقك

[M.Osman]

اولاً: شكر حار لكل من اعطاني نصيحة او تشجيع
ثانياً: احب اوضح بعض التفاصيل و خاصة رداً على الأخ مختار ...

وبالنسبه للوالد والوالده لو اتكلمت معاهم بجديه وحسوا فيك الجديه دى هيقفوا معاك على طول انا لما كلمتهم فى كده هما عشان حاسين انى دلوقتى انسان راجل وقد المسئوليه وافقوا وباركوا الخطوه دى وانا فى انتظار التخرج ...

ما هو دي اللي حصل فعلاً .. الوالد و الوالدة لم يحبطوني.. هما قالولي ان انت هتكون محتاج مساعدة بس طبعاً مينفعش تروح تتقدم و انت مجرد طالب او لسة متخرج ... يعني تروح تتقدم لما تكون بتشتغل و ساعتها نساعدك .. لأن مينفعش تتقدم و انت مش بتشتغل. و طبعاَ انا حتى لو فاتحتها في الكلام ده حالياً .. هحاول اعرفها ان مش هيحصل و اجي اطلبك من غير ما كون بشتغل ( دي قاعدة يعني )

الواحد اصلاً حامل هم ما بعد التخرج ... و قلقان جداً من اللي ممكن يحصل ... لأني بجد مش ناوي اضيع وقت و عايز انجز و اشتغل.

وبعدين ياراجل انت بزنس مان اد الدنيا وانجلش كمان ما شاء الله يعنى السكه سالكه
فكر فى الكلام اللى قلتهولك كويس .. متقفلهاش فى وشك ..ومتقضيهاش حب وتخيلات فقط


قولى بقى عملت ايه فى النتيجه ... و ايه اخبار القسم عندكم احنا زملاء وجيران عايزين نتواصل

ألف شكر عالتشجيع دا... قوللي انت اخبار إدارة اعمال اية ؟ مش احسن من قسم محاسبة الروتيني ؟؟ ( مع الإحترام لأصدقائنا المحاسبين طبعاً )

بخصوص النتيجة .. لسة منتظرين !
شكراً

[mokhtar]

اولاً: شكر حار لكل من اعطاني نصيحة او تشجيع
ثانياً: احب اوضح بعض التفاصيل و خاصة رداً على الأخ مختار ...

ما هو دي اللي حصل فعلاً .. الوالد و الوالدة لم يحبطوني.. هما قالولي ان انت هتكون محتاج مساعدة بس طبعاً مينفعش تروح تتقدم و انت مجرد طالب او لسة متخرج ... يعني تروح تتقدم لما تكون بتشتغل و ساعتها نساعدك .. لأن مينفعش تتقدم و انت مش بتشتغل. و طبعاَ انا حتى لو فاتحتها في الكلام ده حالياً .. هحاول اعرفها ان مش هيحصل و اجي اطلبك من غير ما كون بشتغل ( دي قاعدة يعني )

الواحد اصلاً حامل هم ما بعد التخرج ... و قلقان جداً من اللي ممكن يحصل ... لأني بجد مش ناوي اضيع وقت و عايز انجز و اشتغل.


على فكره والله العظيم اللى انت فيه ده نفس حالتى بالزبط مع بعض الفروق الطفيفه اننا فى سنه رابعه وبنحب وعايزين نرتبط
والدك ووالدتك كلامهم صح من حيث ان مينفعش تروح تتقدم وانت لسه مخلصتش او لسه ماشتغلتش على الاقل تكون حاسس شويه بالمسئوليه وواقف على ارض صلبه ومتقلقش من بعد التخرج طول مانت بتعمل اللى عليك وبتطرق كل الابواب صحيح الازمه الماليه مأثره جامد بس برضه الواحد يسعى





ألف شكر عالتشجيع دا... قوللي انت اخبار إدارة اعمال اية ؟ مش احسن من قسم محاسبة الروتيني ؟؟ ( مع الإحترام لأصدقائنا المحاسبين طبعاً )

بخصوص النتيجة .. لسة منتظرين !
شكراً

اداره الاعمال تمام وزى الفل احسن قسم فى الدنيا مع انى كان نفسى ادرسه فى مكان محترف شويه بس الحمد لله هو عامه المجال جامد جدا وانا حبيته كمجال عمل اولا وكدراسه ثانيا وان شاء الله الواحد يقدر يعمل فيه حاجه لانه قسم كل شغله او معظمه متطور ومتجدد بعكس المحاسبه ثوابت مع احترامنا لكل المحاسبين