مهم لكل فرد فينا: طريقك للنجاح........!

[samoevil911]

السلام عليكم ورحمة الله وبركاته...
من فترة كدا ظهر على شاشة التليفزيون اعلان (موبينيل اللي هو بتاع ال 20 مليون مشترك) وكانت بداية الاعلان" تخيل لو في 20 مليون مواطن نظفوا الشوارع في وقت واحد , مصر هتبقي نظيفة في روبع ساعة" انا بصراحة في البداية افتكرت ان دي حملة توعية الوزارة عملاها لتنمية البلد وفرحت اوى بالفكرة.. و اول ملقيت انه اعلان موبينيل بصراحة اتغظت ..


المهم انا بكلم علي الفكرة.. ان احنا نتخيل ان احنا ايد واحدة .. كل واحد ليه دور في المجتمع و لو قام بيه البلد دي هتغير..

نيجي بقي للكلام بتاعنا:
واحنا هنعمل ايه .. هي الحكومة سيبا حد في حاله. وبعدين دا مفيش فرص عمل .. والشوارع بيظا وزبالة وقرف وزحمة... والمصالح الحكومية بيظا واهمال ومفيش رقابة.. والنا علي اد حالهم ..


دا كلام الناس اللي هما احنا من ضمنهم . وانا كنت عايز ارد من وجهت نظري:

1-مشكلة البطالة .. اينعم هي مشكلة دولة... بس هنعمل ايه ادي حالنا .. والبطالة موجودة في معظم دول العالم .. اينعم هي زيادة عندنا ..بس احنا البطالة عندنا بطالة مهنية مش فعلية .. يعني احنا عندنا الناس بتشتغل مش قاعدة في بيوتها .. بس مش شغالين بشهادتهم.. ونادر ان يكون في حد مش بيشتغل خالص.

2- مشكلة الشوارع .. نبص عليها كدا هنلاقيها مشكلة دولة ومشكلة شعب.. مشكلة دولة في تنظيمها وتنظيم المرور.. اما مشكلة شعب فدي اكبر..
ونقلها بالعقل كدا..
* اول حاجة الزحمة.. حتي لو الشوارع زحمة وسوء تنظيم من الحكومة.. طب م احنا لو بنتصرف بعقل ومش متسرعين وكل واحد استنا دوره في المرور في الشارع عمر مهيكون في زحمة ولا العربيات هتدخل في بعض.. لو كل واحد مشى براحة ومفكرش انه يسبق اللي قدامه او يجري عشان يعدي التقاطع بسرعة قبل العربيات اللي جية منوا .. مش هتلاقى عربيات بتخش فى بعضها .
*لو كل واحد فينا مشى بعقل وهو سايق .. الحوادث هتقل اكيد .. ولا هنلاقي ان معدل الوفيات في الحوادث عالي .. ولو كل واحد سايق عربية لقي واحد بيعدي قدامه وهدي عشان يخليه يعدي .. هنلاقي ان معدل الناس اللي بتتخبط وتموت هيقل ..
*مين اللي بيمشي عكسي؟ والا الحكومة كمان فرضا علينا نمشي عكسي.؟ والا لازم تركب مع كل واحد عسكري يقله متمشيش عكسى؟
*مين اللي بيكسر الاشارة؟
* مين اللي لما بيعدي السرعة المقررة.؟
والا هو لاوم الحكومة تراقبنا ؟؟ مينفعش نكون ملتزمين من نفسنا ؟؟ في الدول الاوربية وامريكا و الخليج .. او العالم كله .. الناس بتحترم المرور من نفسها .. مش لازم عسكري يراقبهم .. حتي العساكر لما بتقف بتبقي احتياطي بس لو حصل حاجة لقدر الله.


3- مشكلة النظافة: اظن دي مشكلة الشعب .. والحكومة لو حتي مش بتوفر مكان ترمي فيه الزبالة .. ولو ان دا اصبح صعب لان الصناديق متوفرة .. لو كل واحد خالي الحاجة اللي هيرميها دي معاه في شنطته في عربته . حتي لو في ايده لحد ميروح او اي محل اكيد هيبقي فيه صندوق قمامة..
انا افتكر ان الناس لما كانت بتشتكي في اسكندرية ان مفيش صناديق قمامة .و الحكومة جابت شركة اونيكس الفرنسية .. الناس عملو ايه .. او حاجة كان كل بيت ليه صندوق.. الله اكبر الناس كتنوا بيسرقوا صناديق بعض دول الكبار .. اما الشباب فكانوا بيعملوها عرضات ويلعبوا عليها كورة او يسدوا بيها الشوارع عشان يلعبوا .. ام الاطفال معجزة العصر دول كانو بيركبو جواها ويزقوا بعض او يفجعوا الناس.. وادي الشعب .ز لدرجة ان الشركة مشيت من مصر.. يأسوا مننا .

4- مشكلة القطاعات والمصاح الحكومية.: بنشتكي من ان المصالح الحكومية مفهاش رقابة و غير منظمة وشبه ملهاش لازمة والموظفين مش بيشتغلوا والمرتبات قليلة..
*اول حاجة هو الموظفين دول اللي هما مين ؟ مش احنا ؟ قلولي بقي ايه دخل الحكومة ؟ عشان مش بيرقبوا الموظفين؟ طب هو احنا محتجين حد يراقب علينا .. دا كفايا انك تبقي عارف ان ربنا مطاع عليك .. تخش مصلحة حكومية تلاقي موضفين بيشربو شاي والسيجارة في بقهم ولا كأنك دخلت , والا الموظفات والله شفتها بعيني .. اخدين اكل والله انا شفت واحدة بتقطف ملوخية .. واللي بيبيعوا هدوم و برفنات لزميلتهم .. وبقول لوحدة لو سمحت عايز اختم الشهادة بتقلي وانت شايفني فاضية انا جعانة .. وهقوم اعمل فطار.. المهم ان الكلام دا كان الساعة 10 وهي اصلا شغلها الساعة 8 وجت الشغل 9 .. ادي الموظفين اللي هما احنا.. ونطبق علي كدا المستشفيات والشركات وكل المصالح الحكومية ..

5- التعليم: بأختصار عشان الاطالة .. مين اللي مش بيشرح ومين اللي مش بيحضر في المدرسة ومتن اللي بيزوغ..



في النهاية ممكن نطبق كل دا علي كل حتجة في حياتنا . وزي م الاعلان بيقول

لو تخيلنا ان ال 80 مليون كل واحد شال ورقة من الشارع .. دا احما لو شلنا الطوب هتبقي شوارعنا مرايا في 5 دقايق
لو تخيلنا ان كل واحد فينا بيقوم بدوره في المكان اللي هو فيه . يعني لو المدرس بيشرح بضمير والطلبة اللي هما اولادنا بيحضرو والدكاترة بتعالج المرضي بضمير والموظفين ... الخ تفتكروا بلدنا هتبقي عملة ازاي؟؟؟؟؟

علي فكرة الحكومة دي مننا .. دول مش ناس جم من بره واحتلونا .. دول ناس من شعب مصر.. اللي هما احنا .. كل واح فينا عندوا ابن او بنت ممكن في يوم يبقي هو او هي الحكومة ...


***** بس الموضوع في ان احنا عايزيين بلدنا ازاي؟؟؟****



ياريت يبقي الكلام دا مش مجرد كلام .. زي معملنا حملة للعربيات عشان الغلو وانتشرت ونشرتاها احنا بنفسنا .. ليه متبقاش دي حملة جديدة ووننشرها ( مصر جنة بسواعد ابنائها) او ايا كان المهم كل واحد فينا يحاول يعمل حاجة دي بلدنا ..



واسف جدا علي الاطالة ..

[ahmad5997]

معاك بكل تأكيد ( مصر جنة بسواعد ابنائها )

[zobaaa]

طيب يعني هيه كل حاجه وحشه من انجازات الشعب وكل حاجه حلوه من انجازات الحكومه ورؤساء الحكومات

سيادتك الرسول قال علينا خير اجناد الارض

اكدب رسول الله واصدق الحكومات؟

[tmz9111]

معاك بكل تأكيد ( مصر جنة بسواعد ابنائها )

مصر عظيمة بشعبها بس محتاج شوية ذمة

[samoevil911]

طيب يعني هيه كل حاجه وحشه من انجازات الشعب وكل حاجه حلوه من انجازات الحكومه ورؤساء الحكومات

سيادتك الرسول قال علينا خير اجناد الارض

اكدب رسول الله واصدق الحكومات؟

اولا حضرتك انا والا قلت الحكومة حلوة والا قلت ان نصدقها .. انا بكلم علي واجب لازم نعمله تجاه بلدنا..

ثانيا قول الرسول علينا ان احنا خير اجناد الارض... دا كلام عام علي المصريين بس مش معنا كدا ان احنا معصومين عن الخطأ.. ولو زي محضرتك بتقول ان نكدب الرسول -حاشا لله بس احنا بشر ومش معصومين من الغلط- ممكن تفسرلي حضرتك .. ليه في مننا بيسب الدين .. وكام واحد بيحشش؟ وكام واحد مش بيصلي؟ وكام واحد بيعاكس بنات؟ وكام واحد بيزني؟ هل معني كده ان احنا صح عشان خير اجناد الارض.. ثانيا الكلام دا كمان كان علي القتال... والله سبحانه وتعالي اعلم .

[samoevil911]

هو انا مش شايف اراء ليه ؟.؟؟؟

[kh_talaat]

الإداره ثم الإداره ثم الإداره

الحكومة هي اللي بتدير البلد ولو عايزه محدش برمي زباله في الشوارع هتقدر وبالقانون زي ما بتفرض اي حاجه تانية هي عايزاها بالقانون

نقطه الوعي الشعبي بالمواضيع دي زي النظافه واحترام المرور وأهمية العمل طبعا مهمة بس مينفعش نعتمد عليها في الأول لأن مش كل الناس ثقافتهم واحده وعلميا الجماعه بتأثر في الفرد يعني لما انت تكون واحد ملتزم وتلاقي نعظم اللي حواليك غير ملتزمين بعد فتره هتلاقي نفسك بقيت زيهم بدون ما تشعر

إذن لازم الحكومة الأول هي اللي تقنن الموضوع وبعد كدة الناس لما تلاقي في جديه ورقابه هتبدأ تغير من سلوكياتها وهو دة اللي بيحصل في الدول المتقدمة لما الحكومة بتحترم الشعب الشعب بيحترم الحكومة وبيحترم البلد وبيحافظ عليها زي بيته تمام

[powerofhelll]

المشكله فعلا
لو كل واحد حاسب نفسه مش هيحتاج حد يحاسبه و كل حاجه هتبقي تمام

[samoevil911]

الإداره ثم الإداره ثم الإداره

الحكومة هي اللي بتدير البلد ولو عايزه محدش برمي زباله في الشوارع هتقدر وبالقانون زي ما بتفرض اي حاجه تانية هي عايزاها بالقانون

نقطه الوعي الشعبي بالمواضيع دي زي النظافه واحترام المرور وأهمية العمل طبعا مهمة بس مينفعش نعتمد عليها في الأول لأن مش كل الناس ثقافتهم واحده وعلميا الجماعه بتأثر في الفرد يعني لما انت تكون واحد ملتزم وتلاقي نعظم اللي حواليك غير ملتزمين بعد فتره هتلاقي نفسك بقيت زيهم بدون ما تشعر

إذن لازم الحكومة الأول هي اللي تقنن الموضوع وبعد كدة الناس لما تلاقي في جديه ورقابه هتبدأ تغير من سلوكياتها وهو دة اللي بيحصل في الدول المتقدمة لما الحكومة بتحترم الشعب الشعب بيحترم الحكومة وبيحترم البلد وبيحافظ عليها زي بيته تمام

يا استاذنا الفاضل .. مالطبيعي ان الحكومة هي اللي هتأثر.. طب اذا كانت الحكومة ايديها في ميه سقعة .. نحط احنا ادينا في تلج..
سؤال : حضرتك تعرف تتحكم في حكومتك؟؟
اكيد لأ خصوصا فيي العصر اللي احنا فيه
بس تعرف تتحكم في نفسك.. لو كل واحد فينا فكر في نفسوا وايه الصح والغلط وحاسب نفسوا وحس ان البلد دي ليها واجب عليه .. صدقني البلد دي هتتغير.. بس المشكلة ان كله يقولك هو انا اللي هعمل . او الحكومة الحكومة.. طب نبقي نستنا الحكومة..

ممكن حضرتك تشفها بطريقة تانية.. لو حضرتك عايش في بيت مع اسرتك.. ووالدك هو المتحكم في البيت هو اللي يؤمر وانتوا تنفذوا وانتوا بتتصرفوا طبقا لاومره.. واكتشفتم انت بيتكم هيقع ومحتاج ترميم.. ووالدك ولا هو هنا مأمركوش انكم ترمموا البيت.. هل حضرتك هتسيب البيت يقع عشان هو مأوركومش ترمموه.. والا هتحاول انت وبقيت اسرتك تنقذو البيت

[kh_talaat]

أرسل أصلا بواسطة samoevil911
يا استاذنا الفاضل .. مالطبيعي ان الحكومة هي اللي هتأثر.. طب اذا كانت الحكومة ايديها في ميه سقعة .. نحط احنا ادينا في تلج..
سؤال : حضرتك تعرف تتحكم في حكومتك؟؟
اكيد لأ خصوصا فيي العصر اللي احنا فيه
بس تعرف تتحكم في نفسك.. لو كل واحد فينا فكر في نفسوا وايه الصح والغلط وحاسب نفسوا وحس ان البلد دي ليها واجب عليه .. صدقني البلد دي هتتغير.. بس المشكلة ان كله يقولك هو انا اللي هعمل . او الحكومة الحكومة.. طب نبقي نستنا الحكومة..

ممكن حضرتك تشفها بطريقة تانية.. لو حضرتك عايش في بيت مع اسرتك.. ووالدك هو المتحكم في البيت هو اللي يؤمر وانتوا تنفذوا وانتوا بتتصرفوا طبقا لاومره.. واكتشفتم انت بيتكم هيقع ومحتاج ترميم.. ووالدك ولا هو هنا مأمركوش انكم ترمموا البيت.. هل حضرتك هتسيب البيت يقع عشان هو مأوركومش ترمموه.. والا هتحاول انت وبقيت اسرتك تنقذو البيت

كلام سليم 100 % يا باشا
أنا بس كنت اقصد اوضح ان اي نظام اساسه الآداره الناجحه وقدرتها على الإلزام ودة دور الحكومة

[bmw323]

والله ياجماعة أحنا ممكن نغير حاجات كتير للأحسن بس للأسف (كل واحد عجباة دماغة)!!

[samoevil911]

كلام سليم 100 % يا باشا
أنا بس كنت اقصد اوضح ان اي نظام اساسه الآداره الناجحه وقدرتها على الإلزام ودة دور الحكومة

والله يا باشا الحكومة دي غلوبنا معاها.. بجد انا نفسي اشوف البلد دي احسن بلد قبل مامووت.. هو احنا مش من حقنا نعيش حياة نضيفة ونشوف بلدنا احسن بلد.. كفاية كلمة العالم النامي اللي كسفانا دي ..
ربنا يهدينا ويوفقنا

[samoevil911]

والله ياجماعة أحنا ممكن نغير حاجات كتير للأحسن بس للأسف (كل واحد عجباة دماغة)!!

للأسف دا مش كل واحد عجباه دماغه بس.. دا كل واحد شايف انه الصح والباقي كلهم غلط.. علم النفس ةالاجتماع ودكتور في التنمية البشريةوتقوله متعمل انت .. يقولك اعمل امين للعالم اللي مبتفهمش دي(اسف) واعمل انا ليه ميبتدوا هما وانا اول مشوف حد بيعمل حاجة هعمل علي طول.. ال يعني هو مخترع علم النفس والاجتماع ودكتور في التنمية البشرية..



متيجوا نعمل يوم ونبتدي كلما في نتغير.. وكل واحد يقول للي يعرفوا ..
ناخد عهد علي نفسنا ان احنا نغير البلد دي ونعمل اقصي جهد لينا عشان نخليها احسن بلد في العالم

[lulya]

أنت بتتكلم فى موضوع مهم جدا بس لازم نبدأ بنفسنا ونعلم دا لأولادنا والأجيال اللى جاية

[samoevil911]

أنت بتتكلم فى موضوع مهم جدا بس لازم نبدأ بنفسنا ونعلم دا لأولادنا والأجيال اللى جاية

مدا اللي انا اقصدو .. ان كل واحد يبتدي من نفسه وكل اب يعلم اولاده.. بس عايزين نبتدي .. انا شايف ان الاعضاء اللي شافوا الموضوع قليلين .. حتي اللي علقوا عليه ياتري في حد منهم بدأ؟؟؟ دي المشكلة ان احنا كلنا مقتنعين وبنقول ان دا الصح بس محدش بيبتدي.. عايزين نعمل مثلا حملة كبيرة .. ونعملها دعاية وكل واحد يبلغ اللي يعرفوا .. ويبقي ليها يوم نبيدي فيه كلنا مع بعض.. او مثلا كل واحد يعرف عن الحنلة دي يبتدي من نفسه ... المهم نبتدي.. واحنا لحد امتي هنشوف البلد بتضيع .. دا العالم كله بيتقدم واحنا بنرجع .. يا جماعة الجنية السوداني ب 2 جنية مصري .. (ودا مش تقليل من السودان بس انا قصدي انهم بدأو ينهضوا واحنا بنرجع)