ياريييييت اى معلومات عن الهجره

[Dr.SherifMansy]

شوف يا سيدى
الموضوع مش بسيط ولا سهل خالص و لكن مش مستحيل
و لكن مش علشان حضرتك زهقان و خلاص يبقى تهاجر
الموضوع ده له ابعاد اكبر من كده بكتييييير
مش هادخل معاك فى كلام خليك هنا و خلافه ، دى حاجة خاصة بيك مش بي
انا عن نفسى بافكر فى الهجرة و لكن لظروف قهرية خارجة عن ارادتى ، و برغم كده لسه ما خدتش قرار نهائى
مع كامل احترامى للى بيقول سافر دول عربية فيه مشكلتين :
* لما حضرتك لسه هاتبقى خريج جديد : هاتسافر تحت اى مسمى ؟؟ دول عايزين خبرة ، و لو للأسف اخدوا حد لسه خريج جديد بيكون معاملته (مع خالص اسفى للتسمية) كأنه مرمطون و بيبهدلوا فيه
* عيش حياتك بقى مع ذل الكفيل و الأقامات و العنصرية الخليجية و بخاصة مع المصريين (و ماتنساش ان المصريين فى الغربة للأسف احسن ناس ياكلوا فى بعض،بدل ما يبقوا ايد واحدة ، ليه مش عارف)
حكاية فلوسهم حلوة فدى تقريبا بقت حلم ، لأن هما عارفين ان الظروف الأقتصادية هنا صعبة ، فبيساوموا على الأقل سعرا ، و لو انت رفضت فهو متأكد ان اكيد فيه غيرك تعبان اكتر منك و هايقبل...
ده غير الغش و الخداع اللى هاتقابله من مكاتب تسفير العمالة للخارج و اللى بتحس انهم بيخافوا على اصخاب العمل الخليجيين اكتر من اولاد بلدهم و مش مهم انت او غيرك ينضحك عليه

ده رأيى بالنسبة للدول العربية

[Dr.SherifMansy]

نيجى للهجرة بقى
اشهر مكانين هما كندا و استراليا (او طبعا زيها نيوزيلاندا)
اوروبا احتمالاتها اقل و المشكلة فى اللغة
امريكا شبه مستحيلة الا لو كسبت فى اللوتارية اللى بيعملوها كل سنة او حد بعتلك من عناك او انت مليونير

اول حاجة لازم تكون ممتاز فى الأنجليزى (او الفرنسى بالنسبة لبعض مقاطعات كندا)
مش بالكلام ، لأ ... لازم تاخد IELTS بنتيجة 7 مثلا فى الجزئين العادى و الأكاديمى بتوعه ، او BLAP او الشهادة اللى يكون معترف بيها فى الدولة اللى عايز تهاجر ليها ، لو مش كده يبقى بلاش تضيع وقت و ابدأ فى دراسة اللغة اولا

تانى اهم نقطة انك تحدد هاتطلع تحت اى مسمى ، و هى دى مربط الفرس و سبب فشل او رفض طلبات الكثيرين من راغبى الهجرة

لو عايز تكمل دراستك هناك فلازم تتأكد ان الفيزا اللى هاتاخدها بتسمح بحاجتين :
*العمل جنب الدراسة (علشان تقدر تصرف على نفسك)
*البقاء و الأستمرار فى الأقامة بعد الانتهاء من الدراسة و الحصول على الشهادة

و ياريت لو لقيت جامعة بتدى فرصة العمل عندهم بعد الأنتهاء من الدراسة (صعب لكن موجود بالذات لو حضرتك "حرّيت" فى المذاكرة).

لو عايز تسافر تشتغل على طول يبقى لازم تعرف هاتشتغل ايه ؟ و هل شهادتك معترف بيها عندهم و لا لازم معادلة الأول ؟ و لو لازم معادلة بتبقى بكام و مطلوب ليها ايه ؟ و هل بتتم من هنا ولا عندهم ؟ و لو عندهم ينفع تشتغل و انت بتعمل المعادلة ولا ممنوع و لازم تصرف على نفسك بالكامل ؟ و الأهم ان بعد المعادلة ، هل وظيفتك و تخصصك من ضمن التخصصات المطلوبة و لا لأ (احسن تبقى عملت معادلة على الفاضى)
و لو تخصصك مش مطلوب ، هل ينفع تشتغل حاجة تانية ولا لأ

عادة فى كل موقع حكومى للهجرة بتلاقى لنكات لشركات التوظيف المعترف بيها من الحكومة (recruitment agencies) ، خش عليها و شوف هل الوظائف المعروضة ممكن تنطبق عليك ولا لأ ، لو ممكن بتسهل كتير عليك

كل بلد فيها اماكن احتياجات بيسموها areas of need (زى المناطق النائية عندنا ماهى اماكن احتياجات) و لكن هناك ممكن تفاجأ ان من الأماكن دى العاصمة او المدن الكبيرة ، و لو ممكن تشتغل فى الوظائف المطلوبة فيها بيخلصوا الورق بتاعك بسرعة او بيستثنوك من شروط معينة علشان قبلت تشتغل هناك فممكن تبقى فرصة كويسة

مهم جدا تتاكد لما تسافر بيشترط معاك فلوس قد ايه على الأقل ، و هل لما تاخد الرقم القومى بتاعهم بيبقى من حقك اعانة بطالة (تسدد بالقسط لاحقا طالما لك تحصل على الجنسية بعد) لحد ما تشتغل ولا لأ

دى اعتقد اهم نقط تفكر فيها الأول
و اتمنى اكون وضحت الموضوع لك شوية
و ربنا يوفقنا جميعا
و تحياتى