شنط رمضان-كل عام وانتم بخير

[Karim_Monir]

السلام عليكم ورحمه الله
بقالي اكتر من شهر متردد اطرح عليكم الموضوع ده ولا لاء دفعا لشبهة الرياء
لكن في الاخر قولت ليه امنع ابواب خير عن ناس

الموضوع زي ماهو باين من عنوانة ان في ناس بتعمل شنط رمضان كصدقة(مش زكاة مال) وباكد على موضوع الصدقة ده قوي قوي
المهم الناس دي بتعمل مثلا 50 شنطة ماتعرفش توزع 10 او 20 عشان هما ساكنين في مناطق معينة ومعارفهم ناس معينة يقوموا يتصلو بالعبد لله اللي هما عارفين ان هو اهل ثقة يدولوة الشنط يوزعها على مستحقينها
في ناس تانية بتبقي مش عارفه تعمل شنط ازاي عشان كدة بيقولوي نروح فين وازاي
والشنطة بتتقسم الى 3 انواع :
الشنطة العادية اللي بنفرح بيها الغلابة ودي حسب سعر السنة دي بعد ما الاسعار ولعت بحوالي 37 جنية عند المحمل(عشان حاجتة كويسة ومش بيكسب من الشنطة دي)
هو عامل شنطة ب 30 وشنطة ب 40 بس انا عملت المكونات دي:
1ك زيت
1ك سمن
1ك سكر
1 ك ارز
1 لفة قمر الدين
1 ك بلح
ربع ك زبيب
ربع ك جوز هند
2 باكو شاي صغير
المكونات دي تم اختيارها في الشنطة الصغيرة بناء على دراسات وتجارب بقالها اكتر من 7 سنين في العمل الخيري
في بعد كدة شنطة ب 50 وشنطة ب 80 وشنطة ب 100
50 و 80 بيفرق بنزود بقوليات اكتر وزيت وسمن ورز وكدة عشان غالبا بتبقي عائلات
وكمان حاجات رمضان اكتر وصلصة وخلافة
اللي ب 100 بتزيد ظرف محطوط جواة 20 جنية نقدا تمن فرخة او كيلو الا ربع لحمة مثلا
عشان الحاجات دي بتعفن مننا لما بنشتريه ونحب نوزعها
=============
معلش طولت عليكم استحملوني
اللي شايف منكم حد قريب منه غلبان قوي لو يقدر يعمل شنطة ويديهالة في الخفاء تبقي حاجة عظيمة-بواب فقير بجد-بياع غلبان قوي-طلع صدقة وثق تماما ان ما عند الله باق

اللي عنده اكتر من حد وواثق ثم واثق ثم واثق انه محتاجها لاننا هانسئل عن الامانات دي يوم الدين يتصل بيا مباشرة ويقولي كام شنطة ومتوسط افراد الاسرة دي عشان اعمل حسابة ومعلش اللي محتاج يكلمني مباشرة على الموبايل عشان بكتب عشان انا سريع النسيان
====================
اخر حاجة اللي عمل او هايعمل شنط رمضان ومش عارف يوزعها يقولي وانا اساعدة او اخدها منه اوزعهالة لان الحمد لله نشاطنا تخطي نطاق القاهرة الى الشرقية تحديدا وبعض قرى الصعيد القريبة شديدة الفقر

اخوكم في الله المحتاج دعائكم دوما
كريم منير
0101263030

(رب لا تجعلني جسرا يعبره الناس الى الجنة ويهوى بي في النار)

[معاذ الشرباصى]

كريم خلى بالك السمنة متكونش سمن نباتى, يعنى تفضل تبقى سمنة طبيعى زى فيرن و الحاجات دى لأنها هى المفيدة بجد عن تجربة

كان بيحط حلاوة, مكرونة, بقوليات

الحاجات كانت بتتجاب جملة علشان التكلفة تقل

و البقوليات و الحاجات دى بتتجاب سايبة مش متعبية علشان ارخص النص تقريبا

[Karim_Monir]

بعمل كدة في الشنط الكبيرة فعلا يا معاذ
لكن الصغير دي بفضل اجيبها من المحمل جاهزة زي اللي كتبت مواصفاتها دي وفرق التكلفة لا يجاوز 2 جنية عن السايبة
والله موضوع السمنة ده انا غلبت فيه مع الناس وكل ماقول للناس الغلابة الزيت احسن يقولو لاء هاتلنا سمنة
اصلهم مش لاقيين يا معاذ
الفقر وحش ربنا يعفينا وماتقلبش علي المواجع وتفكرني

قوم قوم صلي الفجر

[ahmed ismail]

عموما يا عم كريم احنا فى الجامعة عندنا بنبدا موضوع شنطة رمضان متاخر عشان انت عارف مضان قى يخش فى الصسف قبل المدارس بس فكرنا فى حاجه جديدة كل الناس بتبقى مهتمة بموضوع شنطة رمضان وفجاة نخش فى العيد وننسي بعد كده لحد السنة اللى بعديها
عندنا فى ال club بنعمل Post Ramadan pack campaign شنطة لبعد رمضان وتكون الناس دخلت عندنا ونكون لمينا فلوس كويسة النقطة بقى لو عندكم يا جماعه حد عايز يتبرع يبعتلى على الخاص منتظرينكم احنا بننزل خط الصعيد لحد ما نوصل سوهاج وبنوصل اسكندرية والسويس و الشرقية وخط بحرى جمعنا السنة اللى فاتت ولله الحمد 130.000 جنية والسنة ديه حاطين خطة طموحة عشان نعدى الربع مليون السنة اللى فاتت جهزنا 6975 شنطة طالعين من الجامعة احنا اللى بنشترى الحاجه متفرقة والعربيات بتنزلها واحنا اللى بنعمل packing فى يومين ,بيكون حوالى 200 طالب بيسعدونا منتظرين تبرعاتكم يا جماعة.عايزين نعدى حاجز ال 10000

فى حاجه عايز انوه عليها اللى حيتبرع يبقى عارف ان ديه شنطة ما بعد رمضان مش شنطة رمضان
حتى لا نكون عباد رمضان فقط

اقولكم مكونات الشنطة
1كم عدس
2كم ارز
1كم فول
8 كيس مكرونة
1 زجاجة زيت لتر ونص
برطمان صلصة
2كيلو سكر
2 كيس شاى
يا رب مكونش نسيت حاجة

[Karim_Monir]

انا دمجتلك المشاركتين ياحمد
وجزاكم الله كل خير
وطبعا احنا مش عباد رمضان احنا عباد الله
لكن بنستغل ان الناس بتحب تعمل الطاعات في رمضان لمضاعفة الاجر بنحاول نساعدهم
اما عن التبرعات المادية يا ابو حميد ببعد عنها تماما عشان مادخلش نفسي في حوارات وبكتفي ان الي عايز بدلة على الطريق وفي اضيق الظروف ممكن اساعدة واشتريلة بس لازم اكزن حد عارفة وعارفني
الرسول امرنا باتقاء الشبهات

[amr mokhtar]

السلام عليكم
الحمد لله الدنيا لسه فيها خير
انا فى الإسكندرية يا ريت لو أقدر اساعد بحاجة او نحاول نجمع المشتركين من أهل الإسكندرية و نعمل شنطة رمضان برضه يبقى شىء جميل اوى و ربنا يبارك للجميع

[محمد ابراهيم 1]

يا ما أنت كريم يا رب
قال رسول الله صلى الله عليه وسلم
الخير فى وفى أمتى الى يوم القيامه
جزاكم الله خيرا

[Karim_Monir]

يا جماعة الخير حبيت بس افكركم اللي ما عملش وكان ناوي يعمل شنطة ينزل يعملها دلوقتي
اديها للبواب
اديها لقريب من بعيد في عيلتك وانت عارف انه فقير ولا تستحي بس من غير ما تجرحة
اديها لجار عندك في الخفاء من غير ما تهينة قدام ولاده او زوجتة
لو مش قادر تديهاللة عشان عزة نفسه قوله انا اشتريت ومراتي اشترت وانا مش محتاجها خدها وسدد فلوسها بعدين ان شالله جنيه جنية
باي اسلوب انت شايفه
الفقراء كتير حوالينا واحنا بنقف بالساعات قدام الكاشير بتاع سبينس او كارفور خد بالك من نظرة العامل اللي بيشيلك الشنط ويقولك كل دي حاجات هاتكلها انت وعيالك واحنا مش لاقيين طبق الفول
لازم تراضيه وتكسر سم الاكل اللي هاتكله انت وعياللك
تذكروا قول المولى عز وجل
(ما عندكم ينفد وما عند الله باق)
باق في صحتك في رزقك في عملك في ستر بيتك في زوجتك هذا للدنيا فما باللكم بالاخرة
اذكر نفسي واياكم ان باق على رمضان ايام قليلة
واللي واخد انه يطلع زكاة المال في رمضان ما ينساش يطلعها بس ما يعملش بيها شنط رمضان
الشنط من فلوس الصدقة
لكن الزكاة ليها اوجه انفاقها الشرعية عشان الامور ساعات بتختلط عند اناس كتير

دمتم بخير
والله اني احبكم في الله
كريم منير

[modux]

كريم
شوف خير زمان - جسر السويس

جبت منو انا و اصحابي اللي ربنا قدرنا عليه
الناس هناك متافهمين و ادونا حاجات كويسة باسعار كويسة

لو عايز اي مساعدة انا تحت امرك

[Karim_Monir]

انا بجيب من المحمل بتاع النزهة
جنب الشغل واعرفهم من سنين وبيظبطولي اللي انا عايزة عشان باطلب حاجات افتكاسات كدة
خاصة ان في ناس كتير بتديني اعملهم فكل واحد وطلبة
شكرا حبيب قلبي على مساعدتك وحاول تنشر الموضوع اكتر بين اصحابك
ولا تنس ان الدال على الخير كفاعلة

[sokasoon]

كريم
شوف خير زمان - جسر السويس

جبت منو انا و اصحابي اللي ربنا قدرنا عليه
الناس هناك متافهمين و ادونا حاجات كويسة باسعار كويسة

لو عايز اي مساعدة انا تحت امرك

• فعلا اا روحت جبت من خير زمان بس اللى
  
  فى الحلمية الجديدة الشنطة كانت ب26.5 بدلا من 31 جنية
  
  علشان اللى مايعرفش سعرها وفيها حاجات كتير

[Heshaam]

ربنا يتقبل منا جميعا إن شاء الله يا جماعة. وربنا يجازيكم خير على مبادراتكم الجميلة ديه

وفي برضه جمعيات محترمة - زي رسالة مثلا - ممكن الواحد يوديلها كميات من الأنواع المختلفة أو فلوس وهما بيشتروا. وهما ليهم قوائم بالمحتاجين في كل منطقة وممكن طبعا كل واحد يضيف اللي يعرفهم - بعد ما بيعملوا هما البحث بتاعهم. وفي رأيي إن ده ممكن يكون عائده أكبر من حيث إن الواحد أما بيشتري كميات بتكون أرخص من القطاعي فيوصل الخير لناس أكتر إن شاء الله.

والناس بتتطوع برضه في التعبئة والتوزيع.

وكل واحد بيعمل اللي يقدر عليه وربنا يتقبل.

[Karim_Monir]

تم فك تثبيت الموضوع بمعرفتي

كريم منير