ذكريات الطفولة الشقية!!!

[نور القمر]

انا كنت بخوف اختي واحنا صغيرين بالكهربا
احط فيشه الكاسيت في الكهربا واطلعها واجري وراها علشان اكهرباها على اعتبار ان الكهربا لازقه السلك هههههههههههههههه وطبعا كانت بتموت من الرعب .. بجد افتراء زيادة
مش عارفه ماما بتقول عليا كنت هادية ازاي:POINTI~2[2]:

[AhMeD EzZ]

انا بقي حصلي موقف و انا في ثانوي بس وحششش
كنت باخد درس رياضة و احصاء مع مدرس واحد و الراجل دة كان عامل الاحصاء ببلاش للطلبة الي بتاخد رياضة معاه اصلا
طبعا انا و شلتي البايظة سمعنا كلمة مجانا منة دي و كلنا سرحنا
طبعا كلنا روحنا البيت قولنا الاحصاء ب 25 جندي و قعدنا طول السنة بنقلب فلوسها لحد ما في مرة ماما بتكلمة تسالة عليا قالها علي فكرة يا مدام الاحصاء ببلاش و طبعا شكلي كان وحششششش جدااا

[aif]

مش انا ... دول قرايبي
عيال مؤذيين ....ودمهم زي العسل
كان زمااان فيه تجمع عائلي كبير ... و عزومة غذا فيها العيلة كلها ...
والحلو كان مذبحة مانجو .... والعيال جابو بذرة مانجه ... وقعدو ينحتو فيها لغاية ما بقت ناعمة جدا ومافيهاش ولا اي الياف او شعر ... ولونها ابيض مصفر شوية ..... وراحو شايلين الصابونة من الحمام ... وحاطين البذرة مكانها .... وبعد شوية واحد من الآباء دخل ياخد دوش بعد ظروطت الاكل والمانجه ..... ونلاقية بينادي على ابنه من الحمام ....
يا حمادة .... يا حمادة
شوفلي يا ابني صابونة غير دي ..... دي مش بترغي خالص ...
....
وكمية ضحك هيستيري .... والابهات والامهات مستغربين ... ومش فاهمين اي حاجة .... والغلبان اللي جوة عمال يرغي الليفة بالصابونة الوهمية .... لكن الرغوة ح تيجي منين ....
الكلام ده كان قبل الشاور جيل طبعا

[abo_hosni]

حاجات كتير بس الواحد بينسى.

0- لما أكون منهمك في موضوع فساد و حد ينادي عليا يكون الرد مني "لأ" و ليس "نعم". كده يعرفوا أني باعمل مصيبة

1- موضوع بودرة العفريت ده نسخة طبق الأصل ينتهي بخناقات و جواب استدعاء ولي أمر.

2- كان في درس إنجليزي يوم الجمعة صباحاً كنت باقلبه و أروح أصطاد مع واحد زميلي و ساعات يجي معانا واحد تاني اسمه الحركي (عصفورة) بس ده تخصص صيد بالنبلة و ذبح :) . و كان في كمان مسدسين رش إيطالي و بندقية رش رمسيس. واحد شافني راح قال للمدرس. المهم ولا مرة رجعنا بحاجة عليها القيمة مع أننا اكلنا كتير

مقر درس الإنجليزي القديم ده كمان حكاية. كان شقة فوق سطح عمارة و كان بسقف خشب و دهان جير أبيض×سماوي. و كان مقري معروف (الركن الجنوبي الشرقي) و كان أمامي بروز عمودي في الحائط تعاونت مع زميل و رسمنا على هذا البروز وجه الأستاذ بملامحه المميزة و كتبنا عليه (عبده) و كل ما حصل موقف يضايقنا منه أقوم نافخ في إيدي و لاسعه على وشه و الناس اللي قاعدين ورا هاتك يا ضحك. واحد حب يستعبط راح كاتب على الحائط "ملك الكنوج" انجليزي ده يا مرسي؟. في الآخر اكتشف الموضوع

مرة الشقة بتاعة الدرس اتسرق منها 3 مراوح سقف، رحنا عاملين مراوح ورق كبيرة و علقناها في السقف و عينكم ما تشوف إلا النور لما الأستاذ دخل. بس عجبته الفكرة و سابهم لحد ما اشترى مراوح كهرباء


3- افتكرت بالمناسبة مسدس الرش القديم كان كبسه ضعيف في آخر أيامه يعني ما يعورش و كان بيتنا القديم في منطقة تجارية و شارع زحمة جداً و كان تحت البيت اللي قدامنا ورشتين حدادة. كنت أخللي العامل واقف و مديني ظهره و بيقطع أو يلحم حديد و أقوم معمر المسدس و أنشن و زريييييووو و أستخبى بعدها. طبعاً مع الزحمة و دوشة الشارع مش بيسمع صوت الطلقة اللي جاية له من الدور الرابع و يقعد يبص حواليه و بعدين يكمل شغل و أضرب تاني و هكذا و مرة اتخانق مع صبي القهوة اللي جنبه افتكره هو اللي حدف عليه طوبة

4- بالاشتراك مع ابن خالتي عملنا بلاوي لكن أشدها بصراحة كان يوم جمعة في البلد قرب الصلاة طلعنا فوق السطح و كان فيه كراكيب كتير و عفش قديم و كتب و قش. و كنا فاهمين بعض و في خلال ربع ساعة كان الجاز اتوزع و ولعنا في السطح و كانت حريقة بمعنى الكلمة. لما اكتشفنا أن الموضوع خرج من إيدينا و مش هنقدر نسيطر عليه عملنا إيه؟ رحنا ببراءة الأطفال جهزنا و نزلنا الجامع نسمع الخطبة و فجأة سمعنا ناس بتنادي في الشارع و الناس خرجت من الجامع و الجرادل طلعت و الخراطيم اشتغلت و كان يوم عالمي.

5- في البلد أيضاً كنت أنزل العشة اللي بيربو فيها البط و أخنق أكبر عدد من البط الصغير و أقوم طالع من العشة المظلمة ممسكاً في يدي بطتين من رقبتهم

6- أفتح باب الثلاجة و أكسر البيض على الأرض واحدة واحدة، و لما أخلص أمشي

7-كنت لا أعترف بعملة إلا "البريزة" فكل شئ ثمنه بريزة، أروح للبقال آخد اللي أنا عايزه و أرميله بريزة و أمشي.

في البيت كان اسمي "فساد البر و البحر" و في البلد كان اسمى "صاروخ" و ده مش من فراغ طبعاً
دلوقتي الهدوء كله

[نور القمر]

في موقف مقلب عملته بس كنت كبيرة
كنت لسه بسوق جديد وفي واحد قريبي واخد عني فكرة ان سواقتي وحشه جدا
معرفش ايه دخل الفكرة الغريبة دي في دماغه
المهم كنت راجعه من مشوار وشوفته هو وبنته الصغيرة في شارع فيه مساحة كبيرة وفاضية
روحت دايسة بنزين جامد وموجهة العربيه ناحيته
شوفت كل الوان الطيف على وشه وشال بنته وجري بيها
لقاني ميته على نفسي من الضحك ووقفت فهم انه مقلب فيه

[sendrella]

افتكرت ذكرى دلوقت طبعا في ناس كتير عارفه ان سندريلا اختي الصغيرة واصغر اخواتي
كانت وهي صغيرة مش بتبطل عياط وبتعصبني
اكتشفت انها لما بتترعب بتكست
ولقيتها بتترعب من اي صوت عالي
كنت فجأة اعلي صوت التليفزيون على اخره هههههههههههه تجيلها صدمه وبالتالي تسكت فيها شوية كتير لحد ما مرة الزرار اتكسر في ايدي وبابا الله يرحمه عرف السبب في الكسر وطبعاً من بعدها شوفتلي طريقه جديدة لترهيبها وتهذيبها هههههههههههههه

نور القمر كانت بتربي لي الخفيف
و انا فاكره لها موقف عمري ما هنساه و ممكن هي اصلا تكون مش فاكراه
كنا رايحين الاهرامات مرة و معانا كرة و الحرس على الباب عايزين ياخدوها منا و بيقولوا ممنوع دخول الكرة
فضلت هي تقوللي عيطي عشان يرضوا يدخلونا بيها
عيطي
عيطي
عيطي

والله لو ما عيطي هنرجع البيت تاني
و انا طبعا عيطت و انهلت في البكاء
بس مش بسبب انى عايزه الكرة
انا كنت بعيط من القهر ساعتها

[نور القمر]

ههههههههههههه حرام عليكي انا مش فاكراها خالص دي
اكيد محصلش طبعا وانتي بتألفي

[evoo90]

كنت انا واخويا الاكبر منى نعد نرعب اى حد من قرايبنا يبات عندنا
مره كان عندنا ابن عمتى وقل مايجى رتبت كل حاجه انا واخويا نزلت تحت السرير وخدت الكاسيت وحطيت فيه شريط عليه اصوات مرعبه اخويا كان مسجلها وشغلته على البطاريات
جه ابن عمتى وقعد على السرير ومايعرفش ان فى حد تحتيه طبعا اخويا قاله هروح اجيب ميه وخرج من الاوضه وفصل النور بتاع الشقه كله
جه دورى شغلت الشريط وقعدت اخبط فى السرير وابن عمتى يصرررررخ يا خالى ياخالى هههههههههههه
طبعا انا ماقدرتش امسك نفسى وقعدت اضحك واخويا حس ان الواد هينهار وفتح النور
ابن عمتى كان عايز يرننى علقه..

[sendrella]

ههههههههههههه حرام عليكي انا مش فاكراها خالص دي
اكيد محصلش طبعا وانتي بتألفي

و الله حصلت يا نااااااااااااااااااس :K_crying[1]::K_crying[1]::K_crying[1]:
طبعا هي لازم تنسى
ما هو الموقف ده مش سايب عندها بصمة
الدور و الباقي على المسكينة انا اللي حصلتلي عقدة منها

و ياريتها على اد كدة و خلاص
هبقى اكمل لكم باقي مغامرات مصاص الدماء و القهر اللي كانت نور القمر بتمارسه عليا

[نور القمر]

هههههههههههههههه نفس الموقف عملناه في ابن عمتنا برضو
في الاول قعدنا نقوله اننا بنشوف عفاريت وكل واحدة مننا تحكي له حكاية عن عفريت
وجينا بالليل دخلنا خرطوم من شباك الجنينه وبقينا نعمله منه اصوات تخوف
الولد جات له حالة هيسترية ومسك عصاية وبقه يضرب بيها في الهواء علشان يضرب العفاريت
ونفس الموقف عملناه في اخوه الاكبر منه بس كنا قعدين في الفراندة واختي طلعت السطوح وبقت ترمي عليه حاجات من فوق

[نور القمر]

طيب المهم فكرة العياط نفعت مع الحرس ولا لأ
علشان بعد كدة اخدك معايا تعيطي وتدخليني اي مكان باي حاجة معايا

[ihab]

من الواضح يا نور انك كنت متميزة جدا فترة الطفولة و شكلك كده لسه برضه متميزة

[msobhy]

ما شاء الله
ما شاء الله
ده انا اكتشفت انى ملاك بالنسبة ليكم

[نور القمر]

من الواضح يا نور انك كنت متميزة جدا فترة الطفولة و شكلك كده لسه برضه متميزة

ما شاء الله
ما شاء الله
ده انا اكتشفت انى ملاك بالنسبة ليكم

لا بجد حقيقي بدون مبالغه انا دلوقت الهدوء كله وملاك كمان
وبجد ماما بتقول عليا اني كنت هادية وانا صغيره ههههههههههه معرفش ازاي يعني تقريبا هي مش فاكرة كويس

[ASKAFRAWY]

و الله حصلت يا نااااااااااااااااااس :K_crying[1]::K_crying[1]::K_crying[1]:
طبعا هي لازم تنسى
ما هو الموقف ده مش سايب عندها بصمة
الدور و الباقي على المسكينة انا اللي حصلتلي عقدة منها

و ياريتها على اد كدة و خلاص
هبقى اكمل لكم باقي مغامرات مصاص الدماء و القهر اللي كانت نور القمر بتمارسه عليا

لا حول الله!!ايه القهر دة بس!!

هو ده بقى قهر الانسان لاخيه الانسان
ومصاص دماء كمان..........هههههههههه