ازاى انسى ؟؟؟؟؟

[محمد جلال]

ازيكم بقالى فترة مدخلتش المنتدى كنت فى مشكلة ومش عارف لها حل فقلت استشيركم كنت اتقدمت لانسة جمعتنى بها قصة حب لمدة سنة وبعد ما تقدمت والدها رفض نظراً لامكاناتى مع انى سمعتى وسيرتى حسنة واملك شقة وعربية ووظيفة محترمة بقطاع البترول لكن الاب محامى وتاجر ومقاول يملك الكثيرو الكثير (ماشاء الله) وهى ابنته الوحيدة وكنت اتعامل معها بحذر لانى كنت مقدر الموقف قبل ما امشى فى الموضوع لكنها شجعتنى وطمنتنى والدها طلب بياناتى وبيانات عائلتى وعملتله كشف عيله والحمد لله عائلتى محترمة وذات مكانة اجتماعية وادبية جيدة جداً وبعد اسبوعين بلغتنى بالرفض واتضح ان والدها رافض من اول يوم بس البنت بتضغط عليه وطبعاً عيشت انا فى الحلم الجميل واتصدمت صدمة بفضل الله تجاوزتها لكن هى لم تريد ان تتركنى وانها خبت على علشان بتحبنى قولتلها خلينا اصدقاء واخوة وزملاء فى العمل قالت مستحيل فاضطريت اتعامل معها بجفاء علشان تكرهنى وتم بالفعل لكنى دلوقتى حاسس انى تايه مش عارف اعمل ايه والدها رافض وبشدة طيب المفروض انى اكمل من ورا اهلها لغاية ونقعد نحب فى بعض لغاية ما تفرج المهم بعتتى رسالة وقالت انها دائماً بتتختار خطأ وانى السبب انها هتتغير بعد كده الرسالة تعبتنى وانا بتمنالها كل خير وهى بتشتغل معايا فى نفس المكان انا حيران اتعامل معها بتجاهل فى العمل ام ماذا وازاى اتجاوز الموقف ده هل ان كده بظلمها والامر متروك لارائكم السديدة .

[aboelnagah]

بص يا معالى الباشا انت انسان جميل والدليل على كده ان انت كنت معاها لحد اخر لحظة متمسك بيها وبتتمنى ليا كل خير

هى اكيد كانت بتحبك وهتفضل تحبك انما لما انت عاملتها بجفاء هى طبعا بدات تتغير مشاعرها ناحيتك انما اللى انت عملته ده صح

وهى ههتعرف ان انت صح بس بعد فترة لان لو انت كملت معاها حب من ورا اهلها يبقى انت مش كويس ومش بتخاف عليها انما اللى انت عملته ده صح الصح وعين العقل واهم من الحب موافقة الاهل دى اهم شئ فى الارتباط

وربنا يوفقك ويفقها ويكرمكم ويعوضكم خير

وليا الشرف انى اكون اول حد رديت على موضوع

اخوك / منتصر

[Haytham1212]

بص ....
دايما فى حاجات بنبقى نفنسا نحققها بس الظروف بتحكم
لازم تعرف ان لا سبيل للزواج منها الا بموافقة ابوها
غير كدة لو مثلا اتجوزت بعيد عن ابوها وموافقة
الحياة هتبقى مشاكل اكتر
نصيحة حاول مرة اخيرة بكل شتى الطرق ان ابوها يوافق ولو موافقش
يبقى العوض على الله
واعلم ان والله ربنا بيقدم اللى فية الخير وان اذا دى مش نصيبك
يبقى ربنا سبحانة وتعالى هيعوضك عنها خير
توكل على الله وحاول مرة اخيرة
توكل على الله وانساها (ان فشلت اخر محاولة)

[abouelmaggd]

طالما الموضوع كان جد و رسمى و انت اخدت خطوة ايجابية و دخلت البيت يبقى كده الموضوع مفيهوش استخفاف او تسلية و عشان اهلها رافضين يبقى مينفعش انى اكمل معاها من وراهم حتى لو هتفرج بعد حين لان ابوها غالبا مش هينتظر الحين ده ، بس عايز اقلك حاجة انا مريت بقصة زى دى السنة اللى فاتت و كانت قريبتى و اللى فارق عن قصتك انى لقيت ترحيب من عندهم بس بصراحة انا بعد ما دست فى الموضوع لقيت حاجات غريبة و بسيطة جدا مكنتش متخيل انها ممكن تحصل و ده بسبب ان مستواها عالى اوى و حياتها طول عمرها كده و المشكلة انك هتحاول تعمل حاجات انت بتعمل المستحيل و بتتعب جدا عشان تحاول تحققها و فاهم بقه ان دى حاجة جامدة تلاقى ان ده اساسا حاجة عادية عندها و هى مش عايشة الدنيا اللى احنا عايشينها و برضه انا كنت اول واحد فى حياتها و برضه نفس اللى انت بتحكى فيه انها تعبت بعدها و عايزة تتغير بس مينفعش اكمل ، انا مش عايز اقلك ان البنت دى هتبقى زى دى بس ثق تماما ان ربنا بيعمل الصالح للطرفين ، و بعدين انها حاولت مع اهلها لمدة اسبوعين و فشلت و بعدين عايزه الموضوع يفضل ماشى بينكم و انت رافض يبقى متهيألى معلكش اى لوم و انا شايف ان ده الصح بس مينفعش برضه انك تتعامل بجفاء عشان تكرهها فيك ، فهمها و اتكلم معاها عشان فى الآخر هتنسى موقف اهلها و كل اللى حصل و هيشغل دماغها انك كنت مفترى عليها و تخليت عنها بسهولة ، ده طبعا رأييى المتواضع فى الموضوع و ربنا يعملك اللى فيه الصالح :)

[نور العمر]

السلام عليكم
اسمحلي أخي في الله أشارك بالرأي
الرأي القائل حاول مرة أخيرة ... صائب
لكن .. تأكد إن الموضوع بعد الموافقة حيكون ليه مشاكل من ناحية أخرى
كما أشار الأخ / أبو المجد ... تجنب التعامل معها .. دون أن تضغط عليها بطريقة من الجفاء ... وإللي تفكيره مادي كدة ... حيفضل تفكيرو مادي علطول ... وهي نفسها بعد هوجة الحب دي ما تهدى ... حتلوم عليك في حاجات كتيير ... وتأكد والدها إللي رباها هو أقدر بإللي يقدر يسعدها ... وللأسف دي بقت نظرة مجتمعنا في الزواج ... الأهم من كل ده
لا تترك نفسك للجراح ... خذها بمحمل القسمة والنصيب .... ولا تجعل هذا يهز كيانك وثقتك في نفسك ... وزي ما حصل معاك كدة مممكن يحصل إن واحدة تحبك وانت متحبهاش ... المهم إنهي الموضوع .. ومتحاولش من ورا أهلها طبعا ... لإن ده مش من شيم الرجال المحترمين ..
وواضح من كلامك إنك إنسان محترم وابن ناس قوي ... وربنا يوفقك

[MoToRiZeR]

إوعي تسيبها يمكن ربنا يكرمك و أبوها يموت ولا حاجة .. متتخلاش عن حد بيحبك .
و متحاولش تبان قدامها بشخصية تانية عشان تكرهك و تبعد عنك .. حاول و شوف هتروح فين .

[maka]

انا اتعرضت لموقف مشابه لموقفك من فترة قريبة وحسيت بالحيرة الشديدة اللى انت فيها

وراى اتعامل معها على طبيعتك كانك بتعامل حد عادى وفهامها انها

دلوقتى زى اختك وعلاقة الوحيدة اللى بتربطكم هى علاقة عمل .

وطبعا هتبرمج نفسك على كده وانا عارف انه صعب لكن حاول

و حاول تشغل تفكيرك عنها باى حاجة لانك لوفضلت تفكر فيه هياكل دماغك

وصدقنى لو ليك نصيب فيها ربنا هيكرمك بيها ولو ملكش يبقى ربنا هيرزقك بالاحسن منها

[A.Saad]

انا شايف انك تبعد
ليه
لان مستواها اعلى منك ماديا
وهتلاقى نفسك مكلف وبتدفع فلوس كتير جدا علشان ترضيها وتجيب اللى هيا متعودة عليه

انا الاحسن فى راى انك ما تكلمش معاها
غير تليفونك
بين لنفسك ان ده نصيب مش ان الظروف - راى ابوها - هوة الى حرمكوا من بعض
واعرف ان الموضوع ده كله صعب جدا مش سهل
يعنى موضوع
بالدم والدموع

[Abdo_Eldesokey]

أنا رأيي تنسى موضوع الجواز ده خالص واعتبره لم يكن ، لأن واضح إن والدها من النوع الحازم ، طالما موافقش من أول مرة يبقى مش هيوافق ، ولو وافق هيكون تحت ضغط وهتفضلوا على طول مش طايقين بعض

طبعا ً إلى جانب الاختلاف في المستوى المادى أكيد بيعمل مشاكل كتير بعد الجواز

وبالنسبة ليها ... اتعامل معاها زي ما بتتعامل مع أي واحدة تانية ، وانسى خالص إن كان بينكوا حاجة في يوم من الأيام

وإن شاء الله الى فيه النصيب ربنا هيقدمه

[sasatony]

طيب انا ادخل اقول ايه بقي كل الاعضاء الي بعتبرهم اكتر من اخواتي قالولك كل حاجة
واناشايف انك تنسي الموضوع وقدر الله وماشاء فعل بس مش تعاملها بجفاء حتي لو الهدف انها تنساك لانها ملهاش ذنب في الي حصل علي الاقل لما تشوفها كلمها واقنعها بالعقل والمنطق مش تعاملها بالشكل ده هي ملهاش ذنب خالص وهي حاولت

[bassem.naguib]

انا شايف انك تبعد
ليه
لان مستواها اعلى منك ماديا
وهتلاقى نفسك مكلف وبتدفع فلوس كتير جدا علشان ترضيها وتجيب اللى هيا متعودة عليه

انا الاحسن فى راى انك ما تكلمش معاها
غير تليفونك
بين لنفسك ان ده نصيب مش ان الظروف - راى ابوها - هوة الى حرمكوا من بعض
واعرف ان الموضوع ده كله صعب جدا مش سهل
يعنى موضوع
بالدم والدموع

انا موافق على رأي الباشا .. وهو رأي حكيم جداً وواقعي جداً .. وبالإضافة إلى ذلك أي جوازة لازم ليها تكافئ في كل حاجة سواء مادي أو اجتماعي أو ثقافي أو فكري ... إلخ ممكن يكون فيه بعض الفروقات (بس مش بنسبة عاليه) غير كده الجوازة دي حيبقى محكوم عليها بالفشل الذريع .

[ahit]

السلام عليكم و رحمة الله

أنا فى رأى إنك تنهى العلاقة دى بسرعة لأنها هاتسببلك مشاكل كتير و جروح كبيرة قد لا يساعدك الزمن على علاجها.
أنا مريت بموقف مشابه لحالتك لكن مع الإصرار من ناحيتها و الثقة من ناحيتى تمت الموافقة و لكن ظلت المشاكل من اليوم التالى للخطوبة و مع تمسكها بى بشدة كنت مش عاوز أسيبها لأن بينا حب كبير و لكن مع عدم التكافؤ فى الطباع و التفكير و الثقافة بينا و بينهم زادت المشاكل و كانت غالبيتها ليست مادية فقط و لكن إجتماعية و أدبية و أخلاقية و غيره.
و أستمر هذا الوضع من الشد و الجذب 4 سنوات بالرغم من أن الإتفاق كان سنه بعد الخطوبة و لكن عدم إلتزامهم بالإتفاق العديد من المرات و تحملى الكثير من مستلزمات تجهيز الشقة زادت الفترة حتى و صلت أربع سنوات بالإضافة للكثير من المشاكل و الصراعات و هما دايماً حاسين إنهم ضحو بالموافقه عشان بنتهم و دى تضحية كبيرة و كان لازم تتجوز واحد يكبرها بأكثر من 10 سنوات عشان يكون جاهز و مستريح مادياً و ليس شاب يكبرها بسنه واحدة و بينهم قصة حب.

و المفاجأة إنى نهيت الموضوع قبل الزفاف بشهرين فقط !!!!!!!!!! و كان كل مستلزمات البيت و الشقة تقريبا جاهزة و كله تمام لكن صدقنى كنت أنا خلاص إستويت و إتخنقت و قرفت من الدنيا و ما فيها و كرهت الحب و الزواج و الأنعرة الفاضية و الفشخرة و غيره.
و بالرغم من المحاولات المستمرة من أهلى و أهلها عشان نرجع لكنى كنت قررت عدم العودة للمعاناه و التعب و الإرهاق الفكرى و الأخلاقى و المادى مهما كلفنى هذا القرار من متاعب و جروح.
و حاول ألا تضعف أمام دموعها و كلام الحب الذى قد تسمعه و حكم عقلك و أنظر للأمام و ليس تحت قدميك و أعلم أن الزواج الذى يبدأ بمشاكل إجتماعية أو فرق كبيرة فى التكافؤ يعقبة الكثير من المشاكل فى غالبية الأوضاع.

و أعلم أن الله سبحانه و تعالى دائماً ما يختار الصالح و الخير للإنسان و أن الله سوف يعوضك خير منها فى كل شىء , و أن القسمة و النصيب هى الأساس و طبعاً صلاة الإستخارة مهمة جداً و الحمد لله قد عوضنى الله خيراً منها فى كل شىء و وسع الله فى رزقى و باركلى فيه و تزوجت بالرغم من خطبتى لثلاثة بعد الخطبة الأولى !!! فى محاولة للهروب و إيجاد بديل و لكن بعدما قررت عدم الزواج نهائياً يريد الله للإنسان الخير رغم أنفه و هدانى لزوجتى الحالية و لكن بتفكير و ذهن و قلب فاضى صافى مستريح و هى الحمد لله خير زوجة , رزقكم الله جميعاً بالزوجة الصالحة التى هى خير متاع الدنيا.

و آسف على الإطالة

[نور القمر]

ماتسيبهااااااااااااااااااااااااااااااااااااااااااا ااش
حاول مرة وعشرة والف مع اهلها مدام هي متمسكة بيك
ولعلمك والله ياما مرت قدامي حالات مشابهة ومع الاصرار ربنا جمعهم ببعض
واوعى وجرح مشاعرها علشان تبعدها عنك
انت متقدرش تتوقع ردة فعلها بسبب سوء حالتها النفسية ممكن تضر بيها نفسها ازاي
للاسف كتير من الاهالي مش بيعملوا اعتبار لمشاعر ابنائهم اللي هي اغلى ما يملكه الانسان واللي بتميزه عن باقي المخلوقات

[SeiffoZ]

إوعي تسيبها يمكن ربنا يكرمك و أبوها يموت ولا حاجة .. متتخلاش عن حد بيحبك .
و متحاولش تبان قدامها بشخصية تانية عشان تكرهك و تبعد عنك .. حاول و شوف هتروح فين .

يا ساتر يا رب ...
قول يمكن ربنا يهدييه ...
مش كده وال إيه؟

[pro_samir]

هقولك على نقطتين وبشكل عملى بالأضافة لكلام الأخوة الأفاضل

أولا
انت ممكن تكون حاسس انك فقدت حياة هانئة وردية مليانة حب وان الموضوع كان هيبقى كلة خير فى خير
علشان تتخلص من الأحساس بالمرارة دى لازم تعمل استخارة ، وحاول مرة أخيرة مع الأخذ بالأسباب

بعد الأستخارة تأكد مليون فى المية ان اللى هيحصل هوا اللى فية الخير حتى لو انت كنت شايف غير كدة ، تأكد ان ابوها لو رفضك يبقى مستحيل ان الموضوع يكون هيبقى فية خير لأن لو فية خير كان ربنا هيسهلة وهيمشى نتيجة للأستخارة
مهما كانت وجهة نظرك ومهما كنت شايف فى الجوازة دى من مميزات فأكيد ربنا أعلم منك

بكدة تبقى متأكد ان اللى حصل دة هوا الخير ومتبقاش ندمان أبدا



النقطة التانية

اوعى تفتكر انك هتفضل تعبان كدة كتير

صدقنى الأيام والسنين ليها مفعول السحر

ومهما كانت حالتك ومهما كنت شايف انك مش هتقدر تعيش من غيرها صدقنى كل دة بعد مرور فترة كافية هتفتكر الأوقات دى وتقول سبحان الله

انا عارف ان الدنيا سودا فى وشك وشايف انك مش هتعرف تعيش

بس اعمل اللى عليك واستخير ولو الموضوع ممشيش كبر دماغك لأقصى درجة ومع الوقت هتنسى يعنى هتنسى