لو كنت واحد من اولى الامر هتعمل ايه عشان حال البلد يتصلح

[hesham_tawfiq]

السلام عليكم جميعا
بدون اسباب او مقدمات لعنوان الموضوع. باختصار انا ملاحظ ان المواضيع فالمنتدى بئالها فتره بتدور فى دايره مغلقه بخصوص اوضاع البلد والناس والعيش والعيشه واللى عايشينها .... الخ ولكن بدون تقديم حلول.
طبعا احنا مش بايدينا ننفذ حلول انما ممكن نقترح حلول.
لو كل واحد لئى نفسه فجأه صانع قرار فى مصر هيعمل ايه علشان نخللى بلدنا احسن؟
انا عن نفسى هبتدى بأصلاح شامل لنظام التعليم بكل عناصره
المدرسين لازم يبئى ليهم وضع احسن علشان الطلبه تحترمهم
المدارس لازم تكون مجهزه تماما وعدد طلاب اقل فى كل فصل
تطوير شامل للمناهج مع التركيز على امواد العلميه ( تحديدا الرياضيات والفيزياء والكيمياء)
واهم حاجه ودى اللى لازم تحصل الغاء تدريجى لمجانية التعليم من بعد المرحله الاعداديه لان بصراحه الموضوع لازم يبئى كيف مش بالكم واللى عاوز يتعللم صح لازم يثبت كدا مش من ابو بلاش.
واخيرا توحيد نظام التعليم يعنى مفيش مدارس حكومه , تجريبى , لغات , اجنبيه .... الخ وكذلك الجامعات ميكونش فيها خاصه او حكومه
هى جامعه واحده للكل علشان يبئى فيه تكافؤ فرص والافضل يبان
حاسس انكم هتؤولو الراجل دا مجنون او حتى مش هتردوا خالص عموما ياريت تشاركونا

[Imhotep]

انا بقى هعمل مخصصات مالية لعمل ابحاث على حبوب الاخلاق...... فاكرين فيلم ارض النفاق؟ و هطلب عمل ابحاث عن عمليات زراعة الضمير.....

اسف ان مشاركتى صبت فى خانة الخيال العلمى..... لكن تقدروا تستشفوا منها ما اراه مطلوبا لكى ينصلح حال البلد.....

[itsonlyme]

انا بقى هعمل مخصصات مالية لعمل ابحاث على حبوب الاخلاق...... فاكرين فيلم ارض النفاق؟ و هطلب عمل ابحاث عن عمليات زراعة الضمير.....

اسف ان مشاركتى صبت فى خانة الخيال العلمى..... لكن تقدروا تستشفوا منها ما اراه مطلوبا لكى ينصلح حال البلد.....

ومين هيحتكر تجارة حبوب الأخلاق؟
بعدين ممكن ناس تبيع ضمائرها زي ما بتبيع كليتها!

[hesham_tawfiq]

و
بعدين ممكن ناس تبيع ضمائرها زي ما بتبيع كليتها!

طب ماهم بيبيعوها دلوئتى !!
ياشباب
بصوا لنص الكبايه المليان ( دا لو الكباييه متباعتش هى كمان ) :-)

[mohmd76]

ع........د.........ل عدل

ش......ر..........ع شرع

اول شىء العدل

وتطبيق الشرع الحرامى تقطع يده بدون جدل ...... لكن قبل هذا اقامه العدل ووقتها لن تكون هناك سرقه ولا فساد ولا اغتصاب ولا واسطه ولا رشوة ولا توريث

[itsonlyme]

طب ماهم بيبيعوها دلوئتى !!

أيوة، وهنا يجي دور التورية في تعليقي.

[Imhotep]

ومين هيحتكر تجارة حبوب الأخلاق؟
بعدين ممكن ناس تبيع ضمائرها زي ما بتبيع كليتها!

اذن هعدل طموحى و اخليه مصل الاخلاق، لكى لا يتم التخلص منه بهذه السهولة، الا اذا حد مؤذى اخترع له فيروس مضاد متحور زى فيروس انفلونزا الخنازير :)

[mobitic]

تطبيق تجربة سيدنا عمر بن عبد العزيز فى الخلافة تطبيقاً شاملاً
مع الإهتمام بالتعليم على أساس أنى واحد من أهل التربية والتعليم وشايف المصير الأسود اللى رايحنله إن لم يرحمنا المولى عز وجل

[hisham343]

العدل
ثم العدل
ثم العدل
لو حطيت العدل علي اي شئ هيتعدل
العدل هيعدل الاخلاق
والتعليم
ولاقتصاد و...............................ز

[نور العمر]

حعمل حاجة لا تخطر على بال

حستقطع زكاة المال إجباريا من الأغنياء

وإللي حيتهرب ... حدفعوا غرامة ... أو ... اسجنه

حق ربنا ... وحق الغلابة

اصل لو كل واحد غني في الدنيا طلع زكاة المال بحق

مكانش بقا فيه فقر فاحش

ولا دول نامية ودول متقدمة

ههيـــــــــــــــــــــــــــه .. دنيــــــــــــــــــــــــــااا

[Terrible_DaRsH]

لا بايدك و لا بايدى و لا بايد حسين حتى :)

خلاص كده على الدنيا السلام ..

انتهت يا رجالة والله ... محدش يضيع وقته و يجيب لنفسه اكتئاب و يفكر فى حال الدنيا مش مصر بس ...

لو ركزتوا فى كلام ربنا سبحانه وتعالى و الرسول عليه الصلاة و السلام .. هتعرفوا ان اننا فى اخر الزمان .. عندما لا يدرى المقتول لماذا قُتل ولا يدرى القاتل ماذا قتل ( يا رب تكون صح بس ) ...

الدنيا مش هتتعدل يا جدعان .. كل واحد يعمل اللى عليه وخلاص ملهوش دعوة بالباقى ..

[hn_kamal]

طبعا العدل ده حاجة مهمة جدا وكما قال ابن القيم: (على الارجح)

ان الله يقيم ويعلى الدولة العادلة وان كانت كافرة

ولا يقيم ولا يعلى الدولة الغير عادلة ولو كانت مؤمنة

وده اللى احنا شايفينه فى أوروبا وأمريكا وغيرهم

ياجماعة ده اصلا كمان فيه قول ان (تأخير العدل ظلم ) فما بالكم بأه لو لم يطبق أصلا !!!!!


وطبعا اذا تم تطبيق العدل كل حاجة بعد كده حتيجى لوحدها (التعليم - البحث العلمى - .........)